- ਸ਼ਹਿਰ ਚੁਣੋ
- ਈ-ਪੇਪਰ
- ਵੈੱਬ ਸਟੋਰੀਜ਼
- ਸ਼ਹਿਰ ਚੁਣੋ
- ਈ-ਪੇਪਰ
- ਵੈੱਬ ਸਟੋਰੀਜ਼
ਬੇਕਾਰ ਪਏ ਪੁਰਾਣੇ ਫ਼ੋਨ ਨੂੰ ਦਿਓ ਨਵੀਂ ਜ਼ਿੰਦਗੀ, 10 ਸੁਪਰ-ਯੂਜ਼ਫੁੱਲ ਤਰੀਕੇ ਜੋ ਬਚਾਉਣਗੇ ਤੁਹਾਡੇ ਹਜ਼ਾਰਾਂ ਰੁਪਏ!
ਜੇਕਰ ਤੁਸੀਂ ਆਪਣਾ ਡਾਟਾ ਨਵੇਂ ਫੋਨ ’ਚ ਟਰਾਂਸਫਰ ਕਰ ਲਿਆ ਹੈ ਤੇ ਪੁਰਾਣੇ ਫੋਨ ਨੂੰ ਕਿਸੇ ਹੋਰ ਕੰਮ ਲਈ ਵਰਤਣਾ ਚਾਹੁੰਦੇ ਹੋ ਤਾਂ ਤੁਸੀਂ ਇਸ ਨੂੰ ਇੱਕ ਉਪਯੋਗੀ ਗੈਜੇਟ ’ਚ ਬਦਲ ਸਕਦੇ ਹੋ।
Posted By Paramjit Kaur
Publish Date: Wed, 23 Sep 2026 03:42 PM (IST)
Updated Date: Wed, 23 Sep 2026 03:44 PM (IST)
ਟੈਕਨਾਲੋਜੀ ਡੈਸਕ, ਨਵੀਂ ਦਿੱਲੀ : ਨਵਾਂ ਸਮਾਰਟਫੋਨ ਖਰੀਦਣ ਤੋਂ ਬਾਅਦ ਸਭ ਤੋਂ ਵੱਡਾ ਸਵਾਲ ਇਹ ਹੁੰਦਾ ਹੈ ਕਿ ਪੁਰਾਣੇ ਫੋਨ ਦਾ ਕੀ ਕੀਤਾ ਜਾਵੇ। ਅਕਸਰ ਪੁਰਾਣਾ ਫੋਨ ਅਲਮਾਰੀ ਜਾਂ ਦਰਾਜ਼ ’ਚ ਪਿਆ ਰਹਿੰਦਾ ਹੈ, ਜਦਕਿ ਇਸ ’ਚ ਕੈਮਰਾ, GPS, ਸਟੋਰੇਜ ਤੇ ਕਈ ਹੋਰ ਅਜਿਹੇ ਫੀਚਰ ਹੁੰਦੇ ਹਨ, ਜਿਨ੍ਹਾਂ ਨੂੰ ਮੁੜ ਵਰਤਿਆ ਜਾ ਸਕਦਾ ਹੈ। ਹਾਲਾਂਕਿ AI ਦੇ ਦੌਰ ’ਚ ਫੋਨ ’ਚ ਮੌਜੂਦ ਨਿੱਜੀ ਫੋਟੋਆਂ, ਦਸਤਾਵੇਜ਼, ਪਾਸਵਰਡ ਤੇ ਹੋਰ ਡਾਟਾ ਦੀ ਸੁਰੱਖਿਆ ਪਹਿਲਾਂ ਨਾਲੋਂ ਜ਼ਿਆਦਾ ਜ਼ਰੂਰੀ ਹੋ ਗਈ ਹੈ। ਇਸ ਲਈ ਪੁਰਾਣੇ ਫੋਨ ਨੂੰ ਕਿਸੇ ਕੰਮ ’ਚ ਲਗਾਉਣ ਤੋਂ ਪਹਿਲਾਂ ਡਾਟਾ ਸੁਰੱਖਿਆ ਦਾ ਧਿਆਨ ਰੱਖਣਾ ਵੀ ਜ਼ਰੂਰੀ ਹੈ।
