ਫੁੱਟਬਾਲ ਮੈਚ ਦੌਰਾਨ ਗੋਲਕੀਪਰ ਨਾਲ ਭਿਆਨਕ ਟੱਕਰ, 30 ਸਾਲਾ ਸਟ੍ਰਾਈਕਰ ਦੀ ਮੌਤ, ਖੇਡ ਜਗਤ 'ਚ ਸੋਗ ਦੀ ਲਹਿਰ

Posted By alisha

Publish Date: Wed, 04 Nov 2026 11:20 AM (IST)

Updated Date: Wed, 04 Nov 2026 11:28 AM (IST)

ਫੁੱਟਬਾਲ ਮੈਚ ਦੌਰਾਨ ਗੋਲਕੀਪਰ ਨਾਲ ਭਿਆਨਕ ਟੱਕਰ, 30 ਸਾਲਾ ਸਟ੍ਰਾਈਕਰ ਦੀ ਮੌਤ, ਖੇਡ ਜਗਤ 'ਚ ਸੋਗ ਦੀ ਲਹਿਰ

ਜਾਗਰਣ ਨਿਊਜ਼ ਨੈੱਟਵਰਕ, ਨਵੀਂ ਦਿੱਲੀ : ਸਪੈਨਿਸ਼ ਫੁੱਟਬਾਲ ਦੇ ਦੂਜੇ ਡਿਵੀਜ਼ਨ ਦੇ ਕਲੱਬ ਟੈਨੇਰੀਫ ਦੇ ਸਪੈਨਿਸ਼ ਸਟ੍ਰਾਈਕਰ ਜੀਸਸ ਡੀ ਮਿਗੁਏਲ ਦੀ 30 ਸਾਲ ਦੀ ਉਮਰ ਵਿੱਚ ਮੌਤ ਹੋ ਗਈ ਹੈ। ਸੋਮਵਾਰ ਨੂੰ ਇੱਕ ਮੈਚ ਦੌਰਾਨ ਉਹ ਕਬਜ਼ਾ ਲੈਣ ਲਈ ਮੁਕਾਬਲਾ ਕਰਦੇ ਹੋਏ ਅੰਡੋਰਾ ਫੁੱਟਬਾਲ ਕਲੱਬ ਦੇ ਗੋਲਕੀਪਰ ਜੀਸਸ ਓਵੋਨੋ ਨਾਲ ਟਕਰਾ ਗਿਆ, ਜਿਸ ਤੋਂ ਬਾਅਦ ਮਿਗੁਏਲ ਮੈਦਾਨ ’ਤੇ ਬੇਹੋਸ਼ ਹੋ ਗਿਆ। ਰਿਪੋਰਟਾਂ ਤੋਂ ਪਤਾ ਚੱਲਦਾ ਹੈ ਕਿ ਉਸਦੀ ਮੌਤ ਦਿਲ ਦਾ ਦੌਰਾ ਪੈਣ ਕਾਰਨ ਹੋਈ। ਟੱਕਰ ਦੌਰਾਨ, ਓਵੋਨੋ ਦਾ ਗੋਡਾ ਮਿਗੁਏਲ ਦੀ ਛਾਤੀ ’ਤੇ ਲੱਗਿਆ।

ਰੈਫਰੀ ਨੇ ਤੁਰੰਤ ਓਵੋਨੋ ਨੂੰ ਲਾਲ ਕਾਰਡ ਦਿਖਾਇਆ ਤੇ ਉਸ ਨੂੰ ਮੈਦਾਨ ਤੋਂ ਬਾਹਰ ਭੇਜ ਦਿੱਤਾ। ਮੈਡੀਕਲ ਸਟਾਫ ਨੇ ਮਿਗੁਏਲ ਨੂੰ ਹਸਪਤਾਲ ਲਿਜਾਣ ਤੋਂ ਪਹਿਲਾਂ ਥੋੜ੍ਹੇ ਸਮੇਂ ਲਈ ਮੈਦਾਨ ’ਤੇ ਇਲਾਜ ਕਰਨ ਦੀ ਕੋਸ਼ਿਸ਼ ਕੀਤੀ ਜਿੱਥੇ ਉਸ ਦੀ ਮੌਤ ਹੋ ਗਈ। ਇਸ ਮਾਮਲੇ ’ਚ ਓਵੋਨੋ ਵਿਰੁੱਧ ਕੋਈ ਅਪਰਾਧਿਕ ਦੋਸ਼ ਦਾਇਰ ਨਹੀਂ ਕੀਤੇ ਗਏ ਹਨ। ਆਮ ਤੌਰ ’ਤੇ ਫੁੱਟਬਾਲ ਦੇ ਮੈਦਾਨ ’ਤੇ ਅਜਿਹੀ ਲਾਪਰਵਾਹੀ ਚਾਰ ਤੋਂ 14 ਮੈਚਾਂ ਦੀ ਪਾਬੰਦੀ ਲਗਾਉਂਦੀ ਹੈ। ਜੇਕਰ ਓਵੋਨੋ ਵਿਰੁੱਧ ਕੋਈ ਅਪਰਾਧਿਕ ਮਾਮਲਾ ਦਰਜ ਕੀਤਾ ਜਾਂਦਾ ਹੈ ਤਾਂ ਸਪੈਨਿਸ਼ ਕਾਨੂੰਨ ਤਹਿਤ ਅੱਗੇ ਦੀ ਕਾਰਵਾਈ ਕੀਤੀ ਜਾਵੇਗੀ।

