ਸਰਕਾਰ ਵਿਰੁੱਧ ਪੱਕੇ ਮੋਰਚੇ ’ਚ ਸ਼ਾਮਿਲ ਹੋਣਗੇ ਨੰਗਲ ਦੇ ਪੈਨਸ਼ਨਰ

ਕੁਲਵਿੰਦਰ ਭਾਟੀਆ, ਪੰਜਾਬੀ ਜਾਗਰਣ, ਨੰਗਲ: ਪੰਜਾਬ ਪੈਨਸ਼ਨਰ ਵੈੱਲਫੇਅਰ ਐਸ਼ੋਸ਼ੀਏਸ਼ਨ ਨੰਗਲ ਦੀ ਮਹੀਨਾਵਾਰ ਮੀਟਿੰਗ ਜਥੇਬੰਦੀ ਦੇ ਪ੍ਰਧਾਨ ਤਰਸੇਮ ਲਾਲ ਸੈਣੀ ਭਨਾਮ ਦੀ ਪ੍ਰਧਾਨਗੀ ਹੇਠ ਭੜੋਲੀਆਂ ਭਵਨ ਨੰਗਲ ’ਚ ਕੀਤੀ ਗਈ। ਮੀਟਿੰਗ ’ਚ ਪੰਜਾਬ ਸਰਕਾਰ ਦੇ ਮੁਲਾਜ਼ਮਾਂ ’ਤੇ ਪੈਨਸ਼ਨਰਾਂ ਦੀਆਂ ਮੰਗਾਂ ਸਬੰਧੀ ਸਰਕਾਰ ਦੇ ਅੜੀਅਲ ਤੇ ਬੇਸ਼ਰਮ ਵਤੀਰੇ ਦੀ ਪੁਰਜ਼ੋਰ ਨਿੰਦਾ ਕੀਤੀ ਗਈ ਤੇ ਮੀਟਿੰਗ ’ਚ ਦੱਸਿਆ ਗਿਆ ਕਿ ਸਾਡੀ ਤਾਲਮੇਲ ਕਮੇਟੀ ਵੱਲੋਂ ਚੰਡੀਗੜ੍ਹ ਵਿਖੇ ਚਾਰ ਨਵੰਬਰ ਨੂੰ ਪ੍ਰੈੱਸ ਕਾਨਫਰੰਸ ਕਰਕੇ ਪੰਜਾਬ ਸਰਕਾਰ ਦੇ ਝੂਠ ਦਾ ਪਰਦਾਫਾਸ਼ ਕੀਤਾ ਜਾਵੇਗਾ। ਤਾਲਮੇਲ ਕਮੇਟੀ ਵੱਲੋਂ 6 ਨਵੰਬਰ ਤੋਂ 19 ਨਵੰਬਰ ਤੱਕ ਦਿਨ-ਰਾਤ ਦਾ ਪੱਕਾ ਮੋਰਚਾ ਲਾਇਆ ਜਾਵੇਗਾ। ਇਸ ਮੋਰਚੇ ’ਚ 16 ਨਵੰਬਰ ਨੂੰ ਦਿਨ-ਰਾਤ ਦੇ ਧਰਨੇ ’ਚ ਨੰਗਲ ਤੋਂ ਪੈਨਸ਼ਨਰ ਸਾਥੀ ਚੰਡੀਗੜ੍ਹ ਵਿਖੇ ਇਸ ਮੋਰਚੇ ’ਚ ਆਪਣੀ ਹਾਜ਼ਰੀ ਦੇਣਗੇ ਤੇ ਹੱਕ-ਸੱਚ ਦੀ ਲੜਾਈ ’ਚ ਹਿੱਸਾ ਪਾਉਣਗੇ। ਮੀਟਿੰਗ ’ਚ ਜਥੇਬੰਦੀ ਦੇ ਸੀਨੀਅਰ ਮੀਤ ਪ੍ਰਧਾਨ ਦੇਵ ਰਾਜ ਧਾਮੀ, ਐੱਮ. ਆਈ. ਡੀ. ਕੰਸਲ, ਪ੍ਰਿੰਸੀਪਲ ਸੁਖਦੇਵ ਰਾਜ, ਜਨਰਲ ਸਕੱਤਰ ਕਸ਼ਮੀਰੀ ਲਾਲ, ਵਿੱਤ ਸਕੱਤਰ ਦੌਲਤ ਰਾਮ ਮਜਾਰੀ, ਸਟੇਜ ਸਕੱਤਰ ਹਰਦਿਆਲ ਸਿੰਘ ਪਲਾਸੀ, ਉਪ ਪ੍ਰਧਾਨ ਪ੍ਰੀਤਮ ਸਿੰਘ ਰੱਕੜ, ਹਰੀਸ਼ ਚੰਦਰ ਮਹਿਲਵਾ ,ਸ਼ਿਵ ਕੁਮਾਰ, ਰੋਸ਼ਨ ਸਿੰਘ, ਬਲਦੇਵ ਰਾਜ, ਗੰਗਾ ਪ੍ਰਸਾਦ, ਸੁਭਾਸ਼ ਚੰਦ, ਪਰਮਜੀਤ ਸਿੰਘ ਪਲਾਸੀ, ਗੁਰਦੀਪ ਸਿੰਘ ਬੇਲਾ ਨੇ ਹਿੱਸਾ ਲਿਆ।