ਅੱਜ ਤੋਂ ਸ਼ੁਰੂ ਹੋ ਰਿਹਾ 'ਰਾਜ ਪੰਚਕ', ਜਾਣੋ ਇਨ੍ਹਾਂ 5 ਦਿਨਾਂ ’ਚ ਕਿਹੜੇ ਕੰਮ ਕਰਨ ਦੀ ਹੈ ਸਖ਼ਤ ਮਨਾਹੀ ; ਕੀ ਹੈ ਰਾਜ ਪੰਚਕ

ਧਰਮ ਡੈਸਕ, ਨਵੀਂ ਦਿੱਲੀ : ਹਿੰਦੂ ਧਰਮ ’ਚ ਕੋਈ ਵੀ ਨਵਾਂ ਜਾਂ ਸ਼ੁਭ ਕੰਮ ਸ਼ੁਰੂ ਕਰਨ ਤੋਂ ਪਹਿਲਾਂ ਸ਼ੁਭ ਮੁਹੂਰਤ ਦੇਖਣ ਦੀ ਪਰੰਪਰਾ ਹੈ। ਇਸੇ ਤਰ੍ਹਾਂ ਕੁਝ ਅਜਿਹੇ ਸਮੇਂ ਵੀ ਹੁੰਦੇ ਹਨ, ਜਿਨ੍ਹਾਂ ’ਚ ਮੰਗਲਿਕ ਕੰਮ ਕਰਨ ਦੀ ਸਖ਼ਤ ਮਨਾਹੀ ਹੁੰਦੀ ਹੈ। ਇਨ੍ਹਾਂ ’ਚੋਂ ਇੱਕ 'ਪੰਚਕ' ਹੈ। ਅੱਜ ਯਾਨੀ 23 ਸਤੰਬਰ ਤੋਂ ਪੰਚਕ ਕਾਲ ਦੀ ਸ਼ੁਰੂਆਤ ਹੋ ਰਹੀ ਹੈ। ਪੰਚਾਂਗ ਦੇ ਅਨੁਸਾਰ ਧਨਿਸ਼ਠਾ ਤੋਂ ਲੈ ਕੇ ਰੇਵਤੀ ਤੱਕ ਦੇ ਪੰਜ ਨਕਸ਼ਤਰਾਂ ਦੇ ਇਸ ਸਮੂਹ ਨੂੰ ਪੰਚਕ ਕਿਹਾ ਜਾਂਦਾ ਹੈ ਤੇ ਇਹ 5 ਦਿਨਾਂ ਲਈ ਰਹਿੰਦਾ ਹੈ।

ਰਾਜ ਪੰਚਕ ਦਾ ਸਮਾਂ ਤੇ ਮਹੱਤਵ

ਜੋਤਿਸ਼ ਸ਼ਾਸਤਰ ਦੇ ਅਨੁਸਾਰ ਪੰਚਕ ਦਾ ਨਾਮ ਇਸ ਗੱਲ ’ਤੇ ਨਿਰਭਰ ਕਰਦਾ ਹੈ ਕਿ ਇਹ ਕਿਸ ਦਿਨ ਸ਼ੁਰੂ ਹੋ ਰਿਹਾ ਹੈ। ਇਸ ਵਾਰ ਪੰਚਕ ਬੁੱਧਵਾਰ ਤੋਂ ਸ਼ੁਰੂ ਹੋ ਰਿਹਾ ਹੈ, ਇਸ ਲਈ ਇਸ ਨੂੰ 'ਰਾਜ ਪੰਚਕ' ਕਿਹਾ ਜਾਂਦਾ ਹੈ। ਇਹ 23 ਸਤੰਬਰ ਦੀ ਰਾਤ 9 ਵੱਜ ਕੇ 57 ਮਿੰਟ ਤੋਂ ਸ਼ੁਰੂ ਹੋ ਕੇ 28 ਸਤੰਬਰ ਦੀ ਸਵੇਰ 10 ਵੱਜ ਕੇ 17 ਮਿੰਟ ’ਤੇ ਸਮਾਪਤ ਹੋਵੇਗਾ। ਦਰਅਸਲ, ਰਾਜ ਪੰਚਕ ਨੂੰ ਹੋਰ ਪੰਚਕਾਂ (ਜਿਵੇਂ ਸ਼ਨੀਵਾਰ ਤੋਂ ਸ਼ੁਰੂ ਹੋਣ ਵਾਲੇ ਬਹੁਤ ਅਸ਼ੁਭ 'ਮੌਤ ਪੰਚਕ') ਦੀ ਤੁਲਨਾ ’ਚ ਸ਼ੁਭ ਤੇ ਦੋਸ਼-ਮੁਕਤ ਮੰਨਿਆ ਜਾਂਦਾ ਹੈ। ਪਰ ਧਾਰਮਿਕ ਮਾਨਤਾਵਾਂ ਦੇ ਅਨੁਸਾਰ ਪੰਚਕ ਭਾਵੇਂ ਕੋਈ ਵੀ ਹੋਵੇ, ਕੁਝ ਖਾਸ ਕੰਮਾਂ ਤੋਂ ਹਮੇਸ਼ਾ ਬਚਣ ਦੀ ਸਲਾਹ ਦਿੱਤੀ ਜਾਂਦੀ ਹੈ।

