ਭਾਰਤ ਤੇ ਪਾਕਿਸਤਾਨ ਦਾ ਹਾਕੀ ਵਿਸ਼ਵ ਕੱਪ 'ਚ ਮਹਾ-ਮੁਕਾਬਲਾ ਅੱਜ, ਭਾਰਤ ਆਪਣਾ ਅਜੇਤੂ ਸਫ਼ਰ ਜਾਰੀ ਰੱਖਣ ਲਈ ਉਤਰੇਗਾ ਮੈਦਾਨ 'ਚ

ਭਾਰਤ ਦੇ ਦੋ ਮੈਚਾਂ ਵਿਚ ਤਿੰਨ ਅੰਕ ਹਨ ਤੇ ਉਸਨੂੰ ਅਗਲੇ ਦੌਰ ਵਿਚ ਪਹੁੰਚਣ ਲਈ ਘੱਟੋ-ਘੱਟ ਡਰਾਅ ਦੀ ਲੋੜ ਹੈ। ਦੂਜੇ ਪਾਸੇ, ਇਕ ਅੰਕ ਨਾਲ ਪਾਕਿਸਤਾਨ ਲਈ ਟੂਰਨਾਮੈਂਟ ਵਿਚ ਬਣੇ ਰਹਿਣ ਲਈ ਜਿੱਤ ਜ਼ਰੂਰੀ ਹੈ। ਇੰਗਲੈਂਡ ਆਪਣੇ ਦੋਵਾਂ ਮੈਚਾਂ ਨੂੰ ਜਿੱਤ ਕੇ ਪਹਿਲਾਂ ਹੀ ਅਗਲੇ ਦੌਰ ਵਿਚ ਪਹੁੰਚ ਚੁੱਕਾ ਹੈ। ਭਾਰਤ ਨੇ ਆਪਣੀ ਮੁਹਿੰਮ ਦੀ ਸ਼ੁਰੂਆਤ ਵੇਲਜ਼ ਨੂੰ 3-1 ਨਾਲ ਹਰਾ ਕੇ ਕੀਤੀ ਸੀ, ਪਰ ਦੁਨੀਆ ਦੀ ਤੀਜੀ ਨੰਬਰ ਦੀ ਟੀਮ ਇੰਗਲੈਂਡ ਦੇ ਖ਼ਿਲਾਫ਼ ਉਸਨੂੰ 2-4 ਨਾਲ ਹਾਰ ਦਾ ਸਾਹਮਣਾ ਕਰਨਾ ਪਿਆ। ਦੂਜੇ ਹਾਫ ਵਿਚ ਤਿੰਨ ਗੋਲ ਗੁਆਉਣਾ ਭਾਰਤ ਲਈ ਚਿੰਤਾ ਦਾ ਵਿਸ਼ਾ ਰਿਹਾ ਹੈ। ਭਾਰਤੀ ਕੋਚ ਕ੍ਰੇਗ ਫੁਲਟਨ ਲਈ ਡਿਫੈਂਸਿਵ ਗਲਤੀਆਂ ਅਤੇ ਪੈਨਾਲਟੀ ਕਾਰਨਰ ਨੂੰ ਗੋਲ ਵਿਚ ਬਦਲਣ ਦੀ ਖਰਾਬ ਦਰ ਮੁੱਖ ਚਿੰਤਾ ਬਣੀ ਹੋਈ ਹੈ। ਦੂਜੇ ਪਾਸੇ, ਪਾਕਿਸਤਾਨ ਨੇ ਇੰਗਲੈਂਡ ਤੋਂ 1-4 ਦੀ ਹਾਰ ਦੇ ਬਾਅਦ ਵੇਲਜ਼ ਦੇ ਖ਼ਿਲਾਫ਼ 3-3 ਦਾ ਡਰਾਅ ਖੇਡਿਆ। ਭਾਰਤ ਨੂੰ ਚੁਣੌਤੀ ਦੇਣ ਲਈ ਪਾਕਿਸਤਾਨ ਨੂੰ ਆਪਣੇ ਪ੍ਰਦਰਸ਼ਨ ਵਿਚ ਕਾਫੀ ਸੁਧਾਰ ਕਰਨਾ ਪਵੇਗਾ। ਪਾਕਿਸਤਾਨ ਦੇ ਪੈਨਾਲਟੀ ਕਾਰਨਰ ਅਤੇ ਡਿਫੈਂਸ ਵਿਚ ਵੀ ਹੁਣ ਤੱਕ ਨਿਰੰਤਰਤਾ ਦੀ ਕਮੀ ਰਹੀ ਹੈ। ਹਾਲੀ ਦੇ ਮੁਕਾਬਲਿਆਂ ਵਿਚ ਭਾਰਤ ਦਾ ਪਾਕਿਸਤਾਨ 'ਤੇ ਪਲੜਾ ਭਾਰੀ ਰਿਹਾ ਹੈ। ਇਸ ਸਾਲ ਪ੍ਰੋ ਲੀਗ ਦੇ ਯੂਰਪੀ ਗੇੜ ਵਿਚ ਭਾਰਤ ਨੇ ਪਾਕਿਸਤਾਨ ਨੂੰ 7-1 ਅਤੇ 4-3 ਨਾਲ ਹਰਾਇਆ ਸੀ। ਪਾਕਿਸਤਾਨ ਨੇ ਭਾਰਤ ਦੇ ਖ਼ਿਲਾਫ਼ ਆਪਣੀ ਆਖਰੀ ਜਿੱਤ 2016 ਚੈਂਪੀਅਨਸ ਟਰਾਫੀ ਵਿਚ ਦਰਜ ਕੀਤੀ ਸੀ।