ਅਰਜਨਟੀਨਾ ਖ਼ਿਲਾਫ਼ ਭਾਰਤ ਲਈ 'ਕਰੋ ਜਾਂ ਮਰੋ' ਦਾ ਮੁਕਾਬਲਾ, ਸੈਮੀਫਾਈਨਲ 'ਚ ਪਹੁੰਚਣ ਲਈ ਵੱਡੀ ਜਿੱਤ ਜ਼ਰੂਰੀ

ਵਿਸ਼ਵ ਕੱਪ ਦੇ ਨਵੇਂ ਫਾਰਮੈਟ ਦੇ ਤਹਿਤ ਪੂਲ ਈ ਤੇ ਐੱਫ ਦੇ ਦੂਜੇ ਦੌਰ ’ਚ ਸਿਖਰਲੇ ਦੋ ਸਥਾਨਾਂ ’ਤੇ ਰਹਿਣ ਵਾਲੀਆਂ ਟੀਮਾਂ ਸੈਮੀਫਾਈਨਲ ’ਚ ਜਾਣਗੀਆਂ। ਇੰਗਲੈਂਡ ਨੂੰ ਰੀਓ ਓਲੰਪਿਕ 2016 ਚੈਂਪੀਅਨ ਅਰਜਨਟੀਨਾ ਨੇ 3-1 ਨਾਲ ਹਰਾਇਆ ਪਰ ਪਹਿਲੇ ਦੌਰ ’ਚ ਭਾਰਤ ’ਤੇ ਮਿਲੀ ਜਿੱਤ ਕਾਰਨ ਇੰਗਲੈਂਡ ਕੋਲ ਤਿੰਨ ਅੰਕ ਹਨ। ਨੀਦਰਲੈਂਡ ਛੇ ਅੰਕਾਂ ਨਾਲ ਆਖਰੀ ਚਾਰ ’ਚ ਪਹੁੰਚ ਚੁੱਕਾ ਹੈ। ਅਰਜਨਟੀਨਾ ਦੇ ਵੀ ਕੱਲ੍ਹ ਮਿਲੀ ਜਿੱਤ ਤੋਂ ਬਾਅਦ ਤਿੰਨ ਅੰਕ ਹੋ ਗਏ ਹਨ, ਜਦਕਿ ਭਾਰਤ ਕੋਲ ਕੋਈ ਅੰਕ ਨਹੀਂ ਹੈ। ਹੁਣ ਭਾਰਤ ਨੂੰ ਨਾ ਸਿਰਫ ਅਰਜਨਟੀਨਾ ਨੂੰ ਵੱਡੇ ਅੰਤਰ ਨਾਲ ਹਰਾਉਣਾ ਹੋਵੇਗਾ, ਬਲਕਿ ਇੰਗਲੈਂਡ ਦੇ ਵੀ ਵੱਡੇ ਅੰਤਰ ਨਾਲ ਹਾਰਨ ਦੀ ਦੁਆ ਕਰਨੀ ਹੋਵੇਗੀ। ਅਰਜਨਟੀਨਾ ਨੂੰ ਹਰਾਉਣਾ ਆਸਾਨ ਨਹੀਂ ਹੋਵੇਗਾ, ਜਿਸਨੇ ਉਸ ਨੂੰ ਇਸ ਸਾਲ ਐੱਫਆਈਐੱਚ ਪ੍ਰੋ ਲੀਗ ’ਚ ਰਾਉਰਕੇਲਾ ’ਚ 8-0 ਤੇ 4-2 ਨਾਲ ਹਰਾਇਆ ਹੈ। ਇਸ ਤੋਂ ਇਲਾਵਾ ਇੰਗਲੈਂਡ ਵਿਰੁੱਧ ਵੀ ਪਿਛਲੇ ਮੈਚ ’ਚ ਉਸਨੇ ਜ਼ਬਰਦਸਤ ਪ੍ਰਦਰਸ਼ਨ ਕਰ ਕੇ ਭਾਰਤ ਲਈ ਖਤਰੇ ਦੀ ਘੰਟੀ ਵਜਾ ਦਿੱਤੀ ਹੈ। ਉਸ ਕੋਲ ਰੀਓ ਓਲੰਪਿਕ ਜੇਤੂ ਮਟਿਆਸ ਰੇ ਦੇ ਤੌਰ ’ਤੇ ਤਜਰਬੇਕਾਰ ਕਪਤਾਨ ਹੈ, ਜੋ 329 ਅੰਤਰਰਾਸ਼ਟਰੀ ਮੈਚ ਖੇਡ ਚੁੱਕਾ ਹੈ ਤੇ ਇਹ ਉਸਦਾ ਛੇਵਾਂ ਵਿਸ਼ਵ ਕੱਪ ਹੈ। ਭਾਰਤ ਜੇ ਦੋ ਗੋਲਾਂ ਤੋਂ ਵੱਧ ਦੇ ਅੰਤਰ ਨਾਲ ਜਿੱਤ ਦਰਜ ਕਰਦਾ ਹੈ ਤਾਂ ਹੀ ਅਰਜਨਟੀਨਾ ਬਾਹਰ ਹੋ ਸਕਦਾ ਹੈ ਕਿਉਂਕਿ ਅਜਿਹੇ ’ਚ ਉਸਦੇ ਗੋਲ ਵੱਧ ਹੋ ਜਾਣਗੇ। ਅਰਜਨਟੀਨਾ ਨੇ ਹਾਲੇ ਤੱਕ ਚਾਰ ਗੋਲ ਸਕੋਰ ਕੀਤੇ ਹਨ, ਜਦਕਿ ਭਾਰਤ ਦੇ ਤਿੰਨ ਗੋਲ ਹਨ।