ਸਪੈਨਿਸ਼ ਫੁੱਟਬਾਲ ਫੈਡਰੇਸ਼ਨ ਨੇ ਮੰਗਲਵਾਰ ਨੂੰ ਉਨ੍ਹਾਂ ਦੇ ਸਨਮਾਨ ’ਚ ਹੋਣ ਵਾਲੇ ਸਾਰੇ ਮੈਚ ਰੱਦ ਕਰ ਦਿੱਤੇ। ਖਿਡਾਰੀਆਂ ਦੀ ਪਹਿਲਾਂ ਮੈਦਾਨ ’ਤੇ ਹੋਏ ਹਾਦਸਿਆਂ ’ਚ1 ਮੌਤ ਹੋ ਚੁੱਕੀ ਹੈ। ਕ੍ਰਿਕਟਰ ਫਿਲਿਪ ਹਿਊਜ਼, ਆਈਸ ਹਾਕੀ ਖਿਡਾਰੀ ਐਡਮ ਜੌਨਸਨ, ਫੁੱਟਬਾਲਰ ਟੌਮੀ ਬਲੈਕਸਟੌਕ ਤੇ ਚੋਇਰੁਲ ਹੁੱਡਾ ਸਾਰਿਆਂ ਦੀ ਮੈਦਾਨ 'ਤੇ ਹੋਈਆਂ ਸੱਟਾਂ ਕਾਰਨ ਮੌਤ ਹੋ ਚੁੱਕੀ ਹੈ।

ਖਿਡਾਰੀਆਂ ਦੀ ਪਹਿਲਾਂ ਮੈਦਾਨ ’ਤੇ ਹੋਏ ਹਾਦਸਿਆਂ ’ਚ ਮੌਤ ਹੋ ਚੁੱਕੀ ਹੈ

ਫਿਲਿਪ ਹਿਊਜ਼ : 25 ਨਵੰਬਰ 2014 ਨੂੰ ਸਿਡਨੀ ਕ੍ਰਿਕਟ ਗਰਾਊਂਡ ’ਤੇ ਸ਼ੈਫੀਲਡ ਸ਼ੀਲਡ ਮੈਚ ਦੌਰਾਨ, ਸ਼ਾਨ ਐਬੋਟ ਦੇ ਬਾਊਂਸਰ ਨਾਲ ਫਿਲ ਹਿਊਜ਼ ਦੀ ਗਰਦਨ ਵਿੱਚ ਸੱਟ ਲੱਗੀ ਸੀ। ਹਿਊਜ਼ ਨੂੰ ਹਸਪਤਾਲ ’ਚ ਭਰਤੀ ਕਰਵਾਇਆ ਗਿਆ, ਸਰਜਰੀ ਕੀਤੀ ਗਈ ਤੇ ਉਸ ਨੂੰ ਕੋਮਾ ’ਚ ਰੱਖਿਆ ਗਿਆ। ਜਿਵੇਂ-ਜਿਵੇਂ ਉਸ ਦੀ ਹਾਲਤ ਵਿਗੜਦੀ ਗਈ, ਉਹ ਆਈਸੀਯੂ ’ਚ ਰਿਹਾ ਤੇ ਕਦੇ ਵੀ ਹੋਸ਼ ’ਚ ਨਹੀਂ ਆਇਆ। 27 ਨਵੰਬਰ 2014 ਨੂੰ ਉਸ ਦੀ ਮੌਤ ਹੋ ਗਈ। ਹਿਊਜ਼ ਦੀ ਮੌਤ ਨੂੰ ਦੁਰਘਟਨਾ ਕਰਾਰ ਦਿੱਤਾ ਗਿਆ।

