ਮੀਂਹ ਵਿਚਾਲੇ ਏਸ਼ਿਆਈ ਖੇਡਾਂ 'ਚ ਐਥਲੈਟਿਕਸ ਦਾ ਸ਼ਾਨਦਾਰ ਪ੍ਰਦਰਸ਼ਨ, ਭਾਰਤ ਨੇ ਇੱਕ ਗੋਲਡ ਸਮੇਂਤ ਜਿੱਤੇ 5 ਤਮਗੇ

ਭਾਰਤ ਦੇ ਲੰਬੀ ਦੂਰੀ ਦੇ ਦੌੜਾਕ ਗੁਲਵੀਰ ਸਿੰਘ ਨੇ ਏਸ਼ਿਆਈ ਖੇਡਾਂ ’ਚ ਆਪਣੀ ਸ਼ਾਨਦਾਰ ਲੈਅ ਜਾਰੀ ਰੱਖਦੇ ਹੋਏ ਮਰਦਾਂ ਦੀ 5000 ਮੀਟਰ ਰੇਸ ’ਚ 13 ਮਿੰਟ 32.75 ਸਕਿੰਟਾਂ ਦਾ ਸਮਾਂ ਕੱਢ ਕੇ ਕਾਂਸੀ ਦਾ ਤਮਗਾ ਜਿੱਤਿਆ, ਜੋ ਇਨ੍ਹਾਂ ਖੇਡਾਂ ’ਚ ਉਸ ਦਾ ਤੀਜਾ ਤਮਗਾ ਸੀ। ਗੁਲਵੀਰ ਨੇ ਇਸ ਤੋਂ ਪਹਿਲਾਂ ਮਰਦਾਂ ਦੀ 1500 ਮੀਟਰ ਤੇ 10000 ਮੀਟਰ ਦੌੜ ’ਚ ਸਿਲਵਰ ਮੈਡਲ ਜਿੱਤਿਆ ਸੀ। ਇਸ ਨਾਲ ਉਹ ਟਰੈਕ ਐਂਡ ਫੀਲਡ ਮੁਕਾਬਲਿਆਂ ’ਚ ਇਕ ਹੀ ਏਸ਼ਿਆਈ ਖੇਡਾਂ ’ਚ ਤਿੰਨ ਤਮਗੇ ਜਿੱਤਣ ਵਾਲਾ ਭਾਰਤ ਦਾ ਦੂਜਾ ਮਰਦ ਖਿਡਾਰੀ ਬਣ ਗਿਆ ਹੈ। ਇਸ ਤੋਂ ਪਹਿਲਾਂ 1951 ’ਚ ਦਿੱਲੀ ’ਚ ਹੋਈਆਂ ਏਸ਼ਿਆਈ ਖੇਡਾਂ ’ਚ ਭਾਰਤ ਦੇ ਲੇਵੀ ਪਿੰਟੋ ਨੇ 100 ਮੀਟਰ, 200 ਮੀਟਰ ’ਚ ਸੋਨਾ ਤੇ ਚਾਰ ਗੁਣਾ 100 ਮੀਟਰ ਰਿਲੇਅ ’ਚ ਚਾਂਦੀ ਦਾ ਤਮਗਾ ਜਿੱਤਿਆ ਸੀ। ਇਸੇ ਤਰ੍ਹਾਂ, ਪੀਟੀ ਊਸ਼ਾ ਨੇ ਸਿਓਲ ’ਚ 1986 ਦੀਆਂ ਏਸ਼ਿਆਈ ਖੇਡਾਂ ’ਚ ਚਾਰ ਗੋਲਡ ਤੇ ਇਕ ਚਾਂਦੀ ਦਾ ਤਮਗਾ ਜਿੱਤਿਆ ਸੀ। ਮੱਧ ਦੂਰੀ ਦੀ ਦੌੜਾਕ ਕੇਐਮ ਬੀਨਾਮੋਲ ਨੇ 2002 ਬੁਸਾਨ ਏਸ਼ਿਆਈ ਖੇਡਾਂ ’ਚ ਤਿੰਨ ਤਮਗੇ ਜਿੱਤੇ ਸਨ। ਮਰਦਾਂ ਦੇ 5000 ਮੀਟਰ ਮੁਕਾਬਲੇ ’ਚ ਰਾਸ਼ਟਰੀ ਰਿਕਾਰਡਧਾਰਕ ਗੁਲਵੀਰ ਨੇ 2026 ਗਲਾਸਗੋ ਰਾਸ਼ਟਰਮੰਡਲ ਖੇਡਾਂ ’ਚ ਕਾਂਸੀ ਦਾ ਤਮਗਾ ਜਿੱਤਿਆ ਸੀ। ਉਹ ਰਾਸ਼ਟਰਮੰਡਲ ਖੇਡਾਂ ’ਚ ਇਸ ਮੁਕਾਬਲੇ ’ਚ ਤਮਗਾ ਜਿੱਤਣ ਵਾਲਾ ਪਹਿਲਾ ਭਾਰਤੀ ਮਰਦ ਬਣਿਆ।