ਕੀ Foldable iPhone ਅੱਜ ਹੋਵੇਗਾ ਲਾਂਚ? Tim Cook ਨੇ ਕਿਵੇਂ ਬਦਲਿਆ Apple ਦਾ ਫੋਕਸ, ਕੀ ਹੋ ਸਕਦੀ ਹੈ ਕੀਮਤ?

ਟੈਕਨਾਲੋਜੀ ਡੈਸਕ, ਨਵੀਂ ਦਿੱਲੀ : Apple ਅੱਜ ਆਪਣਾ ਲਾਂਚ ਇਵੈਂਟ “Surprise and Shine” ਕਰਨ ਵਾਲੀ ਹੈ। ਇਸ ਇਵੈਂਟ ’ਚ ਕੰਪਨੀ ਆਪਣਾ ਪਹਿਲਾ ਫੋਲਡੇਬਲ Foldable iPhone ਲਾਂਚ ਕਰ ਸਕਦੀ ਹੈ। ਇਸ ਡਿਵਾਈਸ ਦੇ ਲਾਂਚ ਤੋਂ ਠੀਕ ਪਹਿਲਾਂ Bloomberg ਨੇ ਇਸ ਬਾਰੇ ਕੁਝ ਜਾਣਕਾਰੀਆਂ ਸਾਂਝੀਆਂ ਕੀਤੀਆਂ ਹਨ। ਇਸ ਰਿਪੋਰਟ ’ਚ ਦਾਅਵਾ ਕੀਤਾ ਗਿਆ ਹੈ ਕਿ ਕੰਪਨੀ ਦੇ ਫੋਲਡੇਬਲ iPhone ਪ੍ਰੋਜੈਕਟ ਨੂੰ ਅੱਗੇ ਵਧਾਉਣ ’ਚ ਸਾਬਕਾ CEO Tim Cook ਦੀ ਵੱਡੀ ਭੂਮਿਕਾ ਰਹੀ ਹੈ। ਇਸ ਦੇ ਨਾਲ ਹੀ ਰਿਪੋਰਟ ’ਚ ਆਉਣ ਵਾਲੇ ਫੋਲਡੇਬਲ iPhone ਦੀ ਸੰਭਾਵਿਤ ਕੀਮਤ ਬਾਰੇ ਵੀ ਅੰਦਾਜ਼ਾ ਲਗਾਇਆ ਗਿਆ ਹੈ।

2016 ਤੋਂ ਫੋਲਡੇਬਲ ਫੋਨ ’ਤੇ ਕੰਮ ਕਰ ਰਹੀ ਹੈ Apple

Apple ਆਪਣੇ ਫੋਲਡੇਬਲ iPhone ’ਤੇ ਸਾਲ 2016 ਤੋਂ ਕੰਮ ਕਰ ਰਹੀ ਹੈ। ਰਿਪੋਰਟ ’ਚ ਦੱਸਿਆ ਗਿਆ ਹੈ ਕਿ ਸਾਲ 2020 ’ਚ Tim Cook ਚੀਨ ਤੋਂ ਵਾਪਸ ਆਏ ਸਨ, ਤਾਂ ਉਹ ਫੋਲਡੇਬਲ ਫੋਨਾਂ ਨੂੰ ਲੈ ਕੇ ਕਾਫ਼ੀ ਉਤਸ਼ਾਹਿਤ ਸਨ। ਉਨ੍ਹਾਂ ਨੇ Apple ਦੀ ਹਾਰਡਵੇਅਰ ਟੀਮ ਦੇ ਇੰਜੀਨੀਅਰਾਂ ਨੂੰ ਫੋਲਡੇਬਲ ਡਿਵਾਈਸ ਪ੍ਰੋਜੈਕਟ ’ਤੇ ਤੇਜ਼ੀ ਨਾਲ ਕੰਮ ਕਰਨ ਲਈ ਕਿਹਾ।

