Apple ਨੇ ਲਾਂਚ ਕੀਤਾ ਆਪਣਾ ਪਹਿਲਾ ਸਮਾਰਟ ਡਿਸਪਲੇ HomeView, ਫੇਸ ਰਿਕਗਨੀਸ਼ਨ ਨਾਲ ਲੈਸ; ਜਾਣੋ ਭਾਰਤ ’ਚ ਕਿੰਨੀ ਹੈ ਕੀਮਤ

ਟੈਕਨਾਲੋਜੀ ਡੈਸਕ, ਨਵੀਂ ਦਿੱਲੀ : Apple ਨੇ ਮੰਗਲਵਾਰ ਨੂੰ ਆਪਣੇ ਸਮਾਰਟ ਹੋਮ ਲਾਈਨਅੱਪ ’ਚ ਨਵੇਂ ਡਿਵਾਈਸ ਵਜੋਂ Apple HomeView ਲਾਂਚ ਕੀਤਾ ਹੈ। ਕੂਪਰਟੀਨੋ ਦੀ ਇਸ ਦਿੱਗਜ ਟੈਕ ਕੰਪਨੀ ਮੁਤਾਬਕ, ਇਹ ਡਿਵਾਈਸ ਇੱਕ ਬਿਲਕੁਲ ਨਵੀਂ ਕੈਟੇਗਰੀ ਤਿਆਰ ਕਰਦਾ ਹੈ, ਜੋ ਐਂਟਰਟੇਨਮੈਂਟ, ਕਮਿਊਨੀਕੇਸ਼ਨ ਤੇ ਹੋਮ ਆਟੋਮੇਸ਼ਨ ਨੂੰ ਇੱਕੋ ਥਾਂ ’ਤੇ ਲਿਆਉਂਦਾ ਹੈ।

Apple HomeView ’ਚ 7-ਇੰਚ ਦੀ Liquid Retina ਡਿਸਪਲੇਅ ਤੇ ਇਨ-ਬਿਲਟ ਸਪੀਕਰ ਸਿਸਟਮ ਦਿੱਤਾ ਗਿਆ ਹੈ। ਇਸ ’ਚ ਫੇਸ਼ੀਅਲ ਰਿਕਗਨੀਸ਼ਨ ਫੀਚਰ ਵੀ ਮੌਜੂਦ ਹੈ। Apple ਦਾ ਦਾਅਵਾ ਹੈ ਕਿ ਇਸ ਦੀ ਮਦਦ ਨਾਲ ਇੱਕੋ ਘਰ ਦੇ ਵੱਖ-ਵੱਖ ਮੈਂਬਰਾਂ ਨੂੰ ਉਨ੍ਹਾਂ ਦੀ ਪਸੰਦ ਮੁਤਾਬਕ ਨਿੱਜੀ ਤਜਰਬਾ ਮਿਲੇਗਾ। ਇਹ ਸਮਾਰਟ ਹੋਮ ਡਿਵਾਈਸ ਅਨੁਕੂਲ Apple ਡਿਵਾਈਸਾਂ ਰਾਹੀਂ ਨਿੱਜੀ ਜਵਾਬ ਦੇਣ ਲਈ Siri AI ਨੂੰ ਸਪੋਰਟ ਕਰਦਾ ਹੈ।

Apple HomeView ਦੀ ਭਾਰਤ ’ਚ ਕੀਮਤ ਤੇ ਉਪਲਬਧਤਾ

ਭਾਰਤ ’ਚ Apple HomeView ਦੀ ਕੀਮਤ 39,900 ਰੁਪਏ ਰੱਖੀ ਗਈ ਹੈ, ਜਦਕਿ ਅਮਰੀਕਾ ’ਚ ਇਸ ਦੀ ਕੀਮਤ 299 ਡਾਲਰ (ਲਗਭਗ 28,000 ਰੁਪਏ) ਹੈ। ਭਾਰਤ, ਆਸਟ੍ਰੇਲੀਆ, ਕੈਨੇਡਾ, ਨਿਊਜ਼ੀਲੈਂਡ, ਬ੍ਰਿਟੇਨ ਤੇ ਅਮਰੀਕਾ ਦੇ ਗਾਹਕ Apple ਦੇ ਆਨਲਾਈਨ ਸਟੋਰ ਤੇ Apple Store ਐਪ ਰਾਹੀਂ ਅੱਜ ਤੋਂ ਹੀ Apple HomeView ਦੀ ਪ੍ਰੀ-ਬੁਕਿੰਗ ਕਰ ਸਕਦੇ ਹਨ। ਇਸ ਦੀ ਵਿਕਰੀ 13 ਨਵੰਬਰ ਤੋਂ ਸ਼ੁਰੂ ਹੋਵੇਗੀ।

