ਪੰਜਾਬੀ ਸਾਹਿਤ ਚੇਤਨਾ ਮੰਚ ਨੇ ਰੂਬਰੂ ਸਮਾਗਮ ਕਰਵਾਇਆ

ਨਰਿੰਦਰ ਮਾਹੀ, ਪੰਜਾਬੀ ਜਾਗਰਣ, ਬੰਗਾ : ਪੰਜਾਬੀ ਸਾਹਿਤ ਚੇਤਨਾ ਮੰਚ ਵੱਲੋਂ ਰੂਬਰੂ ਸਮਾਗਮ ਕਰਵਾਇਆ। ਜਿਸ ਦੀ ਪ੍ਰਧਾਨਗੀ ਡਾ. ਸੋਮਾ ਸਬਲੋਕ ਨੇ ਕੀਤੀ। ਇਸ ਸਮਾਗਮ ਵਿਚ ਗੁਰਪ੍ਰੀਤ ਸਿੰਘ ਪਸੌਰੀਆ ਨੂੰ ਦਰਸ਼ਕਾਂ ਦੇ ਰੂਬਰੂ ਕਰਵਾਇਆ ਜਿਹੜੇ ਕਿ ਇਤਿਹਾਸਕ, ਪੁਰਾਤੱਤਵ, ਵਿਰਾਸਤੀ ਇਮਾਰਤਾਂ ਬਾਰੇ ਖੋਜ ਯਾਤਰਾਵਾਂ ਕਰਦੇ ਰਹਿੰਦੇ ਹਨ। ਉਨ੍ਹਾਂ ਆਪਣੇ ਖੋਜ ਸਫ਼ਰ ਬਾਰੇ ਦਿਲਚਸਪ ਤਜਰਬੇ ਸਾਂਝੇ ਕਰਦਿਆਂ ਵੱਖ-ਵੱਖ ਸੂਬਿਆਂ ਦੇ ਰਹਿਣ-ਸਹਿਣ, ਸੁਭਾਅ, ਹਾਲਾਤ ਬਾਰੇ ਵਿਸਥਾਰ ਵਿਚ ਦੱਸਦਿਆਂ ਕਿਹਾ ਕਿ ਜਦੋਂ ਅਸੀਂ ਆਪਣੇ ਪਿੰਡ, ਸ਼ਹਿਰ ਜਾਂ ਸੂਬੇ ਤੋਂ ਬਾਹਰ ਵਿਚਰਦੇ ਹਾਂ। ਤਾਂ ਇੱਕ ਵਿਅਕਤੀ ਨਹੀਂ ਪੂਰੇ ਪਿੰਡ, ਸ਼ਹਿਰ, ਸੂਬੇ ਦੀ ਪਛਾਣ ਦਾ ਚਿਹਰਾ ਮੋਹਰਾ ਹੁੰਦੇ ਹਾਂ। ਉਨ੍ਹਾਂ ਕਿਹਾ ਕਿ ਉਹ ਮਨਮੋਹਨ ਸਿੰਘ ਬਾਵਾ ਦੇ ਸਫ਼ਰਨਾਮਿਆਂ ਤੋਂ ਪ੍ਰਭਾਵਤ ਹੋ ਕੇ ਇਹ ਖੇਤਰ ਚੁਣਿਆ ਹੈ। ਉਨ੍ਹਾਂ ਦੱਸਿਆ ਕਿ ਕਿਸੇ ਵੀ ਇਲਾਕੇ ਵਿਚ ਯਾਤਰਾ ਕਰਦੇ ਸਮੇਂ ਸਹੀ ਜਾਣਕਾਰੀ ਲੈਣ ਲਈ ਆਮ ਲੋਕਾਂ ਨੂੰ ਮਿਲਣਾ ਜ਼ਰੂਰੀ ਹੈ। ਉਨ੍ਹਾਂ ਦੱਸਿਆ ਕਿ ਹੁਣ ਤੱਕ ਦੇ ਸਫ਼ਰ ਦੌਰਾਨ ਪ੍ਰਾਪਤ ਕੀਤੀਆਂ ਜਾਣਕਾਰੀਆਂ ਅਤੇ ਨਿੱਜੀ ਤਜਰਬੇ ਕਲਮਬੱਧ ਕਰ ਰਿਹਾ ਹਾਂ। ਇਸ ਤਰ੍ਹਾਂ ਵੱਧ ਤੋਂ ਵੱਧ ਲੋਕਾਂ ਤੱਕ ਖੋਜ ਕਾਰਜ ਨੂੰ ਪਹੁੰਚਾਇਆ ਜਾਵੇਗਾ। ਉਨ੍ਹਾਂ ਵੱਲੋਂ ਸਾਥੀਆਂ ਨਾਲ ਮਿਲ ਕੇ ਘੁਮੱਕੜਨਾਮਾ‘ਰਸਾਲੇ ਦੀ ਸ਼ੁਰੂਆਤ ਵੀ ਕੀਤੀ ਹੈ। ਜਿਸ ਵਿਚ ਸੈਰ ਸਫ਼ਰ ਨਾਲ ਸੰਬੰਧਿਤ ਸਾਹਿਤ ਛਾਪਿਆ ਜਾਂਦਾ ਹੈ। ਉਨ੍ਹਾਂ ਪਿੰਡ ਪਿਪਲਾਂਤਰੀ (ਰਾਜਸਥਾਨ) ਦਾ ਵਿਸ਼ੇਸ਼ ਜ਼ਿਕਰ ਵੀ ਕੀਤਾ, ਜਿੱਥੇ ਕੁੜੀ ਪੈਦਾ ਹੋਣ ਤੇ 111 ਰੁੱਖ ਲਾਏ ਜਾਂਦੇ ਹਨ। ਜਿਸ ਦਾ ਸਿੱਟਾ ਉਹ ਪਿੰਡ ਮਾਰੂਥਲ ਵਿਚ ਨਖਲਿਸਤਾਨ ਬਣ ਚੁੱਕਾ ਹੈ। ਉਨ੍ਹਾਂ ਦੇ ਸੈਰ ਸਫ਼ਰ ਸੰਬੰਧੀ ਚਰਚਾ ਵਿਚ ਪ੍ਰਿੰ. ਹਰਭਜਨ ਸਿੰਘ ਕਰਨਾਣਾ (ਭਾਰਤ ਵਿਭੂਸ਼ਣ), ਗੁਰਦੀਪ ਸੈਣੀ, ਪ੍ਰੋ. ਹਰਜਿੰਦਰ ਗਾਖਲ, ਗੁਰਨਾਮ ਬਾਵਾ ਨਾਵਲਕਾਰ, ਪ੍ਰੋ. ਸਾਹਿਬਾਂ ਜੀਟਨ ਕੌਰ, ਲੈਕ. ਸ਼ਾਮ ਸੁੰਦਰ ਆਦਿ ਨੇ ਹਿੱਸਾ ਲਿਆ।। ਗੁਰਪ੍ਰੀਤ ਪਿਸੌਰੀਆ ਵੱਲੋਂ ਸਵਾਲਾਂ ਦੇ ਜਵਾਬ ਵੇਰਵੇ ਸਹਿਤ ਦਿੱਤੇ ਗਏ। ਸੁਰੇਸ਼ ਚੌਹਾਨ ਕਰਨਾਣਾ ਹੋਰਾਂ ਨੇ ਆਪਣੇ ਵਿਚਾਰ ਪੇਸ਼ ਕਰਦਿਆਂ ਸਭ ਨੂੰ ਸਮੇਂ ਨੂੰ ਅਹਿਮੀਅਤ ਦੇਣ ਦੀ ਅਪੀਲ ਕੀਤੀ। ਇਨ੍ਹਾਂ ਤੋਂ ਇਲਾਵਾ ਕਲਵਿੰਦਰ ਕੁੱਲਾ, ਸੁਖਦੇਵ ਗੰਢਵਾਂ, ਦੀਪ ਜਗਤਪੁਰੀ, ਮਾ. ਸੁੱਚਾ ਰਾਮ, ਅਮਰਜੀਤ ਅਮਰੀ ਪਾਲ ਕਦੀਮ, ਗੁਰਦੀਪ ਸਿੰਘ ਮੁਕੱਦਮ, ਵਿਨੇ ਸ਼ਰਮਾ, ਗਗਨ ਜੋਸ਼ੀ, ਆਨੰਦ ਬਾਲਿਆਂਵਾਲੀ, ਸੁਖਜਿੰਦਰ ਖੋਖਰ, ਗੁਰਮੀਤ ਸੇਖੂਵਾਲ, ਗਗਨ ਆਦਿ ਨੇ ਸ਼ਮੂਲੀਅਤ ਕੀਤੀ। ਇਸ ਮੌਕੇ ਸੋਢੀ ਰਾਣਾ, ਰਜਨੀ ਸ਼ਰਮਾ, ਰਣਜੀਤ ਪੋਸੀ, ਹਰਜਿੰਦਰ ਜਿੰਦੀ ਆਦਿ ਨੇ ਆਪਣੀਆਂ ਭਾਵਪੂਰਕ ਰਚਨਾਵਾਂ ਪੇਸ਼ ਕੀਤੀਆਂ। ਡਾ. ਸੋਮਾ ਸਬਲੋਕ ਨੇ ਸਮਾਗਮ ਦੀ ਸਫ਼ਲਤਾ ਲਈ ਦੂਰੋਂ-ਨੇੜਿਓ ਚੱਲ ਕੇ ਆਏ ਸਭਨਾਂ ਦਾ ਧੰਨਵਾਦ ਕੀਤਾ। ਸਮਾਗਮ ਦੀ ਸਮੁੱਚੀ ਕਾਰਵਾਈ ਇੰਜੀ. ਜਸਵੀਰ ਸਿੰਘ ਮੋਰੋਂ ਵੱਲੋਂ ਨਿਭਾਈ ਗਈ।