ਆਰਬੀਯੂ ਦੇ ਐੱਚਆਰ ਕਾਨਕਲੇਵ-2026 ’ਚ ਕੈਂਪਸ ਤੇ ਕਾਰਪੋਰੇਟ ਜਗਤ ਵਿਚਲਾ ਪਾੜਾ ਘਟਾਉਣ ’ਤੇ ਜ਼ੋਰ

ਉਦਯੋਗ ਦੀਆਂ ਬਦਲਦੀਆਂ ਲੋੜਾਂ ਅਨੁਸਾਰ ਵਿਦਿਆਰਥੀਆਂ ਨੂੰ ਤਿਆਰ ਕਰਨ ’ਤੇ ਚਰਚਾ ਸਟਾਫ਼ ਰਿਪੋਰਟਰ, ਪੰਜਾਬੀ ਜਾਗਰਣ, ਰੂਪਨਗਰ : ਰਿਆਤ ਬਾਹਰਾ ਯੂਨੀਵਰਸਿਟੀ (ਆਰਬੀਯੂ) ਵੱਲੋਂ ਐੱਚਆਰ ਕਾਨਕਲੇਵ-2026 ਕਰਵਾਇਆ ਗਿਆ, ਜਿਸ ਵਿਚ ਪ੍ਰਮੁੱਖ ਮਨੁੱਖੀ ਸਰੋਤ ਮਾਹਿਰਾਂ, ਕਾਰਪੋਰੇਟ ਅਧਿਕਾਰੀਆਂ, ਉਦਯੋਗ ਮਾਹਿਰਾਂ ਅਤੇ ਸਿੱਖਿਆ ਸ਼ਾਸਤਰੀਆਂ ਨੇ ਸ਼ਿਰਕਤ ਕੀਤੀ। ਕਾਨਕਲੇਵ ਦੌਰਾਨ ਵਿਦਿਆਰਥੀਆਂ ਦੀ ਰੁਜ਼ਗਾਰ ਯੋਗਤਾ ਵਧਾਉਣ, ਕਾਰਜ ਸਥਾਨ ਦੀਆਂ ਬਦਲਦੀਆਂ ਲੋੜਾਂ ਅਤੇ ਅਕਾਦਮਿਕ ਸਿੱਖਿਆ ਤੇ ਉਦਯੋਗ ਵਿਚਕਾਰਲੇ ਪਾੜੇ ਨੂੰ ਪੂਰਾ ਕਰਨ ਬਾਰੇ ਵਿਚਾਰ-ਵਟਾਂਦਰਾ ਕੀਤਾ ਗਿਆ। ਚਾਂਸਲਰ ਗੁਰਵਿੰਦਰ ਸਿੰਘ ਬਾਹਰਾ ਦੀ ਅਗਵਾਈ ਹੇਠ ਕਰਵਾਏ ਗਏ ਇਸ ਕਾਨਕਲੇਵ ਦਾ ਵਿਸ਼ਾ ‘ਐਜੂਕੇਸ਼ਨ.ਐਕਸਈ ਤੋਂ ਕਾਰਪੋਰੇਟ.ਐਕਸਈ ਤੱਕ,ਉਹ ਹਕੀਕਤ ਜਿਸ ਬਾਰੇ ਤੁਹਾਨੂੰ ਕਿਸੇ ਨੇ ਨਹੀਂ ਦੱਸਿਆ’ ਸੀ। ਇਸ ਦਾ ਮੁੱਖ ਉਦੇਸ਼ ਵਿਦਿਆਰਥੀਆਂ ਨੂੰ ਕਾਰਪੋਰੇਟ ਜਗਤ ਦੀਆਂ ਤੇਜ਼ੀ ਨਾਲ ਬਦਲ ਰਹੀਆਂ ਲੋੜਾਂ ਅਤੇ ਚੁਣੌਤੀਆਂ ਲਈ ਤਿਆਰ ਕਰਨਾ ਸੀ। ਕਾਨਕਲੇਵ ਵਿਚ ਉਨਮੇਸ਼ ਪਵਾਰ, ਸਲਾਹਕਾਰ ਅਤੇ ਏਂਜਲ ਨਿਵੇਸ਼ਕ, ਨੀਵ ਵੈਂਚਰਜ਼; ਗੁੰਜਨ ਰਾਮਚੰਦਾਨੀ, ਡਾਇਰੈਕਟਰ, ਲੀਡਰਸ਼ਿਪ ਟ੍ਰਾਂਸਫਾਰਮੇਸ਼ਨ, ਕੇਪੀਐਮਜੀ; ਕਪਿਲ ਗੋਤਮ ਕੈੱਲਾ, ਐਨਸੀਐਸ ਗਰੁੱਪ; ਸਮਿਤਾ ਨਾਰਕਰ, ਇਨਫਿਨਿਟ ਅਪਟਾਈਮ; ਡਾ. ਧਰੁਵ ਚੋਪੜਾ, ਏਵੀਪੀ-ਐੱਚਆਰ, ਈਐਕਸਐੱਲ ਸਰਵਿਸਿਜ਼, ਅਮਿਤਾ ਕਰਾਡਖੇਡਕਰ, ਮਾਸਟਰਕਾਰਡ; ਪਰਵੇਜ਼ ਸਿਰਾਜ, ਲੂਪਿਨ; ਮੇਖੋਲਾ ਗਾਂਗੁਲੀ, ਵੈਲਸਪਨ; ਸਾਹਿਲ ਨਈਅਰ, ਕੇਪੀਐਮਜੀ ਅਤੇ ਸੁਸ਼ਾਂਤ ਸ਼ਰਮਾ, ਈਵਾਈ ਸਮੇਤ ਵੱਖ-ਵੱਖ ਸੰਸਥਾਵਾਂ ਦੇ ਨੁਮਾਇੰਦਿਆਂ ਨੇ ਸ਼ਿਰਕਤ ਕੀਤੀ।ਇਸ ਮੌਕੇ ਗੁਰਿੰਦਰ ਸਿੰਘ ਬਾਹਰਾ ਵਾਈਸ ਚੇਅਰਮੈਨ ਰਿਆਤ ਬਾਹਰਾ ਗਰੁੱਪ , ਯੂਨੀਵਰਸਿਟੀ ਦੇ ਵਾਈਸ-ਚਾਂਸਲਰ ਪ੍ਰੋ. (ਡਾ.) ਸੰਜੇ ਕੁਮਾਰ ,ਵਿਕਰਮ ਸਿੰਘ ਗਰੁੱਪ ਵਾਈਸ ਪ੍ਰੈਸੀਡੈਂਟ ਪਲੇਸਮੈਂਟ ਵੀ ਮੌਜੂਦ ਸਨ । ਚਾਂਸਲਰ ਗੁਰਵਿੰਦਰ ਸਿੰਘ ਬਾਹਰਾ ਨੇ ਸੰਬੋਧਨ ਕਰਦਿਆਂ ਉਦਯੋਗ ਅਤੇ ਅਕਾਦਮਿਕ ਖੇਤਰ ਵਿਚਕਾਰ ਭਾਈਵਾਲੀ ਮਜ਼ਬੂਤ ਕਰਨ ਦੀ ਮਹੱਤਤਾ ਉਜਾਗਰ ਕੀਤੀ। ਉਨ੍ਹਾਂ ਕਿਹਾ ਕਿ ਉੱਚ ਸਿੱਖਿਆ ਨੂੰ ਪੇਸ਼ੇਵਰ ਖੇਤਰ ਦੀਆਂ ਉੱਭਰ ਰਹੀਆਂ ਲੋੜਾਂ ਦੇ ਅਨੁਕੂਲ ਬਣਾਉਣਾ ਸਮੇਂ ਦੀ ਅਹਿਮ ਲੋੜ ਹੈ। ਉਨਮੇਸ਼ ਪਵਾਰ ਨੇ ‘ਦਿ ਐਮਬੀਏ ਟ੍ਰੈਪਬੁੱਕ: ਪੰਜ ਗਲਤੀਆਂ, ਪੰਜ ਹੱਲ ਅਤੇ ਅੱਗੇ ਵਧਣ ਦੇ ਪੰਜ ਤਰੀਕੇ’ ਵਿਸ਼ੇ ’ਤੇ ਮੁੱਖ ਭਾਸ਼ਣ ਦਿੱਤਾ। ਉਨ੍ਹਾਂ ਨੇ ਕਰੀਅਰ ’ਚ ਹੋਣ ਵਾਲੀਆਂ ਆਮ ਗਲਤੀਆਂ ਅਤੇ ਉਨ੍ਹਾਂ ਤੋਂ ਉੱਭਰਨ ਦੇ ਵਿਹਾਰਕ ਤਰੀਕਿਆਂ ਬਾਰੇ ਜਾਣਕਾਰੀ ਸਾਂਝੀ ਕੀਤੀ। ਗੁੰਜਨ ਰਾਮਚੰਦਾਨੀ ਦੀ ਅਗਵਾਈ ਹੇਠ “ਨੌਕਰੀ ਮਿਲੇ ਜਾਂ ਅਣਡਿੱਠੇ ਰਹਿ ਜਾਓ—ਐਮਬੀਏ ਡਿਗਰੀਧਾਰਕ ਨੂੰ ਰੁਜ਼ਗਾਰ ਯੋਗ ਕੀ ਬਣਾਉਂਦਾ ਹੈ?” ਵਿਸ਼ੇ ’ਤੇ ਪੈਨਲ ਚਰਚਾ ਹੋਈ, ਜਿਸ ’ਚ ਰੁਜ਼ਗਾਰਦਾਤਾਵਾਂ ਦੀਆਂ ਉਮੀਦਾਂ ਅਤੇ ਪ੍ਰਬੰਧਨ ਦੇ ਵਿਦਿਆਰਥੀਆਂ ਲਈ ਲੋੜੀਂਦੇ ਹੁਨਰਾਂ ’ਤੇ ਵਿਚਾਰ ਕੀਤਾ ਗਿਆ। ਨੈਟਵੈਸਟ, ਮਾਸਟਰਕਾਰਡ, ਲੂਪਿਨ ਅਤੇ ਵੈਲਸਪਨ ਦੇ ਨੁਮਾਇੰਦਿਆਂ ਨੇ ਕਾਰਪੋਰੇਟ ਬੋਰਡਰੂਮ ਸੈਸ਼ਨ ਦੌਰਾਨ ਵਿਦਿਆਰਥੀਆਂ ਨਾਲ ਉਦਯੋਗ ਦੀਆਂ ਉਮੀਦਾਂ ਸਾਂਝੀਆਂ ਕੀਤੀਆਂ। “ਵਧਾਈ ਹੋਵੇ, ਤੁਹਾਨੂੰ ਨੌਕਰੀ ਮਿਲ ਗਈ ਹੈ” ਸੈਸ਼ਨ ਵਿਚ ਕਾਰਜ ਸਥਾਨ ਲਈ ਤਿਆਰੀ ਅਤੇ ਕੈਂਪਸ ਤੋਂ ਕਾਰਪੋਰੇਟ ਜੀਵਨ ’ਚ ਤਬਦੀਲੀ ਦੇ ਵਿਸ਼ੇ ’ਤੇ ਚਰਚਾ ਕੀਤੀ ਗਈ। ਇੱਕ ਹੋਰ ਅਹਿਮ ਸੈਸ਼ਨ “ਭਵਿੱਖ ਲਈ ਤਿਆਰ ਕਾਰਜਬਲ ਦੀ ਉਸਾਰੀ: ਅਕਾਦਮਿਕ ਸਿੱਖਿਆ ਤੇ ਉਦਯੋਗ ਵਿਚਕਾਰ ਪਾੜਾ ਪੂਰਨ ਲਈ ਯੂਨੀਵਰਸਿਟੀ ਦੇ ਪਾਠਕ੍ਰਮ ’ਚ ਏਆਈ ਨੂੰ ਸ਼ਾਮਲ ਕਰਨਾ” ਵਿਸ਼ੇ ’ਤੇ ਹੋਇਆ। ਇਸ ’ਚ ਯੂਨੀਵਰਸਿਟੀ ਦੇ ਆਗੂਆਂ, ਡੀਨ, ਡਾਇਰੈਕਟਰ ਅਤੇ ਉਦਯੋਗ ਦੇ ਨੁਮਾਇੰਦਿਆਂ ਨੇ ਅਕਾਦਮਿਕ ਪ੍ਰੋਗਰਾਮਾਂ ’ਚ ਆਰਟੀਫ਼ੀਸ਼ੀਅਲ ਇੰਟੈਲੀਜੈਂਸ ਅਤੇ ਉੱਭਰ ਰਹੀਆਂ ਤਕਨੀਕਾਂ ਨੂੰ ਸ਼ਾਮਲ ਕਰਨ ਦੇ ਤਰੀਕਿਆਂ ’ਤੇ ਵਿਚਾਰ ਕੀਤਾ। ਚਾਂਸਲਰ ਬਾਹਰਾ ਨੇ ਨਵੀਨਤਾ, ਤਜਰਬੇ-ਆਧਾਰਿਤ ਸਿੱਖਿਆ ਅਤੇ ਪ੍ਰਮੁੱਖ ਕਾਰਪੋਰੇਟ ਸੰਸਥਾਵਾਂ ਨਾਲ ਮਜ਼ਬੂਤ ਭਾਈਵਾਲੀ ਨੂੰ ਉਤਸ਼ਾਹਿਤ ਕਰਨ ਪ੍ਰਤੀ ਯੂਨੀਵਰਸਿਟੀ ਦੀ ਵਚਨਬੱਧਤਾ ਦੁਹਰਾਈ। ਕਾਨਕਲੇਵ ਦੀ ਸਮਾਪਤੀ ਅਕਾਦਮਿਕ ਅਤੇ ਉਦਯੋਗਿਕ ਖੇਤਰਾਂ ਵਿਚਕਾਰ ਨਿਰੰਤਰ ਸਹਿਯੋਗ ਰਾਹੀਂ ਵਿਦਿਆਰਥੀਆਂ ਨੂੰ ਭਵਿੱਖ ਦੀਆਂ ਪੇਸ਼ੇਵਰ ਚੁਣੌਤੀਆਂ ਲਈ ਤਿਆਰ ਕਰਨ ਦੇ ਸੰਦੇਸ਼ ਨਾਲ ਹੋਈ।