ਬ੍ਰਹਮਚਰਿਆ ਦਾ ਮਤਲਬ ਸਿਰਫ਼ ਵਿਆਹ ਨਾ ਕਰਨਾ ਨਹੀਂ! ਜਾਣੋ ਇਸ ਦਾ ਅਸਲ ਅਰਥ ਤੇ ਜ਼ਿੰਦਗੀ ਨਾਲ ਜੁੜਿਆ ਡੂੰਘਾ ਸੰਦੇਸ਼

ਸਦਗੁਰੂ, (ਸੰਸਥਾਪਕ ਤੇ ਮੁਖੀ, ਈਸ਼ਾ ਫਾਊਂਡੇਸ਼ਨ ਤੇ ਅਧਿਆਤਮਿਕ ਗੁਰੂ) : ਮਨ ਦੀ ਖੁਸ਼ੀ ਤੇ ਸਿਹਤਮੰਦ ਜੀਵਨਸ਼ੈਲੀ ਲਈ ਯੋਗ ਕਰਨਾ ਠੀਕ ਹੈ। ਪਰ ਜਦੋਂ ਕਿਸੇ ਵਿਅਕਤੀ ਲਈ ਭੌਤਿਕ ਜੀਵਨ ਤੋਂ ਪਰੇ ਕੋਈ ਚੀਜ਼ ਜ਼ਿਆਦਾ ਮਹੱਤਵਪੂਰਨ ਹੋ ਜਾਂਦੀ ਹੈ ਤੇ ਤੁਸੀਂ ਉਸ ਨੂੰ ਆਮ ਲੋਕਾਂ ਵਾਂਗ ਜੀਵਨ ਬਤੀਤ ਕਰਨ ਲਈ ਮਜਬੂਰ ਕਰਦੇ ਹੋ, ਤਾਂ ਇਹ ਉਸ ਲਈ ਤਕਲੀਫ਼ ਤੇ ਨਰਕ ਬਣ ਜਾਂਦਾ ਹੈ। ਜਿਹੜਾ ਵਿਅਕਤੀ ਇਕੱਲੇ ਇਸ ਰਾਹ 'ਤੇ ਚੱਲਣਾ ਚਾਹੁੰਦਾ ਹੈ, ਜੇ ਤੁਸੀਂ ਉਸ ਨੂੰ ਕਿਸੇ ਅਜਿਹੇ ਵਿਅਕਤੀ ਨਾਲ ਚੱਲਣ ਲਈ ਮਜਬੂਰ ਕਰਦੇ ਹੋ ਜੋ ਇਸ ਰਾਹ 'ਤੇ ਚੱਲਣ ਦਾ ਇੱਛੁਕ ਜਾਂ ਯੋਗ ਨਹੀਂ ਹੈ, ਤਾਂ ਇਹ ਦੋਵਾਂ ਲਈ ਤਕਲੀਫ਼ ਬਣ ਜਾਂਦੀ ਹੈ। ਦੂਜੇ ਪਾਸੇ, ਜੇ ਤੁਸੀਂ ਕਿਸੇ ਅਜਿਹੇ ਵਿਅਕਤੀ ਨੂੰ ਬ੍ਰਹਮਚਰਿਆ ਦੀ ਦੀਖਿਆ ਦਿੰਦੇ ਹੋ ਜੋ ਵਿਆਹ ਕਰਨਾ ਚਾਹੁੰਦਾ ਹੈ, ਤਾਂ ਇਹ ਇੱਕ ਵੱਖਰੀ ਤਰ੍ਹਾਂ ਦੀ ਤਕਲੀਫ਼ ਹੈ। ਬ੍ਰਹਮਚਰਿਆ ਉਸ ਵਿਅਕਤੀ ਦੇ ਜੀਵਨ ’ਚ ਆਉਂਦਾ ਹੈ, ਜੋ ਇਹ ਸਮਝਣ ਲੱਗਦਾ ਹੈ ਕਿ ਖੁਸ਼ੀ, ਆਨੰਦ ਜਾਂ ਸ਼ਾਂਤੀ ਲਈ ਬਾਹਰ ਵੱਲ ਦੇਖਣ ਦਾ ਕੋਈ ਮਤਲਬ ਨਹੀਂ ਹੈ। ਉਹ ਸਮਝਣ ਲੱਗਦਾ ਹੈ ਕਿ ਇਹ ਸਭ ਕੁਝ ਆਪਣੇ ਅੰਦਰ ਹੀ ਲੱਭਣਾ ਪਵੇਗਾ। ਇੱਕ ਵਾਰ ਜਦੋਂ ਉਹ ਇਹ ਗੱਲ ਸਮਝ ਲੈਂਦਾ ਹੈ ਤਾਂ ਇਕੋ-ਇਕ ਰਾਹ ਅੰਦਰੂਨੀ ਰਾਹ ਹੁੰਦਾ ਹੈ। ਜੇ ਉਹ ਇਸ ਰਾਹ 'ਤੇ ਨਹੀਂ ਚੱਲਦਾ ਤਾਂ ਉਹ ਆਪਣੇ ਲਈ ਤੇ ਆਪਣੇ ਆਲੇ-ਦੁਆਲੇ ਦੇ ਲੋਕਾਂ ਲਈ ਦੁੱਖ ਪੈਦਾ ਕਰਦਾ ਹੈ।