ਬਣਾਓ ਸਕਿਓਰਿਟੀ ਕੈਮਰਾ ![naidunia_image]()
ਪੁਰਾਣੇ ਫੋਨ ਨੂੰ ਘਰ ਦੇ ਸਕਿਓਰਿਟੀ ਕੈਮਰੇ ਜਾਂ ਬੇਬੀ ਮਾਨੀਟਰ ਵਜੋਂ ਵਰਤਿਆ ਜਾ ਸਕਦਾ ਹੈ। ਇਸ ਲਈ ਵੱਖਰਾ ਮਹਿੰਗਾ ਕੈਮਰਾ ਖਰੀਦਣ ਦੀ ਲੋੜ ਨਹੀਂ ਹੈ। ਫੋਨ ’ਚ ਬੇਬੀ ਕੈਮ ਜਾਂ IP ਫੋਨ ਕੈਮਰਾ ਵਰਗੀਆਂ ਐਪਸ ਇੰਸਟਾਲ ਕਰਕੇ ਇਸ ਨੂੰ ਕੈਮਰੇ ’ਚ ਬਦਲਿਆ ਜਾ ਸਕਦਾ ਹੈ। ਐਪ ਸੈੱਟਅੱਪ ਕਰਨ ਤੋਂ ਬਾਅਦ ਫੋਨ ਨੂੰ ਅਜਿਹੀ ਥਾਂ ਰੱਖੋ, ਜਿੱਥੋਂ ਕਮਰੇ ਜਾਂ ਘਰ ਦੇ ਉਸ ਹਿੱਸੇ ਦਾ ਸਾਫ਼ ਦ੍ਰਿਸ਼ ਮਿਲੇ, ਜਿਸ 'ਤੇ ਨਜ਼ਰ ਰੱਖਣੀ ਹੈ। ਫੋਨ ਨੂੰ ਚਾਰਜਰ ਨਾਲ ਕਨੈਕਟ ਰੱਖਣਾ ਬਿਹਤਰ ਹੋਵੇਗਾ, ਤਾਂ ਜੋ ਇਹ ਲੰਬੇ ਸਮੇਂ ਤੱਕ ਕੈਮਰੇ ਵਜੋਂ ਕੰਮ ਕਰ ਸਕੇ। ਕੁਝ ਐਪਸ ਲਾਈਵ ਵੀਡੀਓ ਦੇਖਣ, ਆਡੀਓ ਸੁਣਨ ਤੇ ਫੋਟੋ ਜਾਂ ਵੀਡੀਓ ਰਿਕਾਰਡ ਕਰਨ ਦੀ ਸਹੂਲਤ ਵੀ ਦਿੰਦੀਆਂ ਹਨ।
ਡੈਸ਼ਕੈਮ ’ਚ ਬਦਲੋ
ਜੇਕਰ ਪੁਰਾਣੇ ਫੋਨ ਦਾ ਕੈਮਰਾ ਅਜੇ ਵੀ ਠੀਕ ਹੈ ਤਾਂ ਇਸ ਨੂੰ ਕਾਰ ਦੇ ਡੈਸ਼ਕੈਮ ਵਜੋਂ ਵਰਤਿਆ ਜਾ ਸਕਦਾ ਹੈ। ਫੋਨ ਨੂੰ ਕਾਰ ਦੇ ਡੈਸ਼ਬੋਰਡ ਜਾਂ ਵਿੰਡਸ਼ੀਲਡ 'ਤੇ ਮਾਊਂਟ ਕਰਕੇ ਸੜਕ ਦੀ ਰਿਕਾਰਡਿੰਗ ਕੀਤੀ ਜਾ ਸਕਦੀ ਹੈ। ਇਸ ਲਈ ਡੈਸ਼ ਕੈਮ ਟਰੈਵਲ ਐਪ ਤੋਂ ਇਲਾਵਾ ਗੂਗਲ ਪਲੇ ਸਟੋਰ 'ਤੇ ਹੋਰ ਵੀ ਕਈ ਵਿਕਲਪ ਮਿਲ ਜਾਣਗੇ। ਫੋਨ ਨੂੰ ਲਗਾਤਾਰ ਰਿਕਾਰਡਿੰਗ ਲਈ ਵਰਤਦੇ ਸਮੇਂ ਇਸ ਨੂੰ ਕਾਰ ਦੇ ਚਾਰਜਿੰਗ ਪੋਰਟ ਨਾਲ ਕਨੈਕਟ ਰੱਖਣਾ ਜ਼ਰੂਰੀ ਹੈ। ਧਿਆਨ ਰੱਖੋ ਕਿ ਫੋਨ ਨੂੰ ਅਜਿਹੀ ਥਾਂ ਨਾ ਲਗਾਇਆ ਜਾਵੇ, ਜਿੱਥੋਂ ਡਰਾਈਵਰ ਦਾ ਦ੍ਰਿਸ਼ਟੀਕੋਣ ਰੁਕਾਵਟ ਵਾਲਾ ਹੋਵੇ।
ਐਂਡਰਾਇਡ ਆਟੋ ਵਰਗਾ ਐਕਸਪੀਰੀਅੰਸ
ਜੇਕਰ ਤੁਹਾਡੀ ਕਾਰ ’ਚ ਐਂਡਰਾਇਡ ਆਟੋ ਨਹੀਂ ਹੈ ਤਾਂ ਪੁਰਾਣੇ ਫੋਨ ਜਾਂ ਟੈਬਲੇਟ ਨੂੰ ਕਾਰ ਲਈ ਇੱਕ ਵੱਖਰੀ ਸਕਰੀਨ ਵਜੋਂ ਵਰਤਿਆ ਜਾ ਸਕਦਾ ਹੈ। ਇਸ ਲਈ ਕਾਰ ਲਾਂਚਰ, ਆਟੋਜ਼ੇਨ ਤੇ ਆਟੋਮੇਟ ਵਰਗੀਆਂ ਐਪਸ ਦੀ ਵਰਤੋਂ ਕੀਤੀ ਜਾ ਸਕਦੀ ਹੈ। ਇਨ੍ਹਾਂ ’ਚ ਮੈਪ, ਮਿਊਜ਼ਿਕ ਤੇ ਹੋਰ ਜ਼ਰੂਰੀ ਚੀਜ਼ਾਂ ਨੂੰ ਵੱਡੇ ਆਈਕਨ ਨਾਲ ਐਕਸੈੱਸ ਕੀਤਾ ਜਾ ਸਕਦਾ ਹੈ। ਹਾਲਾਂਕਿ ਡਰਾਈਵਿੰਗ ਦੌਰਾਨ ਫੋਨ ਨੂੰ ਹੱਥ ’ਚ ਲੈ ਕੇ ਵਰਤਣ ਦੀ ਬਜਾਏ ਇਸ ਨੂੰ ਸੁਰੱਖਿਅਤ ਮਾਊਂਟ 'ਤੇ ਲਗਾਉਣਾ ਚਾਹੀਦਾ ਹੈ।
ਬਣਾਓ ਈ-ਬੁੱਕ ਰੀਡਰ
ਜੇਕਰ ਤੁਹਾਨੂੰ ਕਿਤਾਬਾਂ ਪੜ੍ਹਨ ਦਾ ਸ਼ੌਕ ਹੈ ਤਾਂ ਪੁਰਾਣੇ ਫੋਨ ਨੂੰ ਵੱਖਰੇ ਈ-ਬੁੱਕ ਰੀਡਰ ’ਚ ਬਦਲ ਸਕਦੇ ਹੋ। ਕਿੰਡਲ, ਗੂਗਲ ਪਲੇ ਬੁਕਸ ਤੇ ਮੂਨ+ ਰੀਡਰ ਵਰਗੀਆਂ ਐਪਸ ਰਾਹੀਂ ਕਿਤਾਬਾਂ, ਮੈਗਜ਼ੀਨ ਤੇ ਕਾਮਿਕਸ ਪੜ੍ਹੀਆਂ ਜਾ ਸਕਦੀਆਂ ਹਨ। ਪੜ੍ਹਦੇ ਸਮੇਂ ਵਾਰ-ਵਾਰ ਆਉਣ ਵਾਲੀਆਂ ਨੋਟੀਫਿਕੇਸ਼ਨਾਂ ਪਰੇਸ਼ਾਨ ਨਾ ਕਰਨ, ਇਸ ਲਈ ਨੋਟੀਫਿਕੇਸ਼ਨ ਬੰਦ ਕੀਤੇ ਜਾ ਸਕਦੇ ਹਨ। ਫੋਨ ’ਚ ਸਿੰਪਲ ਲਾਂਚਰ ਜਾਂ ਗ੍ਰੇਸਕੇਲ ਮੋਡ ਦੀ ਵਰਤੋਂ ਵੀ ਕੀਤੀ ਜਾ ਸਕਦੀ ਹੈ। ਇਸ ਨਾਲ ਸਕ੍ਰੀਨ 'ਤੇ ਰੰਗ ਘੱਟ ਹੋਣ ਕਾਰਨ ਪੜ੍ਹਨ ਦਾ ਤਜਰਬਾ ਵਧੇਰੇ ਆਰਾਮਦਾਇਕ ਲੱਗ ਸਕਦਾ ਹੈ।
ਗੇਮਿੰਗ ਲਈ ਵੱਖਰਾ ਫੋਨ
ਨਵੇਂ ਫੋਨ ਦੀ ਬੈਟਰੀ ਗੇਮਿੰਗ ’ਚ ਖਰਚ ਕਰਨ ਦੀ ਬਜਾਏ ਪੁਰਾਣੇ ਫੋਨ ਨੂੰ ਗੇਮਿੰਗ ਡਿਵਾਈਸ ਬਣਾਇਆ ਜਾ ਸਕਦਾ ਹੈ। ਜੇਕਰ ਪੁਰਾਣੇ ਫੋਨ ਦਾ ਹਾਰਡਵੇਅਰ ਠੀਕ ਹੈ ਤਾਂ ਇਸ ’ਚ ਪਲੇ ਸਟੋਰ ਤੋਂ ਗੇਮ ਡਾਊਨਲੋਡ ਕੀਤੀਆਂ ਜਾ ਸਕਦੀਆਂ ਹਨ। ਕਲਾਊਡ ਗੇਮਿੰਗ ਲਈ ਐਕਸਬਾਕਸ ਕਲਾਊਡ ਗੇਮਿੰਗ, ਐਨਵੀਡੀਆ ਜੀਫੋਰਸ ਨਾਓ ਤੇ ਸਟੀਮ ਲਿੰਕ ਵਰਗੀਆਂ ਸੇਵਾਵਾਂ ਦੀ ਵਰਤੋਂ ਕੀਤੀ ਜਾ ਸਕਦੀ ਹੈ। ਪੁਰਾਣੀਆਂ ਗੇਮਾਂ ਖੇਡਣ ਵਾਲਿਆਂ ਲਈ ਐਂਡਰਾਇਡ ਐਮੂਲੇਟਰ ਵੀ ਇੱਕ ਵਿਕਲਪ ਹੋ ਸਕਦਾ ਹੈ। ਇਸ ਤਰ੍ਹਾਂ ਪੁਰਾਣਾ ਫੋਨ ਇੱਕ ਵੱਖਰਾ ਹੈਂਡਹੈਲਡ ਗੇਮਿੰਗ ਡਿਵਾਈਸ ਬਣ ਸਕਦਾ ਹੈ।
ਡਿਜੀਟਲ ਘੜੀ ਬਣਾਓ
ਜੇਕਰ ਪੁਰਾਣਾ ਫੋਨ ਜ਼ਿਆਦਾ ਪਾਵਰਫੁੱਲ ਨਹੀਂ ਹੈ ਤਾਂ ਇਸ ਨੂੰ ਬੈੱਡਸਾਈਡ ਡਿਜੀਟਲ ਘੜੀ ’ਚ ਬਦਲਿਆ ਜਾ ਸਕਦਾ ਹੈ। ਇਸ ਲਈ ਫਲਿੱਪ ਕਲਾਕ ਵਰਗੀ ਐਪ ਇੰਸਟਾਲ ਕਰਕੇ ਫੋਨ ਨੂੰ ਸਟੈਂਡ 'ਤੇ ਰੱਖਿਆ ਜਾ ਸਕਦਾ ਹੈ। ਜੇਕਰ ਤੁਹਾਡੇ ਕੋਲ ਵਾਇਰਲੈੱਸ ਚਾਰਜਿੰਗ ਵਾਲਾ ਸਟੈਂਡ ਹੈ ਤਾਂ ਲੰਬੇ ਸਮੇਂ ਤੱਕ ਵਰਤੋਂ ਕਰਨਾ ਹੋਰ ਵੀ ਆਸਾਨ ਹੋ ਜਾਵੇਗਾ। ਫੋਨ ਨੂੰ ਡਿਜੀਟਲ ਫੋਟੋ ਫਰੇਮ ਵਜੋਂ ਵੀ ਵਰਤਿਆ ਜਾ ਸਕਦਾ ਹੈ। ਗੂਗਲ ਫੋਟੋਜ਼ ’ਚ ਸਲਾਈਡਸ਼ੋ ਫੀਚਰ ਦੀ ਮਦਦ ਨਾਲ ਫੋਨ ਦੀ ਸਕ੍ਰੀਨ 'ਤੇ ਆਪਣੀਆਂ ਪਸੰਦੀਦਾ ਤਸਵੀਰਾਂ ਦਿਖਾਈਆਂ ਜਾ ਸਕਦੀਆਂ ਹਨ। ਉੱਥੇ ਹੀ ਫੋਟੋ ਵਰਗੀਆਂ ਐਪਸ ’ਚ ਵੱਖ-ਵੱਖ ਕਲਾਊਡ ਸਟੋਰੇਜ ਤੋਂ ਫੋਟੋ ਲੈ ਕੇ ਸਲਾਈਡਸ਼ੋ ਚਲਾਉਣ ਤੇ ਟ੍ਰਾਂਜ਼ਿਸ਼ਨ ਬਦਲਣ ਵਰਗੇ ਵਿਕਲਪ ਵੀ ਮਿਲ ਸਕਦੇ ਹਨ।
ਬਣਾਓ GPS ਟ੍ਰੈਕਰ
ਪੁਰਾਣੇ ਐਂਡਰਾਇਡ ਫੋਨ ਨੂੰ ਲੋਕੇਸ਼ਨ ਟ੍ਰੈਕਿੰਗ ਲਈ ਵੀ ਵਰਤਿਆ ਜਾ ਸਕਦਾ ਹੈ। ਫੋਨ ’ਚ ਗੂਗਲ ਦਾ Find Hub ਫੀਚਰ ਮੌਜੂਦ ਹੈ, ਜਿਸ ਦੀ ਵਰਤੋਂ ਡਿਵਾਈਸ ਦੀ ਲੋਕੇਸ਼ਨ ਪਤਾ ਕਰਨ ਲਈ ਕੀਤੀ ਜਾ ਸਕਦੀ ਹੈ। ਇਸ ਨੂੰ ਕਾਰ ’ਚ ਸੁਰੱਖਿਅਤ ਥਾਂ 'ਤੇ ਰੱਖ ਕੇ ਲੋਕੇਸ਼ਨ ਦੀ ਜਾਣਕਾਰੀ ਲਈ ਜਾ ਸਕਦੀ ਹੈ। ਹਾਲਾਂਕਿ ਕਿਸੇ ਹੋਰ ਵਿਅਕਤੀ ਦੀ ਲੋਕੇਸ਼ਨ ਟ੍ਰੈਕ ਕਰਨ ਲਈ ਉਸ ਦੀ ਜਾਣਕਾਰੀ ਤੇ ਸਹਿਮਤੀ ਜ਼ਰੂਰੀ ਹੈ। ਫੋਨ ਦੀ ਬੈਟਰੀ ਜਲਦੀ ਖ਼ਤਮ ਨਾ ਹੋਵੇ, ਇਸ ਲਈ ਛੋਟਾ ਪਾਵਰ ਬੈਂਕ ਵੀ ਨਾਲ ਰੱਖਿਆ ਜਾ ਸਕਦਾ ਹੈ।
Wi-Fi ਰੀਪੀਟਰ
