ਦੂਜੀ ਕੰਪਨੀ ਦਾ ਸੀ ‘iPhone’ ਨਾਮ, ਐਪਲ ਨੇ ਇਸਨੂੰ ਆਪਣੀ ਸਭ ਤੋਂ ਵੱਡੀ ਪਛਾਣ ਕਿਵੇਂ ਬਣਾਇਆ?

ਟੈਕਨਾਲੋਜੀ ਡੈਸਕ, ਨਵੀਂ ਦਿੱਲੀ : ਐਪਲ ਦਾ ਇੱਕ ਹੋਰ ਵੱਡਾ ਲਾਂਚ ਇਵੈਂਟ ਕੱਲ੍ਹ ਯਾਨੀ 9 ਸਤੰਬਰ ਨੂੰ ਦੇਰ ਰਾਤ ਹੋਣ ਜਾ ਰਿਹਾ ਹੈ। ਟੈਕ ਜਗਤ ਦੀਆਂ ਨਜ਼ਰਾਂ ਕੰਪਨੀ ਦੇ ਅਗਲੇ ਆਈਫੋਨ ’ਤੇ ਟਿਕੀਆਂ ਹੋਈਆਂ ਹਨ। ਪਰ ਨਵੇਂ iPhone ਮਾਡਲਾਂ ਦੇ ਆਉਣ ਤੋਂ ਪਹਿਲਾਂ iPhone ਦੀ ਉਹ ਦਿਲਚਸਪ ਕਹਾਣੀ ਜਾਣਨਾ ਕਾਫ਼ੀ ਜ਼ਰੂਰੀ ਹੈ, ਜਿਸ ਨੇ ਲਗਭਗ ਦੋ ਦਹਾਕਿਆਂ ’ਚ ਮੋਬਾਈਲ ਫੋਨ ਦੀ ਦੁਨੀਆ ਨੂੰ ਪੂਰੀ ਤਰ੍ਹਾਂ ਬਦਲ ਦਿੱਤਾ।

ਤੁਹਾਨੂੰ ਜਾਣ ਕੇ ਹੈਰਾਨੀ ਹੋਵੇਗੀ ਕਿ ਜਿਸ ‘iPhone’ ਨਾਮ ਨੂੰ ਅੱਜ ਪੂਰੀ ਦੁਨੀਆ ਐਪਲ ਨਾਲ ਜੋੜਦੀ ਹੈ, ਉਹ ਸ਼ੁਰੂ ’ਚ ਐਪਲ ਦਾ ਸੀ ਹੀ ਨਹੀਂ। ਜੀ ਹਾਂ, ਅਮਰੀਕੀ ਨੈੱਟਵਰਕਿੰਗ ਕੰਪਨੀ Cisco ਕੋਲ ਇਸ ਨਾਮ ਦਾ ਟ੍ਰੇਡਮਾਰਕ ਸੀ। ਇਸ ਤੋਂ ਬਾਅਦ ਜਦੋਂ ਐਪਲ ਨੇ 2007 ’ਚ ਆਪਣਾ iPhone ਪੇਸ਼ ਕੀਤਾ ਤਾਂ ਦੋਵੇਂ ਕੰਪਨੀਆਂ ਵਿਚਕਾਰ ਵਿਵਾਦ ਸ਼ੁਰੂ ਹੋ ਗਿਆ। ਬਾਅਦ ’ਚ Cisco ਨੇ ਕਾਨੂੰਨੀ ਕਾਰਵਾਈ ਵੀ ਕੀਤੀ। ਹਾਲਾਂਕਿ ਕੁਝ ਸਮੇਂ ਬਾਅਦ ਸਮਝੌਤੇ ਰਾਹੀਂ ਇਹ ਵਿਵਾਦ ਖਤਮ ਹੋ ਗਿਆ।