Apple HomeView ਚਾਰ ਰੰਗਾਂ—ਸਿਲਵਰ, ਸਟਾਰਲਾਈਟ, ਰੋਜ਼ ਪਿੰਕ ਤੇ ਸਪੇਸ ਗ੍ਰੇ—’ਚ ਉਪਲਬਧ ਹੋਵੇਗਾ। ਇਸ ਦਾ ਵਾਲ-ਮਾਊਂਟਡ ਵਰਜ਼ਨ ਵੀ ਪੇਸ਼ ਕੀਤਾ ਗਿਆ ਹੈ, ਜਿਸ ਨੂੰ Apple HomeView (Wall Mounted) ਦਾ ਨਾਂ ਦਿੱਤਾ ਗਿਆ ਹੈ। ਇਸ ਦੀ ਸ਼ੁਰੂਆਤੀ ਕੀਮਤ ਵੀ 39,900 ਰੁਪਏ ਹੀ ਹੈ।

Apple HomeView ਦੇ ਫੀਚਰਜ਼ ਤੇ ਸਪੈਸੀਫਿਕੇਸ਼ਨਜ਼

Apple HomeView ’ਚ True Tone ਤਕਨੀਕ ਤੇ 500 ਨਿਟਸ ਤੱਕ ਦੀ ਬ੍ਰਾਈਟਨੈੱਸ ਵਾਲੀ 7-ਇੰਚ ਦੀ Liquid Retina ਡਿਸਪਲੇਅ ਦਿੱਤੀ ਗਈ ਹੈ। ਇਸ ਨੂੰ ਐਲੂਮੀਨੀਅਮ ਡਿਜ਼ਾਈਨ ’ਚ ਫਿੱਟ ਕੀਤਾ ਗਿਆ ਹੈ। ਇਸ ’ਚ ਸਟੇਨਲੈੱਸ ਸਟੀਲ ਦੇ ਹਿੰਜ ਨਾਲ ਜੁੜਿਆ ਗੁੰਬਦ-ਆਕਾਰ ਦਾ ਸਪੀਕਰ ਬੇਸ ਦਿੱਤਾ ਗਿਆ ਹੈ। ਕੰਪਨੀ ਦਾ ਦਾਅਵਾ ਹੈ ਕਿ ਇਹ ਹਿੰਜ ਯੂਜ਼ਰਜ਼ ਨੂੰ ਟੇਬਲ ’ਤੇ ਰੱਖ ਕੇ ਬਿਹਤਰ ਵਿਊਇੰਗ ਲਈ ਡਿਸਪਲੇਅ ਦਾ ਝੁਕਾਅ ਐਡਜਸਟ ਕਰਨ ਦੀ ਸਹੂਲਤ ਦਿੰਦਾ ਹੈ।

ਕੂਪਰਟੀਨੋ ਦੀ ਟੈਕ ਕੰਪਨੀ ਮੁਤਾਬਕ, HomeView ਦਾ ਇੰਟਰਫੇਸ ਇਸ ਗੱਲ ਦੇ ਆਧਾਰ ’ਤੇ ਸਕ੍ਰੀਨ ’ਤੇ ਦਿਖਾਈ ਜਾਣ ਵਾਲੀ ਜਾਣਕਾਰੀ ਬਦਲ ਸਕਦਾ ਹੈ ਕਿ ਯੂਜ਼ਰ ਡਿਵਾਈਸ ਤੋਂ ਕਿੰਨੀ ਦੂਰੀ ’ਤੇ ਖੜ੍ਹਾ ਹੈ। ਜੇਕਰ ਕੋਈ ਕਮਰੇ ਦੇ ਦੂਜੇ ਕੋਨੇ ’ਚ ਹੈ, ਤਾਂ ਇਹ ਸੌਖੀ ਤੇ ਮੁੱਢਲੀ ਜਾਣਕਾਰੀ ਦਿਖਾਉਂਦਾ ਹੈ। ਜਿਵੇਂ ਹੀ ਯੂਜ਼ਰ ਇਸ ਦੇ ਨੇੜੇ ਆਉਂਦਾ ਹੈ, ਜਾਣਕਾਰੀ ਹੋਰ ਵਿਸਥਾਰ ਨਾਲ ਦਿਖਾਈ ਦੇਣ ਲੱਗਦੀ ਹੈ।

