ਏਸ਼ੀਆਈ ਖੇਡਾਂ 'ਚ ਫਿਰ ਦਿਸੇਗਾ 'ਬਲੂ ਬ੍ਰਿਗੇਡ' ਦਾ ਜਲਵਾ, ਨੀਲੀ ਜਰਸੀ ਪਾ ਕੇ ਮੈਦਾਨ 'ਚ ਉਤਰੇਗੀ ਭਾਰਤੀ ਹਾਕੀ ਟੀਮ

ਨਵੀਂ ਦਿੱਲੀ (ਪੀਟੀਆਈ) : ਖੇਡ ਮੰਤਰੀ ਮਨਸੁਖ ਮਾਂਡਵੀਆ ਨੇ ਹਾਕੀ ਵਿਸ਼ਵ ਕੱਪ ਤੋਂ ਬਾਅਦ ਸਮੀਖਿਆ ਮੀਟਿੰਗ ’ਚ ਕਪਤਾਨਾਂ ਤੇ ਕੋਚਾਂ ਨੂੰ ਹਾਰ ਦੀ ਬਜਾਏ ਉਸਦੇ ਕਾਰਨਾਂ ’ਤੇ ਫੋਕਸ ਕਰ ਕੇ ਏਸ਼ਿਆਈ ਖੇਡਾਂ ’ਚ ਬਿਹਤਰ ਪ੍ਰਦਰਸ਼ਨ ਕਰਨ ਲਈ ਕਿਹਾ। ਸੂਤਰਾਂ ਅਨੁਸਾਰ, ਸੋਮਵਾਰ ਨੂੰ ਖੇਡ ਮੰਤਰੀ ਨੇ ਮਰਦ ਟੀਮ ਦੇ ਕੋਚ ਕ੍ਰੇਗ ਫੁਲਟਨ, ਕਪਤਾਨ ਹਰਮਨਪ੍ਰੀਤ ਸਿੰਘ, ਮਹਿਲਾ ਟੀਮ ਦੇ ਕੋਚ ਸ਼ੋਰਡ ਮਾਰਿਨ ਤੇ ਕਪਤਾਨ ਸਲੀਮਾ ਟੇਟੇ ਨਾਲ ਮੀਟਿੰਗ ’ਚ ਵਿਸ਼ਵ ਕੱਪ ’ਚ ਪ੍ਰਦਰਸ਼ਨ ਦੀ ਸਮੀਖਿਆ ਕੀਤੀ ਤੇ ਕਮੀਆਂ ਦਾ ਪਤਾ ਲਗਾ ਕੇ ਉਨ੍ਹਾਂ ਨੂੰ ਦੂਰ ਕਰਨ ’ਤੇ ਫੋਕਸ ਕਰਨ ਲਈ ਕਿਹਾ। ਸੂਤਰਾਂ ਅਨੁਸਾਰ, ਕਰੀਬ ਇਕ ਘੰਟੇ ਤੱਕ ਸਾਈ ਹੈੱਡਕੁਆਰਟਰ ’ਚ ਹੋਈ ਮੀਟਿੰਗ ’ਚ ਖੇਡ ਮੰਤਰੀ ਨੇ ਦੋਵਾਂ ਟੀਮਾਂ ਦੇ ਕਪਤਾਨਾਂ ਤੇ ਕੋਚਾਂ ਤੋਂ ਇਲਾਵਾ ਹਾਕੀ ਇੰਡੀਆ ਦੇ ਅਹੁਦੇਦਾਰਾਂ ਨਾਲ ਗੱਲ ਕੀਤੀ। ਉਨ੍ਹਾਂ ਵਿਸ਼ਵ ਕੱਪ ਦੀ ਨਿਰਾਸ਼ਾ ਨੂੰ ਭੁਲਾਉਣ ਤੇ ਏਸ਼ਿਆਈ ਖੇਡਾਂ ’ਚ ਬਿਹਤਰੀਨ ਪ੍ਰਦਰਸ਼ਨ ਕਰ ਕੇ ਲਾਸ ਏਂਜਲਸ ਓਲੰਪਿਕ ਲਈ ਕੁਆਲੀਫਾਈ ਕਰਨ ਦਾ ਟੀਚਾ ਰੱਖਣ ਲਈ ਕਿਹਾ।