ਭਾਰਤ-ਯੂਕੇ ਵਪਾਰ ਸਮਝੌਤਾ ਲਾਗੂ ਹੋਣ ’ਤੇ ਕੀਤਾ ਧੰਨਵਾਦ

ਪ੍ਰਦੀਪ ਭਨੋਟ, ਪੰਜਾਬੀ ਜਾਗਰਣ, ਨਵਾਂਸ਼ਹਿਰ : ਐੱਨਆਰਆਈ ਯੂਨੀਅਨ ਦੇ ਪ੍ਰਧਾਨ ਦੇਵ ਸਿੰਘ ਥਿੰਦ ਨੇ ਹਰਿਆਣਾ ਦੇ ਮੁੱਖ ਮੰਤਰੀ ਨਾਇਬ ਸਿੰਘ ਸੈਣੀ ਨਾਲ ਮੁਲਾਕਾਤ ਦੌਰਾਨ ਦੱਸਿਆ ਕਿ ਭਾਰਤ-ਯੂਕੇ ਵਿਆਪਕ ਆਰਥਿਕ ਤੇ ਵਪਾਰ ਸਮਝੌਤਾ (ਸੀਈਟੀਏ) ਅਧਿਕਾਰਤ ਤੌਰ ਤੇ ਲਾਗੂ ਹੋ ਗਿਆ ਹੈ, ਜਿਸ ਨਾਲ ਯੂਕੇ ਨੂੰ ਨਿਰਯਾਤ ਕੀਤੇ ਜਾਣ ਵਾਲੇ ਲਗਭਗ 99 ਫੀਸਦੀ ਭਾਰਤੀ ਸਮਾਨ ਤੇ ਭਾਰਤ ਵਿਚ ਆਉਣ ਵਾਲੇ 90 ਫੀਸਦੀ ਬ੍ਰਿਟਿਸ਼ ਸਮਾਨ ਤੇ ਟੈਰਿਫ ਖਤਮ ਜਾਂ ਘਟਾਏ ਗਏ ਹਨ। ਇਸ ਇਤਿਹਾਸਕ ਸਮਝੌਤੇ ਨੇ ਭਾਰਤ ਵਿਚ ਬ੍ਰਿਟਿਸ਼ ਕਾਰਾਂ ਤੇ ਸਕਾਚ ਵਿਸਕੀ ਨੂੰ ਸਸਤਾ ਕਰ ਦਿੱਤਾ ਹੈ, ਜਦੋਂ ਕਿ ਯੂਕੇ ਨੂੰ ਭਾਰਤ ਦੇ ਟੈਕਸਟਾਈਲ, ਸਮੁੰਦਰੀ ਤੇ ਆਈਟੀ ਸੇਵਾਵਾਂ ਦੇ ਨਿਰਯਾਤ ਨੂੰ ਵਧਾ ਦਿੱਤਾ ਹੈ। ਉਨ੍ਹਾਂ ਨੇ ਮੁੱਖ ਮੰਤਰੀ ਨਾਇਬ ਸਿੰਘ ਸੈਣੀ ਨੂੰ ਚੰਡੀਗੜ੍ਹ ਵਿਖੇ ਉਨ੍ਹਾਂ ਦੇ ਦਫ਼ਤਰ ਵਿਚ ਸਮਝੌਤੇ ਤੇ ਵਧਾਈ ਦਿੱਤੀ ਤੇ ਕੇਂਦਰ ਸਰਕਾਰ ਦਾ ਦਿਲੋਂ ਧੰਨਵਾਦ ਕੀਤਾ। ਮੁੱਖ ਮੰਤਰੀ ਨਾਇਬ ਸਿੰਘ ਸੈਣੀ ਨੇ ਕਿਹਾ ਕਿ ਇਸ ਸਮਝੌਤੇ ਦੀਆਂ ਮੁੱਖ ਵਿਸ਼ੇਸ਼ਤਾਵਾਂ ਵਿਚ ਭਾਰਤੀ ਸਮਾਨ ਤੇ ਯੂਕੇ ਦੁਆਰਾ ਲਗਾਏ ਗਏ 96.8 ਫੀਸਦੀ ਟੈਰਿਫ ਨੂੰ ਤੁਰੰਤ ਖਤਮ ਕਰਨਾ ਸ਼ਾਮਲ ਹੈ। ਭਾਰਤ ਆਪਣੇ 90 ਫੀਸਦੀ ਟੈਰਿਫਾਂ ਨੂੰ ਪੜਾਅ ਵਾਰ ਖਤਮ ਕਰ ਦੇਵੇਗਾ, ਜਿਸ ਵਿਚ 64.1 ਫੀਸਦੀ ਉਤਪਾਦਾਂ ਤੇ ਤੁਰੰਤ ਕਟੌਤੀ ਸ਼ਾਮਲ ਹੈ। ਉਨ੍ਹਾਂ ਨੋਟ ਕੀਤਾ ਕਿ ਭਾਰਤ ਵਿਚ ਕਾਸਮੈਟਿਕਸ, ਮੈਡੀਕਲ ਡਿਵਾਈਸ, ਇੰਗਲਿਸ਼ ਜਿਨ ਤੇ ਆਟੋਮੋਬਾਈਲ (ਇਲੈਕਟ੍ਰਿਕ ਵਾਹਨਾਂ ਸਮੇਤ) ਵਰਗੀਆਂ ਪ੍ਰਸਿੱਧ ਯੂਕੇ ਵਸਤੂਆਂ ਸਸਤੀਆਂ ਹੋ ਗਈਆਂ ਹਨ। ਇਸ ਦੇ ਉਲਟ ਯੂਕੇ ਵਿਚ ਭਾਰਤੀ ਕੱਪੜੇ, ਜੁੱਤੇ, ਮਸਾਲੇ ਅਤੇ ਭੋਜਨ ਉਤਪਾਦ ਡਿਊਟੀ ਮੁਕਤ ਉਪਲਬਧ ਹਨ। ਮੁੱਖ ਮੰਤਰੀ ਨਾਇਬ ਸਿੰਘ ਸੈਣੀ ਨੇ ਦੱਸਿਆ ਕਿ ਇਸ ਸਮਝੌਤੇ ਦੇ ਤਹਿਤ, ਯੂਕੇ ਵਿਚ ਅਸਥਾਈ ਤੌਰ ਤੇ ਕੰਮ ਕਰਨ ਵਾਲੇ ਭਾਰਤੀ ਪੇਸ਼ੇਵਰਾਂ (60 ਮਹੀਨਿਆਂ ਤੱਕ) ਨੂੰ ਦੋਵਾਂ ਦੇਸ਼ਾਂ ਵਿਚ ਦੋਹਰੇ ਸਮਾਜਿਕ ਸੁਰੱਖਿਆ ਯੋਗਦਾਨ ਦਾ ਭੁਗਤਾਨ ਕਰਨ ਤੋਂ ਛੋਟ ਹੈ। ਇਹ ਸਮਝੌਤਾ 137 ਉਪ-ਖੇਤਰਾਂ ਨੂੰ ਕਵਰ ਕਰਦਾ ਹੈ, ਜੋ ਭਾਰਤੀ ਆਈਟੀ ਤੇ ਪੇਸ਼ੇਵਰ ਸੇਵਾਵਾਂ ਨੂੰ ਮਜ਼ਬੂਤ ਕਰੇਗਾ। ਇਹ ਸਮਝੌਤਾ ਯੂਕੇ ਸਪਲਾਇਰਾਂ ਲਈ ਭਾਰਤ ਦੇ ਕੇਂਦਰ ਸਰਕਾਰ ਦੇ ਖਰੀਦ ਬਾਜ਼ਾਰ ਨੂੰ ਵੀ ਖੋਲ੍ਹਦਾ ਹੈ। ਐੱਨਆਰਆਈ ਯੂਨੀਅਨ ਦੇ ਪ੍ਰਧਾਨ ਦੇਵ ਸਿੰਘ ਥਿੰਦ ਨੇ ਕਿਹਾ ਕਿ ਸਮਝੌਤੇ ਦੇ ਲਾਗੂ ਹੋਣ ਦੇ ਪਹਿਲੇ ਦਿਨ, ਭਾਰਤ ਤੋਂ ਬ੍ਰਿਟੇਨ ਨੂੰ 14 ਬਿਲੀਅਨ ਡਾਲਰ ਦੇ ਸਮਾਨ ਭੇਜੇ ਗਏ ਸਨ, ਜੋ ਕਿ ਬਹੁਤ ਖੁਸ਼ੀ ਦੀ ਗੱਲ ਹੈ। ਉਨ੍ਹਾਂ ਕਿਹਾ ਕਿ ਜੇਕਰ ਭਾਜਪਾ ਪੰਜਾਬ ਵਿਚ ਸਰਕਾਰ ਬਣਾਉਂਦੀ ਹੈ ਤਾਂ ਵਪਾਰ ਲਈ ਹੋਰ ਰਸਤੇ ਖੁੱਲ੍ਹਣਗੇ। ਉਨ੍ਹਾਂ ਕਿਹਾ ਕਿ ਅਜਿਹੇ ਨਵੇਂ ਵਪਾਰਕ ਮੌਕੇ ਦੇਸ਼ ਦੇ ਪ੍ਰਧਾਨ ਮੰਤਰੀ ਨਰਿੰਦਰ ਮੋਦੀ ਦੀ ਅਗਵਾਈ ਹੇਠ ਹੀ ਸੰਭਵ ਹੋ ਸਕਦੇ ਹਨ। ਇਸ ਮੌਕੇ ਨਗਰ ਕੌਂਸਲ ਬੰਗਾ ਦੇ ਕੌਂਸਲਰ ਹਿੰਮਤ ਤੇਜਪਾਲ, ਵਿੱਕੀ ਖੋਸਲਾ ਸਾਬਕਾ ਮੰਡਲ ਪ੍ਰਧਾਨ ਬੰਗਾ, ਦੀਪਕ ਸੂਦਨ ਸੀਨੀਅਰ ਆਗੂ ਭਾਜਪਾ, ਸੰਤੋਖ ਸਿੰਘ ਮੱਲੂਪੋਤਾ ਆਦਿ ਵੀ ਉਨ੍ਹਾਂ ਨਾਲ ਮੌਜੂਦ ਸਨ।