Apple ਇਸ ’ਚ ਕਸਟਮਾਈਜ਼ ਕੀਤੇ ਜਾ ਸਕਣ ਵਾਲੇ ਡਿਸਪਲੇਅ ਫੇਸਿਜ਼ ਦਾ ਕਲੈਕਸ਼ਨ ਵੀ ਦੇ ਰਿਹਾ ਹੈ, ਜਿਸ ’ਚ Photos, Flow ਤੇ Snoopy ਸ਼ਾਮਲ ਹਨ। ਇਸ ਤੋਂ ਇਲਾਵਾ, ਵਿਜੇਟਸ ਤੇ ਸਾਂਝੀਆਂ ਫੋਟੋ ਐਲਬਮਾਂ ਦਿਖਾਉਣ ਦੇ ਵਿਕਲਪ ਵੀ ਮਿਲਦੇ ਹਨ।

HomeView ਇੱਕੋ ਸਮੇਂ 6 ਲੋਕਾਂ ਤੱਕ ਦੀ ਪਛਾਣ ਫੇਸ਼ੀਅਲ ਰਿਕਗਨੀਸ਼ਨ ਰਾਹੀਂ ਕਰ ਸਕਦਾ ਹੈ। Apple ਦਾ ਕਹਿਣਾ ਹੈ ਕਿ ਇਸ ਨਾਲ ਘਰ ਦਾ ਹਰ ਮੈਂਬਰ ਆਪਣੀਆਂ ਐਪਸ ਤੇ ਵਿਜੇਟਸ ਵਾਲੀ ਨਿੱਜੀ ਹੋਮ ਸਕ੍ਰੀਨ ਦੇਖ ਸਕਦਾ ਹੈ। Messages ਤੇ Calendar ਵਰਗੀਆਂ ਐਪਸ ’ਚ ਮੌਜੂਦ ਨਿੱਜੀ ਜਾਣਕਾਰੀ ਸਿਰਫ਼ ਪਛਾਣੇ ਗਏ ਯੂਜ਼ਰ ਤੱਕ ਹੀ ਸੀਮਤ ਰਹਿੰਦੀ ਹੈ। ਦੂਜੇ ਪਾਸੇ, ਸਾਂਝੀਆਂ ਐਲਬਮਾਂ ਤੇ ਮਿਊਜ਼ਿਕ ਨੂੰ ਘਰ ਦਾ ਕੋਈ ਵੀ ਮੈਂਬਰ ਐਕਸੈੱਸ ਕਰ ਸਕਦਾ ਹੈ।

A18 ਚਿੱਪ ਤੇ Siri AI ਦਾ ਸਪੋਰਟ

Apple ਦਾ ਇਹ ਸਮਾਰਟ ਹੋਮ ਹੱਬ A18 ਚਿੱਪ ’ਤੇ ਕੰਮ ਕਰਦਾ ਹੈ। ਇਸ ’ਚ Siri AI ਦਿੱਤਾ ਗਿਆ ਹੈ। ਕੰਪਨੀ ਮੁਤਾਬਕ, ਇਸ ਦਾ ਵਾਇਸ ਅਸਿਸਟੈਂਟ ਦੁਨੀਆ ਬਾਰੇ ਵਧੇਰੇ ਜਾਣਕਾਰੀ, ਬਿਹਤਰ ਮਿਊਜ਼ਿਕ ਡਿਸਕਵਰੀ ਤੇ ਸਕ੍ਰੀਨ ’ਤੇ ਮੌਜੂਦ ਜਾਣਕਾਰੀ ਨੂੰ ਸਮਝਣ ਵਰਗੀਆਂ ਸਹੂਲਤਾਂ ਨੂੰ ਸਪੋਰਟ ਕਰਦਾ ਹੈ। ਇਹ ਤਜਰਬਾ iOS 27 ਵਰਗਾ ਹੋਵੇਗਾ। Siri AI ਵੱਖ-ਵੱਖ ਐਪਸ ’ਚ ਮੌਜੂਦ ਨਿੱਜੀ ਜਾਣਕਾਰੀ ਦੀ ਵਰਤੋਂ ਕਰ ਸਕਦਾ ਹੈ। ਇਸ ਤੋਂ ਇਲਾਵਾ, HomeView ’ਤੇ ਸ਼ੁਰੂ ਕੀਤੀ ਗਈ ਗੱਲਬਾਤ ਨੂੰ Siri ਐਪ ’ਚ ਵੀ ਜਾਰੀ ਰੱਖਿਆ ਜਾ ਸਕਦਾ ਹੈ।

ਸ਼ਾਨਦਾਰ ਆਡੀਓ ਸੈੱਟਅੱਪ

ਆਡੀਓ ਸੈੱਟਅੱਪ ਦੀ ਗੱਲ ਕਰੀਏ ਤਾਂ Apple HomeView ’ਚ ਦੋ ਕਸਟਮ ਫੁੱਲ-ਰੇਂਜ ਡਰਾਈਵਰ, ਇੱਕ ਡਾਊਨ-ਫਾਇਰਿੰਗ ਵੂਫਰ ਤੇ ਬੇਸ ’ਚ ਦੋ ਫੋਰਸ-ਕੈਂਸਲਿੰਗ ਪੈਸਿਵ ਰੇਡੀਏਟਰ ਦਿੱਤੇ ਗਏ ਹਨ। ਕੰਪਨੀ ਮੁਤਾਬਕ, ਇਹ ਡਿਵਾਈਸ ਰੀਅਲ ਟਾਈਮ ’ਚ ਆਵਾਜ਼ ਦੀ ਉੱਚਾਈ ਤੇ ਬੇਸ ਰਿਸਪਾਂਸ ਨੂੰ ਐਡਜਸਟ ਕਰਨ ਲਈ ਕੰਪਿਊਟੇਸ਼ਨਲ ਆਡੀਓ ਤਕਨੀਕ ਦੀ ਵਰਤੋਂ ਕਰਦਾ ਹੈ। ਇਸ ’ਚ ਅਨੁਕੂਲ HomePod ਤੇ AirPlay ਸਪੀਕਰਾਂ ਦੇ ਨਾਲ ਸਪੇਸ਼ਲ ਆਡੀਓ ਤੇ ਮਲਟੀ-ਰੂਮ ਪਲੇਬੈਕ ਦਾ ਸਪੋਰਟ ਵੀ ਮਿਲਦਾ ਹੈ।

FaceTime ਤੇ ਕਿਚਨ ’ਚ ਵੀ ਆਵੇਗਾ ਕੰਮ

HomeView ’ਚ 'Center Stage' ਫੀਚਰ ਦੇ ਨਾਲ FaceTime ਦੀ ਸਹੂਲਤ ਦਿੱਤੀ ਗਈ ਹੈ। ਇਸ ਤੋਂ ਇਲਾਵਾ, ਯੂਜ਼ਰ ਵੌਇਸ ਕਮਾਂਡ ਜਾਂ ਸਕ੍ਰੀਨ ’ਤੇ ਮੌਜੂਦ ਕੀਬੋਰਡ ਰਾਹੀਂ ਮੈਸੇਜਾਂ ਦਾ ਜਵਾਬ ਵੀ ਦੇ ਸਕਦੇ ਹਨ। ਕਿਚਨ ’ਚ ਕੰਮ ਕਰਦੇ ਸਮੇਂ HomeView ਰੈਸਿਪੀਜ਼ ਨੂੰ ਕਦਮ-ਦਰ-ਕਦਮ ਹਦਾਇਤਾਂ ਦੇ ਰੂਪ ’ਚ ਦਿਖਾ ਸਕਦਾ ਹੈ। ਇਸ ਦੇ ਨਾਲ ਹੀ, ਇਸ ’ਚ ਬਿਨਾਂ ਹੱਥ ਲਗਾਏ ਟਾਈਮਰ ਨੂੰ ਕੰਟਰੋਲ ਕਰਨ ਦੀ ਸਹੂਲਤ ਵੀ ਮਿਲਦੀ ਹੈ।

