ਸ੍ਰੀ ਰਾਘਵ ਕਲਾ ਮੰਚ ਵੱਲੋਂ ਰਾਮਲੀਲਾ ਦਾ ਸ਼ੁਭ ਆਰੰਭ

ਪੰਜਾਬੀ ਜਾਗਰਣ ਟੀਮ, ਨੰਗਲ : ਨਵਾਂ ਨੰਗਲ ਦੇ ਸੈਕਟਰ-2 ’ਚ ਸ੍ਰੀ ਰਾਘਵ ਕਲਾ ਮੰਚ ਵੱਲੋਂ ਸ਼ਨੀਵਾਰ ਰਾਤ ਨੂੰ ਭਗਵਾਨ ਸ੍ਰੀ ਰਾਮ ਦੇ ਜੀਵਨ ਨਾਲ ਜੁੜੇ ਪ੍ਰਸੰਗਾਂ ਦੀ ਪੇਸ਼ਕਾਰੀ ਦਾ ਸ਼ੁਭ ਆਰੰਭ ਕੀਤਾ ਗਿਆ। ਇਸ ਮੌਕੇ ਰਾਵਣ-ਵੇਦਵਤੀ ਸੰਵਾਦ ਅਤੇ ਮਾਤਾ-ਪਿਤਾ ਦੇ ਭਗਤ ਸ਼੍ਰਵਣ ਕੁਮਾਰ ਦੀ ਗਾਥਾ ਦਾ ਪ੍ਰਭਾਵਸ਼ਾਲੀ ਮੰਚਨ ਕੀਤਾ ਗਿਆ। ਸੰਜੀਵ ਕੁਰਾਲੀਆ ਦੇ ਨਿਰਦੇਸ਼ਨ ਹੇਠ ਸ੍ਰੀ ਰਾਘਵ ਕਲਾ ਮੰਚ ਵੱਲੋਂ ਪਿਛਲੇ ਕਈ ਸਾਲਾਂ ਤੋਂ ਰਾਮਲੀਲਾ ਦਾ ਮੰਚਨ ਕੀਤਾ ਜਾ ਰਿਹਾ ਹੈ। ਮੰਚਨ ਦੀ ਸ਼ੁਰੂਆਤ ਮੰਚ ਦੇ ਪ੍ਰਧਾਨ ਹੇਮ ਰਾਜ ਸੈਣੀ, ਸਾਬਕਾ ਕੌਂਸਲਰ ਸ਼ਸ਼ੀ ਸੰਦਲ, ਸਤਪਾਲ ਪਾਲੀ, ਪਦਮ ਪੁਰੀ, ਧਰਮਪਾਲ ਸੈਣੀ, ਅਜੈ ਕੁਮਾਰ, ਮੰਚ ਦੇ ਉਪ ਪ੍ਰਧਾਨ ਧੀਰਜ ਵਾਲੀਆ ਅਤੇ ਸਕੱਤਰ ਸੰਦੀਪ ਰਾਣਾ ਦੀ ਮੌਜੂਦਗੀ ’ਚ ਪੰਡਿਤ ਹੰਸ ਰਾਜ ਵਸ਼ਿਸ਼ਟ ਵੱਲੋਂ ਗਣੇਸ਼ ਵੰਦਨਾ ਨਾਲ ਕੀਤੀ ਗਈ। ਮੰਚਨ ਦੌਰਾਨ ਰਾਵਣ ਦੀ ਭੂਮਿਕਾ ਨੀਰਜ, ਭਗਵਾਨ ਸ਼ਿਵ ਦੀ ਭੂਮਿਕਾ ਸੂਰਿਆਂਸ਼, ਰਾਜਾ ਦਸ਼ਰਥ ਦੀ ਭੂਮਿਕਾ ਕਮਲ ਅਤੇ ਸ਼੍ਰਵਣ ਕੁਮਾਰ ਦੀ ਭੂਮਿਕਾ ਯੁਗ ਨੇ ਨਿਭਾਈ। ਇਸ ਤੋਂ ਇਲਾਵਾ ਅਨੰਤ ਦੇਵ, ਸੁਲਭ ਰਾਣਾ, ਅਖਿਲ, ਤਰੁਣ ਪੁਰੀ, ਮੋਹਿਤ, ਤੇਜਿੰਦਰ ਅਤੇ ਵਿੱਕੀ ਸਮੇਤ ਹੋਰ ਕਲਾਕਾਰਾਂ ਨੇ ਵੀ ਮੰਚਨ ’ਚ ਅਹਿਮ ਯੋਗਦਾਨ ਪਾਇਆ। ਮੰਚ ਦੇ ਬੁਲਾਰੇ ਰਾਕੇਸ਼ ਵਰਮਾ ਨੇ ਦੱਸਿਆ ਕਿ ਰਾਮਲੀਲਾ ਦਾ ਯੂਟਿਊਬ ਰਾਹੀਂ ਲਾਈਵ ਪ੍ਰਸਾਰਣ ਵੀ ਕੀਤਾ ਜਾ ਰਿਹਾ ਹੈ, ਤਾਂ ਜੋ ਦੂਰ-ਦੁਰਾਡੇ ਬੈਠੇ ਲੋਕ ਵੀ ਇਸ ਧਾਰਮਿਕ ਅਤੇ ਸੱਭਿਆਚਾਰਕ ਸਮਾਗਮ ਦਾ ਆਨੰਦ ਮਾਣ ਸਕਣ। ਉਨ੍ਹਾਂ ਆਸ ਪ੍ਰਗਟਾਈ ਕਿ ਆਉਣ ਵਾਲੇ ਦਿਨਾਂ ’ਚ ਰਾਮਲੀਲਾ ਦੇਖਣ ਲਈ ਪਹੁੰਚਣ ਵਾਲੇ ਦਰਸ਼ਕਾਂ ਦੀ ਗਿਣਤੀ ’ਚ ਹੋਰ ਵਾਧਾ ਹੋਵੇਗਾ।