ਡੀਸੀ ਨੇ ਜ਼ਿਲ੍ਹੇ ’ਚ ਸਫ਼ਾਈ ਸੇਵਾਵਾਂ ਲਈ ਬਦਲਵੇਂ ਪ੍ਰਬੰਧਾਂ ਦੇ ਦਿੱਤੇ ਹੁਕਮ

-15 ਦਿਨਾਂ ਤੋਂ ਸਫ਼ਾਈ ਸੇਵਕਾਂ ਦੀ ਚੱਲ ਰਹੀ ਕੰਮ ਛੋੜ ਹੜਤਾਲ, ਲੱਗੇ ਕੂੜੇ ਦੇ ਢੇਰ

ਸਟਾਫ ਰਿਪੋਰਟਰ, •ਪੰਜਾਬੀ ਜਾਗਰਣ, ਤਰਨਤਾਰਨ : ਸਫ਼ਾਈ ਮੁਲਾਜ਼ਮਾਂ ਵੱਲੋਂ ਬੀਤੀ 8 ਜੁਲਾਈ ਤੋਂ ਜ਼ਿਲ੍ਹਾ ਤਰਨਤਾਰਨ ਦੀਆਂ ਕਈ ਸ਼ਹਿਰੀ ਸਥਾਨਕ ਸੰਸਥਾਵਾਂ ’ਚ ਸਫ਼ਾਈ ਸੇਵਾਵਾਂ ਨੂੰ ਮੁਅੱਤਲ ਕਰ ਦਿੱਤਾ ਹੈ, ਜਿਸ ਦੇ ਨਤੀਜੇ ਵਜੋਂ ਜ਼ਿਲ੍ਹੇ ਦੇ ਕਸਬਿਆਂ ਵਿੱਚੋਂ ਕੂੜਾ ਨਹੀਂ ਚੁੱਕਿਆ ਜਾ ਰਿਹਾ ਤੇ ਨਾ ਹੀ ਨਿਪਟਾਇਆ ਜਾ ਰਿਹਾ ਹੈ। ਇਸ ਸਥਿਤੀ ਦੇ ਮੱਦੇ ਨਜ਼ਰ ਡਿਪਟੀ ਕਮਿਸ਼ਨਰ ਰਾਹੁਲ ਨੇ ਪੰਜਾਬ ਮਿਉਂਸਪਲ ਐਕਟ ਦੀਆਂ ਧਾਰਾਵਾਂ, ਐਮਰਜੈਂਸੀ ਦੀ ਸਥਿਤੀ ’ਚ ਡਿਪਟੀ ਕਮਿਸ਼ਨਰ ਦੀ ਅਸਾਧਾਰਨ ਸ਼ਕਤੀ ਅਤੇ ਇਸ ਸਬੰਧ ਵਿਚ ਹੋਰ ਸਾਰੀਆਂ ਸ਼ਕਤੀਆਂ ਦੀ ਵਰਤੋਂ ਕਰਦੇ ਹੋਏ, ਵੱਖ-ਵੱਖ ਉਪਾਵਾਂ ਨੂੰ ਤੁਰੰਤ ਪ੍ਰਭਾਵ ਨਾਲ ਲਾਗੂ ਕਰਨ ਦੇ ਹੁਕਮ ਜਾਰੀ ਕੀਤੇ ਹਨ, ਜਿਨ੍ਹਾਂ ਦਾ ਖ਼ਰਚਾ ਸਬੰਧਤ ਸ਼ਹਿਰੀ ਸਥਾਨਕ ਸੰਸਥਾ ਦੇ ਮਿਉਂਸੀਪਲ ਫੰਡ ਵਿੱਚੋਂ ਅਦਾ ਕੀਤਾ ਜਾਵੇਗਾ।

