5G ਹੋਇਆ ਮਹਿੰਗਾ ਤਾਂ 4G ਦੀ ਵਾਪਸੀ! 2026 ’ਚ ਫਿਰ ਵਧੀ ਸਸਤੇ ਸਮਾਰਟਫੋਨਾਂ ਦੀ ਮੰਗ

ਪੀਟੀਆਈ, ਨਵੀਂ ਦਿੱਲੀ : 5G ਸਮਾਰਟਫੋਨਾਂ ਦੀਆਂ ਵਧਦੀਆਂ ਕੀਮਤਾਂ ਕਾਰਨ ਚਾਲੂ ਕੈਲੰਡਰ ਸਾਲ ’ਚ 4G ਸਮਾਰਟਫੋਨਾਂ ਦੀ ਵਿਕਰੀ ’ਚ ਰਿਕਵਰੀ ਦੇ ਸੰਕੇਤ ਮਿਲ ਰਹੇ ਹਨ। Counterpoint Research ਦੀ ਰਿਪੋਰਟ ਮੁਤਾਬਕ, 4G ਸਮਾਰਟਫੋਨਾਂ ਦੀ ਥੋਕ ਵਿਕਰੀ ’ਚ ਸਾਲ-ਦਰ-ਸਾਲ 3% ਵਾਧੇ ਦੀ ਉਮੀਦ ਹੈ।

2025 ’ਚ 4G ਸਮਾਰਟਫੋਨਾਂ ਦੀ ਵਿਕਰੀ ’ਚ 48% ਦੀ ਗਿਰਾਵਟ ਦਰਜ ਕੀਤੀ ਗਈ ਸੀ। ਕੁੱਲ ਸਮਾਰਟਫੋਨ ਬਾਜ਼ਾਰ ’ਚ 4G ਫੋਨਾਂ ਦੀ ਹਿੱਸੇਦਾਰੀ 2025 ਦੇ 11% ਤੋਂ ਵਧ ਕੇ 2026 ’ਚ 13% ਤੇ 2027 ’ਚ ਅਨੁਮਾਨਿਤ ਤੌਰ 'ਤੇ 15% ਹੋ ਸਕਦੀ ਹੈ।

ਮਹਿੰਗੇ ਕੰਪੋਨੈਂਟਸ ਦੀ ਲਾਗਤ ਵਧਣ ਕਾਰਨ 4G ਤੇ 5G ਸਮਾਰਟਫੋਨਾਂ ਵਿਚਕਾਰ ਕੀਮਤ ਦਾ ਅੰਤਰ ਵਧ ਗਿਆ ਹੈ। ਇਸ ਨਾਲ ਖਪਤਕਾਰਾਂ ਲਈ 5G ਸਮਾਰਟਫੋਨ ਹੋਰ ਮਹਿੰਗੇ ਹੋ ਗਏ ਹਨ। ਇਸ ਦੇ ਨਤੀਜੇ ਵਜੋਂ 10,000 ਰੁਪਏ ਤੋਂ ਘੱਟ ਤੇ 10,000-20,000 ਰੁਪਏ ਵਾਲੀ ਕੀਮਤ ਸ਼੍ਰੇਣੀ ਦੇ ਖਪਤਕਾਰ ਘੱਟ ਕੀਮਤ ’ਚ ਬਿਹਤਰ ਫੀਚਰ ਤੇ ਵਧੀਆ ਵੈਲਿਊ ਲਈ 4G ਡਿਵਾਈਸਾਂ ਵੱਲ ਰੁਖ ਕਰ ਰਹੇ ਹਨ।

4G ਸਮਾਰਟਫੋਨਾਂ ਦੀ ਵਧ ਰਹੀ ਮੰਗ

Counterpoint ਦੇ ਮੁਤਾਬਕ, ਕੰਪਨੀਆਂ ਇਸ ਮੰਗ ਨੂੰ ਪੂਰਾ ਕਰਨ ਤੇ 5G ਫੋਨਾਂ ਦੇ ਮਹਿੰਗੇ ਹੋਣ ਕਾਰਨ ਪੈਦਾ ਹੋਈ ਕਮੀ ਨੂੰ ਪੂਰਾ ਕਰਨ ਲਈ 10,000 ਤੋਂ 20,000 ਰੁਪਏ ਦੀ ਕੀਮਤ ਵਾਲੇ ਸੈਗਮੈਂਟ ’ਚ ਆਪਣੇ 4G ਸਮਾਰਟਫੋਨ ਪੋਰਟਫੋਲੀਓ ਦਾ ਵਿਸਥਾਰ ਕਰ ਰਹੀਆਂ ਹਨ।

