ਰੋਮਾਂਚ ਨਾਲ ਭਰਪੂਰ ਹੋਵੇਗਾ ਯੂਐੱਸ ਓਪਨ : ਜੋਕੋਵਿਚ ਦੀਆਂ ਅੱਖਾਂ ਰਿਕਾਰਡ 25ਵੇਂ ਖਿਤਾਬ 'ਤੇ, ਜ਼ਵੇਰੇਵ ਦੇਵੇਗਾ ਚੁਣੌਤੀ; ਸਿੰਨਰ ਬਾਹਰ ਤੇ ਅਲਕਾਰਜ਼ ਦੀ ਵਾਪਸੀ

ਜੋਕੋਵਿਚ 2023 ’ਚ ਫਲਸ਼ਿੰਗ ਮੀਡੋਜ਼ ’ਚ ਖਿਤਾਬ ਜਿੱਤਣ ਤੋਂ ਬਾਅਦ ਲਗਾਤਾਰ ਗ੍ਰੈਂਡ ਸਲੈਮ ਪਸੰਦੀਦਾ ਰਿਹਾ ਹੈ ਪਰ ਅਲਕਾਰਜ਼ ਤੇ ਸਿਨਰ ਨੇ ਪਿਛਲੇ 11 ਗ੍ਰੈਂਡ ਸਲੈਮ ਖ਼ਿਤਾਬਾਂ ’ਚੋਂ 10 ਨੂੰ ਸਾਂਝਾ ਕਰਦੇ ਹੋਏ ਪੁਰਸ਼ ਟੈਨਿਸ ’ਚ ਦਬਦਬਾ ਬਣਾਇਆ ਹੈ। ਸਭ ਤੋਂ ਵੱਧ ਗ੍ਰੈਂਡ ਸਲੈਮ ਖਿਤਾਬ ਜਿੱਤਣ ਦੀ ਆਲ ਟਾਈਮ ਸੂਚੀ ’ਚ ਮਾਰਗਰੇਟ ਕੋਰਟ ਨੂੰ ਪਛਾੜਨ ਦੀਆਂ ਜੋਕੋਵਿਚ ਦੀਆਂ ਕੋਸ਼ਿਸ਼ਾਂ ਨੂੰ ਅਲਕਾਰਜ਼ ਤੇ ਸਿਨਰ ਨੇ ਵਾਰ-ਵਾਰ ਨਾਕਾਮ ਕਰ ਦਿੱਤਾ। ਦੋਵਾਂ ਨੇ ਪਿਛਲੇ 6 ਗਰੈਂਡ ਸਲੈਮ ’ਚੋਂ ਪੰਜ ਵਿੱਚ ਜੋਕੋਵਿਚ ਨੂੰ ਹਰਾਇਆ ਹੈ। ਅਲਕਾਰਜ਼ ਨੇ ਇਸ ਸਾਲ ਆਸਟ੍ਰੇਲੀਅਨ ਓਪਨ ਦੇ ਫਾਈਨਲ ’ਚ ਉਸ ਨੂੰ ਹਰਾਇਆ ਸੀ। ਹਾਲਾਂਕਿ, 39 ਸਾਲਾ ਸਰਬੀਆਈ ਖਿਡਾਰੀ ਦਾ ਆਤਮ-ਵਿਸ਼ਵਾਸ ਘੱਟ ਨਹੀਂ ਹੋਇਆ ਹੈ ਤੇ ਉਹ ਸੀਮਤ ਤਿਆਰੀ ਤੇ ਲਗਾਤਾਰ ਸਰੀਰਕ ਸਮੱਸਿਆਵਾਂ ਦੇ ਬਾਵਜੂਦ ਪੰਜਵਾਂ ਯੂਐੱਸ ਓਪਨ ਖਿਤਾਬ ਜਿੱਤਣ ਦੀ ਉਮੀਦ ਕਰ ਰਿਹਾ ਹੈ। ਹਾਲ ਦੇ ਸਮੇਂ ਦੇ ਮੁਕਾਬਲੇ ਜੋਕੋਵਿਚ ਲਈ ਹਾਲਾਤ ਵੀ ਜ਼ਿਆਦਾ ਅਨੁਕੂਲ ਬਣ ਗਏ ਹਨ। ਸਿਨਰ ਗੋਡੇ ਦੀ ਸੱਟ ਨਾਲ ਬਾਹਰ ਹੈ, ਜਦੋਂ ਕਿ ਅਲਕਾਰਜ਼ ਗੁੱਟ ਦੀ ਸਮੱਸਿਆ ਨਾਲ ਚਾਰ ਮਹੀਨਿਆਂ ਤੋਂ ਵੱਧ ਸਮੇਂ ਤੋਂ ਬਾਹਰ ਰਹਿਣ ਤੋਂ ਬਾਅਦ ਵਾਪਸੀ ਕਰ ਰਿਹਾ ਹੈ।