ਸਾਮੁਦ੍ਰਿਕ ਸ਼ਾਸਤਰ: ਤੁਹਾਡੀ ਲਿਖਾਈ ਖੋਲ੍ਹਦੀ ਹੈ ਸ਼ਖਸੀਅਤ ਦੇ ਕਈ ਰਾਜ, ਲਿਖਾਵਟ ਤੋਂ ਜਾਣੋ ਆਪਣਾ ਸੁਭਾਅ

ਧਰਮ ਡੈਸਕ, ਨਵੀਂ ਦਿੱਲੀ : ਕਿਹਾ ਜਾਂਦਾ ਹੈ ਕਿ ਇਨਸਾਨ ਦੀ ਲਿਖਾਈ ਸਿਰਫ਼ ਸ਼ਬਦਾਂ ਨੂੰ ਕਾਗਜ਼ ’ਤੇ ਉਤਾਰਨ ਦਾ ਸਾਧਨ ਨਹੀਂ ਹੁੰਦੀ, ਸਗੋਂ ਇਹ ਉਸਦੀ ਸ਼ਖਸੀਅਤ ਬਾਰੇ ਵੀ ਕਈ ਸੰਕੇਤ ਦਿੰਦੀ ਹੈ। ਸਾਮੁਦ੍ਰਿਕ ਸ਼ਾਸਤਰ ’ਚ ਲਿਖਾਈ ਦੇ ਆਕਾਰ, ਝੁਕਾਅ ਤੇ ਸ਼ਬਦਾਂ ਵਿਚਕਾਰ ਦੀ ਦੂਰੀ ਵਰਗੀਆਂ ਕਈ ਗੱਲਾਂ ਨੂੰ ਵਿਅਕਤੀ ਦੇ ਸੁਭਾਅ ਨਾਲ ਜੋੜ ਕੇ ਦੇਖਿਆ ਜਾਂਦਾ ਹੈ। ਸਾਮੁਦ੍ਰਿਕ ਸ਼ਾਸਤਰ ਤੇ ਗ੍ਰਾਫੋਲੋਜੀ ’ਚ ਲਿਖਾਈ ਦੇ ਵੱਖ-ਵੱਖ ਸੰਕੇਤਾਂ ਦੀ ਆਪਣੀ ਪਰਿਭਾਸ਼ਾ ਦੱਸੀ ਗਈ ਹੈ। ਆਓ ਜਾਣਦੇ ਹਾਂ ਕਿ ਇਨ੍ਹਾਂ ਦੇ ਅਨੁਸਾਰ ਤੁਹਾਡੀ ਲਿਖਾਈ ਤੁਹਾਡੇ ਸੁਭਾਅ ਬਾਰੇ ਕੀ ਸੰਕੇਤ ਦਿੰਦੀ ਹੈ।

ਲਿਖਾਈ ਦਾ ਝੁਕਾਅ ਦੱਸਦਾ ਹੈ ਭਾਵਨਾਵਾਂ ਦਾ ਅੰਦਾਜ਼

ਲਿਖਦੇ ਸਮੇਂ ਅੱਖਰ ਕਿਸ ਦਿਸ਼ਾ ਵੱਲ ਝੁਕਦੇ ਹਨ, ਇਸਨੂੰ ਕਾਫ਼ੀ ਮਹੱਤਵਪੂਰਨ ਮੰਨਿਆ ਜਾਂਦਾ ਹੈ।

ਸੱਜੇ ਪਾਸੇ ਝੁਕੀ ਲਿਖਾਈ : ਜਿਨ੍ਹਾਂ ਦੀ ਲਿਖਾਈ ’ਚ ਸ਼ਬਦ ਸੱਜੇ ਪਾਸੇ ਝੁਕੇ ਹੁੰਦੇ ਹਨ, ਉਨ੍ਹਾਂ ਨੂੰ ਆਮ ਤੌਰ ’ਤੇ ਮਿਲਣਸਾਰ ਤੇ ਭਾਵੁਕ ਸੁਭਾਅ ਵਾਲਾ ਮੰਨਿਆ ਜਾਂਦਾ ਹੈ। ਮਾਨਤਾ ਹੈ ਕਿ ਅਜਿਹੇ ਲੋਕ ਦੂਜਿਆਂ ਨਾਲ ਆਸਾਨੀ ਨਾਲ ਜੁੜ ਜਾਂਦੇ ਹਨ ਤੇ ਆਪਣੇ ਰਿਸ਼ਤਿਆਂ ਨੂੰ ਲੈ ਕੇ ਹਮੇਸ਼ਾ ਸਕਾਰਾਤਮਕ ਸੋਚ ਰੱਖਦੇ ਹਨ।

ਖੱਬੇ ਪਾਸੇ ਝੁਕੀ ਲਿਖਾਈ: ਜਿਨ੍ਹਾਂ ਲੋਕਾਂ ਦੀ ਲਿਖਾਈ ’ਚ ਖੱਬੇ ਪਾਸੇ ਝੁਕਾਅ ਹੁੰਦਾ ਹੈ, ਉਹ ਥੋੜ੍ਹੇ ਸੰਕੋਚੀ ਜਾਂ ਰਿਜ਼ਰਵ ਸੁਭਾਅ ਦੇ ਹੁੰਦੇ ਹਨ। ਅਜਿਹੇ ਲੋਕ ਆਪਣੀਆਂ ਭਾਵਨਾਵਾਂ ਹਰ ਕਿਸੇ ਦੇ ਸਾਹਮਣੇ ਆਸਾਨੀ ਨਾਲ ਪ੍ਰਗਟ ਨਹੀਂ ਕਰਦੇ ਤੇ ਆਪਣੇ ਵਿਚਾਰਾਂ ਤੇ ਨਿੱਜੀ ਜੀਵਨ ਨੂੰ ਵਧੇਰੇ ਮਹੱਤਵ ਦਿੰਦੇ ਹਨ।

ਸਿੱਧੀ ਲਿਖਾਈ: ਸਾਮੁਦ੍ਰਿਕ ਸ਼ਾਸਤਰ ਤੇ ਗ੍ਰਾਫੋਲੋਜੀ ’ਚ ਸਿੱਧੀ ਲਿਖਾਈ ਨੂੰ ਭਾਵਨਾਵਾਂ ’ਤੇ ਕਾਬੂ ਤੇ ਵਿਹਾਰਕ ਸੋਚ ਨਾਲ ਜੋੜਿਆ ਜਾਂਦਾ ਹੈ। ਅਜਿਹੇ ਵਿਅਕਤੀ ਫੈਸਲੇ ਲੈਂਦੇ ਸਮੇਂ ਭਾਵਨਾਵਾਂ ਦੀ ਬਜਾਏ ਤਰਕ ਨੂੰ ਵਧੇਰੇ ਮਹੱਤਵ ਦਿੰਦੇ ਹਨ।

ਅੱਖਰਾਂ ਦਾ ਆਕਾਰ ਵੀ ਦਿੰਦਾ ਹੈ ਸੰਕੇਤ

ਲਿਖਾਈ ਦੇ ਅੱਖਰ ਵੱਡੇ ਹਨ ਜਾਂ ਛੋਟੇ, ਇਸ ਤੋਂ ਵੀ ਸਾਹਮਣੇ ਵਾਲੇ ਵਿਅਕਤੀ ਦੀ ਸ਼ਖਸੀਅਤ ਬਾਰੇ ਕਾਫ਼ੀ ਕੁਝ ਜਾਣਿਆ ਜਾ ਸਕਦਾ ਹੈ।

ਵੱਡੇ ਅੱਖਰ: ਅਜਿਹੀ ਲਿਖਾਈ ਵਾਲੇ ਲੋਕਾਂ ਨੂੰ ਆਤਮਵਿਸ਼ਵਾਸੀ, ਖੁੱਲ੍ਹੇ ਵਿਚਾਰਾਂ ਵਾਲੇ ਤੇ ਹਰ ਥਾਂ ਤੇ ਹਰ ਮੌਕੇ ’ਤੇ ਆਪਣੀ ਮੌਜੂਦਗੀ ਦਾ ਅਹਿਸਾਸ ਕਰਵਾਉਣ ਵਾਲਾ ਮੰਨਿਆ ਜਾਂਦਾ ਹੈ। ਕਿਹਾ ਜਾਂਦਾ ਹੈ ਕਿ ਅਜਿਹੇ ਲੋਕ ਦੂਜਿਆਂ ਦਾ ਧਿਆਨ ਆਪਣੇ ਵੱਲ ਖਿੱਚਣ ’ਚ ਆਸਾਨੀ ਮਹਿਸੂਸ ਕਰਦੇ ਹਨ।

