ਧੜੱਮ ਹੋਈਆਂ ਖੰਡ ਦੀਆਂ ਕੀਮਤਾਂ, ਹੁਣ ਇੰਨ ਰੁਪਏ ਹੋਈ ਕਿੱਲੋ; ਸਟਾਕ ਰੱਖਣ ਦੀ ਮਿਆਦ ਵੀ ਵਧੀ

ਬਿਜ਼ਨਸ ਡੈਸਕ, ਨਵੀਂ ਦਿੱਲੀ: ਤਿਉਹਾਰੀ ਸੀਜ਼ਨ ਸ਼ੁਰੂ ਹੋਣ ਤੋਂ ਪਹਿਲਾਂ ਆਮ ਲੋਕਾਂ ਨੂੰ ਵੱਡੀ ਰਾਹਤ ਮਿਲੀ ਹੈ। ਦਰਅਸਲ, ਖੰਡ ਦੀਆਂ ਕੀਮਤਾਂ ਨੂੰ ਲੈ ਕੇ ਵੱਡੀ ਖ਼ਬਰ ਸਾਹਮਣੇ ਆਈ ਹੈ। ਰਿਟੇਲ ਮਾਰਕੀਟ ਵਿੱਚ ਖੰਡ ਦੇ ਭਾਅ ਹਾਲੀਆ ਉੱਚ ਪੱਧਰ ਤੋਂ ਕਰੀਬ 10 ਫੀਸਦੀ ਘਟ ਗਏ ਹਨ। ਕੀਮਤਾਂ ਵਿੱਚ ਗਿਰਾਵਟ ਦੇ ਵਿਚਕਾਰ ਕੇਂਦਰ ਸਰਕਾਰ ਨੇ ਵੱਡੇ ਥੋਕ ਖਪਤਕਾਰਾਂ ਲਈ ਖੰਡ ਦਾ ਸਟਾਕ ਰੱਖਣ ਦੀ ਸੀਮਾ 15 ਦਿਨਾਂ ਤੋਂ ਵਧਾ ਕੇ 30 ਦਿਨ ਕਰ ਦਿੱਤੀ ਹੈ। ਹਾਲਾਂਕਿ, ਵਾਧੂ 15 ਦਿਨਾਂ ਦਾ ਸਟਾਕ ਰੱਖਣ ਲਈ ਸਰਕਾਰ ਨੇ ਇੱਕ ਅਹਿਮ ਸ਼ਰਤ ਵੀ ਲਗਾਈ ਹੈ।

ਹੁਣ ਕਿੰਨੀ ਹੋਈ ਇੱਕ ਕਿਲੋ ਚੀਨੀ ਦੀ ਕੀਮਤ

ਸਰਕਾਰ ਮੁਤਾਬਕ ਅਗਸਤ ਵਿੱਚ ਖੰਡ ਦੀ ਰਿਟੇਲ ਕੀਮਤ ਕਰੀਬ 65 ਰੁਪਏ ਪ੍ਰਤੀ ਕਿਲੋ ਤੱਕ ਪਹੁੰਚ ਗਈ ਸੀ। ਹੁਣ ਇਸ ਵਿੱਚ ਕਰੀਬ 10 ਫੀਸਦੀ ਦੀ ਗਿਰਾਵਟ ਆਈ ਹੈ ਅਤੇ ਕੀਮਤ ਲਗਭਗ 58.50 ਰੁਪਏ ਪ੍ਰਤੀ ਕਿਲੋ ਰਹਿ ਗਈ ਹੈ। ਯਾਨੀ ਕੁਝ ਹੀ ਹਫ਼ਤਿਆਂ ਵਿੱਚ ਖਪਤਕਾਰਾਂ ਨੂੰ ਪ੍ਰਤੀ ਕਿਲੋ ਕਰੀਬ 6.50 ਰੁਪਏ ਦੀ ਰਾਹਤ ਮਿਲੀ ਹੈ।

ਮਿਲ ਕੀਮਤਾਂ ਵਿੱਚ 25 ਫੀਸਦੀ ਦੀ ਗਿਰਾਵਟ

ਸਰਕਾਰ ਦਾ ਕਹਿਣਾ ਹੈ ਕਿ ਖੰਡ ਦੀ ਮਿਲ ਕੀਮਤ ਯਾਨੀ ਐਕਸ-ਮਿਲ ਪ੍ਰਾਈਸ ਵਿੱਚ ਕਰੀਬ 25 ਫੀਸਦੀ ਦੀ ਗਿਰਾਵਟ ਆ ਚੁੱਕੀ ਹੈ। ਇਸ ਦੇ ਮੁਕਾਬਲੇ ਰਿਟੇਲ ਕੀਮਤਾਂ ਵਿੱਚ ਕਮੀ ਘੱਟ ਰਹੀ ਹੈ। ਖੁਰਾਕ ਅਤੇ ਜਨਤਕ ਵੰਡ ਵਿਭਾਗ ਨੇ ਚੀਨੀ ਕਾਰੋਬਾਰ ਨਾਲ ਜੁੜੇ ਥੋਕ ਵਿਕਰੇਤਾਵਾਂ ਅਤੇ ਰਿਟੇਲ ਕਾਰੋਬਾਰੀਆਂ ਨੂੰ ਕੀਮਤਾਂ ਵਿੱਚ ਆਈ ਗਿਰਾਵਟ ਦਾ ਲਾਭ ਗਾਹਕਾਂ ਤੱਕ ਪਹੁੰਚਾਉਣ ਦੀ ਅਪੀਲ ਕੀਤੀ ਹੈ।

