ਹਾਕੀ ਵਿਸ਼ਵ ਕੱਪ : ਨੀਦਰਲੈਂਡਸ ਹੱਥੋਂ 3-1 ਨਾਲ ਹਾਰ ਕੇ ਸੈਮੀਫਾਈਨਲ ਦੀ ਦੌੜ ਤੋਂ ਬਾਹਰ ਹੋਇਆ ਭਾਰਤ

ਭਾਰਤ ਨੇ ਪਹਿਲੇ ਹਾਫ ’ਚ ਸ਼ਾਨਦਾਰ ਤੇ ਸੰਜਮ ਭਰੀ ਖੇਡ ਦਿਖਾਈ ਪਰ ਆਖਰੀ ਕੁਆਰਟਰ ’ਚ ਕੀਤੀਆਂ ਗਲਤੀਆਂ ਕਾਰਨ ਉਸ ਨੂੰ ਹਾਰ ਦਾ ਸਾਹਮਣਾ ਕਰਨਾ ਪਿਆ। ਭਾਰਤ ਨੂੰ ਅੰਤਿਮ ਚਾਰ ’ਚ ਪੁੱਜਣ ਲਈ ਇਸ ਮੁਕਾਬਲੇ ’ਚ ਹਰ ਹਾਲਤ ’ਚ ਜਿੱਤ ਦਰਜ ਕਰਨੀ ਸੀ। ਟੀਮ ਨੇ ਚੰਗੀ ਸ਼ੁਰੂਆਤ ਕੀਤੀ ਤੇ ਪਹਿਲੇ ਹਾਫ ’ਚ ਨੀਦਰਲੈਂਡਸ ਨੂੰ ਗੋਲ ਕਰਨ ਦਾ ਕੋਈ ਮੌਕਾ ਨਹੀਂ ਦਿੱਤਾ। ਭਾਰਤੀ ਰੱਖਿਆ ਪੰਕਤੀ ਨੇ ਸ਼ਾਨਦਾਰ ਪ੍ਰਦਰਸ਼ਨ ਕਰਦਿਆਂ ਡੱਚ ਟੀਮ ਦੇ ਮਿਡਫੀਲਡ ਨੂੰ ਲੰਬੇ ਸਮੇਂ ਤੱਕ ਗੇਂਦ 'ਤੇ ਕਬਜ਼ਾ ਬਣਾਈ ਰੱਖਣ ਤੋਂ ਰੋਕਿਆ। ਹਾਲਾਂਕਿ, ਤੀਜੇ ਕੁਆਰਟਰ ਤੋਂ ਮੈਚ ਦਾ ਰੁਖ ਬਦਲ ਗਿਆ। ਨੀਦਰਲੈਂਡਸ ਦੇ ਡਿਊਕੋ ਟੇਲਗੇਨਕੈਂਪ ਨੇ 41ਵੇਂ ਮਿੰਟ ’ਚ ਗੋਲ ਕਰ ਕੇ ਆਪਣੀ ਟੀਮ ਨੂੰ ਅਗੇ ਵਧਾਇਆ। ਇਸ ਤੋਂ ਬਾਅਦ 51ਵੇਂ ਮਿੰਟ ’ਚ ਟੀਜੇਪ ਹੂਡੇਮੇਕਰਸ ਨੇ ਗੋਲ ਕਰ ਕੇ ਸਕੋਰ 2-0 ਕਰ ਦਿੱਤਾ। ਭਾਰਤੀ ਕੈਪਟਨ ਹਰਮਨਪ੍ਰੀਤ ਸਿੰਘ ਨੇ ਅਗਲੇ ਹੀ ਮਿੰਟ ’ਚ ਪੈਨਲਟੀ ਕਾਰਨਰ 'ਤੇ ਸ਼ਾਨਦਾਰ ਡ੍ਰੈਗ-ਫਲਿਕ ਨਾਲ ਭਾਰਤ ਦਾ ਖਾਤਾ ਖੋਲ੍ਹਿਆ ਤੇ ਵਾਪਸੀ ਦੀ ਉਮੀਦ ਜਗਾਈ ਪਰ 55ਵੇਂ ਮਿੰਟ ’ਚ ਥਾਇਸ ਵਾਨ ਡੈਮ ਨੇ ਇਕ ਹੋਰ ਫੀਲਡ ਗੋਲ ਕਰ ਕੇ ਨੀਦਰਲੈਂਡਸ ਦੀ ਬੜ੍ਹਤ 3-1 ਕਰ ਦਿੱਤੀ।