ਛੋਟੇ ਅੱਖਰ: ਛੋਟੀ ਲਿਖਾਈ ਨੂੰ ਇਕਾਗਰਤਾ, ਬਾਰੀਕੀ ਨਾਲ ਕੰਮ ਕਰਨ ਤੇ ਸ਼ਾਂਤ ਸੁਭਾਅ ਨਾਲ ਜੋੜ ਕੇ ਦੇਖਿਆ ਜਾਂਦਾ ਹੈ। ਜਿਨ੍ਹਾਂ ਲੋਕਾਂ ਦੀ ਅਜਿਹੀ ਲਿਖਾਈ ਹੁੰਦੀ ਹੈ, ਉਹ ਬਹੁਤ ਫੋਕਸਡ ਮੰਨੇ ਜਾਂਦੇ ਹਨ ਤੇ ਦੂਜਿਆਂ ਦੀ ਬਜਾਏ ਆਪਣੇ ਕੰਮ ’ਤੇ ਧਿਆਨ ਕੇਂਦਰਿਤ ਕਰਦੇ ਹਨ।

ਸ਼ਬਦਾਂ ਵਿਚਕਾਰ ਦੀ ਦੂਰੀ

ਲਿਖਾਈ ’ਚ ਸ਼ਬਦਾਂ ਵਿਚਕਾਰ ਕਿੰਨੀ ਜਗ੍ਹਾ ਛੱਡੀ ਜਾਂਦੀ ਹੈ, ਇਹ ਵੀ ਸ਼ਖਸੀਅਤ ਨਾਲ ਜੁੜੇ ਕਈ ਸੰਕੇਤ ਦਿੰਦੀ ਹੈ।

ਨੇੜੇ-ਨੇੜੇ ਲਿਖਣਾ: ਜਿਨ੍ਹਾਂ ਦੀ ਲਿਖਾਈ ’ਚ ਸ਼ਬਦ ਬਹੁਤ ਨੇੜੇ-ਨੇੜੇ ਹੁੰਦੇ ਹਨ, ਉਨ੍ਹਾਂ ਨੂੰ ਬਹੁਤ ਮਿਲਣਸਾਰ ਸੁਭਾਅ ਵਾਲਾ ਮੰਨਿਆ ਜਾਂਦਾ ਹੈ। ਅਜਿਹੇ ਲੋਕ ਦੂਜਿਆਂ ਨਾਲ ਜਲਦੀ ਘੁਲ-ਮਿਲ ਜਾਂਦੇ ਹਨ। ਉਹ ਬਹੁਤ ਸੋਸ਼ਲ ਹੁੰਦੇ ਹਨ ਤੇ ਨਵੇਂ ਲੋਕਾਂ ਨੂੰ ਮਿਲਣਾ, ਗੱਲਬਾਤ ਕਰਨਾ ਤੇ ਉਨ੍ਹਾਂ ਨਾਲ ਸੰਪਰਕ ਬਣਾਉਣਾ ਪਸੰਦ ਕਰਦੇ ਹਨ।

ਦੂਰ-ਦੂਰ ਲਿਖਣਾ: ਜੋ ਲੋਕ ਸ਼ਬਦਾਂ ਵਿਚਕਾਰ ਬਹੁਤ ਜ਼ਿਆਦਾ ਦੂਰੀ ਰੱਖ ਕੇ ਲਿਖਦੇ ਹਨ, ਉਨ੍ਹਾਂ ਨੂੰ ਆਜ਼ਾਦ ਸੋਚ ਵਾਲਾ ਕਿਹਾ ਜਾਂਦਾ ਹੈ। ਅਜਿਹੇ ਲੋਕ ਆਪਣੇ ‘ਮੀ-ਟਾਈਮ’ ਨੂੰ ਬਹੁਤ ਪਸੰਦ ਕਰਦੇ ਹਨ। ਉਹ ਪਹਿਲਾਂ ਆਪਣੇ ਬਾਰੇ ਤੇ ਫਿਰ ਦੂਜਿਆਂ ਬਾਰੇ ਸੋਚਦੇ ਹਨ। ਆਪਣੀ ਨਿੱਜੀ ਸਪੇਸ ’ਚ ਉਹ ਕਿਸੇ ਦੀ ਦਖਲਅੰਦਾਜ਼ੀ ਪਸੰਦ ਨਹੀਂ ਕਰਦੇ।