ਗੀਤਾ ਦੇ 5 ਸੂਤਰ: ਜਦੋਂ ਵੀ ਵਿਗੜਨ ਲੱਗੇ ਤੁਹਾਡਾ ਮਾਨਸਿਕ ਸੰਤੁਲਨ, ਯਾਦ ਰੱਖੋ ਸ਼੍ਰੀ ਕ੍ਰਿਸ਼ਨ ਦੀਆਂ ਇਹ ਗੱਲਾਂ

ਧਰਮ ਡੈਸਕ, ਨਵੀਂ ਦਿੱਲੀ : ਤੁਹਾਨੂੰ ਜ਼ਿੰਦਗੀ ’ਚ ਜਦੋਂ ਵੀ ਦੁਚਿੱਤੀ ਜਾਂ ਤਣਾਅ ਮਹਿਸੂਸ ਹੁੰਦਾ ਹੈ ਤਾਂ ਤਰ੍ਹਾਂ-ਤਰ੍ਹਾਂ ਦੇ ਖਿਆਲ ਆਉਣੇ ਸ਼ੁਰੂ ਹੋ ਜਾਂਦੇ ਹਨ ਤੇ ਮਾਨਸਿਕ ਸੰਤੁਲਨ ਵਿਗੜਨ ਲੱਗਦਾ ਹੈ। ਮਹਾਭਾਰਤ ਦੇ ਯੁੱਧ ਦੇ ਮੈਦਾਨ ’ਚ ਅਰਜੁਨ ਦਾ ਸਾਹਮਣਾ ਵੀ ਇਸੇ ਡਰ, ਘਬਰਾਹਟ ਤੇ ਮੋਹ ਨਾਲ ਹੋਇਆ ਸੀ। ਪਰ ਉਸ ਸਮੇਂ ਭਗਵਾਨ ਸ਼੍ਰੀ ਕ੍ਰਿਸ਼ਨ ਨੇ ਉਨ੍ਹਾਂ ਨੂੰ ਅਜਿਹਾ ਰਸਤਾ ਦਿਖਾਇਆ, ਜੋ ਅੱਜ ਦੇ ਸਮੇਂ ’ਚ ਵੀ ਹਰ ਵਿਅਕਤੀ ਲਈ ਜੀਵਨ ਜਿਉਣ ਦਾ ਮਹੱਤਵਪੂਰਨ ਸੂਤਰ ਹੈ। ਸ਼੍ਰੀਮਦਭਗਵਦ ਗੀਤਾ ਇੰਨੀ ਪ੍ਰਭਾਵਸ਼ਾਲੀ ਮੰਨੀ ਜਾਂਦੀ ਹੈ ਕਿ ਜੇਕਰ ਤੁਸੀਂ ਇਸ ਦੇ ਵਿਚਾਰਾਂ ਨੂੰ ਆਪਣੀ ਸੋਚ ਦਾ ਹਿੱਸਾ ਬਣਾ ਲਓ ਤਾਂ ਔਖੀ ਤੋਂ ਔਖੀ ਸਥਿਤੀ ’ਚ ਵੀ ਆਪਣੇ ਆਪ ਨੂੰ ਸੰਭਾਲਣਾ ਆਸਾਨ ਹੋ ਸਕਦਾ ਹੈ। ਤਾਂ ਆਓ ਅੱਜ ਭਗਵਦ ਗੀਤਾ ਦੇ ਕੁਝ ਉਪਦੇਸ਼ ਪੜ੍ਹਦੇ ਹਾਂ, ਜੋ ਤੁਹਾਡੀਆਂ ਮੁਸ਼ਕਲਾਂ ਨੂੰ ਕੁਝ ਹੱਦ ਤੱਕ ਆਸਾਨ ਕਰ ਸਕਦੇ ਹਨ।

