Para Asian Games 2026 : ਜਾਪਾਨ 'ਚ ਅੱਜ ਤੋਂ ਸ਼ੁਰੂ ਹੋ ਰਹੀਆਂ ਹਨ ਪੈਰਾ ਏਸ਼ਿਆਈ ਖੇਡਾਂ, ਛੋਟੇ ਦਲ ਦੇ ਬਾਵਜੂਦ ਭਾਰਤੀ ਖਿਡਾਰੀਆਂ ਤੋਂ ਸ਼ਾਨਦਾਰ ਪ੍ਰਦਰਸ਼ਨ ਦੀ ਉਮੀਦ

ਭਾਰਤ ਨੇ 2023 ’ਚ 29 ਸੋਨੇ, 31 ਚਾਂਦੀ ਤੇ 51 ਕਾਂਸੀ ਦੇ ਤਮਗਿਆਂ ਨਾਲ ਪੰਜਵਾਂ ਸਥਾਨ ਹਾਸਲ ਕੀਤਾ ਸੀ। ਹਾਲਾਂਕਿ ਇਸ ਵਾਰ ਸਖਤ ਕੋਟੇ ਤੇ ਈਵੈਂਟਸ ’ਚ ਬਦਲਾਅ ਕਾਰਨ ਭਾਰਤੀ ਦਲ ਛੋਟਾ ਹੈ। ਪੈਰਾ ਐਥਲੈਟਿਕਸ ’ਚ ਖਿਡਾਰੀਆਂ ਦੀ ਗਿਣਤੀ 123 ਤੋਂ ਘਟ ਕੇ 62 ਹੋ ਗਈ ਹੈ। ਪਿਛਲੇ ਐਡੀਸ਼ਨ ’ਚ ਭਾਰਤ ਨੇ ਇਸ ਖੇਡ ’ਚੋਂ 55 ਤਮਗੇ ਜਿੱਤੇ ਸਨ, ਜਿਸ ’ਚ 18 ਸੋਨੇ ਦੇ ਤਮਗੇ ਸ਼ਾਮਲ ਸਨ। ਇਸ ਵਾਰ ਪੈਰਾਲੰਪਿਕ ਚੈਂਪੀਅਨ ਸੁਮਿਤ ਅੰਤਿਲ, ਹਾਈ ਜੰਪਰ ਨਿਸ਼ਾਦ ਕੁਮਾਰ, ਦੌੜਾਕ ਪ੍ਰੀਤੀ ਪਾਲ ਤੇ ਕਲੱਬ ਥਰੋਅਰ ਧਰਮਬੀਰ ਸਿੰਘ ਤੋਂ ਤਮਗੇ ਦੀਆਂ ਉਮੀਦਾਂ ਹਨ। ਤੀਰਅੰਦਾਜ਼ੀ ’ਚ ਸ਼ੀਤਲ ਦੇਵੀ, ਹਰਵਿੰਦਰ ਸਿੰਘ ਤੇ ਤੋਮਨ ਕੁਮਾਰ ’ਤੇ ਨਜ਼ਰਾਂ ਰਹਿਣਗੀਆਂ, ਜਦਕਿ ਪੈਰਾ ਬੈਡਮਿੰਟਨ ’ਚ ਪ੍ਰਮੋਦ ਭਗਤ, ਸੁਹਾਸ ਐੱਲਵਾਈ ਤੇ ਪੈਰਿਸ ਪੈਰਾਲੰਪਿਕ ਚੈਂਪੀਅਨ ਨਿਤੀਸ਼ ਕੁਮਾਰ ਭਾਰਤੀ ਚੁਣੌਤੀ ਪੇਸ਼ ਕਰਨਗੇ। ਨਿਸ਼ਾਨੇਬਾਜ਼ੀ ’ਚ ਅਵਨੀ ਲੇਖਰਾ ਤੇ ਟੇਬਲ ਟੈਨਿਸ ’ਚ ਭਾਵਨਾ ਪਟੇਲ ਵੀ ਤਮਗੇ ਦੀਆਂ ਮੁੱਖ ਦਾਅਵੇਦਾਰ ਹੋਣਗੀਆਂ।