ਮਿਸ ਲਿੰਧੀਆ ਐੱਲਐੱਨ ਨੇ ਸੰਭਾਲਿਆ ਐੱਸਡੀਐੱਮ ਮੋਰਿੰਡਾ ਦਾ ਚਾਰਜ

ਅਮਰਜੀਤ ਧੀਮਾਨ,ਪੰਜਾਬੀ ਜਾਗਰਣ,ਮੋਰਿੰਡਾ : ਪੰਜਾਬ ਸਰਕਾਰ ਵੱਲੋਂ ਕੀਤੇ ਗਏ ਪ੍ਰਸ਼ਾਸਨਿਕ ਫੇਰਬਦਲ ਤਹਿਤ ਆਈਏਐੱਸ. ਅਧਿਕਾਰੀ ਮਿਸ ਲਿੰਧੀਆ ਐੱਲਐੱਨ. ਨੇ ਉੱਪ ਮੰਡਲ ਮੈਜਿਸਟ੍ਰੇਟ (ਐੱਸ.ਡੀ.ਐੱਮ.) ਮੋਰਿੰਡਾ ਵਜੋਂ ਆਪਣਾ ਅਹੁਦਾ ਸੰਭਾਲ ਲਿਆ ਹੈ। ਅਹੁਦਾ ਸੰਭਾਲਣ ਉਪਰੰਤ ਪੱਤਰਕਾਰਾਂ ਅਤੇ ਅਧਿਕਾਰੀਆਂ ਨਾਲ ਗੱਲਬਾਤ ਕਰਦਿਆਂ ਐੱਸ.ਡੀ.ਐੱਮ. ਮਿਸ ਲਿੰਧੀਆ ਐੱਲ.ਐੱਨ. ਨੇ ਕਿਹਾ ਕਿ ਮੋਰਿੰਡਾ ਸਬ-ਡਵੀਜ਼ਨ ਦੇ ਲੋਕਾਂ ਦੀਆਂ ਮੁਸ਼ਕਿਲਾਂ ਨੂੰ ਪਹਿਲ ਦੇ ਆਧਾਰ ’ਤੇ ਹੱਲ ਕੀਤਾ ਜਾਵੇਗਾ। ਉਨ੍ਹਾਂ ਸਪੱਸ਼ਟ ਕੀਤਾ ਕਿ ਪ੍ਰਸ਼ਾਸਨ ਵੱਲੋਂ ਬਿਨਾਂ ਕਿਸੇ ਪੱਖਪਾਤ ਜਾਂ ਭੇਦਭਾਵ ਦੇ ਹਰ ਵਰਗ ਦੇ ਕੰਮ ਪਾਰਦਰਸ਼ੀ ਢੰਗ ਨਾਲ ਨੇਪਰੇ ਚਾੜ੍ਹੇ ਜਾਣਗੇ ਤੇ ਆਮ ਜਨਤਾ ਨੂੰ ਸਰਕਾਰੀ ਦਫ਼ਤਰਾਂ ’ਚ ਕੋਈ ਖੱਜਲ-ਖੁਆਰੀ ਨਹੀਂ ਹੋਣ ਦਿੱਤੀ ਜਾਵੇਗੀ। ਉਨਾਂ ਕਿਹਾ ਕਿ ਕੋਈ ਵੀ ਇਲਾਕਾ ਵਾਸੀ ਉਨਾਂ ਨੂੰ ਦਫਤਰ ਵਿਚ ਕਿਸੇ ਸਮੇਂ ਵੀ ਮਿਲਕੇ ਆਪਣੀ ਸਮੱਸਿਆ ਜਾਂ ਪ੍ਰਸ਼ਾਸਨਿਕ ਜਰੂਰਤ ਦੱਸ ਸਕਦਾ ਹੈ। ਇਸ ਮੌਕੇ ਤਹਿਸੀਲਦਾਰ ਮੋਰਿੰਡਾ ਪੁਨੀਤ ਬੰਸਲ ਦੀ ਅਗਵਾਈ ਹੇਠ ਸਮੁੱਚੇ ਪ੍ਰਸ਼ਾਸਨਿਕ ਅਤੇ ਤਹਿਸੀਲ ਸਟਾਫ਼ ਵੱਲੋਂ ਨਵ-ਨਿਯੁਕਤ ਐੱਸ.ਡੀ.ਐੱਮ. ਦਾ ਗੁਲਦਸਤੇ ਭੇਂਟ ਕਰਕੇ ਨਿੱਘਾ ਸਵਾਗਤ ਕੀਤਾ ਗਿਆ। ਦੱਸਣਯੋਗ ਹੈ ਕਿ ਇਸ ਤੋਂ ਪਹਿਲਾਂ ਮਿਸ ਲਿੰਧੀਆ ਐੱਲਐੱਨ. ਐੱਸਏਐੱਸ. ਨਗਰ (ਮੋਹਾਲੀ) ਵਿਖੇ ਓਐੱਸਡੀ. (ਸ਼ਹਿਰੀ ਵਿਕਾਸ)/ਡਿਪਟੀ ਕਮਿਸ਼ਨਰ ਦਫ਼ਤਰ ਵਿਚ ਸੇਵਾਵਾਂ ਨਿਭਾ ਰਹੇ ਸਨ। ਉਹ ਇੱਥੇ ਪਹਿਲਾਂ ਤੈਨਾਤ ਰਹੇ ਐੱਸਡੀਐੱਮ. ਚੇਤਨ ਬੰਗੜ ਦੇ ਤਬਾਦਲੇ ਤੋਂ ਬਾਅਦ ਨਿਯੁਕਤ ਹੋਏ ਹਨ। ਇਸ ਮੌਕੇ ’ਤੇ ਤਹਿਸੀਲਦਾਰ ਸ਼ਰੀਫ ਪੁਨੀਤ ਬੰਸਲ, ਸੁਪਰਡੈਂਟ ਹਰਪਾਲ ਕੌਰ, ਰੀਡਰ ਜਸਵੀਰ ਸਿੰਘ, ਅਮਨਦੀਪ ਸਿੰਘ, ਜਸਪ੍ਰੀਤ ਸਿੰਘ ਕਲਸੀ, ਸੰਦੀਪ ਕੌਰ, ਹਰਮਨ ਦੀਪ ਸਿੰਘ, ਅਲਕਾ ਰਾਣੀ ਅਤੇ ਅਰਮਨਦੀਪ ਸਿੰਘ ਹਰਮਨ ਆਦਿ ਵੀ ਸ਼ਾਮਿਲ ਸਨ।