1. ਆਪਣੇ ਮਨ ਨੂੰ ਸਾਥੀ ਬਣਾਓ, ਦੁਸ਼ਮਣ ਨਹੀਂ

ਸਾਡਾ ਮਨ ਹੀ ਸਾਡੇ ਸੁਖ ਤੇ ਦੁੱਖ ਦਾ ਮੁੱਖ ਕਾਰਨ ਹੈ। ਜਦੋਂ ਤੱਕ ਇਸ ’ਤੇ ਸਾਡਾ ਕਾਬੂ ਨਹੀਂ ਹੁੰਦਾ, ਇਹ ਸਾਨੂੰ ਛੋਟੀਆਂ-ਛੋਟੀਆਂ ਗੱਲਾਂ ’ਤੇ ਭਟਕਾਉਂਦਾ ਤੇ ਪਰੇਸ਼ਾਨ ਕਰਦਾ ਰਹਿੰਦਾ ਹੈ। ਧੀਰਜ, ਧਿਆਨ ਤੇ ਸਮਝ ਦੇ ਜ਼ਰੀਏ ਅਸੀਂ ਆਪਣੇ ਮਨ ਨੂੰ ਅਨੁਸ਼ਾਸਿਤ ਕਰ ਸਕਦੇ ਹਾਂ ਤੇ ਇਹੀ ਮਾਨਸਿਕ ਸ਼ਾਂਤੀ ਦੀ ਪਹਿਲੀ ਪੌੜੀ ਹੈ।

2. ਕਰਤੱਵ ਦੇ ਰਸਤੇ ’ਤੇ ਚੱਲੋ, ਡਰ ਆਪਣੇ ਆਪ ਮਿਟ ਜਾਵੇਗਾ

ਸ਼੍ਰੀ ਕ੍ਰਿਸ਼ਨ ਕਹਿੰਦੇ ਹਨ ਕਿ ਡਰ ਇਨਸਾਨ ਨੂੰ ਅੰਦਰੋਂ ਕਮਜ਼ੋਰ ਬਣਾਉਂਦਾ ਹੈ ਤੇ ਸਹੀ ਫੈਸਲਾ ਲੈਣ ਤੋਂ ਵੀ ਰੋਕਦਾ ਹੈ। ਜਦੋਂ ਕੋਈ ਵਿਅਕਤੀ ਧਰਮ, ਅਰਥਾਤ ਆਪਣੇ ਕਰਤੱਵ ਤੇ ਸੱਚਾਈ ਦੇ ਰਸਤੇ ’ਤੇ ਕਾਇਮ ਰਹਿੰਦਾ ਹੈ ਤਾਂ ਉਸ ਦੇ ਅੰਦਰ ਅਟੁੱਟ ਆਤਮ-ਵਿਸ਼ਵਾਸ ਪੈਦਾ ਹੁੰਦਾ ਹੈ। ਸੱਚਾ ਸਾਹਸ ਡਰ ਦਾ ਨਾ ਹੋਣਾ ਨਹੀਂ ਹੈ, ਸਗੋਂ ਡਰ ਦੇ ਬਾਵਜੂਦ ਆਪਣੇ ਕਰਤੱਵ ਤੋਂ ਨਾ ਹਟਣਾ ਹੈ।

