ਪਿਤ੍ਰ ਪੱਖ 2026: ਸੁਪਨੇ ’ਚ ਪੂਰਵਜਾਂ ਦਾ ਨਜ਼ਰ ਆਉਣਾ ਕਿਸ ਗੱਲ ਦਾ ਸੰਕੇਤ ਹੈ? ਮਿਲਦੇ ਹਨ ਇਹ ਮੁੱਖ ਇਸ਼ਾਰੇ

ਧਰਮ ਡੈਸਕ, ਨਵੀਂ ਦਿੱਲੀ : ਪਿਤ੍ਰ ਪੱਖ ਦੀ ਮਿਆਦ ਨੂੰ ਪੂਰਵਜਾਂ ਨੂੰ ਪ੍ਰਸੰਨ ਕਰਨ ਲਈ ਸ਼ੁਭ ਮੰਨਿਆ ਜਾਂਦਾ ਹੈ। ਇਸ ਦੌਰਾਨ ਪੂਰਵਜਾਂ ਦਾ ਸ਼ਰਾਧ, ਤਰਪਣ ਤੇ ਪਿੰਡਦਾਨ ਕੀਤਾ ਜਾਂਦਾ ਹੈ। ਧਾਰਮਿਕ ਮਾਨਤਾ ਅਨੁਸਾਰ, ਇਹ ਕੰਮ ਕਰਨ ਨਾਲ ਪੂਰਵਜ ਤ੍ਰਿਪਤ ਹੁੰਦੇ ਹਨ ਤੇ ਸੁੱਖ-ਸਮ੍ਰਿੱਧੀ ’ਚ ਵਾਧਾ ਹੁੰਦਾ ਹੈ। ਵੈਦਿਕ ਪੰਚਾਂਗ ਦੇ ਅਨੁਸਾਰ, ਇਸ ਵਾਰ ਪਿਤ੍ਰ ਪੱਖ 26 ਸਤੰਬਰ ਤੋਂ ਸ਼ੁਰੂ ਹੋ ਰਿਹਾ ਹੈ। ਸਵਪਨ ਸ਼ਾਸਤਰ ਦੇ ਮੁਤਾਬਕ, ਪਿਤ੍ਰ ਪੱਖ ਦੌਰਾਨ ਸੁਪਨੇ ’ਚ ਪਿਤਰਾਂ ਨੂੰ ਦੇਖਣ ਨਾਲ ਕਈ ਸ਼ੁਭ-ਅਸ਼ੁਭ ਸੰਕੇਤ ਮਿਲਦੇ ਹਨ। ਅਜਿਹੇ ’ਚ ਆਓ ਇਸ ਲੇਖ ’ਚ ਵਿਸਥਾਰ ਨਾਲ ਜਾਣਦੇ ਹਾਂ ਕਿ ਪਿਤ੍ਰ ਪੱਖ ਦੌਰਾਨ ਪੂਰਵਜਾਂ ਦਾ ਸੁਪਨੇ ’ਚ ਆਉਣਾ ਕਿਸ ਗੱਲ ਵੱਲ ਇਸ਼ਾਰਾ ਕਰਦਾ ਹੈ।

ਸੁਪਨੇ ’ਚ ਪੂਰਵਜਾਂ ਨੂੰ ਦੇਖਣ ਦੇ ਸੰਕੇਤ

ਖੁਸ਼ ਜਾਂ ਮੁਸਕਰਾਉਂਦੇ ਹੋਏ ਦੇਖਣਾ — ਜੇ ਪਿਤ੍ਰ ਪੱਖ ਦੌਰਾਨ ਤੁਸੀਂ ਸੁਪਨੇ ’ਚ ਪਿਤਰਾਂ ਨੂੰ ਖੁਸ਼ ਜਾਂ ਤੁਹਾਨੂੰ ਆਸ਼ੀਰਵਾਦ ਦਿੰਦੇ ਹੋਏ ਦੇਖਿਆ ਹੈ, ਤਾਂ ਸਵਪਨ ਸ਼ਾਸਤਰ ਦੇ ਅਨੁਸਾਰ ਇਸ ਸੁਪਨੇ ਨੂੰ ਸ਼ੁਭ ਮੰਨਿਆ ਜਾਂਦਾ ਹੈ। ਇਸ ਸੁਪਨੇ ਤੋਂ ਸੰਕੇਤ ਮਿਲਦਾ ਹੈ ਕਿ ਪਿਤਰਾਂ ਦੀ ਕਿਰਪਾ ਨਾਲ ਤੁਹਾਡੇ ਘਰ ’ਚ ਸ਼ਾਂਤੀ ਤੇ ਖੁਸ਼ਹਾਲੀ ਆ ਸਕਦੀ ਹੈ ਤੇ ਤੁਹਾਡੇ ਪੂਰਵਜ ਤੁਹਾਡੇ ਤੋਂ ਪ੍ਰਸੰਨ ਹਨ।

