Asian Games 2026 : ਅੰਕੁਸ਼ ਤੇ ਪਰਵੀਨ ਫਾਈਨਲ 'ਚ ਪੁੱਜੇ, ਨਰਿੰਦਰ ਨੂੰ ਮਿਲਿਆ ਕਾਂਸੀ ਦਾ ਤਮਗਾ

ਅੰਕੁਸ਼ ਨੇ 80 ਕਿੱਲੋ ਭਾਰ ਵਰਗ ’ਚ ਸ਼ਾਨਦਾਰ ਪ੍ਰਦਰਸ਼ਨ ਕਰਦੇ ਹੋਏ ਮੌਜੂਦਾ 75 ਕਿੱਲੋ ਵਰਗ ਦੇ ਵਿਸ਼ਵ ਚੈਂਪੀਅਨ ਉਜ਼ਬੇਕਿਸਤਾਨ ਦੇ ਫਜ਼ਲਿਦਿਨ ਇਰਕਿਨਬੋਵ ਨੂੰ 4-1 ਨਾਲ ਹਰਾਇਆ। ਰਾਸ਼ਟਰਮੰਡਲ ਖੇਡਾਂ ਦੇ ਗੋਲਡ ਮੈਡਲ ਜੇਤੂ ਅੰਕੁਸ਼ ਨੇ ਪੱਛੜਨ ਤੋਂ ਬਾਅਦ ਵਾਪਸੀ ਕਰਦੇ ਹੋਏ ਇਹ ਜਿੱਤ ਹਾਸਲ ਕੀਤੀ। ਫਾਈਨਲ ’ਚ ਉਸਦਾ ਸਾਹਮਣਾ ਦੱਖਣੀ ਕੋਰੀਆ ਦੇ ਕਿਮ ਮਿਨਸਿਓਂਗ ਨਾਲ ਹੋਵੇਗਾ। ਇਸ ਤੋਂ ਪਹਿਲਾਂ 2018 ’ਚ ਅਮਿਤ ਪੰਘਾਲ ਨੇ 49 ਕਿੱਲੋ ਵਰਗ ਦਾ ਗੋਲਡ ਮੈਡਲ ਜਿੱਤਿਆ ਸੀ। ਨਰਿੰਦਰ ਨੂੰ ਕਜ਼ਾਕਿਸਤਾਨ ਦੇ ਅਈਬੇਕ ਓਰਲਬੇ ਨੇ 5-0 ਨਾਲ ਹਰਾ ਕੇ ਕਾਂਸੀ ਤਮਗੇ ਨਾਲ ਸਬਰ ਕਰਨ ’ਤੇ ਮਜਬੂਰ ਕਰ ਦਿੱਤਾ। ਇਹ ਨਰਿੰਦਰ ਦਾ ਏਸ਼ਿਆਈ ਖੇਡਾਂ ’ਚ ਦੂਜਾ ਮੈਡਲ ਹੈ, ਉਸਨੇ 2023 ਹਾਂਗਝੂ ਖੇਡਾਂ ’ਚ ਵੀ ਪੋਡੀਅਮ ਤੱਕ ਪੁੱਜਣ ਦਾ ਮਾਣ ਹਾਸਲ ਕੀਤਾ ਸੀ। ਮਹਿਲਾਵਾਂ ਦੇ ਮੁਕਾਬਲੇ ’ਚ ਪਰਵੀਨ ਏਸ਼ਿਆਈ ਖੇਡਾਂ ਦੀ ਮੁੱਕੇਬਾਜ਼ੀ ਦੇ ਫਾਈਨਲ ’ਚ ਪਹੁੰਚਣ ਵਾਲੀ ਤੀਜੀ ਭਾਰਤੀ ਮਹਿਲਾ ਬਣੀ। 2014 ’ਚ ਐੱਮਸੀ ਮੈਰੀਕਾਮ ਨੇ ਗੋਲਡ ਮੈਡਲ ਜਿੱਤਿਆ ਸੀ, ਜਦਕਿ ਲਵਲੀਨਾ ਬੋਰਗੋਹਾਈਨ ਨੇ ਪਿਛਲੇ ਐਡੀਸ਼ਨ ’ਚ ਸਿਲਵਰ ਮੈਡਲ ਆਪਣੇ ਨਾਂ ਕੀਤਾ ਸੀ। ਪਰਵੀਨ ਨੇ ਪਿਛਲੇ ਐਡੀਸ਼ਨ ’ਚ ਕਾਂਸੀ ਤਮਗਾ ਜਿੱਤਿਆ ਸੀ ਪਰ ਡੋਪ ਟੈਸਟ ’ਚ ਅਸਫਲ ਹੋਣ ਕਾਰਨ ਉਸ ’ਤੇ 22 ਮਹੀਨਿਆਂ ਲਈ ਪਾਬੰਦੀ ਲਗਾ ਦਿੱਤੀ ਗਈ ਸੀ।