15 ਦਿਨਾਂ ਤੋਂ ਵਧਾ ਕੇ 30 ਦਿਨ ਹੋਈ ਸਟਾਕ ਸੀਮਾ

ਤਿਉਹਾਰਾਂ ਦੌਰਾਨ ਖੰਡ ਦੀ ਮੰਗ ਵਧਣ ਦੀ ਸੰਭਾਵਨਾ ਨੂੰ ਦੇਖਦੇ ਹੋਏ ਸਰਕਾਰ ਨੇ ਸਟਾਕ ਰੱਖਣ ਦੇ ਨਿਯਮ ਵਿੱਚ ਬਦਲਾਅ ਕੀਤਾ ਹੈ। ਹੁਣ ਵੱਡੇ ਥੋਕ ਖਪਤਕਾਰ 30 ਦਿਨਾਂ ਦੀ ਖਪਤ ਤੱਕ ਚੀਨੀ ਦਾ ਸਟਾਕ ਰੱਖ ਸਕਦੇ ਹਨ, ਜਦਕਿ ਪਹਿਲਾਂ ਇਹ ਸੀਮਾ 15 ਦਿਨ ਸੀ।

ਇਹ ਨਿਯਮ ਉਨ੍ਹਾਂ ਵੱਡੇ ਖਪਤਕਾਰਾਂ ’ਤੇ ਲਾਗੂ ਹੁੰਦਾ ਹੈ ਜੋ ਹਰ ਮਹੀਨੇ 10 ਟਨ ਤੋਂ ਵੱਧ ਚੀਨੀ ਦੀ ਵਰਤੋਂ ਕੱਚੇ ਮਾਲ ਵਜੋਂ ਕਰਦੇ ਹਨ। ਇਨ੍ਹਾਂ ਵਿੱਚ ਮਠਿਆਈ ਬਣਾਉਣ ਵਾਲੇ ਕਾਰੋਬਾਰੀ, ਕਨਫੈਕਸ਼ਨਰੀ ਕੰਪਨੀਆਂ, ਬਿਸਕੁਟ ਨਿਰਮਾਤਾ, ਸਾਫਟ ਡਰਿੰਕ ਅਤੇ ਹੋਰ ਖਾਣ-ਪੀਣ ਵਾਲੀਆਂ ਕੰਪਨੀਆਂ ਸ਼ਾਮਲ ਹਨ।

ਵਾਧੂ 15 ਦਿਨਾਂ ਦੇ ਸਟਾਕ ’ਤੇ ਕੀ ਹੈ ਸ਼ਰਤ?

ਸਰਕਾਰ ਨੇ 30 ਦਿਨਾਂ ਦੀ ਸੀਮਾ ਤਾਂ ਵਧਾ ਦਿੱਤੀ ਹੈ, ਪਰ ਪੂਰਾ ਵਾਧੂ ਸਟਾਕ ਘਰੇਲੂ ਬਾਜ਼ਾਰ ਤੋਂ ਖਰੀਦਣ ਦੀ ਇਜਾਜ਼ਤ ਨਹੀਂ ਦਿੱਤੀ ਗਈ। 15 ਦਿਨਾਂ ਤੋਂ ਵੱਧ ਦਾ ਸਟਾਕ ਸਿਰਫ਼ ਦਰਾਮਦ ਕੀਤੀ ਚੀਨੀ ਨਾਲ ਹੀ ਰੱਖਿਆ ਜਾ ਸਕੇਗਾ।

ਇਸ ਲਈ ਚੀਨੀ ਨੂੰ ਐਡਵਾਂਸ ਅਥਾਰਾਈਜ਼ੇਸ਼ਨ ਸਕੀਮ (AAS) ਜਾਂ ਟੈਰਿਫ ਰੇਟ ਕੋਟਾ (TRQ) ਤਹਿਤ ਦਰਾਮਦ ਕੀਤਾ ਜਾਣਾ ਜ਼ਰੂਰੀ ਹੈ। ਉੱਥੇ ਹੀ ਘਰੇਲੂ ਖੁੱਲ੍ਹੇ ਬਾਜ਼ਾਰ ਤੋਂ ਖਰੀਦੀ ਗਈ ਚੀਨੀ ਲਈ ਸਟਾਕ ਦੀ ਸੀਮਾ ਅਜੇ ਵੀ 15 ਦਿਨਾਂ ਦੀ ਖਪਤ ਤੱਕ ਹੀ ਰਹੇਗੀ।

ਸਰਕਾਰ ਨੇ ਵੱਡੇ ਖਪਤਕਾਰਾਂ ਲਈ ਚੀਨੀ ਦੇ ਸਟਾਕ ਦੀ ਨਿਗਰਾਨੀ ਦਾ ਵੀ ਪ੍ਰਬੰਧ ਕੀਤਾ ਹੈ। ਉਨ੍ਹਾਂ ਨੂੰ ਹਰ ਸ਼ੁੱਕਰਵਾਰ ਖੁਰਾਕ ਅਤੇ ਜਨਤਕ ਵੰਡ ਵਿਭਾਗ ਦੇ ਆਨਲਾਈਨ ਪੋਰਟਲ ’ਤੇ ਆਪਣੇ ਚੀਨੀ ਸਟਾਕ ਦੀ ਜਾਣਕਾਰੀ ਦੇਣੀ ਹੋਵੇਗੀ। ਇਸ ਦਾ ਉਦੇਸ਼ ਬਾਜ਼ਾਰ ਵਿੱਚ ਚੀਨੀ ਦੀ ਉਪਲਬਧਤਾ ’ਤੇ ਨਜ਼ਰ ਰੱਖਣਾ ਅਤੇ ਬੇਲੋੜੀ ਜਮ੍ਹਾਂਖੋਰੀ ਨੂੰ ਰੋਕਣਾ ਹੈ।