ਗਣੇਸ਼ ਚਤੁਰਥੀ 2026 : ਭਾਦੋਂ ਸ਼ੁਕਲ ਚਤੁਰਥੀ ’ਤੇ ਇਸ ਸ਼ੁਭ ਮਹੂਰਤ ’ਚ ਕਰੋ ਬੱਪਾ ਦੀ ਸਥਾਪਨਾ; ਪੜ੍ਹੋ ਪੂਰੀ ਪੂਜਾ ਵਿਧੀ ਤੇ ਸਮੱਗਰੀ

ਧਰਮ ਡੈਸਕ, ਨਵੀਂ ਦਿੱਲੀ : ਭਗਵਾਨ ਗਣੇਸ਼ ਸਾਰੇ ਦੇਵੀ-ਦੇਵਤਿਆਂ ’ਚ ਸਭ ਤੋਂ ਪਹਿਲਾਂ ਪੂਜੇ ਜਾਂਦੇ ਹਨ। ਵਿਆਹ ਦੀ ਅਗਨੀ ਪ੍ਰਜਵਲਿਤ ਕਰਨ ਤੋਂ ਪਹਿਲਾਂ, ਨਵੀਂ ਦੁਕਾਨ ਖੋਲ੍ਹਣ ਤੋਂ ਪਹਿਲਾਂ ਜਾਂ ਵਹੀ-ਖਾਤੇ ਦਾ ਪਹਿਲਾ ਪੰਨਾ ਲਿਖਣ ਤੋਂ ਪਹਿਲਾਂ ਭਗਵਾਨ ਗਣੇਸ਼ ਦਾ ਨਾਮ ਲਿਆ ਜਾਂਦਾ ਹੈ। ਉਹ ਵਿਘਨਹਰਤਾ ਹਨ, ਜੋ ਸਾਰੀਆਂ ਰੁਕਾਵਟਾਂ ਨੂੰ ਦੂਰ ਕਰਦੇ ਹਨ। ਭਾਦੋਂ ਮਹੀਨੇ ਦੇ ਦਸ ਦਿਨਾਂ ਦੌਰਾਨ ਉਹ ਸਿਰਫ਼ ਸਾਡੀਆਂ ਪ੍ਰਾਰਥਨਾਵਾਂ ਹੀ ਪੂਰੀਆਂ ਨਹੀਂ ਕਰਦੇ, ਸਗੋਂ ਧਰਤੀ ’ਤੇ ਵੀ ਨਿਵਾਸ ਕਰਦੇ ਹਨ।

ਇਸ ਸਾਲ ਗਣੇਸ਼ ਚਤੁਰਥੀ ਦਾ ਤਿਉਹਾਰ 14 ਸਤੰਬਰ 2026, ਸੋਮਵਾਰ ਨੂੰ ਹੈ। ਮਹਾਰਾਸ਼ਟਰ, ਗੋਆ, ਕਰਨਾਟਕ, ਤੇਲੰਗਾਨਾ, ਗੁਜਰਾਤ ਸਮੇਤ ਦੇਸ਼ ਦੇ ਵੱਖ-ਵੱਖ ਹਿੱਸਿਆਂ ’ਚ ਲੱਖਾਂ ਪਰਿਵਾਰਾਂ ਲਈ ਇਹ ਭਗਤੀ ਕਰਨ ਦਾ ਸੁਨਹਿਰਾ ਮੌਕਾ ਹੁੰਦਾ ਹੈ। ਆਓ ਜਾਣਦੇ ਹਾਂ ਗਣੇਸ਼ ਚਤੁਰਥੀ 2026 ਨਾਲ ਜੁੜੀ ਸਹੀ ਤਾਰੀਖ, ਮੂਰਤੀ ਸਥਾਪਨਾ ਦਾ ਮੁਹੂਰਤ, ਪੂਜਾ ਵਿਧੀ, ਪੂਜਾ ਸਮੱਗਰੀ ਤੇ ਵਿਸਰਜਨ ਕੈਲੰਡਰ ਸਮੇਤ ਪੂਰੀ ਜਾਣਕਾਰੀ।

ਗਣੇਸ਼ ਚਤੁਰਥੀ 2026 ਦੀ ਤਾਰੀਖ ਤੇ ਸਥਾਪਨਾ ਮੁਹੂਰਤ

ਹਿੰਦੂ ਪੰਚਾਂਗ ਦੇ ਅਨੁਸਾਰ, ਭਾਦੋਂ ਮਹੀਨੇ ਦੇ ਸ਼ੁਕਲ ਪੱਖ ਦੀ ਚਤੁਰਥੀ ਤਿਥੀ ਨੂੰ ਹੀ ਗਣੇਸ਼ ਚਤੁਰਥੀ ਮਨਾਈ ਜਾਂਦੀ ਹੈ। ਜ਼ਿਆਦਾਤਰ ਹਿੰਦੂ ਵਰਤ ਸੂਰਜ ਚੜ੍ਹਨ ਦੇ ਸਮੇਂ ਕੀਤੇ ਜਾਂਦੇ ਹਨ, ਪਰ ਗਣੇਸ਼ ਜੀ ਦੀ ਸਥਾਪਨਾ ਦੁਪਹਿਰ ਦੇ ਸਮੇਂ ਕੀਤੀ ਜਾਂਦੀ ਹੈ। ਇਸ ਦਾ ਕਾਰਨ ਇਹ ਮੰਨਿਆ ਜਾਂਦਾ ਹੈ ਕਿ ਭਗਵਾਨ ਗਣੇਸ਼ ਦਾ ਜਨਮ ਦੁਪਹਿਰ ਦੇ ਸਮੇਂ ਹੋਇਆ ਸੀ। ਇਸ ਲਈ ਦੁਪਹਿਰ ਦੇ ਸਮੇਂ ਮੂਰਤੀ ਸਥਾਪਿਤ ਕਰਨਾ ਬਹੁਤ ਸ਼ੁਭ ਮੰਨਿਆ ਜਾਂਦਾ ਹੈ।

ਗਣੇਸ਼ ਚਤੁਰਥੀ: ਸੋਮਵਾਰ, 14 ਸਤੰਬਰ 2026

ਚਤੁਰਥੀ ਤਿਥੀ ਸ਼ੁਰੂ: ਸਵੇਰੇ 7:06 ਵਜੇ

ਚਤੁਰਥੀ ਤਿਥੀ ਸਮਾਪਤ: ਸਵੇਰੇ 7:44 ਵਜੇ, 15 ਸਤੰਬਰ 2026

ਸਥਾਪਨਾ ਮੁਹੂਰਤ :

ਨਵੀਂ ਦਿੱਲੀ : ਸਵੇਰੇ 11:02 ਵਜੇ ਤੋਂ ਦੁਪਹਿਰ 1:31 ਵਜੇ ਤੱਕ

ਮੁੰਬਈ : ਸਵੇਰੇ 11:20 ਵਜੇ ਤੋਂ ਦੁਪਹਿਰ 1:48 ਵਜੇ ਤੱਕ

ਪੁਣੇ : ਸਵੇਰੇ 11:16 ਵਜੇ ਤੋਂ ਦੁਪਹਿਰ 1:44 ਵਜੇ ਤੱਕ

ਕੋਲਕਾਤਾ : ਸਵੇਰੇ 10:18 ਵਜੇ ਤੋਂ ਦੁਪਹਿਰ 12:46 ਵਜੇ ਤੱਕ

ਮੁੱਖ ਵਿਸਰਜਨ ਦੀ ਤਾਰੀਖ : 25 ਸਤੰਬਰ 2026, ਸ਼ੁੱਕਰਵਾਰ

ਗਣੇਸ਼ ਸਥਾਪਨਾ ਤੇ ਪੂਜਾ ਵਿਧੀ

ਸਵੇਰੇ ਜਲਦੀ ਇਸ਼ਨਾਨ ਕਰਨ ਤੋਂ ਬਾਅਦ ਨਵੇਂ ਕੱਪੜੇ ਜਾਂ ਸਾਫ਼ ਕੱਪੜੇ ਪਾਓ। ਪੂਜਾ ਸਥਾਨ ਨੂੰ ਚੰਗੀ ਤਰ੍ਹਾਂ ਸਾਫ਼ ਕਰੋ ਤੇ ਉੱਤਰ ਜਾਂ ਪੂਰਬ ਦਿਸ਼ਾ ਵੱਲ ਮੂੰਹ ਕਰਕੇ ਲੱਕੜ ਦੀ ਚੌਕੀ ਸਥਾਪਿਤ ਕਰੋ। ਚੌਕੀ ’ਤੇ ਲਾਲ ਜਾਂ ਪੀਲਾ ਕੱਪੜਾ ਵਿਛਾਓ। ਸਵਾਸਤਿਕ ਬਣਾਓ ਤੇ ਮੂਰਤੀ ਵਾਲੀ ਥਾਂ ’ਤੇ ਅਕਸ਼ਤ ਰੱਖੋ। ਇਸ ਤੋਂ ਬਾਅਦ ਸੱਜੇ ਹੱਥ ’ਚ ਜਲ, ਅਕਸ਼ਤ ਤੇ ਇੱਕ ਫੁੱਲ ਲੈ ਕੇ ਆਪਣਾ ਸੰਕਲਪ ਕਰੋ। ਅੰਤ ’ਚ ਜਲ ਨੂੰ ਛੱਡ ਦਿਓ।

