ਨਵਾਂ ਸ਼ਹਿਰ ਦੇ 13 ਸਾਲਾ ਤੇਜੇਸ਼ ਨੇ ਸਾਹਿਤ ਦੇ ਖੇਤਰ ’ਚ ਸੂਬੇ ਦਾ ਨਾਂ ਕੀਤਾ ਰੌਸ਼ਨ

ਪ੍ਰਦੀਪ ਭਨੋਟ, ਪੰਜਾਬੀ ਜਾਗਰਣ, ਨਵਾਂਸ਼ਹਿਰ ਜ਼ਿਲ੍ਹੇ ਦੀ ਵਧੀਕ ਜ਼ਿਲ੍ਹਾ ਤੇ ਸੈਸ਼ਨ ਜੱਜ (ਏਡੀਜੇ) ਡਾ. ਗਗਨਦੀਪ ਕੌਰ ਦੇ ਸਪੁੱਤਰ 13 ਸਾਲਾ ਤੇਜੇਸ਼ ਪ੍ਰਤਾਪ ਸਿੰਘ ਨੇ ਸਾਹਿਤ ਦੇ ਖੇਤਰ ’ਚ ਇਤਿਹਾਸ ਸਿਰਜਦਿਆਂ ਇੰਟਰਨੈਸ਼ਨਲ ਬੁੱਕ ਆਫ ਰਿਕਾਰਡਜ਼ ਅਤੇ ਇੰਡੀਆ ਬੁੱਕ ਆਫ ਰਿਕਾਰਡਜ਼ ਵਿਚ ਆਪਣਾ ਨਾਂ ਦਰਜ ਕਰਵਾਇਆ ਹੈ। ਕੈਂਬਰਿਜ ਇੰਟਰਨੈਸ਼ਨਲ ਸਕੂਲ ਕਰੀਹਾ ਦੀ 8ਵੀਂ ਜਮਾਤ ’ਚ ਪੜ੍ਹਦੇ ਤੇਜੇਸ਼ ਪ੍ਰਤਾਪ ਸਿੰਘ ਨੇ ਐਮਾਜ਼ਾਨ ਕਿੰਡਲ ਤੇ 8 ਪੂਰੀਆਂ ਨਾਵਲ ਲਿਖ ਕੇ ਪ੍ਰਕਾਸ਼ਿਤ ਕੀਤੇ ਹਨ। ਜਿਸ ਤੋਂ ਬਾਅਦ ਉਸ ਨੂੰ ਇਹ ਕੌਮੀ ਅਤੇ ਕੌਮਾਂਤਰੀ ਪੱਧਰ ਦੇ ਵੱਕਾਰੀ ਸਨਮਾਨ ਪ੍ਰਾਪਤ ਹੋਏ ਹਨ। ਇਸ ਪ੍ਰਾਪਤੀ ਨਾਲ ਨਵਾਂਸ਼ਹਿਰ ਹੀ ਨਹੀਂ, ਸਗੋਂ ਪੂਰੇ ਪੰਜਾਬ ਦਾ ਨਾਮ ਰੌਸ਼ਨ ਹੋਇਆ ਹੈ। ਫਿਕਸ਼ਨ, ਮਨੋਵਿਗਿਆਨ, ਸਾਇੰਸ-ਫਿਕਸ਼ਨ ਅਤੇ ਐਪੀਗ੍ਰਾਫੀ ਵਰਗੇ ਵੱਖ-ਵੱਖ ਵਿਸ਼ਿਆਂ ’ਤੇ ਲਿਖੀਆਂ ਗਈਆਂ ਉਸ ਦੀਆਂ ਕਿਤਾਬਾਂ ਉਸ ਦੀ ਉਮਰ ਤੋਂ ਕਿਤੇ ਵੱਧ ਉਤਸੁਕਤਾ, ਰਚਨਾਤਮਕਤਾ ਅਤੇ ਡੂੰਘੀ ਖੋਜ ਨੂੰ ਦਰਸਾਉਂਦੀਆਂ ਹਨ। ਗੁੰਝਲਦਾਰ ਵਿਗਿਆਨਕ ਸੰਕਲਪਾਂ, ਮਨੋਵਿਗਿਆਨਕ ਸੂਝ ਅਤੇ ਇਤਿਹਾਸਕ ਅਧਿਐਨ ਨੂੰ ਦਿਲਚਸਪ ਕਹਾਣੀਆਂ ’ਚ ਪਰੋ ਕੇ ਤੇਜੇਸ਼ ਨੇ ਵੱਖ-ਵੱਖ ਵਿਸ਼ਿਆਂ ’ਤੇ ਸਹਿਜਤਾ ਨਾਲ ਲਿਖਣ ਦੀ ਅਸਾਧਾਰਨ ਯੋਗਤਾ ਦਾ ਪ੍ਰਮਾਣ ਦਿੱਤਾ ਹੈ। ਇਹ ਰਿਕਾਰਡ ਮਾਨਤਾਵਾਂ ਨੌਜਵਾਨ ਤੇਜੇਸ਼ ਦੀ ਲੇਖਣੀ ਯਾਤਰਾ ’ਚ ਇੱਕ ਵੱਡਾ ਮੀਲ ਪੱਥਰ ਹਨ। ਕੌਮੀ ਅਤੇ ਕੌਮਾਂਤਰੀ ਦੋਵਾਂ ਰਿਕਾਰਡ ਟੀਮਾਂ ਵੱਲੋਂ ਰਿਕਾਰਡ ਦੀ ਪੁਸ਼ਟੀ ਕਰਨ ਤੋਂ ਪਹਿਲਾਂ ਉਮਰ, ਮੌਲਿਕਤਾ, ਕਿਤਾਬਾਂ ਦੀ ਗਿਣਤੀ ਅਤੇ ਪ੍ਰਕਾਸ਼ਨ ਦੇ ਸਬੂਤ ਵਰਗੇ ਵੇਰਵਿਆਂ ਦੀ ਸਖ਼ਤ ਜਾਂਚ ਕੀਤੀ ਜਾਂਦੀ ਹੈ। ਤੇਜੇਸ਼ ਦੀ ਪ੍ਰਤਿਭਾ ਸਿਰਫ਼ ਰਚਨਾਤਮਕ ਲੇਖਣ ਤੱਕ ਹੀ ਸੀਮਤ ਨਹੀਂ ਹੈ। ਰਚਨਾਤਮਕ ਸੋਚ ਅਤੇ ਤਿੱਖੀ ਵਿਸ਼ਲੇਸ਼ਣਾਤਮਕ ਯੋਗਤਾ ’ਚ ਸ਼ਾਨਦਾਰ ਸੰਤੁਲਨ ਦਿਖਾਉਂਦਿਆਂ, ਉਸ ਨੇ ਮਾਨਸਿਕ ਗਣਿਤ ਮੁਕਾਬਲਿਆਂ ’ਚ ਵੀ ਆਪਣਾ ਲੋਹਾ ਮਨਵਾਇਆ ਹੈ। ਤੇਜੇਸ਼ ਅਬੈਕਸ ਵਿਚ ਸਟੇਟ ਚੈਂਪੀਅਨ ਦਾ ਖ਼ਿਤਾਬ ਆਪਣੇ ਨਾਮ ਕਰ ਚੁੱਕਾ ਹੈ, ਇਸ ਤੋਂ ਇਲਾਵਾ ਐੱਸਆਈਪੀ ਅਬੈਕਸ ਮੁਕਾਬਲਿਆਂ ’ਚ ਨੈਸ਼ਨਲ ਫਸਟ ਰਨਰ-ਅੱਪ ਅਤੇ ਸੈਕਿੰਡ ਰਨਰ-ਅੱਪ ਵੀ ਰਹਿ ਚੁੱਕਾ ਹੈ। ਅਕਾਦਮਿਕ ਪੱਖੋਂ ਵੀ ਉਹ ਸ਼ਾਨਦਾਰ ਪ੍ਰਦਰਸ਼ਨ ਕਰ ਰਿਹਾ ਹੈ ਅਤੇ ਖੇਡਾਂ ਤੇ ਸਕੂਲੀ ਗਤੀਵਿਧੀਆਂ ਵਿਚ ਵੀ ਸਰਗਰਮੀ ਨਾਲ ਹਿੱਸਾ ਲੈਂਦਾ ਹੈ। ਤੇਜੇਸ਼ ਲਈ ਇੰਟਰਨੈਸ਼ਨਲ ਬੁੱਕ ਆਫ ਰਿਕਾਰਡਜ਼ ਅਤੇ ਇੰਡੀਆ ਬੁੱਕ ਆਫ ਰਿਕਾਰਡਜ਼ ਵਿਚ ਨਾਮ ਦਰਜ ਹੋਣਾ ਸਿਰਫ਼ ਸ਼ੁਰੂਆਤ ਹੈ। ਕਹਾਣੀਆਂ ਸੁਣਾਉਣ ਦੇ ਲਗਾਤਾਰ ਜਨੂੰਨ ਨਾਲ ਪ੍ਰੇਰਿਤ ਇਹ ਨੌਜਵਾਨ ਲੇਖਕ ਪਹਿਲਾਂ ਹੀ ਆਪਣੀ ਅਗਲੀ ਕਿਤਾਬ ਲੜੀ ਦੀ ਯੋਜਨਾ ਬਣਾ ਰਿਹਾ ਹੈ ਅਤੇ ਨਵੇਂ ਵਿਚਾਰਾਂ ਦੀ ਖੋਜ ਕਰ ਰਿਹਾ ਹੈ।