ਕੁਝ ਪੁਰਾਣੇ ਐਂਡਰਾਇਡ ਫੋਨਾਂ ਨੂੰ Wi-Fi ਰੀਪੀਟਰ ਵਜੋਂ ਵਰਤਿਆ ਜਾ ਸਕਦਾ ਹੈ। ਇਸ ਲਈ ਫੋਨ ’ਚ Wi-Fi ਨਾਲ ਕਨੈਕਟ ਰਹਿੰਦੇ ਹੋਏ ਹੌਟਸਪੌਟ ਚਲਾਉਣ ਦਾ ਵਿਕਲਪ ਹੋਣਾ ਜ਼ਰੂਰੀ ਹੈ। ਜੇਕਰ ਤੁਹਾਡਾ ਪੁਰਾਣਾ ਫੋਨ ਇਸ ਸਹੂਲਤ ਨੂੰ ਸਪੋਰਟ ਕਰਦਾ ਹੈ ਤਾਂ ਇਸ ਨੂੰ ਉਸ ਥਾਂ ਰੱਖਿਆ ਜਾ ਸਕਦਾ ਹੈ, ਜਿੱਥੇ ਘਰ ’ਚ Wi-Fi ਸਿਗਨਲ ਕਮਜ਼ੋਰ ਆਉਂਦਾ ਹੈ। ਹਾਲਾਂਕਿ ਪੁਰਾਣੇ ਫੋਨ ਤੋਂ ਮਿਲਣ ਵਾਲੀ ਨੈੱਟਵਰਕ ਪਰਫਾਰਮੈਂਸ ਕਿਸੇ ਖ਼ਾਸ Wi-Fi ਐਕਸਟੈਂਡਰ ਜਿੰਨੀ ਚੰਗੀ ਨਹੀਂ ਹੋਵੇਗੀ, ਪਰ ਛੋਟੇ ਡੈੱਡ ਜ਼ੋਨ ਲਈ ਇਹ ਇੱਕ ਸਸਤਾ ਵਿਕਲਪ ਹੋ ਸਕਦਾ ਹੈ।
ਲੈਪਟਾਪ ਦੀ ਸੈਕੰਡ ਸਕ੍ਰੀਨ
ਪੁਰਾਣੇ ਫੋਨ ਦੀ ਵੱਡੀ ਸਕ੍ਰੀਨ ਨੂੰ ਲੈਪਟਾਪ ਜਾਂ PC ਲਈ ਸੈਕੰਡ ਸਕ੍ਰੀਨ ਵਜੋਂ ਵਰਤਿਆ ਜਾ ਸਕਦਾ ਹੈ। ਵਿੰਡੋਜ਼ ਕੰਪਿਊਟਰ ਨਾਲ ਸਪੇਸਡੈਸਕ ਵਰਗੀ ਐਪ ਰਾਹੀਂ ਫੋਨ ਨੂੰ ਦੂਜੀ ਸਕ੍ਰੀਨ ’ਚ ਬਦਲਿਆ ਜਾ ਸਕਦਾ ਹੈ। ਫੋਨ ਨੂੰ Wi-Fi ਰਾਹੀਂ ਕਨੈਕਟ ਕੀਤਾ ਜਾ ਸਕਦਾ ਹੈ, ਪਰ ਵਧੇਰੇ ਸਥਿਰ ਕਨੈਕਸ਼ਨ ਲਈ USB ਕੇਬਲ ਬਿਹਤਰ ਵਿਕਲਪ ਹੋ ਸਕਦੀ ਹੈ। ਕਨੈਕਸ਼ਨ ਹੋਣ ਤੋਂ ਬਾਅਦ ਕੰਪਿਊਟਰ ਦੀ ਸਕ੍ਰੀਨ ਨੂੰ ਫੋਨ ਤੱਕ ਐਕਸਟੈਂਡ ਕੀਤਾ ਜਾ ਸਕਦਾ ਹੈ ਤੇ ਵੱਖ-ਵੱਖ ਐਪਸ ਨੂੰ ਦੂਜੀ ਸਕ੍ਰੀਨ 'ਤੇ ਰੱਖਿਆ ਜਾ ਸਕਦਾ ਹੈ। ਇਸੇ ਤਰ੍ਹਾਂ ਕੁਝ ਐਪਸ ਦੀ ਮਦਦ ਨਾਲ ਪੁਰਾਣੇ ਫੋਨ ਨੂੰ ਕੰਪਿਊਟਰ ਦੇ ਵੈਬਕੈਮ, ਮਾਈਕ੍ਰੋਫੋਨ ਜਾਂ ਸਪੀਕਰ ਵਜੋਂ ਵੀ ਵਰਤਿਆ ਜਾ ਸਕਦਾ ਹੈ।
ਪੁਰਾਣੇ ਫੋਨ ਦਾ ਡਾਟਾ ਕਿਵੇਂ ਸੁਰੱਖਿਅਤ ਕਰੀਏ?
