ਡੀਪੀ ਵਰਲਡ ਇੰਡੀਆ ਚੈਂਪੀਅਨਸ਼ਿਪ : 27 ਭਾਰਤੀ ਗੋਲਫਰ ਰੋਰੀ ਮੈਕਿਲਰੋਏ ਤੇ ਟਾਮੀ ਫਲੀਟਵੁੱਡ ਵਰਗੇ ਦਿੱਗਜਾਂ ਨਾਲ ਹੋਣਗੇ ਮੁਕਾਬਲੇ ’ਚ

ਨਵੀਂ ਦਿੱਲੀ, (ਪੀਟੀਆਈ) : ਸ਼ੁਭੰਕਰ ਸ਼ਰਮਾ ਤੇ ਅਨਿਰਬਾਨ ਲਾਹਿੜੀ ਵਰਗੇ ਤਜਰਬੇਕਾਰ ਸਿਤਾਰਿਆਂ ਦੀ ਅਗਵਾਈ ਹੇਠ 27 ਭਾਰਤੀ ਗੋਲਫਰ ਡੀਪੀ ਵਰਲਡ ਇੰਡੀਆ ਚੈਂਪੀਅਨਸ਼ਿਪ ’ਚ ਚੁਣੌਤੀ ਪੇਸ਼ ਕਰਨ ਲਈ ਤਿਆਰ ਹਨ। ਸੱਤ ਵਾਰ ਦੇ ਮੇਜਰ ਜੇਤੂ ਰੋਰੀ ਮੈਕਿਲਰੋਏ ਤੇ ਟਾਮੀ ਫਲੀਟਵੁੱਡ ਵਰਗੇ ਦਿੱਗਜਾਂ ਸਾਹਮਣੇ ਭਾਰਤੀ ਗੋਲਫਰਾਂ ਲਈ ਰਸਤਾ ਆਸਾਨ ਨਹੀਂ ਹੋਵੇਗਾ। ਫਿਰ ਵੀ, 40 ਲੱਖ ਅਮਰੀਕੀ ਡਾਲਰ ਦੀ ਇਨਾਮੀ ਰਾਸ਼ੀ ਵਾਲੇ ਇਸ ਟੂਰਨਾਮੈਂਟ ’ਚ ਸ਼ਰਮਾ ਤੇ ਲਾਹਿੜੀ ਨਾਲ ਗਗਨਜੀਤ ਭੁੱਲਰ, ਸਪਤਕ ਤਲਵਾਰ, ਖਲੀਨ ਜੋਸ਼ੀ, ਵੀਰ ਅਹਿਲਾਵਤ ਤੇ ਯੁਵਰਾਜ ਸੰਧੂ ਤੋਂ ਬਿਹਤਰ ਪ੍ਰਦਰਸ਼ਨ ਦੀ ਉਮੀਦ ਰਹੇਗੀ।

ਦਿੱਲੀ ਗੋਲਫ ਕਲੱਬ ’ਚ ਅੱਜ ਤੋਂ ਸ਼ੁਰੂ ਹੋ ਰਹੇ ਇਸ ਮੁਕਾਬਲੇ ’ਚ ਕੁੱਲ 144 ਗੋਲਫਰ ਹਿੱਸਾ ਲੈਣਗੇ। ਪਿਛਲੇ ਹਫ਼ਤੇ ਕਪਿਲ ਦੇਵ ਇਨਵਾਈਟੇਸ਼ਨਲ ਟੂਰ ਚੈਂਪੀਅਨਸ਼ਿਪ ਜਿੱਤਣ ਵਾਲੇ ਸ਼ੁਭੰਕਰ ਇਸ ਟੂਰਨਾਮੈਂਟ ’ਚ ਭਾਰਤ ਲਈ ਮੁੱਖ ਖਿੱਚ ਹੋਣਗੇ। ਸੱਤ ਹਫ਼ਤਿਆਂ ਦੇ ਵਕਫ਼ੇ ਮਗਰੋਂ ਮੈਦਾਨ ’ਚ ਉਤਰ ਰਹੇ ਲਾਹਿੜੀ ਲਈ ਜਲਦੀ ਲੈਅ ਹਾਸਲ ਕਰਨਾ ਚੁਣੌਤੀ ਹੋਵੇਗੀ। ਕਰੀਅਰ ਗ੍ਰੈਂਡ ਸਲੈਮ ਜੇਤੂ ਮੈਕਿਲਰੋਏ ਤੇ ਮੌਜੂਦਾ ਚੈਂਪੀਅਨ ਵਜੋਂ ਵਾਪਸੀ ਕਰ ਰਹੇ ਟਾਮੀ ਫਲੀਟਵੁੱਡ ਕੌਮਾਂਤਰੀ ਚੁਣੌਤੀ ਦੀ ਅਗਵਾਈ ਕਰਨਗੇ। ਟੂਰਨਾਮੈਂਟ ’ਚ ਮੇਜਰ ਚੈਂਪੀਅਨ ਜਸਟਿਨ ਰੋਜ਼, ਪੈਟ੍ਰਿਕ ਰੀਡ, ਬੱਬਾ ਵਾਟਸਨ ਤੇ ਸ਼ੇਨ ਲੋਰੀ ਵਰਗੇ ਵੱਡੇ ਨਾਂ ਵੀ ਸ਼ਾਮਲ ਹਨ।