ਭਾਰਤੀ ਮਹਿਲਾ ਹਾਕੀ ਟੀਮ ਦਾ ਸ਼ਾਨਦਾਰ ਸਫ਼ਰ, 5ਵੇਂ ਨੰਬਰ ਲਈ ਅੱਜ ਜਰਮਨੀ ਨਾਲ ਮੁਕਾਬਲਾ

ਪਹਿਲੀ ਵਾਰ ਵਿਸ਼ਵ ਕੱਪ ਖੇਡ ਰਹੀ 11 ਨੌਜਵਾਨ ਖਿਡਾਰੀਆਂ ਨਾਲ ਕੋਚ ਸ਼ੋਰਡ ਮਾਰਿਨ ਦੀ ਟੀਮ ਨੇ ਉਮੀਦਾਂ ਤੋਂ ਵੱਧ ਪ੍ਰਦਰਸ਼ਨ ਕੀਤਾ ਹੈ ਤੇ ਅਗਲੇ ਮਹੀਨੇ ਹੋਣ ਵਾਲੀਆਂ ਏਸ਼ਿਆਈ ਖੇਡਾਂ ਤੋਂ ਪਹਿਲਾਂ ਇਸ ਦਾ ਆਤਮਵਿਸ਼ਵਾਸ ਵਧੇਗਾ, ਜਿੱਥੇ ਸੋਨੇ ਦਾ ਮੈਡਲ ਜਿੱਤ ਕੇ ਲਾਸ ਏਂਜਲਸ ਓਲੰਪਿਕ ਲਈ ਸਿੱਧਾ ਕੁਆਲੀਫਾਈ ਕਰਨ ਦਾ ਮੌਕਾ ਹੈ। ਟੂਰਨਾਮੈਂਟ ਦੀ ਸ਼ੁਰੂਆਤ ’ਚ ਹੀ ਓਲੰਪਿਕ ਸਿਲਵਰ ਮੈਡਲ ਜੇਤੂ ਚੀਨ ਨੂੰ 2-2 ਦੇ ਡਰਾਅ 'ਤੇ ਰੋਕਣ ਵਾਲੀ ਭਾਰਤੀ ਟੀਮ ਨੇ ਦੂਜੇ ਮੈਚ ’ਚ ਦੱਖਣੀ ਅਫਰੀਕਾ ਨੂੰ 6-1 ਨਾਲ ਹਰਾਇਆ ਤੇ ਛੇ ਵੱਖ-ਵੱਖ ਖਿਡਾਰੀਆਂ ਨੇ ਗੋਲ ਕੀਤੇ। ਆਖਰੀ ਪੂਲ ਮੈਚ ਗੋਲਰਹਿਤ ਡਰਾਅ ਰਹਿਣ 'ਤੇ ਭਾਰਤ ਨੇ ਪੂਲ ਡੀ ’ਚ ਦੂਜੇ ਸਥਾਨ 'ਤੇ ਰਹਿ ਕੇ ਦੂਜੇ ਦੌਰ ’ਚ ਜਗ੍ਹਾ ਬਣਾਈ ਸੀ। ਦੂਜੇ ਦੌਰ ’ਚ ਓਲੰਪਿਕ ਤੇ ਵਿਸ਼ਵ ਕੱਪ ਚੈਂਪੀਅਨ ਨੀਦਰਲੈਂਡ ਨੂੰ ਭਾਰਤ ਨੇ ਖੁੱਲ੍ਹ ਕੇ ਖੇਡਣ ਨਹੀਂ ਦਿੱਤਾ ਤੇ ਮਹਿਮਾਨ ਟੀਮ ਪੈਨਲਟੀ ਕਾਰਨਰ 'ਤੇ ਹੀ ਦੋ ਗੋਲ ਕਰ ਸਕੀ। ਇਹ ਟੂਰਨਾਮੈਂਟ ’ਚ ਭਾਰਤ ਦੀ ਇਕਮਾਤਰ ਹਾਰ ਸੀ ਤੇ ਉਸ ਨੂੰ ਅਗਲੇ ਮੈਚ ’ਚ ਹਰ ਹਾਲਤ ’ਚ ਆਸਟ੍ਰੇਲੀਆ ਨੂੰ ਹਰਾਉਣਾ ਸੀ ਪਰ ਉਹ ਮੈਚ ਵੀ ਗੋਲਰਹਿਤ ਡਰਾਅ ਰਿਹਾ, ਜਿਸ ਨਾਲ ਸੈਮੀਫਾਈਨਲ ਖੇਡਣ ਦਾ ਸੁਪਨਾ ਟੁੱਟ ਗਿਆ।