New Labour Code: ਮੌਜਾਂ ਹੀ ਮੌਜਾਂ! ਹੁਣ ਬਚੀਆਂ ਹੋਈਆਂ ਛੁੱਟੀਆਂ ਦੇ ਵੀ ਮਿਲਣਗੇ ਪੈਸੇ, ਜਾਣੋ ਕੀ ਹੈ 'ਨਵਾਂ ਲੇਬਰ ਕੋਡ 2026'

ਨਵੀਂ ਦਿੱਲੀ: ਭਾਰਤ ਸਰਕਾਰ ਵੱਲੋਂ ਲਾਗੂ ਕੀਤੇ ਗਏ ਨਵੇਂ ਲੇਬਰ ਕੋਡ (New Labour Code 2026) ਤਹਿਤ ਕਰਮਚਾਰੀਆਂ ਦੇ ਹਿੱਤ ਵਿੱਚ ਕਈ ਵੱਡੇ ਬਦਲਾਅ ਕੀਤੇ ਗਏ ਹਨ। ਇਨ੍ਹਾਂ ਵਿੱਚੋਂ ਕੁਝ ਨਿਯਮ 1 ਅਪ੍ਰੈਲ ਤੋਂ ਲਾਗੂ ਹੋ ਚੁੱਕੇ ਹਨ। ਸਭ ਤੋਂ ਖ਼ਾਸ ਨਿਯਮ ਇਹ ਹੈ ਕਿ ਹੁਣ ਕਰਮਚਾਰੀਆਂ ਦੀਆਂ ਬਚੀਆਂ ਹੋਈਆਂ ਛੁੱਟੀਆਂ (Leaves) ਖਾਲੀ ਨਹੀਂ ਜਾਣਗੀਆਂ, ਕੰਪਨੀ ਨੂੰ ਉਨ੍ਹਾਂ ਦੇ ਬਦਲੇ ਪੈਸੇ ਦੇਣੇ ਪੈਣਗੇ।

ਕੀ ਹੈ ਨਵਾਂ ਨਿਯਮ?

ਪਹਿਲਾਂ ਨਿਯਮ ਇਹ ਸੀ ਕਿ ਕਰਮਚਾਰੀ ਨੂੰ ਬਚੀਆਂ ਹੋਈਆਂ ਛੁੱਟੀਆਂ ਦੇ ਪੈਸੇ (Leave Encashment) ਸਿਰਫ਼ ਰਿਟਾਇਰਮੈਂਟ ਵੇਲੇ ਹੀ ਮਿਲਦੇ ਸਨ। ਹਾਲਾਂਕਿ ਕੁਝ ਪ੍ਰਾਈਵੇਟ ਕੰਪਨੀਆਂ ਪਹਿਲਾਂ ਵੀ ਪੈਸੇ ਦਿੰਦੀਆਂ ਸਨ, ਪਰ ਹੁਣ ਨਵੇਂ ਲੇਬਰ ਕੋਡ ਤਹਿਤ ਹਰ ਕੰਪਨੀ ਲਈ ਇਹ ਲਾਜ਼ਮੀ ਹੋ ਜਾਵੇਗਾ।

ਕਿਵੇਂ ਅਤੇ ਕਦੋਂ ਮਿਲਣਗੇ ਪੈਸੇ?

ਅਕਸਰ ਕੰਮ ਦੇ ਬੋਝ ਕਾਰਨ ਕਰਮਚਾਰੀ ਆਪਣੀਆਂ ਸਾਰੀਆਂ ਸਾਲਾਨਾ ਛੁੱਟੀਆਂ ਨਹੀਂ ਲੈ ਪਾਉਂਦੇ ਅਤੇ ਸਾਲ ਦੇ ਅੰਤ ਵਿੱਚ ਉਹ ਛੁੱਟੀਆਂ ਖ਼ਤਮ (Lapse) ਹੋ ਜਾਂਦੀਆਂ ਸਨ। ਪਰ ਹੁਣ ਅਜਿਹਾ ਨਹੀਂ ਹੋਵੇਗਾ:

ਕੈਰੀ ਫਾਰਵਰਡ (Carry Forward): ਕਰਮਚਾਰੀਆਂ ਨੂੰ ਮਿਲਣ ਵਾਲੀਆਂ ਛੁੱਟੀਆਂ (ਜਿਵੇਂ ਕਿ ਓਕੂਪੇਸ਼ਨਲ ਸੇਫਟੀ ਅਤੇ ਹੈਲਥ ਵਰਕਿੰਗ ਕੰਡੀਸ਼ਨ ਤਹਿਤ ਮਿਲਦੀਆਂ ਛੁੱਟੀਆਂ) ਹੁਣ ਅਗਲੇ ਸਾਲ ਲਈ ਜੁੜ ਜਾਣਗੀਆਂ।

30 ਦਿਨਾਂ ਦੀ ਸ਼ਰਤ: ਜੇਕਰ ਤੁਹਾਡੀਆਂ ਕੈਰੀ ਫਾਰਵਰਡ ਹੋਈਆਂ ਛੁੱਟੀਆਂ ਦੀ ਗਿਣਤੀ 30 ਦਿਨਾਂ ਤੋਂ ਵੱਧ ਹੋ ਜਾਂਦੀ ਹੈ, ਤਾਂ ਕੰਪਨੀ ਨੂੰ ਵਾਧੂ ਛੁੱਟੀਆਂ ਦੇ ਬਦਲੇ ਕਰਮਚਾਰੀ ਨੂੰ ਨਕਦ ਭੁਗਤਾਨ (ਪੈਸੇ) ਕਰਨਾ ਪਵੇਗਾ।

ਕਰਮਚਾਰੀਆਂ ਨੂੰ ਫਾਇਦਾ:

ਇਸ ਨਿਯਮ ਨਾਲ ਕਰਮਚਾਰੀਆਂ ਦੀ ਸਾਲਾਨਾ ਕਮਾਈ ਵਿੱਚ ਵਾਧਾ ਹੋਵੇਗਾ। ਹੁਣ ਕਰਮਚਾਰੀ ਆਪਣੀਆਂ ਛੁੱਟੀਆਂ ਬਚਾ ਕੇ ਸਾਲ ਦੇ ਅੰਤ ਵਿੱਚ ਮੋਟੀ ਰਕਮ ਪ੍ਰਾਪਤ ਕਰ ਸਕਣਗੇ। ਸਰਕਾਰ ਦਾ ਇਹ ਕਦਮ ਕਰਮਚਾਰੀਆਂ ਦੀ ਆਰਥਿਕ ਸੁਰੱਖਿਆ ਅਤੇ ਕੰਮ ਦੇ ਬਿਹਤਰ ਮਾਹੌਲ ਨੂੰ ਧਿਆਨ ਵਿੱਚ ਰੱਖ ਕੇ ਚੁੱਕਿਆ ਗਿਆ ਹੈ।