ਪੈਰਿਸ ਮਾਸਟਰਜ਼: ਬੇਨ ਸ਼ੈਲਟਨ ਨੇ ਬਣਾਈ ਕੁਆਰਟਰ ਫਾਈਨਲ 'ਚ ਜਗ੍ਹਾ, ਅਲਕਾਰਾਜ਼ ਅੱਗੇ ਵਧੇ

ਦੂਜੇ ਪਾਸੇ, ਕਾਰਲੋਸ ਅਲਕਾਰਾਜ਼ ਨੂੰ ਆਪਣਾ ਤੀਜੇ ਦੌਰ ਦਾ ਮੈਚ ਖੇਡੇ ਬਿਨਾਂ ਹੀ ਕੁਆਰਟਰ ਫਾਈਨਲ ’ਚ ਜਗ੍ਹਾ ਮਿਲ ਗਈ। ਉਨ੍ਹਾਂ ਦੇ ਵਿਰੋਧੀ, ਇਟਲੀ ਦੇ ਮੈਟਿਓ ਬੇਰੇਟਿਨੀ ਨੇ ਹੱਥ ਦੀ ਸੱਟ ਕਾਰਨ ਮੁਕਾਬਲੇ ਤੋਂ ਨਾਮ ਵਾਪਸ ਲੈ ਲਿਆ, ਹਾਲਾਂਕਿ ਉਨ੍ਹਾਂ ਨੇ ਇਹ ਨਹੀਂ ਦੱਸਿਆ ਕਿ ਉਨ੍ਹਾਂ ਦੇ ਕਿਸ ਹੱਥ ਵਿੱਚ ਸੱਟ ਲੱਗੀ ਹੈ। ਬੇਰੇਟਿਨੀ ਨੇ ਇੰਸਟਾਗ੍ਰਾਮ ’ਤੇ ਦੱਸਿਆ ਕਿ ਪਿਛਲੇ ਕੁਝ ਦਿਨਾਂ ਤੋਂ ਉਨ੍ਹਾਂ ਨੂੰ ਦਰਦ ਮਹਿਸੂਸ ਹੋ ਰਿਹਾ ਸੀ। ਕੁਆਰਟਰ ਫਾਈਨਲ ’ਚ ਦੂਜਾ ਦਰਜਾ ਪ੍ਰਾਪਤ ਅਲਕਾਰਾਜ਼ ਦਾ ਮੁਕਾਬਲਾ ਫਰਾਂਸ ਦੇ ਆਰਥਰ ਫਿਲਸ (6ਵਾਂ ਦਰਜਾ) ਤੇ ਅਮਰੀਕਾ ਦੇ ਟੇਲਰ ਫ੍ਰਿਟਜ਼ (11ਵਾਂ ਦਰਜਾ) ਵਿਚਕਾਰ ਹੋਣ ਵਾਲੇ ਮੈਚ ਦੇ ਜੇਤੂ ਨਾਲ ਹੋਵੇਗਾ। ਫ੍ਰਿਟਜ਼ ਵੀ ਏਟੀਪੀ ਫਾਈਨਲਜ਼ ਵਿੱਚ ਜਗ੍ਹਾ ਬਣਾਉਣ ਦੀ ਦੌੜ ’ਚ ਸ਼ਾਮਲ ਹਨ। ਜੇਕਰ ਉਹ ਆਪਣਾ ਮੈਚ ਹਾਰ ਜਾਂਦੇ ਹਨ, ਤਾਂ ਉਨ੍ਹਾਂ ਦੇ ਦੇਸ਼ ਦੇ ਹੀ ਫ੍ਰਾਂਸਿਸ ਟਿਆਫੋ ਏਟੀਪੀ ਫਾਈਨਲਜ਼ ਲਈ ਕੁਆਲੀਫਾਈ ਕਰ ਲੈਣਗੇ। ਫਰਾਂਸ ਦੇ ਲੂਕਾ ਵੈਨ ਐਸ਼ ਨੇ ਘਰੇਲੂ ਦਰਸ਼ਕਾਂ ਨੂੰ ਖੁਸ਼ ਹੋਣ ਦਾ ਮੌਕਾ ਦਿੱਤਾ; ਉਨ੍ਹਾਂ ਨੇ ਤੀਜੇ ਦੌਰ ਵਿੱਚ ਇਟਲੀ ਦੇ ਲੋਰੇਂਜ਼ੋ ਮੁਸੇਟੀ ਨੂੰ 7-5, 3-6, 6-4 ਨਾਲ ਹਰਾ ਕੇ ਪਹਿਲੀ ਵਾਰ ਕਿਸੇ ਮਾਸਟਰਜ਼ ਟੂਰਨਾਮੈਂਟ ਦੇ ਕੁਆਰਟਰ ਫਾਈਨਲ ਵਿੱਚ ਪ੍ਰਵੇਸ਼ ਕੀਤਾ। ਦੁਨੀਆ ’ਚ 47ਵੇਂ ਨੰਬਰ ’ਤੇ ਮੌਜੂਦ ਵੈਨ ਐਸ਼ ਨੇ ਆਪਣੇ ਪਹਿਲੇ ਮੈਚ ਪੁਆਇੰਟ ’ਤੇ ਨੈੱਟ ਦੇ ਨੇੜੇ ਇੱਕ ਸ਼ਾਨਦਾਰ ‘ਵੌਲੀ’ (ਗੇਂਦ ਨੂੰ ਜ਼ਮੀਨ ’ਤੇ ਡਿੱਗਣ ਤੋਂ ਪਹਿਲਾਂ ਹੀ ਹਿੱਟ ਕਰਨਾ) ਲਗਾ ਕੇ ਜਿੱਤ ਪੱਕੀ ਕੀਤੀ। ਮੁਸੇਟੀ ਇਸ ਤੋਂ ਪਹਿਲਾਂ ਚਾਰੇ ਗ੍ਰੈਂਡ ਸਲੈਮ ਟੂਰਨਾਮੈਂਟਾਂ ’ਚ ਘੱਟੋ-ਘੱਟ ਕੁਆਰਟਰ ਫਾਈਨਲ ਪੜਾਅ ਤੱਕ ਪਹੁੰਚ ਚੁੱਕੇ ਹਨ। ਇਸ ਦੌਰਾਨ, ਕੁਆਲੀਫਾਇਰ ਰਿੰਕੀ ਹਿਜਿਕਾਟਾ ਜਿਸ ਨੇ ਦੂਜੇ ਦੌਰ ’ਚ ਨੋਵਾਕ ਜੋਕੋਵਿਚ ਨੂੰ ਹਰਾਇਆ ਸੀ, ਨੇ ਆਪਣਾ ਸ਼ਾਨਦਾਰ ਪ੍ਰਦਰਸ਼ਨ ਜਾਰੀ ਰੱਖਿਆ ਤੇ ਟੋਮਾਸ ਏਚੇਵੇਰੀ ਨੂੰ 2-6, 6-3, 7-5 ਨਾਲ ਹਰਾ ਕੇ ਅਗਲੇ ਦੌਰ ’ਚ ਪ੍ਰਵੇਸ਼ ਕੀਤਾ। ਹੁਣ ਉਸ ਦਾ ਮੁਕਾਬਲਾ ਵੈਨ ਐਸ਼ ਨਾਲ ਹੋਵੇਗਾ।