ਰੇਲਵੇ ਨੇ ਬੰਦ ਕੀਤੀਆਂ ਦੋਵੇਂ ਗੱਡੀਆਂ ਨੂੰ ਚਲਾਇਆ

ਪੰਜਾਬੀ ਜਾਗਰਣ ਟੀਮ, ਰੂਪਨਗਰ/ਸ੍ਰੀ ਅਨੰਦਪੁਰ ਸਾਹਿਬ : ਉੱਤਰੀ ਰੇਲਵੇ ਨੇ ਹੋਲਾ ਮੁਹੱਲਾ ਦੌਰਾਨ ਭਾਰਤ ਅਤੇ ਵਿਦੇਸ਼ਾਂ ਤੋਂ ਸ੍ਰੀ ਅਨੰਦਪੁਰ ਸਾਹਿਬ ਅਤੇ ਸ੍ਰੀ ਕੀਰਤਪੁਰ ਸਾਹਿਬ ਆਉਣ ਵਾਲੇ ਸ਼ਰਧਾਲੂਆਂ ਨੂੰ ਵੱਡੀ ਰਾਹਤ ਦਿੰਦੇ ਹੋਏ ਪਿਛਲੇ ਤਿੰਨ ਮਹੀਨਿਆਂ ਤੋਂ ਬੰਦ ਦੋ ਰੇਲਗੱਡੀਆਂ ਤੁਰੰਤ ਪ੍ਰਭਾਵ ਨਾਲ ਚਲਾਉਣ ਦਾ ਐਲਾਨ ਕੀਤਾ ਹੈ। ਇਸ ਦੀ ਪੁਸ਼ਟੀ ਕਰਦੇ ਹੋਏ, ਉੱਤਰੀ ਰੇਲਵੇ ਦੇ ਅੰਬਾਲਾ ਡਿਵੀਜ਼ਨ ਦੇ ਸਰਹਿੰਦ ਸੈਕਸ਼ਨ ਦੇ ਸੀਐਮਆਈ ਅਜੈ ਗੋਇਲ ਨੇ ਕਿਹਾ ਕਿ ਪਿਛਲੇ ਤਿੰਨ ਮਹੀਨਿਆਂ ਤੋਂ, ਨੰਗਲ ਡੈਮ-ਅੰਮ੍ਰਿਤਸਰ ਵਿਚਕਾਰ ਚੱਲਣ ਵਾਲੀ ਟ੍ਰੇਨ ਨੰਬਰ 14506 ਅਤੇ ਅੰਮ੍ਰਿਤਸਰ-ਨੰਗਲ ਡੈਮ ਵਿਚਕਾਰ ਚੱਲਣ ਵਾਲੀ ਟ੍ਰੇਨ ਨੰਬਰ 14505 ਇੰਟਰਸਿਟੀ ਐਕਸਪ੍ਰੈਸ ਦੇ ਨਾਲ-ਨਾਲ ਨੰਗਲ ਡੈਮ-ਅੰਬਾਲਾ ਵਿਚਕਾਰ ਚੱਲਣ ਵਾਲੀ ਟ੍ਰੇਨ ਨੰਬਰ 64516 ਅਤੇ ਅੰਬਾਲਾ-ਨੰਗਲ ਡੈਮ ਵਿਚਕਾਰ ਚੱਲਣ ਵਾਲੀ ਟ੍ਰੇਨ ਨੰਬਰ 64517 ਨੂੰ ਤੁਰੰਤ ਪ੍ਰਭਾਵ ਨਾਲ ਬਹਾਲ ਕਰ ਦਿੱਤਾ ਗਿਆ ਹੈ। ਉਨ੍ਹਾਂ ਕਿਹਾਕਿ ਪਹਿਲਾਂ ਇਹ ਟ੍ਰੇਨਾਂ 1 ਮਾਰਚ ਤੋਂ ਚੱਲਣੀਆਂ ਸ਼ੁਰੂ ਹੋਣੀਆਂ ਸਨ, ਪਰ ਹੋਲਾ ਮੁਹੱਲੇ ਤੇ ਹੋਣ ਵਾਲੀ ਭਾਰੀ ਭੀੜ ਨੂੰ ਦੇਖਦੇ ਹੋਏ, ਸ਼ਰਧਾਲੂਆਂ ਦੀ ਸਹੂਲਤ ਲਈ ਇਨ੍ਹਾਂ ਟ੍ਰੇਨਾਂ ਨੂੰ ਤੁਰੰਤ ਪ੍ਰਭਾਵ ਨਾਲ ਬਹਾਲ ਕਰ ਦਿੱਤਾ ਗਿਆ ਹੈ। ਸੀਐਮਆਈ ਅਜੇ ਗੋਇਲ ਨੇ ਸਪੱਸ਼ਟ ਕੀਤਾ ਕਿ ਨੰਗਲ ਡੈਮ-ਅੰਮ੍ਰਿਤਸਰ ਵਿਚਕਾਰ ਚੱਲਣ ਵਾਲੀਆਂ ਇੰਟਰਸਿਟੀ ਐਕਸਪ੍ਰੈਸ ਟ੍ਰੇਨਾਂ ਨੰਬਰ 14506 ਅਤੇ 14505 ਨੰਗਲ ਡੈਮ ਰਾਹੀਂ ਅਨੰਦਪੁਰ ਸਾਹਿਬ-ਰੂਪਨਗਰ-ਲੁਧਿਆਣਾ, ਜਲੰਧਰ-ਅੰਮ੍ਰਿਤਸਰ ਤੱਕ ਆਪਣੇ ਪੁਰਾਣੇ ਰੂਟ ਤੇ ਜਾਰੀ ਰਹਿਣਗੀਆਂ, ਪਰ ਨੰਗਲ ਡੈਮ-ਅੰਬਾਲਾ ਵਿਚਕਾਰ ਚੱਲਣ ਵਾਲੀਆਂ ਟ੍ਰੇਨਾਂ ਨੰਬਰ 64516 ਅਤੇ 64517 ਦਾ ਰੂਟ ਬਦਲ ਦਿੱਤਾ ਗਿਆ ਹੈ। ਪਹਿਲਾਂ ਇਹ ਦੋਵੇਂ ਟ੍ਰੇਨਾਂ ਚੰਡੀਗੜ੍ਹ ਰਾਹੀਂ ਚੱਲਦੀਆਂ ਸਨ, ਪਰ ਹੁਣ ਇਹ ਦੋਵੇਂ ਟ੍ਰੇਨਾਂ 64516-64517 ਅਗਲੇ ਹੁਕਮਾਂ ਤੱਕ ਸਰਹਿੰਦ ਰਾਹੀਂ ਚੱਲਣਗੀਆਂ।