ਮੋਰਿੰਡਾ ਦੇ ਵਾਰਡ ਨੰਬਰ 13 ’ਚੋਂ ਟਵੇਰਾ ਗੱਡੀ ਚੋਰੀ

ਅਮਰਜੀਤ ਧੀਮਾਨ, ਪੰਜਾਬੀ ਜਾਗਰਣ, ਮੋਰਿੰਡਾ : ਮੋਰਿੰਡਾ ਦੇ ਵਾਰਡ ਨੰਬਰ 13 ’ਚ ਸਥਿਤ ਪੰਜਾਬ ਨੈਸ਼ਨਲ ਬੈਂਕ ਦੇ ਨਾਲ ਲੱਗਦੀ ਗਲੀ ’ਚੋਂ ਬੀਤੀ ਰਾਤ ਚੋਰ ਇੱਕ ਟਵੇਰਾ ਗੱਡੀ ਚੋਰੀ ਕਰਕੇ ਲੈ ਜਾਣ ’ਚ ਸਫਲ ਹੋ ਗਏ। ਇਸ ਸਬੰਧੀ ਜਾਣਕਾਰੀ ਦਿੰਦਿਆਂ ਗੱਡੀ ਦੇ ਮਾਲਕ ਲਵਪ੍ਰੀਤ ਸਿੰਘ ਨੇ ਦੱਸਿਆ ਕਿ ਉਹ ਆਪਣੀ ਟਵੇਰਾ ਗੱਡੀ ਨੰਬਰ ਪੀਬੀ 65 ਏ ਵਾਈ- 9243 ਰਾਹੀਂ ਇੱਕ ਸਕੁਲ ਦੇ ਸਟਾਫ ਨੂੰ ਸਕੂਲ ਛੱਡਣ ਤੇ ਲਿਆਉਣ ਦਾ ਕੰਮ ਕਰਕੇ ਆਪਣੇ ਪਰਿਵਾਰ ਦਾ ਪਾਲਣ ਪੋਸ਼ਣ ਕਰਦਾ ਸੀ, ਪ੍ਰੰਤੂ ਇਸ ਵਾਰਡ ’ਚ ਸੀਵਰੇਜ ਬੋਰਡ ਵੱਲੋ ਪਾਈਪਲਾਇਨ ਵਿਛਾਉਣ ਉਪਰੰਤ ਪੁੱਟੀਆਂ ਗਈਆਂ ਗਲੀਆਂ ਤੇ ਸੜਕਾਂ ’ਤੇ ਪਿਛਲੇ ਚਾਰ ਮਹੀਨਿਆਂ ਤੋ ਇੰਟਰਲਾਕਿੰਗ ਦਾ ਕੰਮ ਨਾ ਕਰਨ ਕਾਰਨ ਉਸ ਸਮੇਤ ਬਾਕੀ ਗਲੀ, ਵਾਰਡ ਵਾਲੇ ਵੀ ਆਪੋ-ਆਪਣੀਆਂ ਗੱਡੀਆਂ, ਕਾਰਾਂ ਨੂੰ ਬਾਹਰ ਗਲੀ ’ਚ ਹੀ ਖੜ੍ਹੀਆਂ ਕਰਦੇ ਆ ਰਹੇ ਹਨ। ਲਵਪ੍ਰੀਤ ਸਿੰਘ ਨੇ ਦੱਸਿਆ ਕਿ ਰੋਜਾਨਾ ਵਾਂਗ ਹੀ ਉਸਨੇ ਵੀ ਸ਼ਾਮ ਸਮੇਂ ਆਪਣੀ ਗੱਡੀ ਗਲੀ ’ਚ ਖੜੀ ਕੀਤੀ ਸੀ। ਜਿੱਥੋਂ ਚੋਰਾਂ ਵੱਲੋਂ ਰਾਤੀ ਇੱਕ ਅਤੇ ਦੋ ਵਜੇ ਦੇ ਦਰਮਿਆਨ ਉਸ ਦੀ ਗੱਡੀ ਨੂੰ ਚੋਰੀ ਕਰ ਲਿਆ ਗਿਆ ਅਤੇ ਚੋਰੀ ਦੀ ਇਹ ਵਾਰਦਾਤ ਨਾਲ ਲੱਗਦੇ ਘਰ ਦੇ ਸੀਸੀਟੀਵੀ ਕੈਮਰੇ ’ਚ ਕੈਦ ਹੋ ਗਈ ਹੈ ਜਿਸ ਅਨੁਸਾਰ ਚੋਰ ਇੱਕ ਜੈਨ ਕਾਰ ’ਚ ਆਉਂਦੇ ਹਨ ਅਤੇ ਉਸਦੀ ਗੱਡੀ ਚੋਰੀ ਕਰਕੇ ਬੱਸੀ ਪਠਾਣਾ ਵੱਲ ਲੈ ਜਾਂਦੇ ਹਨ। ਲਵਪ੍ਰੀਤ ਸਿੰਘ ਨੇ ਦੱਸਿਆ ਕਿ ਇਸ ਸਬੰਧੀ ਸ਼ਹਿਰੀ ਪੁਲਿਸ ਨੂੰ ਸੂਚਿਤ ਕਰ ਦਿੱਤਾ ਗਿਆ ਹੈ। ਉੱਧਰ ਜਦੋ ਇਸ ਸਬੰਧੀ ਐਸਐਚਓ ਸਿਟੀ ਮੋਰਿੰਡਾ ਇੰਸਪੈਕਟਰ ਗਗਨਦੀਪ ਸਿੰਘ ਨਾਲ ਗੱਲਬਾਤ ਕੀਤੀ ਤਾਂ ਉਨ੍ਹਾਂ ਦੱਸਿਆ ਕਿ ਲਵਪ੍ਰੀਤ ਸਿੰਘ ਦੀ ਸ਼ਿਕਾਇਤ ਪੁਲਿਸ ਨੂੰ ਮਿਲ ਚੁੱਕੀ ਹੈ। ਜਿਸ ਉਪਰੰਤ ਪੁਲਿਸ ਵੱਲੋ ਸੀਸੀਟੀਵੀ ਕੈਮਰਿਆਂ ਦੀ ਜਾਂਚ ਕੀਤੀ ਜਾ ਰਹੀ ਹੈ।