ਦੁਖੀ ਜਾਂ ਰੋਂਦੇ ਹੋਏ ਦੇਖਣਾ — ਜੇ ਤੁਸੀਂ ਸੁਪਨੇ ’ਚ ਪਿਤਰਾਂ ਨੂੰ ਦੁਖੀ ਜਾਂ ਰੋਂਦੇ ਹੋਏ ਦੇਖਿਆ ਹੈ, ਤਾਂ ਇਸ ਸੁਪਨੇ ਤੋਂ ਸੰਕੇਤ ਮਿਲਦਾ ਹੈ ਕਿ ਪਿਤਰਾਂ ਦੀ ਕੋਈ ਇੱਛਾ ਅਧੂਰੀ ਰਹਿ ਗਈ ਹੈ ਜਾਂ ਉਹ ਕਿਸੇ ਗੱਲ ਤੋਂ ਅਸੰਤੁਸ਼ਟ ਹਨ। ਅਜਿਹੇ ’ਚ ਤੁਸੀਂ ਅਮਾਵੱਸਿਆ ਵਾਲੇ ਦਿਨ ਪਿਤਰਾਂ ਲਈ ਭੋਜਨ ਕੱਢ ਸਕਦੇ ਹੋ।

ਖੁਦ ਨੂੰ ਪੂਰਵਜਾਂ ਨਾਲ ਗੱਲ ਕਰਦੇ ਹੋਏ ਦੇਖਣਾ — ਸਵਪਨ ਸ਼ਾਸਤਰ ਦੇ ਅਨੁਸਾਰ, ਜੇ ਪਿਤ੍ਰ ਪੱਖ ਦੌਰਾਨ ਤੁਸੀਂ ਸੁਪਨੇ ’ਚ ਖੁਦ ਨੂੰ ਪਿਤਰਾਂ ਨਾਲ ਗੱਲ ਕਰਦੇ ਹੋਏ ਦੇਖਿਆ ਹੈ, ਤਾਂ ਇਸ ਸੁਪਨੇ ਨੂੰ ਭਵਿੱਖ ’ਚ ਹੋਣ ਵਾਲੀ ਕਿਸੇ ਘਟਨਾ ਜਾਂ ਪਰੇਸ਼ਾਨੀ ਨਾਲ ਜੋੜ ਕੇ ਦੇਖਿਆ ਜਾਂਦਾ ਹੈ। ਅਜਿਹਾ ਸੁਪਨਾ ਆਉਣ ਤੋਂ ਬਾਅਦ ਜੀਵਨ ’ਚ ਸਾਵਧਾਨ ਰਹਿਣਾ ਚਾਹੀਦਾ ਹੈ।

ਸੁਪਨੇ ’ਚ ਭੋਜਨ ਜਾਂ ਪਾਣੀ ਮੰਗਣਾ — ਸਵਪਨ ਸ਼ਾਸਤਰ ’ਚ ਦੱਸਿਆ ਗਿਆ ਹੈ ਕਿ ਜੇ ਸੁਪਨੇ ’ਚ ਪੂਰਵਜ ਤੁਹਾਡੇ ਕੋਲੋਂ ਭੋਜਨ ਜਾਂ ਪਾਣੀ ਮੰਗ ਰਹੇ ਹਨ, ਤਾਂ ਇਸ ਦਾ ਅਰਥ ਇਹ ਮੰਨਿਆ ਜਾਂਦਾ ਹੈ ਕਿ ਤੁਹਾਡੇ ਪੂਰਵਜ ਤੁਹਾਡੇ ਕੋਲੋਂ ਸ਼ਰਾਧ ਦੀ ਉਮੀਦ ਕਰ ਰਹੇ ਹਨ। ਅਜਿਹਾ ਸੁਪਨਾ ਆਉਣ 'ਤੇ ਪਿਤਰਾਂ ਦਾ ਤਰਪਣ ਕਰੋ ਤੇ ਬ੍ਰਾਹਮਣਾਂ ਨੂੰ ਭੋਜਨ ਕਰਵਾਓ।

ਸੁਪਨੇ ’ਚ ਪੂਰਵਜ ਦਿਖਾਈ ਦੇਣ 'ਤੇ ਕੀ ਕਰਨਾ ਚਾਹੀਦਾ ਹੈ?

ਜੇ ਪਿਤ੍ਰ ਪੱਖ ਦੌਰਾਨ ਤੁਹਾਨੂੰ ਸੁਪਨੇ ’ਚ ਪਿਤਰ ਦਿਖਾਈ ਦਿੰਦੇ ਹਨ, ਤਾਂ ਉਨ੍ਹਾਂ ਦਾ ਵਿਧੀਪੂਰਵਕ ਤਰਪਣ ਤੇ ਪਿੰਡਦਾਨ ਕਰੋ। ਇਸ ਤੋਂ ਇਲਾਵਾ ਗਾਂ, ਕੁੱਤੇ, ਕਾਂ ਤੇ ਕੀੜੀਆਂ ਲਈ ਵੀ ਭੋਜਨ ਜ਼ਰੂਰ ਕੱਢੋ।