World Badminton Championship : ਪੀਵੀ ਸਿੰਧੂ ਨੇ ਜਿੱਤ ਨਾਲ ਕੀਤੀ ਸ਼ੁਰੂਆਤ, ਛੇਵੇਂ ਮੈਡਲ ਵੱਲ ਵਧਾਏ ਕਦਮ

ਨੌਵਾਂ ਦਰਜਾ ਹਾਸਲ ਸਿੰਧੂ ਨੇ ਨੋਬਲ ਨੂੰ 21-7, 21-11 ਨਾਲ ਹਰਾਇਆ। ਸਿੰਧੂ ਦੇ ਨਾਂ ਵਿਸ਼ਵ ਚੈਂਪੀਅਨਸ਼ਿਪ ’ਚ ਪਹਿਲਾਂ ਹੀ ਪੰਜ ਮੈਡਲ ਹਨ, ਜਿਸ ਵਿਚ ਦੋ ਬਰਾਊਂਜ਼, ਦੋ ਸਿਲਵਰ ਤੇ 2019 ’ਚ ਜਿੱਤਿਆ ਗੋਲਡ ਸ਼ਾਮਲ ਹਨ। ਮੌਜੂਦਾ ਮੁਕਾਬਲੇਬਾਜ਼ੀ ਦੇ ਸੈਮੀਫਾਈਨਲ ’ਚ ਪੁੱਜਦਿਆਂ ਹੀ ਸਿੰਧੂ ਘੱਟ ਤੋਂ ਘੱਟ ਬਰਾਊਂਜ਼ ਮੈਡਲ ਪੱਕਾ ਕਰ ਲਵੇਗੀ ਤੇ ਵਿਸ਼ਵ ਚੈਂਪੀਅਨਸ਼ਿਪ ਦੇ ਇਤਿਹਾਸ ’ਚ ਛੇ ਮੈਡਲ ਜਿੱਤਮ ਵਾਲੀ ਪਹਿਲੀ ਖਿਡਾਰੀ ਬਣ ਜਾਵੇਗੀ। ਸਿੰਧੂ ਨੇ ਸ਼ੁਰੂਆਤ ਨਾਲ ਹੀ ਮੁਕਾਬਲੇ ’ਤੇ ਆਪਣਾ ਦਬਦਬਾ ਬਣਾਈ ਰੱਖਿਆ। ਉਸਨੇ ਆਪਣੇ ਤਜਰਬੇ ਅਤੇ ਸਬਰ ਨਾਲ ਨੋਬਲ ਨੂੰ ਖੇਡ ਦੌਰਾਨ ਕਾਫੀ ਪਰੇਸ਼ਾਨ ਕੀਤਾ ਅਤੇ ਉਸ ਦੀਆਂ ਗਲਤੀਆਂ ਦਾ ਫਾਇਦਾ ਉਠਾਇਆ। ਪਹਿਲੇ ਗੇਮ ਦੇ ਬ੍ਰੇਕ ਤੱਕ ਸਿੰਧੂ 11-2 ਦੀ ਅਗਵਾਈ 'ਤੇ ਸੀ ਅਤੇ ਬਾਅਦ ਵਿਚ ਆਸਾਨੀ ਨਾਲ ਗੇਮ ਆਪਣੇ ਨਾਂ ਕੀਤਾ। ਦੂਜੀ ਗੇਮ ਵਿੱਚ, ਨੋਬਲ ਨੇ ਬਿਹਤਰ ਪ੍ਰਦਰਸ਼ਨ ਕੀਤਾ ਅਤੇ ਸਿੰਧੂ ਨੂੰ ਚੁਣੌਤੀ ਦਿੱਤੀ ਪਰ ਸਿੰਧੂ ਨੇ ਬ੍ਰੇਕ ਤੱਕ 11-8 ਦੀ ਬੜ੍ਹਤ ਬਣਾਈ। ਇਸ ਤੋਂ ਬਾਅਦ ਭਾਰਤੀ ਖਿਡਾਰੀ ਨੇ ਕੋਈ ਮੌਕਾ ਨਹੀਂ ਛੱਡਿਆ ਅਤੇ ਸ਼ਾਨਦਾਰ ਡ੍ਰਾਪ ਸ਼ਾਟ ਅਤੇ ਸਮੈਸ਼ ਨਾਲ ਮੁਕਾਬਲਾ ਆਪਣੇ ਹੱਕ ’ਚ ਕਰ ਲਿਆ। ਉਸਨੇ 29 ਮਿੰਟਾਂ ’ਚ ਜਿੱਤ ਦਰਜ ਕੀਤੀ।