ਪੁਰਾਣੇ ਫੋਨ ਨੂੰ ਦੁਬਾਰਾ ਵਰਤਣ ਤੋਂ ਪਹਿਲਾਂ ਸਭ ਤੋਂ ਜ਼ਰੂਰੀ ਕੰਮ ਡਾਟਾ ਦੀ ਸੁਰੱਖਿਆ ਹੈ। AI ਦੇ ਦੌਰ ’ਚ ਫੋਨ ’ਚ ਸਿਰਫ਼ ਫੋਟੋ ਤੇ ਵੀਡੀਓ ਹੀ ਨਹੀਂ, ਸਗੋਂ ਬੈਂਕਿੰਗ ਐਪਸ, ਈਮੇਲ, ਸੋਸ਼ਲ ਮੀਡੀਆ ਅਕਾਊਂਟ, ਪਾਸਵਰਡ, ਕਨਟੈਕਟ ਤੇ ਨਿੱਜੀ ਦਸਤਾਵੇਜ਼ ਵਰਗੀਆਂ ਕਈ ਸੰਵੇਦਨਸ਼ੀਲ ਚੀਜ਼ਾਂ ਮੌਜੂਦ ਰਹਿੰਦੀਆਂ ਹਨ। ਜੇਕਰ ਪੁਰਾਣਾ ਫੋਨ ਕਿਸੇ ਹੋਰ ਵਿਅਕਤੀ ਨੂੰ ਦੇਣਾ ਜਾਂ ਵੇਚਣਾ ਹੈ ਤਾਂ ਸਿਰਫ਼ ਫੋਟੋਆਂ ਤੇ ਐਪਸ ਡਿਲੀਟ ਕਰਨਾ ਕਾਫ਼ੀ ਨਹੀਂ ਹੈ। ਸਭ ਤੋਂ ਪਹਿਲਾਂ ਜ਼ਰੂਰੀ ਡਾਟਾ ਦਾ ਬੈਕਅੱਪ ਨਵੇਂ ਫੋਨ ਜਾਂ ਸੁਰੱਖਿਅਤ ਕਲਾਊਡ ਸਟੋਰੇਜ ’ਚ ਲਓ। ਇਸ ਤੋਂ ਬਾਅਦ ਪੁਰਾਣੇ ਫੋਨ ਤੋਂ ਗੂਗਲ ਜਾਂ ਹੋਰ ਅਕਾਊਂਟ ਹਟਾਓ ਤੇ ਸਕ੍ਰੀਨ ਲਾਕ, ਬੈਂਕਿੰਗ ਐਪ ਤੇ ਪਾਸਵਰਡ ਨਾਲ ਜੁੜੀ ਜਾਣਕਾਰੀ ਨੂੰ ਚੈੱਕ ਕਰੋ। ਜੇਕਰ ਫੋਨ ਕਿਸੇ ਹੋਰ ਵਿਅਕਤੀ ਨੂੰ ਦੇਣਾ ਹੈ ਤਾਂ ਸਭ ਤੋਂ ਸੁਰੱਖਿਅਤ ਤਰੀਕਾ ਫੈਕਟਰੀ ਰੀਸੈੱਟ ਕਰਨਾ ਹੈ। ਰੀਸੈੱਟ ਕਰਨ ਤੋਂ ਪਹਿਲਾਂ ਇਹ ਯਕੀਨੀ ਬਣਾਓ ਕਿ ਜ਼ਰੂਰੀ ਡਾਟਾ ਦਾ ਬੈਕਅੱਪ ਹੋ ਚੁੱਕਾ ਹੈ ਤੇ ਪੁਰਾਣੇ ਫੋਨ ਤੋਂ ਤੁਹਾਡਾ ਗੂਗਲ ਅਕਾਊਂਟ ਜਾਂ ਹੋਰ ਜ਼ਰੂਰੀ ਅਕਾਊਂਟ ਹਟਾ ਦਿੱਤੇ ਗਏ ਹਨ।
ਡਾਟਾ ਨੂੰ ਲੈ ਕੇ ਰਹੋ ਸਾਵਧਾਨ
