ਏਸ਼ੀਆਈ ਖੇਡਾਂ ਤੋਂ ਪਹਿਲਾਂ ਭਾਰਤ ਨੂੰ ਵੱਡਾ ਝਟਕਾ, ਸੱਟ ਕਾਰਨ ਨੀਰਜ ਚੋਪੜਾ ਬਾਹਰ; ਡਾਇਮੰਡ ਲੀਗ ਫਾਈਨਲ 'ਚ ਵੀ ਨਹੀਂ ਲੈ ਸਕਣਗੇ ਹਿੱਸਾ

ਨਵੀਂ ਦਿੱਲੀ, ਪੀਟੀਆਈ : ਭਾਰਤ ਦੀ ਅਥਲੈਟਿਕਸ ਮੁਹਿੰਮ ਨੂੰ ਵੱਡਾ ਝਟਕਾ ਲੱਗਾ ਹੈ। ਉਲੰਪਿਕ ਚੈਂਪੀਅਨ ਨੀਰਜ ਚੋਪੜਾ ਨੇ ਸ਼ਨੀਵਾਰ ਨੂੰ ਐਲਾਨ ਕੀਤਾ ਕਿ ਉਹ 2026 ਦੇ ਬਾਕੀ ਸੀਜ਼ਨ ’ਚ ਹਿੱਸਾ ਨਹੀਂ ਲਵੇਗਾ, ਜਿਸ ’ਚ ਜਾਪਾਨ ’ਚ ਏਸ਼ੀਆਈ ਖੇਡਾਂ ਵੀ ਸ਼ਾਮਲ ਹਨ। ਉਸ ਨੇ ਇਹ ਫੈਸਲਾ ਟ੍ਰੇਨਿੰਗ ਦੌਰਾਨ ਗਿੱਟੇ ’ਚ ਲਿਗਾਮੈਂਟ ਦੀ ਸੱਟ ਲੱਗਣ ਤੋਂ ਬਾਅਦ ਲਿਆ ਹੈ। ਨੀਰਜ ਨੇ ਦੱਸਿਆ ਕਿ ਲੁਸਾਨੇ ਡਾਇਮੰਡ ਲੀਗ ’ਚ ਸੀਜ਼ਨ ਦਾ ਆਪਣਾ ਸਰਬੋਤਮ ਥ੍ਰੋਅ ਕਰਨ ਤੋਂ ਤੁਰੰਤ ਬਾਅਦ ਉਸ ਨੂੰ ਇਹ ਸੱਟ ਲੱਗੀ। ਨੀਰਜ ਨੇ ਇੰਸਟਾਗ੍ਰਾਮ ’ਤੇ ਇਕ ਪੋਸਟ 'ਚ ਕਿਹਾ ਕਿ ਕਾਫੀ ਸਮੇਂ ਦੀ ਸਖਤ ਮਿਹਨਤ ਤੋਂ ਬਾਅਦ ਆਖਰਕਾਰ ਮੈਂ ਮਹਿਸੂਸ ਕੀਤਾ ਕਿ ਮੈਂ ਲੌਸਨੇ 'ਚ ਸੀਜ਼ਨ ਦੇ ਆਪਣੇ ਸਰਬੋਤਮ ਥ੍ਰੋਅ ਨਾਲ ਉਸ ਲੈਅ ’ਤੇ ਵਾਪਸ ਆ ਰਿਹਾ ਹਾਂ ਜਿਸ ਦੀ ਮੈਂ ਭਾਲ ਕਰ ਰਿਹਾ ਸੀ। ਬਦਕਿਸਮਤੀ ਨਾਲ ਇਸ ਤੋਂ ਥੋੜ੍ਹੀ ਦੇਰ ਬਾਅਦ ਮੈਂ ਟ੍ਰੇਨਿੰਗ ਦੌਰਾਨ ਆਪਣੇ ਗਿੱਟੇ ’ਚ ਇੱਕ ਲਿਗਾਮੈਂਟ ’ਤੇ ਸੱਟ ਲੱਗ ਗਈ। ਆਪਣੇ ਡਾਕਟਰ ਤੇ ਟੀਮ ਨਾਲ ਚਰਚਾ ਤੋਂ ਬਾਅਦ ਅਸੀਂ ਫੈਸਲਾ ਕੀਤਾ ਹੈ ਕਿ ਮੈਂ ਇਸ ਸੀਜ਼ਨ ਦੇ ਬਾਕੀ ਬਚੇ ਸਮੇਂ ਲਈ ਬਾਹਰ ਹੋਵਾਂਗਾ। 28 ਸਾਲਾ ਜੈਵਲਿਨ ਥ੍ਰੋਅਰ ਨੇ ਕਿਹਾ ਕਿ ਇਹ ਫੈਸਲਾ ਨਿਰਾਸ਼ਾਜਨਕ ਸੀ, ਕਿਉਂਕਿ ਉਸ ਨੂੰ ਲੱਗਾ ਕਿ ਉਹ ਆਪਣੀ ਲੈਅ ਲੱਭਣ ਦੇ ਨੇੜੇ ਹੈ। ਹਾਲਾਂਕਿ ਉਸ ਨੇ ਕਿਹਾ ਕਿ ਉਸ ਦਾ ਫੌਰੀ ਧਿਆਨ ਹੁਣ ਸੱਟ ਤੋਂ ਉਭਰਨ 'ਤੇ ਹੋਵੇਗਾ।