ਸੜਕ ਹਾਦਸੇ ਨੇ ਬਦਲੀ ਜ਼ਿੰਦਗੀ, ਪਰ ਆਤਮਵਿਸ਼ਵਾਸ ਨਾ ਹੋਇਆ ਕਮਜ਼ੋਰ; ਜਾਣੋ ਪੈਰਾ ਐਥਲੀਟ ਸਚਿਨ ਚਮਰੀਆ ਦੇ ਸੰਘਰਸ਼ ਤੇ ਜਜ਼ਬੇ ਦੀ ਦਾਸਤਾਨ

ਸਾਲ 2008 ’ਚ ਇਕ ਸੜਕ ਹਾਦਸੇ ’ਚ ਸਚਿਨ ਗੰਭੀਰ ਰੂਪ ਨਾਲ ਜ਼ਖ਼ਮੀ ਹੋ ਗਿਆ ਸੀ। ਹਾਦਸੇ ਤੋਂ ਪਹਿਲਾਂ ਉਹ ਮਾਰਸ਼ਲ ਆਰਟਸ ’ਚ ਭਾਰਤ ਦੀ ਨੁਮਾਇੰਦਗੀ ਕਰ ਚੁੱਕਾ ਸੀ ਤੇ ਰਾਸ਼ਟਰੀ ਪੱਧਰ ’ਤੇ ਤਾਇਕਵਾਂਡੋ ਚੈਂਪੀਅਨ ਸੀ। ਉਹ ਰੈਗੂਲਰ ਤੌਰ ’ਤੇ ਫੁੱਟਬਾਲ ਤੇ ਕ੍ਰਿਕਟ ਵੀ ਖੇਡਦਾ ਸੀ। ਹਾਦਸੇ ਤੋਂ ਬਾਅਦ ਉਸਦੀ ਜ਼ਿੰਦਗੀ ਪੂਰੀ ਤਰ੍ਹਾਂ ਬਦਲ ਗਈ ਪਰ ਉਸਨੇ ਆਪਣਾ ਆਤਮਵਿਸ਼ਵਾਸ ਕਮਜ਼ੋਰ ਨਹੀਂ ਹੋਣ ਦਿੱਤਾ। ਸਚਿਨ ਨੇ ਕਿਹਾ ਕਿ ਮੈਂ ਅਤੀਤ ’ਚ ਜਾ ਕੇ ਆਪਣੀ ਸੱਟ ਨੂੰ ਮਿਟਾ ਨਹੀਂ ਸਕਦਾ। ਜੋ ਹੋਣਾ ਸੀ, ਉਹ ਹੋ ਗਿਆ। ਮੇਰੇ ਸਾਹਮਣੇ ਦੋ ਰਾਹ ਸਨ। ਪਹਿਲਾ ਇਹ ਕਿ ਮੈਂ ਹਾਦਸੇ ਦੇ ਸਬੰਧ ’ਚ ਸੋਚ ਕੇ ਰੋਂਦਾ ਰਹਾਂ ਤੇ ਪਰੇਸ਼ਾਨ ਹੁੰਦਾ ਰਹਾਂ ਤੇ ਦੂਜਾ ਰਾਹ ਇਹ ਸੀ ਕਿ ਮੈਂ ਸੋਚਾਂ ਕਿ ਹੁਣ ਆਪਣੀ ਜ਼ਿੰਦਗੀ ਨੂੰ ਬਿਹਤਰ ਕਿਵੇਂ ਕਰ ਸਕਦਾ ਹਾਂ। ਮੈਂ ਦੂਜਾ ਰਾਹ ਚੁਣਿਆ। ਉਸਨੇ ਕਿਹਾ ਕਿ ਮੈਂ ਅਤੀਤ ਨੂੰ ਨਹੀਂ ਬਦਲ ਸਕਦਾ ਪਰ ਅੱਜ ਕਿਵੇਂ ਜਿਊਣਾ ਹੈ, ਇਹ ਮੇਰੇ ਹੱਥ ’ਚ ਹੈ। ਸਚਿਨ ਨੇ ਦੱਸਿਆ ਕਿ ਇਸ ਮੁਸ਼ਕਲ ਦੌਰ ’ਚ ਉਸਦੇ ਪਰਿਵਾਰ ਨੇ ਉਸਦਾ ਪੂਰਾ ਸਾਥ ਦਿੱਤਾ।