ਅੱਜਕੱਲ੍ਹ AI ਐਪਸ ਤੇ ਸਮਾਰਟ ਟੂਲਸ ਦੀ ਵਰਤੋਂ ਫੋਟੋ ਐਡਿਟਿੰਗ, ਦਸਤਾਵੇਜ਼ ਸਕੈਨਿੰਗ, ਟ੍ਰਾਂਸਲੇਸ਼ਨ ਤੇ ਹੋਰ ਕੰਮਾਂ ਲਈ ਤੇਜ਼ੀ ਨਾਲ ਵੱਧ ਰਹੀ ਹੈ। ਇਸ ਲਈ ਪੁਰਾਣੇ ਫੋਨ ’ਚ ਮੌਜੂਦ ਨਿੱਜੀ ਫੋਟੋਆਂ, ਦਸਤਾਵੇਜ਼ ਜਾਂ ਹੋਰ ਜਾਣਕਾਰੀ ਨੂੰ ਕਿਸੇ ਅਣਜਾਣ ਐਪ 'ਤੇ ਅਪਲੋਡ ਕਰਨ ਤੋਂ ਬਚੋ। ਜੇਕਰ ਪੁਰਾਣੇ ਫੋਨ ਨੂੰ ਸਕਿਓਰਿਟੀ ਕੈਮਰਾ, ਸਟੋਰੇਜ ਜਾਂ ਕਿਸੇ ਹੋਰ ਕੰਮ ਲਈ ਵਰਤ ਰਹੇ ਹੋ ਤਾਂ ਇਸ ’ਚ ਸੰਵੇਦਨਸ਼ੀਲ ਡਾਟਾ ਰੱਖਣ ਦੀ ਬਜਾਏ ਸਿਰਫ਼ ਜ਼ਰੂਰੀ ਫਾਈਲਾਂ ਹੀ ਰੱਖੋ। ਫੋਨ ’ਚ ਉਪਲਬਧ ਸੁਰੱਖਿਆ ਅਪਡੇਟ ਵੀ ਜ਼ਰੂਰ ਚੈੱਕ ਕਰੋ। ਜੇਕਰ ਡਿਵਾਈਸ ਬਹੁਤ ਪੁਰਾਣਾ ਹੈ ਤੇ ਲੰਬੇ ਸਮੇਂ ਤੋਂ ਸੁਰੱਖਿਆ ਅਪਡੇਟ ਨਹੀਂ ਮਿਲਿਆ ਹੈ ਤਾਂ ਇਸ ਨੂੰ ਬੈਂਕਿੰਗ ਜਾਂ ਹੋਰ ਸੰਵੇਦਨਸ਼ੀਲ ਕੰਮਾਂ ਲਈ ਵਰਤਣ ਤੋਂ ਬਚੋ। ਥੋੜ੍ਹੀ ਜਿਹੀ ਸਾਵਧਾਨੀ ਨਾਲ ਪੁਰਾਣੇ ਫੋਨ ਨੂੰ ਸਕਿਓਰਿਟੀ ਕੈਮਰਾ, ਡੈਸ਼ਕੈਮ, ਈ-ਬੁੱਕ ਰੀਡਰ, ਗੇਮਿੰਗ ਡਿਵਾਈਸ, ਡਿਜੀਟਲ ਘੜੀ, GPS ਡਿਵਾਈਸ, ਸੈਕੰਡ ਸਕ੍ਰੀਨ ਜਾਂ ਪੋਰਟੇਬਲ ਸਟੋਰੇਜ ਵਰਗੇ ਕਈ ਕੰਮਾਂ ਲਈ ਵਰਤਿਆ ਜਾ ਸਕਦਾ ਹੈ। ਪਰ ਜੇਕਰ ਫੋਨ ਕਿਸੇ ਹੋਰ ਵਿਅਕਤੀ ਨੂੰ ਦੇਣਾ ਜਾਂ ਵੇਚਣਾ ਹੈ ਤਾਂ ਸਭ ਤੋਂ ਪਹਿਲਾਂ ਡਾਟਾ ਦੀ ਸੁਰੱਖਿਆ ਨੂੰ ਤਰਜੀਹ ਦਿਓ।