ਉਨ੍ਹਾਂ ਹੁਕਮ ਦਿੱਤੇ ਹਨ ਕਿ ਜ਼ਿਲ੍ਹੇ ਦੀਆਂ ਨਗਰ ਕੌਂਸਲਾਂ, ਨਗਰ ਪੰਚਾਇਤਾਂ ਦੇ ਕਾਰਜਕਾਰੀ ਅਧਿਕਾਰੀ ਤੁਰੰਤ ਬਦਲਵੇਂ ਪ੍ਰਬੰਧ ਕਰਨਗੇ। ਉਹ ਠੇਕੇ 'ਤੇ ਲਈਆਂ ਗਈਆਂ ਏਜੰਸੀਆਂ, ਆਊਟਸੋਰਸਡ ਮੈਨਪਾਵਰ, ਕਿਰਾਏ ’ਤੇ ਲਏ ਵਾਹਨ, ਮਸ਼ੀਨਰੀ ਜਾਂ ਹੋਰ ਵਿੰਗਾਂ ਤੇ ਵਿਭਾਗਾਂ ਤੋਂ ਸਟਾਫ਼ ਦੀ ਤਾਇਨਾਤੀ ਰਾਹੀਂ ਆਪਣੇ-ਆਪਣੇ ਅਧਿਕਾਰ ਖੇਤਰਾਂ ਦੇ ਅੰਦਰ ਸਾਰੇ ਵਾਰਡਾਂ, ਬਾਜ਼ਾਰਾਂ, ਹਸਪਤਾਲਾਂ ਅਤੇ ਜਨਤਕ ਥਾਵਾਂ ਤੋਂ ਇਕੱਠੇ ਹੋਏ ਕੂੜੇ ਅਤੇ ਠੋਸ ਰਹਿੰਦ-ਖੂੰਹਦ ਨੂੰ ਤੁਰੰਤ ਚੁੱਕਣ, ਢੋਆ-ਢੁਆਈ ਤੇ ਵਿਗਿਆਨਕ, ਕਾਨੂੰਨੀ ਨਿਪਟਾਰਾ ਕਰਵਾਉਣਗੇ।

ਇਸ ਤਹਿਤ ਹਸਪਤਾਲਾਂ, ਡਿਸਪੈਂਸਰੀਆਂ, ਸਕੂਲਾਂ, ਬਾਜ਼ਾਰਾਂ, ਜਲ ਸਰੋਤਾਂ ਦੇ ਨਾਲਿਆਂ ਤੇ ਹੋਰ ਸੰਵੇਦਨਸ਼ੀਲ, ਜ਼ਿਆਦਾ ਭੀੜ-ਭਾੜ ਵਾਲੇ ਸਥਾਨਾਂ ਨੂੰ ਤਰਜੀਹ ਦਿੱਤੀ ਜਾਵੇਗੀ, ਜਿਥੇ ਬਿਮਾਰੀ ਫ਼ੈਲਣ ਦਾ ਜ਼ੋਖ਼ਮ ਸਭ ਤੋਂ ਵੱਧ ਹੈ। ਇਸੇ ਤਰ੍ਹਾਂ ਸਿਵਲ ਸਰਜਨ ਅਤੇ ਜ਼ਿਲ੍ਹਾ ਸਿਹਤ ਅਧਿਕਾਰੀ ਇਸ ਮੁਹਿੰਮ ਨਾਲ ਜੁੜੇ ਰਹਿਣਗੇ ਤੇ ਜ਼ਿਲ੍ਹੇ ਭਰ ਵਿਚ ਡਰੇਨਾਂ, ਪਾਣੀ ਦੇ ਸਰੋਤਾਂ ਅਤੇ ਸੰਵੇਦਨਸ਼ੀਲ ਇਲਾਕਿਆਂ ’ਚ ਜੰਗੀ ਪੱਧਰ 'ਤੇ ਲਾਰਵੇ ਵਿਰੋਧੀ ਸਪਰੇਅ, ਫੌਗਿੰਗ, ਕੀਟਾਣੂ-ਨਾਸ਼ਕ ਅਤੇ ਕਲੋਰੀਨੇਸ਼ਨ ਕਰਵਾਉਣਗੇ। ਨਾਲ ਹੀ ਕਿਸੇ ਵੀ ਪ੍ਰਕੋਪ ਦੀ ਸੰਭਾਵਨਾ ਲਈ ਸਾਰੀਆਂ ਸਿਹਤ ਸੰਸਥਾਵਾਂ ’ਚ ਦਵਾਈਆਂ ਤੇ ਆਈਵੀ ਤਰਲ ਪਦਾਰਥਾਂ ਦਾ ਢੁੱਕਵਾਂ ਸਟਾਕ ਰੱਖਣਗੇ।

