ਅਲਰਟ : ਫੋਨ ਫ੍ਰੀਜ਼ ਹੋਣ ਨੂੰ ਮਾਮੂਲੀ ਖਰਾਬੀ ਨਾ ਸਮਝੋ, ਹੋ ਸਕਦਾ ਹੈ ਵੱਡਾ UPI ਫਰਾਡ

ਟੈਕਨਾਲੋਜੀ ਡੈਸਕ, ਨਵੀਂ ਦਿੱਲੀ : ਜੇਕਰ ਸੋਸ਼ਲ ਮੀਡੀਆ ’ਤੇ ਕਿਸੇ ਇਸ਼ਤਿਹਾਰ ਜਾਂ ਅਣਜਾਣ ਲਿੰਕ ’ਤੇ ਕਲਿੱਕ ਕਰਨ ਤੋਂ ਬਾਅਦ ਤੁਹਾਡਾ ਫੋਨ ਵੀ ਫ੍ਰੀਜ਼ ਹੋ ਗਿਆ ਹੈ, ਤਾਂ ਇਸਨੂੰ ਸਿਰਫ਼ ਇੱਕ ਆਮ ਸਮੱਸਿਆ ਸਮਝਣਾ ਤੁਹਾਨੂੰ ਵੱਡੀ ਮੁਸੀਬਤ ’ਚ ਪਾ ਸਕਦਾ ਹੈ। ਸਾਈਬਰ ਸੁਰੱਖਿਆ ਮਾਹਿਰਾਂ ਨੇ ਇੱਕ ਨਵੇਂ ਤਰ੍ਹਾਂ ਦੇ ਡਿਜ਼ਿਟਲ ਫਰਾਡ ਨੂੰ ਲੈ ਕੇ ਚਿਤਾਵਨੀ ਦਿੱਤੀ ਹੈ। ਇਸ ’ਚ ਫੋਨ ਦਾ ਫ੍ਰੀਜ਼ ਹੋਣਾ ਅਸਲ ਹਮਲਾ ਨਹੀਂ, ਸਗੋਂ ਯੂਜ਼ਰ ਨੂੰ ਘਬਰਾਉਣ ਤੇ ਜਾਲ ’ਚ ਫਸਾਉਣ ਦਾ ਇੱਕ ਤਰੀਕਾ ਹੋ ਸਕਦਾ ਹੈ। ਆਓ ਜਾਣਦੇ ਹਾਂ ਇਹ ਕਿਵੇਂ ਹੁੰਦਾ ਹੈ...

ਇਸ ਤਰ੍ਹਾਂ ਸ਼ੁਰੂ ਹੁੰਦਾ ਹੈ ਸਕੈਮ

ਦਰਅਸਲ, ਇਸ ਸਕੈਮ ’ਚ ਠੱਗ ਪਹਿਲਾਂ ਨਕਲੀ ਐਰਰ ਮੈਸੇਜ, ਪੌਪ-ਅੱਪ ਇਸ਼ਤਿਹਾਰ ਜਾਂ ਨਕਲੀ ਕਸਟਮਰ ਕੇਅਰ ਕਾਲ ਰਾਹੀਂ ਯੂਜ਼ਰ ਨੂੰ ਇਹ ਵਿਸ਼ਵਾਸ ਦਿਵਾਉਂਦੇ ਹਨ ਕਿ ਉਸਦੇ ਮੋਬਾਈਲ, ਬੈਂਕਿੰਗ ਐਪ ਜਾਂ UPI ਖਾਤੇ ’ਚ ਕੋਈ ਗੰਭੀਰ ਸਮੱਸਿਆ ਆ ਗਈ ਹੈ। ਇਸ ਤੋਂ ਬਾਅਦ ਉਨ੍ਹਾਂ ਨੂੰ ਰਿਵਾਰਡ, ਕੈਸ਼ਬੈਕ, ਵੈਰੀਫਿਕੇਸ਼ਨ ਜਾਂ ਸਰਵਿਸ ਐਪ ਦੇ ਨਾਮ 'ਤੇ ਇੱਕ ਖਤਰਨਾਕ APK ਡਾਊਨਲੋਡ ਕਰਨ ਲਈ ਕਿਹਾ ਜਾਂਦਾ ਹੈ। NDTV ਦੇ ਮੁਤਾਬਕ, Quick Heal Technologies ਦੇ CEO ਹਰੀਸ਼ ਕੁਮਾਰ ਨੇ ਦੱਸਿਆ ਕਿ ਮੋਬਾਈਲ ਦਾ ਫ੍ਰੀਜ਼ ਹੋਣਾ ਅਕਸਰ ਅਸਲ ਘਟਨਾ ਨਹੀਂ ਹੁੰਦੀ, ਸਗੋਂ ਯੂਜ਼ਰ ਦਾ ਧਿਆਨ ਭਟਕਾਉਣ ਦਾ ਇੱਕ ਤਰੀਕਾ ਹੁੰਦਾ ਹੈ।

