ਹਿੰਦੀ ਅਤੇ ਸਵੱਛਤਾ ਪੰਦਰਵਾੜੇ ਦਾ ਸ਼ਾਨਦਾਰ ਸਮਾਪਤੀ ਸਮਾਰੋਹ

ਸਟਾਫ਼ ਰਿਪੋਰਟਰ, ਪੰਜਾਬੀ ਜਾਗਰਣ, ਰੂਪਨਗਰ : ਡਿਪਟੀ ਕਮਿਸ਼ਨਰੇਟ ਰੂਪਨਗਰ ਵੱਲੋਂ ਹਿੰਦੀ ਪਖਵਾੜੇ ਅਤੇ ਸਵੱਛਤਾ ਪਖਵਾੜੇ ਦੇ ਸਮਾਪਤੀ ਮੌਕੇ ਸਤਲੁਜ ਦਰਿਆ ਦੇ ਕੰਢੇ ਸਥਿਤ ਹੈੱਡਵਰਕਸ ਵਿਖੇ ਸ਼ਾਨਦਾਰ ਸਮਾਪਤੀ ਸਮਾਰੋਹ ਕਰਵਾਇਆ ਗਿਆ। ਸਮਾਰੋਹ ਵਿਚ ਸੁਗ੍ਰੀਵ ਮੀਣਾ, ਪ੍ਰਧਾਨ ਕਮਿਸ਼ਨਰ, ਸੀਜੀਐਸਟੀ ਕਮਿਸ਼ਨਰੇਟ ਲੁਧਿਆਣਾ ਨੇ ਮੁੱਖ ਮਹਿਮਾਨ ਵਜੋਂ ਸ਼ਿਰਕਤ ਕੀਤੀ, ਜਦਕਿ ਸਮ੍ਰਿਤਾ ਕੌਰ ਗਿੱਲ, ਵਧੀਕ ਕਮਿਸ਼ਨਰ, ਡਿਪਟੀ ਕਮਿਸ਼ਨਰੇਟ ਰੂਪਨਗਰ ਵਿਸ਼ੇਸ਼ ਮਹਿਮਾਨ ਵਜੋਂ ਹਾਜ਼ਰ ਰਹੇ। ਸਮਾਰੋਹ ਦੌਰਾਨ ਹਿੰਦੀ ਪੰਦਰਵਾੜੇ ਅਤੇ ਸਵੱਛਤਾ ਪੰਦਰਵਾੜੇ ਤਹਿਤ ਕਰਵਾਈਆਂ ਗਈਆਂ ਵੱਖ-ਵੱਖ ਗਤੀਵਿਧੀਆਂ ਅਤੇ ਪ੍ਰੋਗਰਾਮਾਂ ਦੀਆਂ ਪ੍ਰਾਪਤੀਆਂ ਨੂੰ ਉਜਾਗਰ ਕੀਤਾ ਗਿਆ। ਹਿੰਦੀ ਪੰਦਰਵਾੜੇ ਤਹਿਤ ਹਿੰਦੀ ਸਹੁੰ, ਟਿੱਪਣੀ ਅਤੇ ਖਰੜਾ ਲੇਖਣ, ਕਾਵਿ ਪਾਠ, ਰਾਜ ਭਾਸ਼ਾ ਪੋਸਟਰ ਨਿਰਮਾਣ, ਨਾਅਰਾ ਲੇਖਣ ਅਤੇ ਲਘੂ ਨਾਟਕਾਂ ਸਮੇਤ ਵੱਖ-ਵੱਖ ਗਤੀਵਿਧੀਆਂ ਕਰਵਾਈਆਂ ਗਈਆਂ। ਇਸ ਤੋਂ ਇਲਾਵਾ ਹਿੰਦੀ ਲੇਖ ਲੇਖਣ, ਹਿੰਦੀ ਅਨੁਵਾਦ ਅਤੇ ਹਿੰਦੀ ਆਮ ਗਿਆਨ ਮੁਕਾਬਲੇ ਵੀ ਕਰਵਾਏ ਗਏ, ਜਿਨ੍ਹਾਂ ਵਿਚ ਸਾਰੇ ਮੰਡਲਾਂ ਦੇ ਅਧਿਕਾਰੀਆਂ ਅਤੇ ਕਰਮਚਾਰੀਆਂ ਨੇ ਉਤਸ਼ਾਹ ਨਾਲ ਭਾਗ ਲਿਆ। ਮੁਕਾਬਲਿਆਂ ਦੇ ਜੇਤੂਆਂ ਨੂੰ ਪਹਿਲਾ, ਦੂਜਾ ਅਤੇ ਤੀਜਾ ਇਨਾਮ ਪ੍ਰਦਾਨ ਕੀਤਾ ਗਿਆ। ਜੇਤੂਆਂ ਨੂੰ ਕ੍ਰਮਵਾਰ 5,000 ਰੁਪਏ, 3,000 ਰੁਪਏ ਅਤੇ 2,000 ਰੁਪਏ ਦੀ ਇਨਾਮੀ ਰਾਸ਼ੀ ਸਿੱਧੇ ਉਨ੍ਹਾਂ ਦੇ ਬੈਂਕ ਖਾਤਿਆਂ ਵਿਚ ਟਰਾਂਸਫਰ ਕੀਤੀ ਜਾਵੇਗੀ। ਸਵੱਛਤਾ ਪੰਦਰਵਾੜੇ ਤਹਿਤ ਡਿਪਟੀ ਕਮਿਸ਼ਨਰੇਟ ਦੇ ਦਫਤਰ ਵਿਚ ਵਿਸ਼ੇਸ਼ ਸਫ਼ਾਈ ਮੁਹਿੰਮ ਚਲਾਈ ਗਈ। ਇਸ ਮੁਹਿੰਮ ਦੌਰਾਨ ਸਮੁੱਚੇ ਦਫਤਰ ਦੇ ਆਲੇ ਦੁਆਲੇ ਦੀ ਵੀ ਵਿਆਪਕ ਸਫ਼ਾਈ, ਵਾਧੂ ਘਾਹ ਦੀ ਕਟਾਈ ਅਤੇ ਪੁਰਾਣੇ ਤੇ ਗੈਰ-ਲੋੜੀਂਦੇ ਸਾਮਾਨ ਨੂੰ ਹਟਾਉਣ ਸਮੇਤ ਸਫ਼ਾਈ ਦੇ ਵੱਖ-ਵੱਖ ਕਾਰਜ ਕੀਤੇ ਗਏ। ਸਮਾਰੋਹ ਦੇ ਅੰਤ ਵਿਚ ਪੀਆਈਐੱਸ. ਭਾਟੀਆ, ਸਹਾਇਕ ਕਮਿਸ਼ਨਰ, ਸੀਜੀਐਸਟੀ ਰੂਪਨਗਰ ਵੱਲੋਂ ਧੰਨਵਾਦ ਮਤਾ ਪੇਸ਼ ਕੀਤਾ ਗਿਆ। ਇਹ ਸਮਾਰੋਹ ਰਾਸ਼ਟਰੀ ਗੌਰਵ, ਸਵੱਛਤਾ ਪ੍ਰਤੀ ਜਾਗਰੂਕਤਾ ਅਤੇ ਸਮੂਹਿਕ ਜ਼ਿੰਮੇਵਾਰੀ ਦੀ ਭਾਵਨਾ ਨੂੰ ਹੋਰ ਮਜ਼ਬੂਤ ਕਰਨ ਵਾਲਾ ਯਾਦਗਾਰ ਅਤੇ ਸਫ਼ਲ ਉਪਰਾਲਾ ਸਾਬਤ ਹੋਇਆ।