142 ਕਰੋੜ ਰੁਪਏ ’ਚ ਵਿਕਿਆ iPhone

iPhone ਦੀ ਕਹਾਣੀ ਸਿਰਫ਼ ਇਸਦੇ ਨਾਮ ਤੱਕ ਹੀ ਸੀਮਿਤ ਨਹੀਂ ਹੈ। ਇਸਦਾ ਇੱਕ ਖਾਸ ਮਾਡਲ ਦੁਨੀਆ ਦੇ ਸਭ ਤੋਂ ਮਹਿੰਗੇ ਫੋਨਾਂ ’ਚੋਂ ਇੱਕ ਬਣ ਗਿਆ ਸੀ। ਬ੍ਰਿਟਿਸ਼ ਡਿਜ਼ਾਈਨਰ Stuart Hughes ਨੇ ਇੱਕ iPhone ਨੂੰ ਸੋਨੇ ਤੇ ਸੈਂਕੜਿਆਂ ਹੀਰਿਆਂ ਨਾਲ ਡਿਜ਼ਾਈਨ ਕੀਤਾ ਸੀ। ਇਸਦੀ ਕੀਮਤ ਲਗਭਗ 1.5 ਕਰੋੜ ਡਾਲਰ, ਯਾਨੀ ਅੱਜ ਦੇ ਹਿਸਾਬ ਨਾਲ ਕਰੀਬ 142 ਕਰੋੜ ਰੁਪਏ ਦੱਸੀ ਗਈ ਸੀ। ਹਾਲਾਂਕਿ iPhone ਦੀ ਅਸਲ ਕਹਾਣੀ 9 ਜਨਵਰੀ 2007 ਤੋਂ ਸ਼ੁਰੂ ਹੁੰਦੀ ਹੈ। ਸੈਨ ਫ੍ਰਾਂਸਿਸਕੋ ’ਚ ਮੰਚ ’ਤੇ ਪਹੁੰਚੇ Steve Jobs ਨੇ ਇੱਕ ਅਜਿਹਾ ਪ੍ਰੋਡੈਕਟ ਦੁਨੀਆ ਦੇ ਸਾਹਮਣੇ ਪੇਸ਼ ਕੀਤਾ, ਜਿਸਨੂੰ ਉਨ੍ਹਾਂ ਨੇ ਮੋਬਾਈਲ ਫੋਨ, ਟੱਚਸਕ੍ਰੀਨ iPod ਤੇ ਇੰਟਰਨੈੱਟ ਡਿਵਾਈਸ ਦਾ ਸੁਮੇਲ ਦੱਸਿਆ। ਇਹੀ ਐਪਲ ਦਾ ਪਹਿਲਾ iPhone ਸੀ। ਉਸ ਦੌਰ ’ਚ ਮੋਬਾਈਲ ਫੋਨਾਂ ’ਤੇ ਕੀਪੈਡ ਦਾ ਰਾਜ ਹੁੰਦਾ ਸੀ ਤੇ Nokia ਤੇ BlackBerry ਵਰਗੇ ਬ੍ਰਾਂਡ ਬਾਜ਼ਾਰ ’ਤੇ ਕਬਜ਼ਾ ਕੀਤੇ ਹੋਏ ਸਨ। ਇਸ ਤੋਂ ਬਾਅਦ ਐਪਲ ਨੇ ਪੂਰੀ ਸੋਚ ਹੀ ਬਦਲ ਦਿੱਤੀ। ਕੰਪਨੀ ਨੇ ਫਿਜ਼ੀਕਲ ਬਟਨ ਹਟਾ ਕੇ ਸਕ੍ਰੀਨ ਨੂੰ ਹੀ ਫੋਨ ਦਾ ਮੁੱਖ ਕੰਟਰੋਲ ਬਣਾ ਦਿੱਤਾ। ਟੈਪ, ਸਵਾਈਪ ਤੇ ਪਿੰਚ ਵਰਗੇ ਜੈਸਚਰ ਹੌਲੀ-ਹੌਲੀ ਦੁਨੀਆ ਦੇ ਜ਼ਿਆਦਾਤਰ ਸਮਾਰਟਫੋਨਾਂ ਦੀ ਪਛਾਣ ਬਣ ਗਏ।

ਇੰਜੀਨੀਅਰਾਂ ਨੇ ਕਈ ਸਾਲ ਡਿਵਾਈਸ ’ਤੇ ਕੀਤਾ ਕੰਮ

ਪਹਿਲੇ iPhone ਦੇ ਪਿੱਛੇ ਇੱਕ ਬੇਹੱਦ ਗੁਪਤ ਪ੍ਰੋਜੈਕਟ ਸੀ, ਜਿਸਦਾ ਕੋਡਨੇਮ Purple ਰੱਖਿਆ ਗਿਆ ਸੀ। ਚੁਣੇ ਹੋਏ ਇੰਜੀਨੀਅਰਾਂ ਨੇ ਕਈ ਸਾਲਾਂ ਤੱਕ ਬੰਦ ਕਮਰਿਆਂ ’ਚ ਇਸ ਡਿਵਾਈਸ ’ਤੇ ਕੰਮ ਕੀਤਾ ਸੀ। ਜਦੋਂ Steve Jobs ਨੇ ਇਸਨੂੰ ਦੁਨੀਆ ਦੇ ਸਾਹਮਣੇ ਲਾਂਚ ਕੀਤਾ, ਉਦੋਂ ਜਾ ਕੇ ਐਪਲ ਦੇ ਇਸ ਗੁਪਤ ਮਿਸ਼ਨ ਤੋਂ ਪਰਦਾ ਉੱਠਿਆ।