ਲਾਈਟਾਂ ਤੋਂ ਲੈ ਕੇ ਸਮਾਰਟ ਲੌਕਸ ਤੱਕ ਕਰ ਸਕੋਗੇ ਕੰਟਰੋਲ

Apple HomeView ਅਨੁਕੂਲ ਸਮਾਰਟ ਹੋਮ ਐਕਸੈਸਰੀਜ਼ ਲਈ ਇੱਕ ਸੈਂਟਰਲ ਡੈਸ਼ਬੋਰਡ ਵਜੋਂ ਵੀ ਕੰਮ ਕਰ ਸਕਦਾ ਹੈ। ਉਦਾਹਰਨ ਲਈ, ਯੂਜ਼ਰ ਟੱਚ ਜਾਂ Siri AI ਰਾਹੀਂ ਘਰ ਦੀਆਂ ਲਾਈਟਾਂ, ਥਰਮੋਸਟੈਟ, ਦਰਵਾਜ਼ਿਆਂ ਦੇ ਸਮਾਰਟ ਲੌਕਸ ਤੇ ਬਲਾਈਂਡਸ ਨੂੰ ਕੰਟਰੋਲ ਕਰ ਸਕਦੇ ਹਨ। ਇਸ ਦਾ 'Home Camera' ਡਿਸਪਲੇਅ ਫੇਸ ਇੱਕੋ ਸਮੇਂ 9 ਕੈਮਰਿਆਂ ਦੀ ਲਾਈਵ ਫੀਡ ਦਿਖਾ ਸਕਦਾ ਹੈ। ਇਸ ਤਰ੍ਹਾਂ ਯੂਜ਼ਰ ਇੱਕੋ ਡਿਵਾਈਸ ਰਾਹੀਂ ਆਪਣੇ ਸਮਾਰਟ ਹੋਮ ਦੀ ਨਿਗਰਾਨੀ ਵੀ ਕਰ ਸਕਣਗੇ।

ਸੁਰੱਖਿਆ ਲਈ ਖਾਸ ਫੀਚਰਜ਼

ਸੁਰੱਖਿਆ ਦੇ ਮਾਮਲੇ ’ਚ Apple ਇਸ ਡਿਵਾਈਸ ਦੀ A18 ਚਿੱਪ ’ਚ 'Secure Exclaves' ਦੀ ਵਰਤੋਂ ਕਰਦਾ ਹੈ। ਇਹ ਸੁਰੱਖਿਅਤ ਤੇ ਵੱਖਰੇ ਰਨਟਾਈਮ ਵਾਤਾਵਰਣ ਹੁੰਦੇ ਹਨ, ਜੋ ਕੈਮਰੇ ਤੇ ਮਾਈਕ੍ਰੋਫੋਨ ਦੇ ਡਾਟਾ ਦੀ ਪ੍ਰੋਸੈਸਿੰਗ ਨੂੰ ਸਿਸਟਮ ਦੇ ਬਾਕੀ ਹਿੱਸਿਆਂ ਤੋਂ ਵੱਖ ਰੱਖਦੇ ਹਨ। ਇਸ ਤੋਂ ਇਲਾਵਾ, ਡਿਵਾਈਸ ਨਿੱਜੀ ਜਾਣਕਾਰੀ ਉਦੋਂ ਹੀ ਦਿਖਾਉਂਦਾ ਹੈ, ਜਦੋਂ ਰਜਿਸਟਰਡ ਯੂਜ਼ਰ ਦੀ ਪਛਾਣ ਹੋ ਜਾਂਦੀ ਹੈ ਤੇ ਉਸ ਦਾ ਪੇਅਰ ਕੀਤਾ ਹੋਇਆ iPhone ਜਾਂ iPad ਨੇੜੇ ਮੌਜੂਦ ਹੋਵੇ ਤੇ ਉਸ ਨੂੰ ਹਾਲ ਹੀ ’ਚ ਅਨਲੌਕ ਕੀਤਾ ਗਿਆ ਹੋਵੇ। ਇਸ ਤਰ੍ਹਾਂ Apple HomeView ’ਚ ਨਿੱਜਤਾ ਤੇ ਸੁਰੱਖਿਆ ਦਾ ਵੀ ਖਾਸ ਧਿਆਨ ਰੱਖਿਆ ਗਿਆ ਹੈ।