ਰਾਈਡ ਤੋਂ ਪਹਿਲਾਂ Ola-Uber ਤੇ Rapido ਨੂੰ ਟਿਪ ਦਾ ਬਦਲ ਕਰਨਾ ਹੋਵੇਗਾ ਬੰਦ , ਸਰਕਾਰ ਨੇ ਜਾਰੀ ਕੀਤੀਆਂ ਹਦਾਇਤਾਂ

ਨਵੀਂ ਦਿੱਲੀ (ਏਜੰਸੀ) : ਖਪਤਕਾਰ ਮਾਮਲਿਆਂ ਦੀ ਸਕੱਤਰ ਨਿਧੀ ਖਰੇ ਨੇ ਯਾਤਰਾ ਬੁੱਕ ਕਰਨ ਤੋਂ ਪਹਿਲਾਂ ਹੀ ਟਿਪ ਦੇਣ ਦੇ ਬਦਲ ਨੂੰ ਭਰਮਾਉਣ ਵਾਲਾ ਅਤੇ ਗ਼ਲਤ ਦੱਸਦਿਆਂ ਕੈਬ ਐਗਰੀਗੇਟਰ ਕੰਪਨੀਆਂ ਨੂੰ ਅਜਿਹੀ ਵਿਵਸਥਾ ਬੰਦ ਕਰਨ ਲਈ ਕਿਹਾ ਹੈ। ਉਨ੍ਹਾਂ ਦਾ ਇਹ ਬਿਆਨ ਅਜਿਹੇ ਸਮੇਂ ਆਇਆ ਹੈ, ਜਦੋਂ ਇੱਕ ਦਿਨ ਪਹਿਲਾਂ ਹੀ ਕੇਂਦਰੀ ਖਪਤਕਾਰ ਸੁਰੱਖਿਆ ਅਥਾਰਟੀ (ਸੀਸੀਪੀਏ) ਨੇ ਅਨੁਚਿਤ ਵਪਾਰਕ ਗਤੀਵਿਧੀਆਂ ਲਈ ਕੈਬ ਅਤੇ ਬਾਈਕ ਟੈਕਸੀ ਸੇਵਾ ਪਲੇਟਫਾਰਮ ਰੈਪਿਡੋ ’ਤੇ 10 ਲੱਖ ਰੁਪਏ ਦਾ ਜੁਰਮਾਨਾ ਲਾਇਆ ਸੀ। ਇਨ੍ਹਾਂ ’ਚ ਯਾਤਰਾ ਸ਼ੁਰੂ ਹੋਣ ਤੋਂ ਪਹਿਲਾਂ ਡਰਾਈਵਰ ਨੂੰ ਟਿਪ ਦੇਣ ਦਾ ਵਿਕਲਪ ਵੀ ਸ਼ਾਮਲ ਸੀ।

ਖਰੇ ਨੇ ਕਿਹਾ ਕਿ ਰਾਸ਼ਟਰੀ ਖਪਤਕਾਰ ਹੈਲਪਲਾਈਨ ਨੂੰ ਕੈਬ ਐਗਰੀਗੇਟਰਾਂ ਖ਼ਿਲਾਫ਼ ਵੱਡੀ ਗਿਣਤੀ ’ਚ ਸ਼ਿਕਾਇਤਾਂ ਮਿਲੀਆਂ ਹਨ। ਉਨ੍ਹਾਂ ਕਿਹਾ ਕਿ ਖਪਤਕਾਰਾਂ ਦੀ ਮੁੱਖ ਸ਼ਿਕਾਇਤ ਇਹ ਸੀ ਕਿ ਯਾਤਰਾ ਸ਼ੁਰੂ ਹੋਣ ਤੋਂ ਪਹਿਲਾਂ ਹੀ ਉਨ੍ਹਾਂ ਨੂੰ ਟਿਪ ਦੇਣ ਦਾ ਵਿਕਲਪ ਦਿੱਤਾ ਜਾ ਰਿਹਾ ਹੈ। ਉਨ੍ਹਾਂ ਕਿਹਾ ਕਿ ਖਪਤਕਾਰਾਂ ’ਤੇ ਇਹ ਦਬਾਅ ਵੀ ਬਣਾਇਆ ਜਾ ਰਿਹਾ ਸੀ ਕਿ ਜੇ ਉਹ ਟਿਪ ਨਹੀਂ ਦੇਣਗੇ ਤਾਂ ਉਨ੍ਹਾਂ ਨੂੰ ਯਾਤਰਾ ਨਹੀਂ ਮਿਲੇਗੀ।

ਖਰੇ ਨੇ ਕਿਹਾ ਕਿ ਟਿਪ ਦੇਣਾ ਪੂਰੀ ਤਰ੍ਹਾਂ ਸਵੈਇੱਛਕ ਹੈ ਅਤੇ ਯਾਤਰਾ ਪੂਰੀ ਹੋਣ ਤੋਂ ਬਾਅਦ ਖਪਤਕਾਰ ਨੂੰ ਇਹ ਫੈਸਲਾ ਕਰਨ ਦਾ ਵਿਕਲਪ ਦਿੱਤਾ ਜਾਣਾ ਚਾਹੀਦਾ ਹੈ ਕਿ ਉਹ ਟਿਪ ਦੇਣਾ ਚਾਹੁੰਦਾ ਹੈ ਜਾਂ ਨਹੀਂ। ਖਰੇ ਨੇ ਕਿਹਾ ਕਿ ਅਥਾਰਟੀ ਪ੍ਰਮੁੱਖ ਕੈਬ ਸੇਵਾ ਪ੍ਰਦਾਤਾਵਾਂ ਉਬਰ ਅਤੇ ਓਲਾ ਦੀਆਂ ਕਾਰੋਬਾਰੀ ਗਤੀਵਿਧੀਆਂ ਦੀ ਵੀ ਜਾਂਚ ਕਰ ਰਹੀ ਹੈ।

ਰੈਪਿਡੋ ਖ਼ਿਲਾਫ਼ ਕਾਰਵਾਈ ਭਾਰਤ ’ਚ ਕੰਮ ਕਰ ਰਹੇ ਕੈਬ ਅਤੇ ਬਾਈਕ-ਟੈਕਸੀ ਐਗਰੀਗੇਟਰ ਪਲੇਟਫਾਰਮਾਂ ਦੀ ਵਿਆਪਕ ਜਾਂਚ ਦੇ ਆਧਾਰ ’ਤੇ ਕੀਤੀ ਗਈ ਹੈ। ਇਸ ਜਾਂਚ ’ਚ ਯਾਤਰਾ ਤੋਂ ਪਹਿਲਾਂ ਟਿਪ ਦੇਣ ਅਤੇ ਗਤੀਸ਼ੀਲ ਕੀਮਤ ਨਿਰਧਾਰਨ ਨਾਲ ਜੁੜੀਆਂ ਵਿਵਸਥਾਵਾਂ ਦੀ ਵੀ ਪੜਤਾਲ ਕੀਤੀ ਜਾ ਰਹੀ ਹੈ।