iOS 27 ਅਪਡੇਟ ਇੰਸਟਾਲ ਕਰਦੇ ਸਮੇਂ ਨਾ ਕਰੋ ਇਹ 5 ਗ਼ਲਤੀਆਂ, ਨਹੀਂ ਤਾਂ ਹੋ ਸਕਦੀ ਹੈ ਪਰੇਸ਼ਾਨੀ

ਸਾਡੇ iPhone 16 Pro 'ਤੇ ਵੀ ਨਵਾਂ iOS 27 ਅਪਡੇਟ ਮਿਲ ਗਿਆ ਹੈ, ਜਿਸ ਦਾ ਸਾਈਜ਼ 13.66GB ਹੈ। ਅਜਿਹੇ 'ਚ ਜੇਕਰ ਤੁਸੀਂ ਵੀ ਆਪਣੇ iPhone ਨੂੰ ਅਪਡੇਟ ਕਰਨ ਦੀ ਤਿਆਰੀ ਕਰ ਰਹੇ ਹੋ ਤਾਂ ਪਹਿਲਾਂ ਕੁਝ ਜ਼ਰੂਰੀ ਗੱਲਾਂ ਦਾ ਖ਼ਾਸ ਧਿਆਨ ਰੱਖੋ। ਨਵਾਂ iOS 27 ਅਪਡੇਟ ਇੰਸਟਾਲ ਕਰਦੇ ਸਮੇਂ ਇਹ 5 ਗ਼ਲਤੀਆਂ ਬਿਲਕੁਲ ਵੀ ਨਾ ਕਰੋ, ਨਹੀਂ ਤਾਂ ਤੁਹਾਡੇ iPhone 'ਚ ਸਮੱਸਿਆ ਆ ਸਕਦੀ ਹੈ...

ਬਿਨਾਂ ਬੈਕਅੱਪ ਲਏ ਨਾ ਕਰੋ ਅਪਡੇਟ

ਸਭ ਤੋਂ ਪਹਿਲਾਂ iOS 27 'ਚ ਅਪਡੇਟ ਕਰਨ ਤੋਂ ਪਹਿਲਾਂ ਆਪਣੇ ਜ਼ਰੂਰੀ ਡਾਟਾ ਦਾ iCloud ਜਾਂ ਕੰਪਿਊਟਰ 'ਚ ਬੈਕਅੱਪ ਲਓ। ਅਪਡੇਟ ਦੌਰਾਨ ਆਮ ਤੌਰ 'ਤੇ ਡਾਟਾ ਸੁਰੱਖਿਅਤ ਰਹਿੰਦਾ ਹੈ ਪਰ ਕਿਸੇ ਤਕਨੀਕੀ ਖ਼ਰਾਬੀ ਦੀ ਸਥਿਤੀ 'ਚ ਬੈਕਅੱਪ ਤੁਹਾਡੀਆਂ ਫ਼ੋਟੋਆਂ, ਵੀਡੀਓਜ਼, ਸੰਪਰਕ ਅਤੇ ਜ਼ਰੂਰੀ ਫ਼ਾਈਲਾਂ ਨੂੰ ਸੁਰੱਖਿਅਤ ਰੱਖਣ 'ਚ ਮਦਦ ਕਰ ਸਕਦਾ ਹੈ।

ਸਟੋਰੇਜ ਨੂੰ ਨਜ਼ਰਅੰਦਾਜ਼ ਨਾ ਕਰੋ

iOS 27 ਅਪਡੇਟ ਦਾ ਸਾਈਜ਼ ਕਾਫ਼ੀ ਵੱਡਾ ਹੈ। ਇਸ ਲਈ ਅਪਡੇਟ ਡਾਊਨਲੋਡ ਕਰਨ ਤੋਂ ਪਹਿਲਾਂ iPhone 'ਚ ਖ਼ਾਲੀ ਸਟੋਰੇਜ ਬਣਾ ਲਓ। ਜ਼ਰੂਰਤ ਪਵੇ ਤਾਂ ਫ਼ਾਲਤੂ ਵੀਡੀਓਜ਼, ਫ਼ੋਟੋਆਂ ਜਾਂ ਐਪਸ ਨੂੰ ਡਿਲੀਟ ਕਰ ਦਿਓ। ਫ਼ੋਟੋਆਂ-ਵੀਡੀਓਜ਼ ਨੂੰ ਕਲਾਊਡ 'ਚ ਸੇਵ ਕਰਕੇ ਥੋੜ੍ਹੀ ਜਗ੍ਹਾ ਬਣਾ ਲਓ।