Counterpoint Research ਦੇ ਰਿਸਰਚ ਡਾਇਰੈਕਟਰ ਤਰੁਣ ਪਾਠਕ ਨੇ ਕਿਹਾ ਕਿ ਇਹ ਵਾਧਾ ਸਿਰਫ਼ ਸਮਾਰਟਫੋਨਾਂ ਦੀਆਂ ਉੱਚੀਆਂ ਕੀਮਤਾਂ ਕਾਰਨ ਆਇਆ ਇੱਕ ਅਸਥਾਈ ਬਦਲਾਅ ਨਹੀਂ ਹੈ, ਸਗੋਂ ਇਹ 4G ਦੀ ਭੂਮਿਕਾ ’ਚ ਵੱਡੇ ਬਦਲਾਅ ਨੂੰ ਦਰਸਾਉਂਦਾ ਹੈ।

ਉਨ੍ਹਾਂ ਮੁਤਾਬਕ, ਕੰਪੋਨੈਂਟਸ ਦੀਆਂ ਕੀਮਤਾਂ ਦੇ ਜਲਦੀ ਆਮ ਹੋਣ ਦੇ ਆਸਾਰ ਨਹੀਂ ਹਨ। ਖਪਤਕਾਰ ਕੀਮਤ ਦੇ ਮੁਕਾਬਲੇ ਫੀਚਰਾਂ ਨੂੰ ਵੱਧ ਮਹੱਤਵ ਦੇ ਰਹੇ ਹਨ। ਅਜਿਹੇ ’ਚ 4G ਦੀ ਮਹੱਤਤਾ ਸਿਰਫ਼ ਐਂਟਰੀ-ਲੈਵਲ ਸੈਗਮੈਂਟ ਤੱਕ ਸੀਮਿਤ ਨਹੀਂ ਰਹੀ, ਖਾਸ ਕਰਕੇ 20,000 ਰੁਪਏ ਤੋਂ ਘੱਟ ਕੀਮਤ ਵਾਲੇ ਸੈਗਮੈਂਟ ’ਚ ਇਸ ਦੀ ਮੰਗ ਵਧ ਰਹੀ ਹੈ।

Counterpoint Research ਦੀ ਸੀਨੀਅਰ ਐਨਾਲਿਸਟ ਪ੍ਰਾਚੀ ਸਿੰਘ ਦਾ ਕਹਿਣਾ ਹੈ ਕਿ ਖਪਤਕਾਰ 5G ਨਾਲ ਜੁੜੀ ਵਾਧੂ ਕੀਮਤ ਦਿੱਤੇ ਬਿਨਾਂ ਬਿਹਤਰ ਫੀਚਰ ਤੇ ਡਿਵਾਈਸ ਅਨੁਭਵ ਚਾਹੁੰਦੇ ਹਨ। ਇਸ ਬਦਲਾਅ ਨੂੰ ਦੇਖਦੇ ਹੋਏ ਕੰਪਨੀਆਂ ਐਂਟਰੀ-ਲੈਵਲ ਸੈਗਮੈਂਟ ਤੋਂ ਅੱਗੇ ਵਧ ਕੇ ਆਪਣੇ 4G ਸਮਾਰਟਫੋਨ ਪੋਰਟਫੋਲੀਓ ਦਾ ਵਿਸਥਾਰ ਕਰ ਰਹੀਆਂ ਹਨ।

2025 ’ਚ ਬਜਟ ਸੈਗਮੈਂਟ ’ਚ 4G ਮਾਡਲ ਪੇਸ਼ ਕਰਨ ਵਾਲੀਆਂ ਕੰਪਨੀਆਂ ਦੀ ਗਿਣਤੀ ਸਿਰਫ਼ 2 ਸੀ, ਜੋ 2026 ’ਚ ਹੁਣ ਤੱਕ ਵਧ ਕੇ 12 ਹੋ ਗਈ ਹੈ।