ਇਸ ਰਿਪੋਰਟ ’ਚ ਦਾਅਵਾ ਕੀਤਾ ਗਿਆ ਹੈ ਕਿ Tim Cook ਆਮ ਤੌਰ ’ਤੇ ਕਿਸੇ ਪ੍ਰੋਜੈਕਟ ਦੇ ਸ਼ੁਰੂਆਤੀ ਪੜਾਅ ’ਚ ਜ਼ਿਆਦਾ ਦਿਲਚਸਪੀ ਨਹੀਂ ਲੈਂਦੇ ਸਨ। ਹਾਲਾਂਕਿ, ਫੋਲਡੇਬਲ iPhone ਦੇ ਮਾਮਲੇ ’ਚ ਅਜਿਹਾ ਨਹੀਂ ਹੋਇਆ। ਇਸ ਦੇ ਨਾਲ ਹੀ Apple ਪਹਿਲਾਂ ਇੱਕ ਫੋਲਡੇਬਲ iPad ਬਣਾਉਣ ’ਤੇ ਧਿਆਨ ਦੇ ਰਹੀ ਸੀ, ਪਰ Tim Cook ਨੇ ਕੰਪਨੀ ਦਾ ਫੋਕਸ ਫੋਲਡੇਬਲ iPhone ਵੱਲ ਕਰ ਦਿੱਤਾ।

ਕੀ ਹੋਵੇਗਾ ਫੋਲਡੇਬਲ iPhone ਦਾ ਨਾਮ?

Apple ਦੇ ਪਹਿਲੇ ਫੋਲਡੇਬਲ iPhone ਦੇ ਨਾਮ ਨੂੰ ਲੈ ਕੇ ਕਾਫ਼ੀ ਉਤਸੁਕਤਾ ਹੈ। ਕੰਪਨੀ ਨੇ ਇਸ ਦਾ ਨਾਮ ਅਧਿਕਾਰਤ ਤੌਰ ’ਤੇ ਜਾਰੀ ਨਹੀਂ ਕੀਤਾ ਹੈ। ਰਿਪੋਰਟ ’ਚ ਦੱਸਿਆ ਗਿਆ ਹੈ ਕਿ ਕੰਪਨੀ ਨੇ ਅੰਦਰੂਨੀ ਤੌਰ ’ਤੇ ਇਸ ਨੂੰ “iPhone Ultra” ਨਾਮ ਦਿੱਤਾ ਹੋਇਆ ਹੈ। ਹਾਲਾਂਕਿ, ਇਹ ਲਾਂਚ ਤੋਂ ਬਾਅਦ ਹੀ ਪਤਾ ਲੱਗੇਗਾ ਕਿ ਇਹ ਕਿਸ ਨਾਮ ਨਾਲ ਬਾਜ਼ਾਰ ’ਚ ਆਵੇਗਾ।

ਕੀ ਹੋਵੇਗੀ ਫੋਲਡੇਬਲ iPhone ਦੀ ਕੀਮਤ?

9to5Mac ਦੀ ਰਿਪੋਰਟ ’ਚ ਦਾਅਵਾ ਕੀਤਾ ਗਿਆ ਹੈ ਕਿ Apple ਦੀ ਯੋਜਨਾ ਫੋਲਡੇਬਲ iPhone ਨੂੰ 1,999 ਡਾਲਰ (ਲਗਭਗ 1,89,839 ਰੁਪਏ) ਦੀ ਕੀਮਤ ’ਤੇ ਲਾਂਚ ਕਰਨ ਦੀ ਸੀ। ਕੰਪੋਨੈਂਟਸ ਦੀਆਂ ਵਧ ਰਹੀਆਂ ਕੀਮਤਾਂ ਦੇ ਕਾਰਨ ਸੰਭਵ ਹੈ ਕਿ ਕੰਪਨੀ ਹੁਣ ਇਸ ਨੂੰ 2,199 ਡਾਲਰ (ਲਗਭਗ 2,08,832 ਰੁਪਏ) ਦੀ ਕੀਮਤ ’ਤੇ ਲਾਂਚ ਕਰੇ। ਦੁਨੀਆ ਭਰ ’ਚ ਚੱਲ ਰਹੀ ਮੈਮੋਰੀ ਚਿਪਸ ਦੀ ਕਮੀ ਦਾ ਅਸਰ ਆਉਣ ਵਾਲੇ ਫੋਲਡੇਬਲ iPhone ਦੇ ਲਾਂਚ ਤੋਂ ਪਹਿਲਾਂ ਹੀ ਦਿਖਾਈ ਦੇਣਾ ਸ਼ੁਰੂ ਹੋ ਗਿਆ ਹੈ। ਇਸ ਫੋਨ ਦਾ ਵੱਧ ਸਟੋਰੇਜ ਵਾਲਾ ਵੇਰੀਐਂਟ ਲਗਭਗ 3,000 ਡਾਲਰ (ਕਰੀਬ 2,84,901 ਰੁਪਏ) ਤੱਕ ਦੀ ਕੀਮਤ ’ਚ ਆ ਸਕਦਾ ਹੈ।