ਜਦੋਂ ਇੱਕ ਵਾਰ ਮੋਬਾਈਲ ’ਚ ਮਾਲਿਸ਼ਸ (ਖਤਰਨਾਕ) ਐਪ ਇੰਸਟਾਲ ਹੋ ਜਾਂਦੀ ਹੈ, ਤਾਂ ਇਹ Accessibility, Notifications, SMS ਤੇ ਹੋਰ ਸੰਵੇਦਨਸ਼ੀਲ ਪਰਮਿਸ਼ਨਾਂ ਦੀ ਗਲਤ ਵਰਤੋਂ ਕਰ ਸਕਦੀ ਹੈ।

ਨੋਟੀਫਿਕੇਸ਼ਨ ਵੀ ਪੜ੍ਹ ਸਕਦੇ ਹਨ

ਸਾਈਬਰ ਅਪਰਾਧੀ ਇਨ੍ਹਾਂ ਪਰਮਿਸ਼ਨਾਂ ਦੀ ਮਦਦ ਨਾਲ OTP ਤੇ ਨੋਟੀਫਿਕੇਸ਼ਨ ਪੜ੍ਹ ਸਕਦੇ ਹਨ। ਉਹ ਸਕ੍ਰੀਨ 'ਤੇ ਹੋ ਰਹੀ ਗਤੀਵਿਧੀ ਨੂੰ ਮਾਨੀਟਰ ਕਰ ਸਕਦੇ ਹਨ ਤੇ ਕੁਝ ਮਾਮਲਿਆਂ ’ਚ ਡਿਵਾਈਸ ਨੂੰ ਕੰਟਰੋਲ ਕਰਨ ਦੀ ਕੋਸ਼ਿਸ਼ ਵੀ ਕਰ ਸਕਦੇ ਹਨ। ਮਾਹਿਰਾਂ ਦਾ ਕਹਿਣਾ ਹੈ ਕਿ ਇਸ ਲਈ ਠੱਗਾਂ ਨੂੰ UPI ਦੀ ਸੁਰੱਖਿਆ ਜਾਂ ਐਨਕ੍ਰਿਪਸ਼ਨ ਤੋੜਨ ਦੀ ਵੀ ਲੋੜ ਨਹੀਂ ਪੈਂਦੀ। ਸਕੈਮਰ ਅਕਸਰ ਫੋਨ, ਯੂਜ਼ਰ ਦੀ ਨਿੱਜੀ ਜਾਣਕਾਰੀ ਤੇ ਟ੍ਰਾਂਜ਼ੈਕਸ਼ਨ ਦੀ ਪ੍ਰਕਿਰਿਆ ਨੂੰ ਹੀ ਨਿਸ਼ਾਨਾ ਬਣਾਉਂਦੇ ਹਨ।