3. ਫਲ ਦੀ ਚਿੰਤਾ ਨਾ ਕਰੋ, ਕਰਮ ’ਤੇ ਧਿਆਨ ਦਿਓ

ਅਸੀਂ ਅਕਸਰ ਕੰਮ ਕਰਨ ਨਾਲੋਂ ਉਸ ਦੇ ਨਤੀਜੇ ਬਾਰੇ ਸੋਚ ਕੇ ਜ਼ਿਆਦਾ ਘਬਰਾ ਜਾਂਦੇ ਹਾਂ। ਗੀਤਾ ’ਚ ਸ਼੍ਰੀ ਕ੍ਰਿਸ਼ਨ ਕਹਿੰਦੇ ਹਨ ਕਿ ਮਨੁੱਖ ਦਾ ਅਧਿਕਾਰ ਸਿਰਫ਼ ਆਪਣੇ ਕਰਮ ’ਤੇ ਹੈ, ਉਸ ਦੇ ਫਲ ’ਤੇ ਨਹੀਂ। ਜਦੋਂ ਤੁਸੀਂ ਹਾਰ ਜਾਂ ਜਿੱਤ ਦੀ ਚਿੰਤਾ ਛੱਡ ਕੇ ਪੂਰੇ ਮਨ ਨਾਲ ਮਿਹਨਤ ਕਰਦੇ ਹੋ ਤਾਂ ਦਿਮਾਗ ਤੋਂ ਅਸਫਲਤਾ ਦਾ ਬੋਝ ਆਪਣੇ ਆਪ ਹਟਣ ਲੱਗਦਾ ਹੈ।

4. ਸੁਖ ਤੇ ਦੁੱਖ ਦੋਵਾਂ ’ਚ ਇੱਕੋ ਜਿਹਾ ਭਾਵ ਬਣਾਈ ਰੱਖੋ

ਸਮਾਂ ਕਦੇ ਇੱਕੋ ਜਿਹਾ ਨਹੀਂ ਰਹਿੰਦਾ। ਸਾਡੇ ਹਾਲਾਤ ਹਮੇਸ਼ਾ ਬਦਲਦੇ ਰਹਿੰਦੇ ਹਨ। ਇੱਕ ਸਮਝਦਾਰ ਵਿਅਕਤੀ ਉਹੀ ਹੈ ਜੋ ਹਰ ਸਥਿਤੀ ’ਚ ਆਪਣੀ ਸਥਿਰਤਾ ਬਣਾਈ ਰੱਖਦਾ ਹੈ। ਨਾ ਤਾਂ ਸੁਖ ਮਿਲਣ ’ਤੇ ਬਹੁਤ ਜ਼ਿਆਦਾ ਅਹੰਕਾਰੀ ਹੋਣਾ ਚਾਹੀਦਾ ਹੈ ਤੇ ਨਾ ਹੀ ਮੁਸ਼ਕਲ ਸਮੇਂ ’ਚ ਹਿੰਮਤ ਹਾਰਨੀ ਚਾਹੀਦੀ ਹੈ। ਆਪਣੇ ਆਪ ਨੂੰ ਮਜ਼ਬੂਤ ਬਣਾਈ ਰੱਖੋ।

5. ਭਾਰੀ ਬੋਝ ਇਕੱਲੇ ਨਾ ਚੁੱਕੋ, ਈਸ਼ਵਰ ’ਤੇ ਭਰੋਸਾ ਰੱਖੋ

ਹਰ ਗੱਲ ਨੂੰ ਖੁਦ ਕੰਟਰੋਲ ਕਰਨ ਦੀ ਕੋਸ਼ਿਸ਼ ਇਨਸਾਨ ਨੂੰ ਮਾਨਸਿਕ ਤੌਰ ’ਤੇ ਥਕਾਉਣ ਦੇ ਨਾਲ-ਨਾਲ ਪਰੇਸ਼ਾਨ ਵੀ ਕਰ ਦਿੰਦੀ ਹੈ। ਆਪਣੇ ਵੱਲੋਂ ਇਮਾਨਦਾਰੀ ਨਾਲ ਪੂਰੀ ਕੋਸ਼ਿਸ਼ ਕਰੋ ਤੇ ਇਸ ਤੋਂ ਬਾਅਦ ਨਤੀਜਾ ਈਸ਼ਵਰ ’ਤੇ ਛੱਡ ਦਿਓ। ਅਜਿਹਾ ਕਰਨ ਨਾਲ ਤੁਹਾਡਾ ਮਨ ਹਲਕਾ, ਬੇਫ਼ਿਕਰ ਤੇ ਮਜ਼ਬੂਤ ਬਣਦਾ ਹੈ।