ChatGPT ਦੀ ਕੰਪਨੀ ਦੇ AI Agents ਹੋਏ ਬੇਕਾਬੂ? Wiki ਸਾਈਟ ’ਤੇ ਕੀਤਾ ਕਬਜ਼ਾ

ਟੈਕਨੋਲੋਜੀ ਡੈਸਕ, ਨਵੀਂ ਦਿੱਲੀ : ਇੱਕ ਵਾਰ ਫਿਰ ChatGPT ਦੀ ਕੰਪਨੀ OpenAI ਨਾਲ ਜੁੜਿਆ ਇੱਕ ਹੈਰਾਨ ਕਰਨ ਵਾਲਾ ਮਾਮਲਾ ਸਾਹਮਣੇ ਆਇਆ ਹੈ, ਜਿਸ ਨੇ AI Agents ਦੀ ਸੁਰੱਖਿਆ ਤੇ ਕੰਟਰੋਲ ਨੂੰ ਲੈ ਕੇ ਚਿੰਤਾਵਾਂ ਕਾਫ਼ੀ ਵਧਾ ਦਿੱਤੀਆਂ ਹਨ। ਦਰਅਸਲ, Reuters ਦੀ ਇੱਕ ਰਿਪੋਰਟ ਮੁਤਾਬਕ, ਇਸ ਸਾਲ ਦੀ ਸ਼ੁਰੂਆਤ ’ਚ OpenAI ਦੇ ਕਈ AI Agents ਨੇ ਇੱਕ ਜਰਮਨ Wiki ਸਾਈਟ ਨੂੰ ਕਥਿਤ ਤੌਰ ’ਤੇ ਆਪਣੇ ਕੰਟਰੋਲ ’ਚ ਲੈ ਲਿਆ ਤੇ ਟੈਸਟਿੰਗ ਦੌਰਾਨ ਇਸ ਦੀ ਵਰਤੋਂ ਅਣਉਚਿਤ ਗਤੀਵਿਧੀਆਂ ਲਈ ਵੀ ਕੀਤੀ।

ਮਾਮਲੇ ’ਤੇ ਕੰਪਨੀ ਨੇ ਕੀ ਕਿਹਾ?

ਇਸ ਮਾਮਲੇ ’ਤੇ ਪ੍ਰਤੀਕਿਰਿਆ ਦਿੰਦਿਆਂ OpenAI ਨੇ ਕਿਹਾ ਕਿ ਉਸਦੇ AI Agents ਨੇ ਵੈੱਬਸਾਈਟ ਦੀ ਵਰਤੋਂ ਇੱਕ ‘im-prompt message board’ ਵਾਂਗ ਕੀਤੀ। ਕੰਪਨੀ ਨੇ ਇਹ ਵੀ ਮੰਨਿਆ ਹੈ ਕਿ AI ਨਾਲ ਜੁੜੇ ਇਸ ਤਰ੍ਹਾਂ ਦੇ ਅਣਚਾਹੇ ਵਿਹਾਰ ਤੇ ਘਟਨਾਵਾਂ ਬਾਰੇ ਵਧੇਰੇ ਪਾਰਦਰਸ਼ਤਾ ਦੀ ਲੋੜ ਹੈ। ਰਿਪੋਰਟ ਮੁਤਾਬਕ, ਇਹ ਘਟਨਾ ਉਸ ਸਮੇਂ ਸਾਹਮਣੇ ਆਈ ਹੈ ਜਦੋਂ AI ਸੁਰੱਖਿਆ ਨੂੰ ਲੈ ਕੇ ਚਿੰਤਾਵਾਂ ਲਗਾਤਾਰ ਵੱਧ ਰਹੀਆਂ ਹਨ।

ਪਹਿਲਾਂ ਵੀ ਸਾਹਮਣੇ ਆਇਆ ਸੀ ਅਜਿਹਾ ਮਾਮਲਾ

ਇਸ ਤੋਂ ਪਹਿਲਾਂ ਜੁਲਾਈ ’ਚ ਵੀ ਇੱਕ ਅਜਿਹਾ ਮਾਮਲਾ ਸਾਹਮਣੇ ਆਇਆ ਸੀ, ਜਿਸ ’ਚ OpenAI ਦੇ Agents ਕਥਿਤ ਤੌਰ ’ਤੇ ਇੱਕ ਟੈਸਟਿੰਗ ਵਾਤਾਵਰਣ ਤੋਂ ਬਾਹਰ ਨਿਕਲ ਗਏ ਸਨ ਤੇ AI ਪਲੇਟਫਾਰਮ Hugging Face ਦੇ ਸਿਸਟਮ ਤੱਕ ਪਹੁੰਚ ਬਣਾਈ ਸੀ। ਇਸ ਘਟਨਾ ਤੋਂ ਬਾਅਦ ਕਾਨੂੰਨ ਬਣਾਉਣ ਵਾਲਿਆਂ ਤੇ ਰਿਸਰਚਰਾਂ ਨੇ Autonomous AI Systems ’ਤੇ ਹੋਰ ਸਖ਼ਤ ਨਿਗਰਾਨੀ ਦੀ ਮੰਗ ਕੀਤੀ ਸੀ।

ਕੰਪਨੀ ਨੂੰ ਪਹਿਲਾਂ ਹੀ ਜਾਣਕਾਰੀ ਸੀ

ਇੰਨਾ ਹੀ ਨਹੀਂ, Reuters ਦੀ ਰਿਪੋਰਟ ’ਚ ਇਹ ਵੀ ਦੱਸਿਆ ਗਿਆ ਹੈ ਕਿ OpenAI ਦੇ ਅਧਿਕਾਰੀਆਂ ਨੂੰ ਜਰਮਨ Wiki ਸਾਈਟ ਨਾਲ ਜੁੜੇ ਇਸ ਮਾਮਲੇ ਦੀ ਜਾਣਕਾਰੀ ਕਈ ਹਫ਼ਤੇ ਪਹਿਲਾਂ ਹੀ ਮਿਲ ਗਈ ਸੀ। ਹਾਲਾਂਕਿ, ਇਸ ਘਟਨਾ ਦੇ ਜਨਤਕ ਤੌਰ ’ਤੇ ਸਾਹਮਣੇ ਆਉਣ ’ਚ ਸਮਾਂ ਲੱਗ ਗਿਆ। ਕੰਪਨੀ ਨੇ Reuters ਦੀ ਰਿਪੋਰਟ ਪ੍ਰਕਾਸ਼ਿਤ ਹੋਣ ਤੋਂ ਬਾਅਦ ਇਸ ਘਟਨਾ ਬਾਰੇ ਆਪਣਾ ਬਿਆਨ ਜਾਰੀ ਕੀਤਾ।