ਏਸ਼ਿਆਈ ਖੇਡਾਂ 'ਚ ਗੋਲਡ 'ਤੇ ਮੀਰਾਬਾਈ ਚਾਨੂ ਦੀ ਨਜ਼ਰ, ਵੇਟਲਿਫਟਿੰਗ ਟੀਮ ਦੀ ਕਰੇਗੀ ਅਗਵਾਈ; ਪਹਿਲਾ ਮੈਡਲ ਜਿੱਤਣ ਦਾ ਇਰਾਦਾ

ਏਸ਼ਿਆਈ ਖੇਡਾਂ 19 ਸਤੰਬਰ ਤੋਂ ਸ਼ੁਰੂ ਹੋਣਗੀਆਂ। ਵੇਟਲਿਫਟਿੰਗ ਮੁਕਾਬਲੇ 22 ਤੋਂ 28 ਸਤੰਬਰ ਤੱਕ ਟੋਕਾਈ ਸਿਟੀਜ਼ਨਜ਼ ਜਿਮਨੇਜ਼ੀਅਮ ’ਚ ਕਰਵਾਏ ਜਾਣਗੇ। ਮੀਰਾਬਾਈ ਮਹਿਲਾਵਾਂ ਦੇ 49 ਕਿਗ੍ਰਾ ਵਰਗ ’ਚ ਚੁਣੌਤੀ ਪੇਸ਼ ਕਰੇਗੀ। ਉਹ ਪਹਿਲੀ ਵਾਰ ਏਸ਼ਿਆਈ ਖੇਡਾਂ ’ਚ ਮੈਡਲ ਜਿੱਤਣ ਦੇ ਇਰਾਦੇ ਨਾਲ ਉਤਰ ਰਹੀ ਹੈ। ਹਾਂਗਝੋਊ 2023 ’ਚ ਉਹ ਬਹੁਤ ਹੀ ਥੋੜ੍ਹੇ ਫਰਕ ਨਾਲ ਮੈਡਲ ਤੋਂ ਖੁੰਝ ਗਈ ਸੀ ਤੇ ਚੌਥੇ ਸਥਾਨ ’ਤੇ ਰਹੀ ਸੀ। ਆਇਚੀ-ਨਾਗੋਯਾ ’ਚ ਮੈਡਲ ਜਿੱਤਣਾ ਮੀਰਾਬਾਈ ਲਈ ਬਹੁਤ ਹੀ ਖਾਸ ਉਪਲੱਬਧੀ ਹੋਵੇਗੀ। ਇਸ ਨਾਲ ਉਹ ਓਲੰਪਿਕ, ਏਸ਼ਿਆਈ ਖੇਡਾਂ ਤੇ ਰਾਸ਼ਟਰਮੰਡਲ ਖੇਡਾਂ ਜਿਹੇ ਤਿੰਨ ਪ੍ਰਮੁੱਖ ਬਹੁ-ਖੇਡ ਆਯੋਜਨਾਂ ’ਚ ਮੈਡਲ ਜਿੱਤਣ ਵਾਲੀ ਖਿਡਾਰੀ ਬਣ ਜਾਵੇਗੀ। ਪਿਛਲੇ ਮਹੀਨੇ ਰਾਸ਼ਟਰਮੰਡਲ ਖੇਡਾਂ ’ਚ ਉਸਨੇ ਲਗਾਤਾਰ ਤੀਜਾ ਸੋਨੇ ਦਾ ਮੈਡਲ ਤੇ ਕੁੱਲ ਚੌਥਾ ਮੈਡਲ ਆਪਣੇ ਨਾਮ ਕੀਤਾ ਸੀ। ਭਾਰਤੀ ਟੀਮ ’ਚ ਚਾਰ ਔਰਤ ਤੇ ਇਕ ਪੁਰਸ਼ ਵੇਟਲਿਫਟਰ ਸ਼ਾਮਲ ਹਨ। ਗਿਆਨੇਸ਼ਵਰੀ ਯਾਦਵ ਤੇ ਹਰਜਿੰਦਰ ਕੌਰ ਕ੍ਰਮਵਾਰ 53 ਤੇ 69 ਕਿਗ੍ਰਾ ਵਰਗ ’ਚ ਉਤਰਣਗੀਆਂ, ਜਦਕਿ ਸੇਰਾਮ ਨਿਰੂਪਮਾ ਦੇਵੀ 61 ਕਿਗ੍ਰਾ ’ਚ ਚੁਣੌਤੀ ਪੇਸ਼ ਕਰੇਗੀ।