ICC T20 ਰੈਂਕਿੰਗ 'ਚ ਛਾਈ ਭਾਰਤੀ ਟੀਮ, ਸ਼੍ਰੀਚਰਨੀ ਨੰਬਰ-1; ਦੀਪਤੀ ਸ਼ਰਮਾ ਦੂਜੇ ਸਥਾਨ 'ਤੇ

ਏਸ਼ੀਆ ਕੱਪ ’ਚ ਸ਼੍ਰੀਚਰਨੀ ਨੇ ਸ੍ਰੀਲੰਕਾ ਵਿਰੁੱਧ ਖ਼ਿਤਾਬੀ ਮੁਕਾਬਲੇ ’ਚ 20 ਦੌੜਾਂ ਦੇ ਕੇ ਚਾਰ ਵਿਕਟਾਂ ਲਈਆਂ ਤੇ ਪੂਰੇ ਟੂਰਨਾਮੈਂਟ ’ਚ ਕੁੱਲ 12 ਵਿਕਟਾਂ ਲੈ ਕੇ ਆਪਣਾ ਸ਼ਾਨਦਾਰ ਸਫ਼ਰ ਪੂਰਾ ਕੀਤਾ। ਇਸ ਨਾਲ ਉਹ 800 ਰੇਟਿੰਗ ਅੰਕ ਦਾ ਅੰਕੜਾ ਪਾਰ ਕਰਨ ਵਾਲੀ ਪਹਿਲੀ ਭਾਰਤੀ ਗੇਂਦਬਾਜ਼ ਤੇ ਕੁੱਲ ਮਿਲਾ ਕੇ ਤੀਜੀ ਗੇਂਦਬਾਜ਼ ਬਣ ਗਈ ਹੈ ਤੇ ਹੁਣ ਉਸਦੀ ਨਜ਼ਰ ਹੁਣ ਤੱਕ ਦੀ ਸਭ ਤੋਂ ਜ਼ਿਆਦਾ ਰੇਟਿੰਗ ਦਾ ਰਿਕਾਰਡ ਤੋੜਨ ’ਤੇ ਹੈ। ਮਹਿਲਾ ਟੀ-20 ਅੰਤਰਰਾਸ਼ਟਰੀ ਮੁਕਾਬਲੇ ’ਚ ਗੇਂਦਬਾਜ਼ਾਂ ਲਈ ਹੁਣ ਤੱਕ ਦੀ ਸਰਬੋਤਮ ਰੇਟਿੰਗ ਆਸਟ੍ਰੇਲੀਆ ਦੀ ਤੇਜ਼ ਗੇਂਦਬਾਜ਼ ਮੈਗਨ ਸ਼ੂਟ ਦੇ ਨਾਂ ਹੈ, ਜਿਸਨੇ ਸਿਖਰ ’ਤੇ ਰਹਿੰਦੇ ਹੋਏ 806 ਰੇਟਿੰਗ ਹਾਸਲ ਕੀਤੀ ਸੀ। ਸ਼੍ਰੀਚਰਨੀ ਨੇ ਇਕ ਕੈਲੰਡਰ ਸਾਲ ’ਚ ਕਿਸੇ ਭਾਰਤੀ ਵੱਲੋਂ ਸਭ ਤੋਂ ਵੱਧ ਵਿਕਟਾਂ ਲੈਣ ਦਾ ਪੂਨਮ ਯਾਦਵ ਦਾ ਰਿਕਾਰਡ ਤੋੜਿਆ ਸੀ। ਉਸ ਤੋਂ ਪਹਿਲਾਂ ਸਾਬਕਾ ਨੰਬਰ ਇਕ ਸੋਫੀ ਐਕਲੈਸਟੋਨ ਵੀ 802 ਰੇਟਿੰਗ ਤੱਕ ਪਹੁੰਚ ਚੁੱਕੀ ਹੈ।