ਐਡਮ ਜੌਨਸਨ : 28 ਅਕਤੂਬਰ, 2023 ਨੂੰ ਇੰਗਲੈਂਡ ਦੇ ਸ਼ੈਫੀਲਡ ਦੇ ਸ਼ੈਫੀਲਡ ਅਰੇਨਾ ’ਚ ਇੱਕ ਆਈਸ ਹਾਕੀ ਮੈਚ ਦੌਰਾਨ, 29 ਸਾਲਾ ਨੌਟਿੰਘਮ ਪੈਂਥਰਜ਼ ਫਾਰਵਰਡ ਐਡਮ ਜੌਨਸਨ ਨੂੰ ਸ਼ੈਫੀਲਡ ਸਟੀਲਰਜ਼ ਦੇ ਖਿਡਾਰੀ ਮੈਟ ਪੇਟਗ੍ਰੂ ਦੇ ਸਕੇਟ ਨਾਲ ਗਰਦਨ ’ਚ ਸੱਟ ਲੱਗੀ। ਜਦੋਂ ਜੌਨਸਨ ਆਪਣੇ ਸਾਥੀ ਨਾਲ ਟਕਰਾਉਣ ਤੋਂ ਬਾਅਦ ਡਿੱਗ ਰਿਹਾ ਸੀ ਤਾਂ ਪੇਟਗ੍ਰੂ ਨੇ ਆਪਣੀ ਖੱਬੀ ਲੱਤ ਚੁੱਕੀ ਤੇ ਆਪਣੇ ਸਕੇਟ ਨਾਲ ਜੌਨਸਨ ਦਾ ਗਲਾ ਕੱਟ ਦਿੱਤਾ। ਜੌਨਸਨ ਨੇ ਟੀਮ ਬੈਂਚ ਵੱਲ ਤੁਰਨ ਦੀ ਕੋਸ਼ਿਸ਼ ਕੀਤੀ ਪਰ ਡਿੱਗ ਪਿਆ ਤੇ ਬਾਅਦ ’ਚ ਉਸ ਨੂੰ ਹਸਪਤਾਲ ਲਿਜਾਇਆ ਗਿਆ, ਜਿੱਥੇ ਉਸ ਨੂੰ ਮ੍ਰਿਤਕ ਐਲਾਨ ਦਿੱਤਾ ਗਿਆ। ਪੁਲਿਸ ਨੇ ਬਾਅਦ ’ਚ ਪੇਟਗ੍ਰੂ ਨੂੰ ਗ੍ਰਿਫ਼ਤਾਰ ਕਰ ਲਿਆ ਤੇ ਇੱਕ ਲੰਬੀ ਜਾਂਚ ਕੀਤੀ ਪਰ ਅੰਤ ’ਚ ਕੇਸ ਖਾਰਜ ਕਰ ਦਿੱਤਾ ਗਿਆ ਅਤੇ ਪੇਟਗ੍ਰੂ ਨੂੰ ਕੋਈ ਸਜ਼ਾ ਨਹੀਂ ਮਿਲੀ।

ਟੌਮੀ ਬਲੈਕਸਟੌਕ : 8 ਅਪ੍ਰੈਲ 1907 ਨੂੰ ਮੈਨਚੈਸਟਰ ਯੂਨਾਈਟਿਡ ਤੇ ਸੇਂਟ ਹੈਲਨਜ਼ ਵਿਚਕਾਰ ਇੱਕ ਫੁੱਟਬਾਲ ਮੈਚ ਦੌਰਾਨ ਸਿਰ ’ਚ ਸੱਟ ਲੱਗਣ ਕਾਰਨ 25 ਸਾਲਾ ਟੌਮੀ ਬਲੈਕਸਟੌਕ ਦੀ ਮੌਤ ਹੋ ਗਈ।

ਚੋਇਰੁਲ ਹੁਡਾ: ਇੰਡੋਨੇਸ਼ੀਆਈ ਫੁੱਟਬਾਲ ਗੋਲਕੀਪਰ ਚੋਇਰੁਲ ਹੁਡਾ 15 ਅਕਤੂਬਰ 2017 ਨੂੰ ਖੇਡੇ ਗਏ ਇੱਕ ਮੈਚ ਦੌਰਾਨ ਗੇਂਦ ਫੜਨ ਦੀ ਕੋਸ਼ਿਸ਼ ਕਰਦੇ ਹੋਏ ਇੱਕ ਸਾਥੀ ਨਾਲ ਟਕਰਾ ਗਿਆ। 38 ਸਾਲਾ ਹੁੱਡਾ ਨੂੰ ਛਾਤੀ ਵਿੱਚ ਸੱਟ ਲੱਗੀ ਅਤੇ ਕੁਝ ਸਮੇਂ ਲਈ ਮੈਦਾਨ ’ਚ ਇਲਾਜ ਕੀਤਾ ਗਿਆ। ਰਿਪੋਰਟਾਂ ਤੋਂ ਪਤਾ ਚੱਲਦਾ ਹੈ ਕਿ ਉਹ ਹੋਸ਼ ’ਚ ਸੀ ਤੇ ਛਾਤੀ ’ਚ ਦਰਦ ਦੀ ਸ਼ਿਕਾਇਤ ਕਰ ਰਿਹਾ ਸੀ ਪਰ ਥੋੜ੍ਹੀ ਦੇਰ ਬਾਅਦ ਉਸ ਦੀ ਹਾਲਤ ਵਿਗੜ ਗਈ ਤੇ ਉਸ ਦੀ ਹਸਪਤਾਲ ’ਚ ਮੌਤ ਹੋ ਗਈ।