ਪੰਚਕ ਦੌਰਾਨ ਨਾ ਕਰੋ ਇਹ ਕੰਮ:

• ਇਨ੍ਹਾਂ 5 ਦਿਨਾਂ ’ਚ ਦੱਖਣ ਦਿਸ਼ਾ ਵੱਲ ਯਾਤਰਾ ਕਰਨ ਤੋਂ ਬਚੋ, ਕਿਉਂਕਿ ਇਸ ਨੂੰ ਯਮ (ਮੌਤ ਦੇ ਦੇਵਤਾ) ਦੀ ਦਿਸ਼ਾ ਮੰਨਿਆ ਜਾਂਦਾ ਹੈ।
• ਪੰਚਕ ’ਚ ਘਰ ਦੀ ਛੱਤ ਬਣਵਾਉਣ ਦੀ ਮਨਾਹੀ ਹੁੰਦੀ ਹੈ। ਮਾਨਤਾ ਹੈ ਕਿ ਇਸ ਨਾਲ ਘਰ ’ਚ ਕਲੇਸ਼ ਵਧਦਾ ਹੈ ਤੇ ਆਰਥਿਕ ਨੁਕਸਾਨ ਦਾ ਸਾਹਮਣਾ ਕਰਨਾ ਪੈ ਸਕਦਾ ਹੈ।
• ਇਸ ਦੌਰਾਨ ਘਰ ’ਚ ਘਾਹ, ਲੱਕੜ ਜਾਂ ਸੜਨ ਵਾਲੀ ਕੋਈ ਵੀ ਚੀਜ਼ ਵੱਡੀ ਮਾਤਰਾ ’ਚ ਇਕੱਠੀ ਨਹੀਂ ਕਰਨੀ ਚਾਹੀਦੀ।
• ਪੰਚਕ ’ਚ ਚਾਰਪਾਈ ਜਾਂ ਪਲੰਗ ਬਣਵਾਉਣਾ ਅਸ਼ੁਭ ਮੰਨਿਆ ਜਾਂਦਾ ਹੈ। ਕਿਹਾ ਜਾਂਦਾ ਹੈ ਕਿ ਇਹ ਕਿਸੇ ਵੱਡੇ ਸੰਕਟ ਨੂੰ ਸੱਦਾ ਦੇਣ ਵਰਗਾ ਹੈ।
• ਕਿਸੇ ਵੀ ਤਰ੍ਹਾਂ ਦੇ ਨਵੇਂ ਨਿਰਮਾਣ ਕਾਰਜ ਦੀ ਸ਼ੁਰੂਆਤ ਜਾਂ ਨਵੇਂ ਔਜ਼ਾਰਾਂ ਤੇ ਭਾਰੀ ਮਸ਼ੀਨਰੀ ਨਾਲ ਜੁੜਿਆ ਕੋਈ ਵੀ ਕੰਮ ਇਸ ਸਮੇਂ ਟਾਲ ਦੇਣਾ ਚਾਹੀਦਾ ਹੈ।

ਪੰਚਕ ਦੇ ਪ੍ਰਭਾਵ ਤੋਂ ਕਿਵੇਂ ਬਚੀਏ?

• ਰੋਜ਼ਾਨਾ ਸਵੇਰੇ ਇਸ਼ਨਾਨ ਕਰਨ ਤੋਂ ਬਾਅਦ ਤਾਂਬੇ ਦੇ ਲੋਟੇ ’ਚ ਪਾਣੀ, ਥੋੜ੍ਹਾ ਜਿਹਾ ਲਾਲ ਚੰਦਨ ਤੇ ਰੋਲੀ ਪਾ ਕੇ ਸੂਰਜ ਦੇਵਤਾ ਨੂੰ ਅਰਘ ਦਿਓ।
• ਪੰਚਕ ਦੇ ਦਿਨਾਂ ’ਚ ਹਨੂਮਾਨ ਚਾਲੀਸਾ ਦਾ ਨਿਯਮਿਤ ਪਾਠ ਕਰੋ।
• ਭਗਵਾਨ ਸ਼ਿਵ ਨੂੰ ਪ੍ਰਸੰਨ ਕਰਨ ਲਈ ਮਹਾਮ੍ਰਿਤਿਉਂਜਯ ਮੰਤਰ ਦਾ ਜਾਪ ਬਹੁਤ ਪ੍ਰਭਾਵਸ਼ਾਲੀ ਮੰਨਿਆ ਜਾਂਦਾ ਹੈ।
• ਆਪਣੀ ਸਮਰੱਥਾ ਅਨੁਸਾਰ ਇਸ ਦੌਰਾਨ ਕਿਸੇ ਲੋੜਵੰਦ ਵਿਅਕਤੀ ਨੂੰ ਦਾਨ ਦੇਣਾ ਵੀ ਪੁੰਨਦਾਇਕ ਮੰਨਿਆ ਜਾਂਦਾ ਹੈ।