ਜਾਰੀ ਹੁਕਮਾਂ ਅਨੁਸਾਰ ਸਬੰਧਤ ਉਪ-ਮੰਡਲ ਮੈਜਿਸਟ੍ਰੇਟ ਤੇ ਕਾਰਜਕਾਰੀ ਅਧਿਕਾਰੀ ਆਮ ਸਥਿਤੀ ਬਹਾਲ ਹੋਣ ਤਕ ਡਿਪਟੀ ਕਮਿਸ਼ਨਰ ਦਫ਼ਤਰ ਨੂੰ ਕੂੜੇ ਦੀ ਮਾਤਰਾ, ਕਵਰ ਕੀਤੇ ਖੇਤਰਾਂ ਤੇ ਹੜਤਾਲ ਨਾਲ ਜੁੜੇ ਕਿਸੇ ਵੀ ਕਾਨੂੰਨ-ਵਿਵਸਥਾ ਦੇ ਮੁੱਦੇ ਬਾਰੇ ਰੋਜ਼ਾਨਾ ਪਾਲਣਾ-ਕਮ-ਸਥਿਤੀ ਰਿਪੋਰਟ ਜਮ੍ਹਾਂ ਕਰਾਉਣਗੇ। ਇਹ ਹੁਕਮ ਉਦੋਂ ਤਕ ਲਾਗੂ ਰਹਿਣਗੇ, ਜਦੋਂ ਤਕ ਹੜਤਾਲ ਖ਼ਤਮ ਨਹੀਂ ਹੋ ਜਾਂਦੀ ਤੇ ਆਮ ਸੈਨੀਟੇਸ਼ਨ ਸੇਵਾਵਾਂ ਬਹਾਲ ਨਹੀਂ ਹੋ ਜਾਂਦੀਆਂ, ਜਾਂ ਅਗਲੇ ਹੁਕਮਾਂ ਤਕ, ਜੋ ਵੀ ਪਹਿਲਾਂ ਹੋਵੇ।

ਇਨ੍ਹਾਂ ਹੁਕਮਾਂ ਦੀ ਪਾਲਣਾ ਵਿਚ ਕੁਤਾਹੀ ਕਰਨ 'ਤੇ ਪੰਜਾਬ ਨਗਰ ਪਾਲਿਕਾ ਐਕਟ 1911 ਤੋਂ ਇਲਾਵਾ ਸਬੰਧਤ ਸੇਵਾ ਨਿਯਮਾਂ ਦੇ ਕਾਨੂੰਨੀ ਉਪਬੰਧਾਂ ਅਧੀਨ ਕਾਰਵਾਈ ਕੀਤੀ ਜਾਵੇਗੀ। ਉਨ੍ਹਾਂ ਹੁਕਮਾਂ ’ਚ ਕਿਹਾ ਕਿ ਲੰਬੇ ਸਮੇਂ ਤੋਂ ਕੂੜਾ ਨਾ ਚੁੱਕਣ ਤੇ ਮੌਨਸੂਨ ਬਦਲਣ ਕਾਰਨ ਵੱਖ-ਵੱਖ ਵਾਰਡਾਂ, ਇਲਾਕਿਆਂ ’ਚ ਸੜਨ ਵਾਲਾ ਠੋਸ ਰਹਿੰਦ-ਖੂੰਹਦ ਇਕੱਠਾ ਹੋਣ, ਨਾਲੀਆਂ ਦੇ ਬੰਦ ਹੋਣ ਅਤੇ ਬੇਰੋਕ ਸਥਿਤੀਆਂ ਪੈਦਾ ਹੋਣ ਨਾਲ ਵੈਕਟਰ-ਜਨਿਤ ਅਤੇ ਪਾਣੀ-ਜਨਿਤ ਬਿਮਾਰੀਆਂ ਦੇ ਫ਼ੈਲਣ ਦਾ ਖਦਸ਼ਾ ਪੈਦਾ ਹੋਇਆ ਹੈ, ਜੋ ਜ਼ਿਲ੍ਹਾ ਤਰਨਤਾਰਨ ਦੇ ਵਸਨੀਕਾਂ ਦੀ ਸਿਹਤ ਅਤੇ ਸੁਰੱਖਿਆ ਲਈ ਇਕ ਗੰਭੀਰ ਵਿਸ਼ਾ ਹੈ। ਉਕਤ ਸਥਿਤੀ ਮਨੁੱਖੀ ਜੀਵਨ ਲਈ ਖ਼ਤਰਾ ਅਤੇ ਜਨਤਾ ਲਈ ਗੰਭੀਰ ਅਸੁਵਿਧਾ ਨਾਲ ਜੁੜੀ ਇਕ ਐਮਰਜੈਂਸੀ ਹੈ ਅਤੇ ਇਹ ਮਾਮਲਾ ਸਬੰਧਤ ਨਗਰ ਕਮੇਟੀ, ਕੌਂਸਲ ਦੁਆਰਾ ਆਮ ਤੌਰ 'ਤੇ ਵਿਚਾਰ ਦੀ ਉਡੀਕ ਨਹੀਂ ਕਰ ਸਕਦਾ।