ਮਹਿਲਾ ਏਸ਼ੀਆ ਕੱਪ : ਅੱਜ ਪਹਿਲਾ ਸੈਮੀਫਾਈਨਲ, ਬੰਗਲਾਦੇਸ਼ ਵਿਰੁੱਧ ਅਜੇਤੂ ਭਾਰਤੀ ਟੀਮ ਦਾ ਪਲੜਾ ਭਾਰੀ

ਭਾਰਤੀ ਟੀਮ ਪੂਰੇ ਟੂਰਨਾਮੈਂਟ ਵਿਚ ਸ਼ਾਨਦਾਰ ਲੈਅ ਵਿਚ ਰਹੀ ਹੈ ਤੇ ਸਾਰੇ ਮੈਚ ਜਿੱਤ ਕੇ ਗਰੁੱਪ ਏ ਵਿਚ ਸਿਖਰ ਸਥਾਨ ਹਾਸਲ ਕੀਤਾ ਹੈ। ਭਾਰਤ ਦੀ ਬੈਟਿੰਗ ਕਾਫੀ ਮਜ਼ਬੂਤ ਰਹੀ ਹੈ ਅਤੇ ਸਮ੍ਰਿਤੀ ਮੰਦਾਨਾ ਨੇ ਹਾਂਗਕਾਂਗ ਦੇ ਖ਼ਿਲਾਫ਼ ਸੈਂਕੜਾ ਲਾ ਕੇ ਫਿਰ ਸਾਬਤ ਕਰ ਦਿੱਤਾ ਕਿ ਉਹ ਆਧੁਨਿਕ ਯੁੱਗ ਦੇ ਸਰਬੋਤਮ ਬੈਟਸਮੈਨਾਂ ਵਿਚੋਂ ਇਕ ਹਨ। ਸ਼ੇਫਾਲੀ ਵਰਮਾ ਨੇ ਟੀਮ ਨੂੰ ਚੰਗੀ ਸ਼ੁਰੂਆਤ ਦੇ ਕੇ ਪਾਵਰਪਲੇ ਵਿਚ ਵਿਰੋਧੀ ਟੀਮਾਂ 'ਤੇ ਦਬਾਅ ਬਣਾਇਆ ਹੈ। ਮੱਧਕ੍ਰਮ ਵਿਚ ਕਪਤਾਨ ਹਰਮਨਪ੍ਰੀਤ ਅਤੇ ਵਿਕਟਕੀਪਰ ਬੈਟਸਮੈਨ ਰਿਚਾ ਘੋਸ਼ ਨੇ ਆਖਰੀ ਓਵਰਾਂ ਵਿਚ ਚੰਗੇ ਰਨ ਬਣਾਏ ਹਨ। ਗੇਂਦਬਾਜ਼ੀ ਵਿਚ ਭਾਰਤ ਕੋਲ ਵਿਭਿੰਨਤਾ ਅਤੇ ਡੂੰਘਾਈ ਹੈ। ਦੀਪਤੀ ਸ਼ਰਮਾ ਔਰਤ ਟੀ20 ਅੰਤਰਰਾਸ਼ਟਰੀ ਕ੍ਰਿਕਟ ਵਿਚ ਸਭ ਤੋਂ ਵੱਧ ਵਿਕਟਾਂ ਲੈਣ ਵਾਲੀ ਗੇਂਦਬਾਜ਼ ਬਣ ਗਈ ਹੈ। ਉਨ੍ਹਾਂ ਨੇ ਰਾਧਾ ਯਾਦਵ ਅਤੇ ਸ਼੍ਰੀ ਚਰਣੀ ਦੇ ਨਾਲ ਮਿਲ ਕੇ ਹਰ ਮੈਚ ਵਿਚ ਸਪਿਨ ਦਾ ਜਾਲ ਬਖੂਬੀ ਬੁਣਿਆ ਹੈ। ਤੇਜ਼ ਗੇਂਦਬਾਜ਼ ਰੇਣੁਕਾ ਠਾਕੁਰ ਨੇ ਨਵੀਂ ਗੇਂਦ ਨੂੰ ਬਖੂਬੀ ਸੰਭਾਲ ਕੇ ਟੀਮ ਨੂੰ ਸ਼ੁਰੂਆਤੀ ਸਫਲਤਾਵਾਂ ਦਿਵਾਈਆਂ ਹਨ।