ਘੱਟ ਬੈਟਰੀ 'ਚ ਨਾ ਕਰੋ ਅਪਡੇਟ

ਜੇਕਰ ਤੁਹਾਡੇ ਫ਼ੋਨ 'ਚ ਬੈਟਰੀ ਘੱਟ ਹੈ ਤਾਂ ਇੰਨਾ ਵੱਡਾ ਸਾਫ਼ਟਵੇਅਰ ਅਪਡੇਟ ਇੰਸਟਾਲ ਨਾ ਕਰੋ। ਅਪਡੇਟ ਸ਼ੁਰੂ ਕਰਨ ਤੋਂ ਪਹਿਲਾਂ ਫ਼ੋਨ ਨੂੰ ਚਾਰਜਰ ਨਾਲ ਕਨੈਕਟ ਕਰ ਲਓ ਜਾਂ ਪਹਿਲਾਂ ਘੱਟੋ-ਘੱਟ 80% ਬੈਟਰੀ ਚਾਰਜ ਕਰ ਲਓ, ਤਾਂ ਜੋ ਇੰਸਟਾਲੇਸ਼ਨ ਦੇ ਵਿਚਕਾਰ ਫ਼ੋਨ ਬੰਦ ਨਾ ਹੋਵੇ।

ਖ਼ਰਾਬ ਇੰਟਰਨੈੱਟ 'ਤੇ ਨਾ ਕਰੋ ਡਾਊਨਲੋਡ

ਨਵਾਂ iOS 27 ਅੱਪਡੇਟ ਡਾਊਨਲੋਡ ਕਰਨ ਲਈ ਸਥਿਰ ਅਤੇ ਤੇਜ਼ (Fast) Wi-Fi ਨੈੱਟਵਰਕ ਦੀ ਵਰਤੋਂ ਕਰੋ। ਖ਼ਰਾਬ ਇੰਟਰਨੈੱਟ ਕੁਨੈਕਸ਼ਨ ਕਾਰਨ ਡਾਊਨਲੋਡਿੰਗ 'ਚ ਕਾਫ਼ੀ ਸਮਾਂ ਲੱਗ ਸਕਦਾ ਹੈ ਜਾਂ ਪ੍ਰਕਿਰਿਆ ਵਿਚਕਾਰ ਹੀ ਰੁਕ ਸਕਦੀ ਹੈ।

ਅਪਡੇਟ ਦੇ ਸਮੇਂ iPhone ਬੰਦ ਨਾ ਕਰੋ

ਜੇਕਰ ਫ਼ੋਨ 'ਚ ਇੱਕ ਵਾਰ iOS 27 ਅੱਪਡੇਟ ਦੀ ਇੰਸਟਾਲੇਸ਼ਨ ਸ਼ੁਰੂ ਹੋ ਜਾਵੇ ਤਾਂ ਫ਼ੋਨ ਨੂੰ ਬੰਦ ਨਾ ਕਰੋ। ਫ਼ੋਨ ਨੂੰ ਰੀਸਟਾਰਟ ਕਰਨ ਜਾਂ ਜ਼ਬਰਦਸਤੀ ਕੋਈ ਬਟਨ ਦੱਬਣ ਦੀ ਕੋਸ਼ਿਸ਼ ਵੀ ਨਾ ਕਰੋ। ਇੰਸਟਾਲੇਸ਼ਨ ਪੂਰੀ ਹੋਣ 'ਚ ਕੁਝ ਸਮਾਂ ਲੱਗ ਸਕਦਾ ਹੈ ਅਤੇ ਇਸ ਦੌਰਾਨ iPhone ਕਈ ਵਾਰ ਰੀਸਟਾਰਟ ਵੀ ਹੋ ਸਕਦਾ ਹੈ।