Asian Games 2026 : ਭਾਰਤੀ ਮਹਿਲਾ ਕ੍ਰਿਕਟ ਟੀਮ ਦੀ ਨਜ਼ਰ ਗੋਲਡ ਮੈਡਲ 'ਤੇ, ਫਾਈਨਲ 'ਚ ਸ੍ਰੀਲੰਕਾ ਨਾਲ ਹੋਵੇਗੀ ਟੱਕਰ

ਨਿਸ਼ਿਨ (ਜਾਪਾਨ), ਪੀਟੀਆਈ : ਭਾਰਤ ਦਾ ਏਸ਼ਿਆਈ ਖੇਡਾਂ ’ਚ ਮਹਿਲਾ ਕ੍ਰਿਕਟ ’ਚ ਦਬਦਬਾ ਕਾਇਮ ਰਹਿਣ ਦੀ ਉਮੀਦ ਹੈ ਪਰ ਮੰਗਲਵਾਰ ਨੂੰ ਹੋਣ ਵਾਲੇ ਫਾਈਨਲ ’ਚ ਸ੍ਰੀਲੰਕਾ ਦੀ ਟੀਮ ਸਾਬਕਾ ਚੈਂਪੀਅਨ ਨੂੰ ਸਖ਼ਤ ਚੁਣੌਤੀ ਦੇਣ ਦੇ ਇਰਾਦੇ ਨਾਲ ਉਤਰੇਗੀ। ਭਾਰਤੀ ਮਹਿਲਾ ਤੇ ਮਰਦ ਦੋਵਾਂ ਟੀਮਾਂ ਦੇ ਇਕ ਵਾਰ ਫਿਰ ਪੋਡੀਅਮ ਦੇ ਸਿਖਰ ’ਤੇ ਪੁੱਜਣ ਦੀ ਉਮੀਦ ਹੈ ਤੇ ਬੇਹੱਦ ਖ਼ਰਾਬ ਪ੍ਰਦਰਸ਼ਨ ਹੀ ਉਸ ਨੂੰ ਗੋਲਡ ਮੈਡਲ ਤੋਂ ਰੋਕ ਸਕਦਾ ਹੈ। ਹਰਮਨਪ੍ਰੀਤ ਕੌਰ ਦੀ ਅਗਵਾਈ ਵਾਲੀ ਭਾਰਤੀ ਟੀਮ ਨੇ ਜਾਪਾਨ ਤੇ ਬੰਗਲਾਦੇਸ਼ ਵਿਰੁੱਧ ਸ਼ਾਨਦਾਰ ਜਿੱਤ ਦਰਜ ਕਰ ਕੇ ਫਾਈਨਲ ’ਚ ਥਾਂ ਬਣਾਈ ਹੈ। ਮੰਗਲਵਾਰ ਨੂੰ ਗੋਲਡ ਮੈਡਲ ਜਿੱਤਣ ’ਤੇ ਭਾਰਤ ਖੇਤਰ ’ਚ ਆਪਣੀ ਬਾਦਸ਼ਾਹਤ ਹੋਰ ਮਜ਼ਬੂਤ ਕਰੇਗੀ। ਭਾਰਤ ਨੇ ਇਸ ਮਹੀਨੇ ਦੀ ਸ਼ੁਰੂਆਤ ’ਚ ਏਸ਼ੀਆ ਕੱਪ ਦੇ ਫਾਈਨਲ ’ਚ ਵੀ ਸ੍ਰੀਲੰਕਾ ਨੂੰ ਹਰਾਇਆ ਸੀ। ਸ੍ਰੀਲੰਕਾ ਅਤੀਤ ’ਚ ਭਾਰਤ ਨੂੰ ਹਰਾ ਚੁੱਕਾ ਹੈ ਪਰ ਹਾਲ ਹੀ ਦੇ ਸਾਲਾਂ ’ਚ ਭਾਰਤ ਤੇ ਹੋਰਨਾਂ ਏਸ਼ਿਆਈ ਟੀਮਾਂ ਵਿਚਾਲੇ ਅੰਤਰ ਵਧਿਆ ਹੈ। ਕਪਤਾਨ ਚਮਾਰੀ ਅੱਟਾਪੱਟੂ ਦੀ 50 ਗੇਂਦਾਂ ’ਚ 82 ਦੌੜਾਂ ਦੀ ਸ਼ਾਨਦਾਰ ਪਾਰੀ ਦੀ ਬਦੌਲਤ ਸ੍ਰੀਲੰਕਾ ਨੇ ਪਾਕਿਸਤਾਨ ਵਿਰੁੱਧ ਚੁਣੌਤੀਪੂਰਣ ਟੀਚੇ ਦਾ ਸਫਲਤਾਪੂਰਵਕ ਪਿੱਛਾ ਕੀਤਾ।