ਦੁਪਹਿਰ ਦੇ ਸ਼ੁਭ ਮੁਹੂਰਤ ’ਚ ਮੂਰਤੀ ਨੂੰ ਅਕਸ਼ਤ ’ਤੇ ਸਥਾਪਿਤ ਕਰੋ। ਮੂਰਤੀ ’ਤੇ ਗੰਗਾਜਲ ਛਿੜਕ ਕੇ “ॐ गं गणपतये नमः” ਮੰਤਰ ਦਾ ਜਾਪ ਕਰੋ। ਇਸ ਤੋਂ ਬਾਅਦ ਮੂਰਤੀ ਦੇ ਕੋਲ ਪਾਣੀ ਨਾਲ ਭਰਿਆ ਤਾਂਬੇ ਦਾ ਕਲਸ਼, ਇੱਕ ਸਿੱਕਾ, ਸੁਪਾਰੀ, ਅੰਬ ਦੇ ਪੱਤੇ ਤੇ ਨਾਰੀਅਲ ਰੱਖੋ।

ਚੰਦਨ ਤੇ ਰੋਲੀ ਦਾ ਤਿਲਕ ਲਗਾਓ। ਅਕਸ਼ਤ, ਮੌਲੀ ਦਾ ਧਾਗਾ, ਫੁੱਲ, 21 ਗੰਢਾਂ ਵਾਲੀ ਦੂਰਵਾ ਘਾਹ ਤੇ ਜੇ ਸੰਭਵ ਹੋਵੇ ਤਾਂ ਲਾਲ ਗੁੜਹਲ ਦਾ ਫੁੱਲ ਅਰਪਿਤ ਕਰਨਾ ਸ਼ੁਭ ਮੰਨਿਆ ਜਾਂਦਾ ਹੈ। ਇਸ ਤੋਂ ਬਾਅਦ ਘਿਓ ਦਾ ਦੀਵਾ ਤੇ ਧੂਪ ਜਲਾਓ।

ਫਿਰ ਪੰਚਮੇਵਾ, ਮਿਸ਼ਰੀ ਤੇ ਫਲਾਂ ਦੇ ਨਾਲ 21 ਮੋਦਕ ਜਾਂ ਲੱਡੂ ਦਾ ਭੋਗ ਲਗਾਓ। ਗਣੇਸ਼ ਚਤੁਰਥੀ ਦੀ ਕਥਾ ਤੇ ਸਯਮੰਤਕ ਮਣਿ ਦੀ ਕਥਾ ਪੜ੍ਹੋ। ਇਸ ਤੋਂ ਬਾਅਦ ਗਣੇਸ਼ ਜੀ ਦੀ ਆਰਤੀ ਕਰੋ।

ਜਿੰਨੇ ਦਿਨ ਭਗਵਾਨ ਗਣੇਸ਼ ਤੁਹਾਡੇ ਘਰ ’ਚ ਬਿਰਾਜਮਾਨ ਰਹਿਣ, ਉਨ੍ਹਾਂ ਦਿਨਾਂ ਦੌਰਾਨ ਸਵੇਰੇ ਤੇ ਸ਼ਾਮ ਦੋਵੇਂ ਸਮੇਂ ਆਰਤੀ ਕਰੋ। ਉਹ ਘਰ ਦੇ ਮਹਿਮਾਨ ਹਨ ਤੇ ਉਨ੍ਹਾਂ ਨਾਲ ਮਹਿਮਾਨਾਂ ਵਰਗਾ ਹੀ ਸਤਿਕਾਰ ਤੇ ਵਿਹਾਰ ਕੀਤਾ ਜਾਣਾ ਚਾਹੀਦਾ ਹੈ।

ਗਣੇਸ਼ ਚਤੁਰਥੀ 2026 ਦੀ ਪੂਜਾ ਸਮੱਗਰੀ

ਗਣੇਸ਼ ਜੀ ਦੀ ਮੂਰਤੀ

ਗੰਗਾਜਲ

ਤਾਂਬੇ ਦਾ ਕਲਸ਼

ਰੋਲੀ, ਕੁੰਕੁਮ ਤੇ ਚੰਦਨ

ਅਕਸ਼ਤ

ਮੌਲੀ ਦਾ ਧਾਗਾ

ਦੇਸੀ ਘਿਓ ਤੇ ਭੀਮਸੇਨੀ ਕਪੂਰ

ਸੁਪਾਰੀ ਤੇ ਹਲਦੀ ਦੀ ਗੰਢ

ਪੰਚਮੇਵਾ ਤੇ ਮਿਸ਼ਰੀ

ਆਰਤੀ ਦੀ ਥਾਲੀ