ਨਗਰ ਕੌਂਸਲ ਰਾਹੋਂ ਨੇ ਕੀਤੀ ਪਲੇਠੀ ਮੀਟਿੰਗ

ਗੌਰਵ ਗਾਬਾ, ਪੰਜਾਬੀ ਜਾਗਰਣ, ਰਾਹੋਂ : ਨਗਰ ਕੌਂਸਲ ਰਾਹੋਂ ਦੀ ਪ੍ਰਧਾਨ ਰਸ਼ਮੀ ਰਣਦੇਵ ਦੀ ਪ੍ਰਧਾਨਗੀ ਵਿਚ ਪਹਿਲੀ ਮੀਟਿੰਗ ਕੀਤੀ। ਇਸ ਮੌਕੇ ਸਾਬਕਾ ਪ੍ਰਧਾਨ ਹੇਮੰਤ ਕੁਮਾਰ ਰਣਦੇਵ ਵੀ ਵਿਸ਼ੇਸ਼ ਤੌਰ ਤੇ ਹਾਜ਼ਰ ਸਨ। ਇਸ ਮੀਟਿੰਗ ਵਿਚ ਨਗਰ ਕੌਂਸਲ ਵੱਲੋਂ ਸ਼ਹਿਰ ਦੇ ਵਿਕਾਸ ਨੂੰ ਲੈ ਕੇ ਅਤੇ ਦਫਤਰੀ ਕੰਮਾਂ ਨੂੰ ਲੈ ਕੇ ਮਤੇ ਰੱਖੇ ਗਏ। ਜਿਸ ਨੂੰ ਸਾਰੇ ਕੌਂਸਲਰਾਂ ਵੱਲੋਂ ਸਰਬਸਮਤੀ ਨਾਲ ਪਾਸ ਕਰ ਦਿੱਤਾ। ਇਸ ਮੌਕੇ ਸਾਰੇ ਕੌਂਸਲਰਾਂ ਨੇ ਸਰਵਸੰਮਤੀ ਨਾਲ ਮਤਾ ਪਾਸ ਕਰਕੇ ਅੱਡਾ ਫੀਸ ਦਾ ਕੰਮ ਠੇਕੇ ਦੇ ਦੇਣ ਦਾ ਮਤਾ ਪਾਸ ਕੀਤਾ। ਨਗਰ ਕੌਂਸਲ ਦੀ ਘੱਟੀ ਆਮਦਨ ਨੂੰ ਦੇਖਦਿਆਂ ਸਰਕਾਰ ਤੋਂ ਵੈਟ ਦੀ ਰਕਮ ਨੂੰ ਵਧਾ ਕੇ ਭੇਜਣ ਦੀ ਮੰਗ ਕੀਤੀ। ਤਾਂ ਜੋ ਬਾਕੀ ਕਰਮਚਾਰੀਆਂ ਨੂੰ ਵੀ ਇਸ ਦਾ ਲਾਭ ਮਿਲ ਸਕੇ। ਜ਼ਿਕਰਯੋਗ ਹੈ ਕਿ ਨਵਾਂਸ਼ਹਿਰ ਨਗਰ ਕੌਂਸਲ ਨੂੰ ਸਰਕਾਰ ਵੱਲੋਂ ਦਿੱਤੀ ਜਾ ਰਹੀ ਵੈਟ ਦੀ ਰਾਸ਼ੀ 45 ਲੱਖ ਦੇ ਕਰੀਬ ਹੈ। ਜਦਕਿ ਰਾਹੋਂ ਨਗਰ ਕੌਂਸਲ ਨੂੰ ਵੈਟ ਦੀ ਰਾਸ਼ੀ ਇਕ ਮਹੀਨੇ ਦੀ 4 ਲੱਖ ਦੇ ਕਰੀਬ ਮਿਲਦੀ ਹੈ। ਜਿਸ ਵਿੱਚੋਂ 3 ਲੱਖ ਰੁਪਇਆ ਡਾਇਰੈਕਟਰ ਦਫਤਰ ਵੱਲੋਂ ਕਿਸਤਾਂ ਦਾ ਕੱਟ ਲਿਆ ਜਾਂਦਾ ਹੈ ਅਤੇ ਇਕ ਲੱਖ ਰੁਪਏ ਹੀ ਮਹੀਨੇ ਦਾ ਵੈਟ ਨਗਰ ਕੌਂਸਲ ਰਾਹੋ ਨੂੰ ਮਿਲਦਾ ਹੈ। ਸਰਕਾਰ ਨੂੰ ਬੇਨਤੀ ਕੀਤੀ ਕਿ ਰਾਹੋਂ ਦੀ ਆਬਾਦੀ ਨੂੰ ਦੇਖਦਿਆਂ ਰਾਹੋਂ ਦੀ ਵੈਟ ਦੀ ਰਾਸ਼ੀ 15 ਤੋਂ 18 ਲੱਖ ਰੁਪਏ ਬਣਦੀ ਹੈ। ਜਿਸ ਨੂੰ ਪੂਰਾ ਭੇਜਿਆ ਜਾਵੇ ਤਾਂ ਜੋ ਮੁਲਾਜ਼ਮਾਂ ਦੇ ਡਿਊਜ ਅਤੇ ਸੈਲਰੀਆਂ ਦਾ ਖਰਚਾ ਕੱਢਿਆ ਜਾ ਸਕੇ। ਪ੍ਰਧਾਨ ਰਸ਼ਮੀ ਰਣਦੇਵ ਨੇ ਕਿਹਾ ਕਿ ਵਿਧਾਇਕ ਨਛੱਤਰ ਪਾਲ ਨਾਲ ਮਿਲ ਕੇ ਸਰਕਾਰ ਦੇ ਅੱਗੇ ਵੈਟ ਦੀ ਰਾਸ਼ੀ ਵਧਾਉਣ ਦਾ ਇਹ ਮੁੱਦਾ ਚੁੱਕਾਂਗੇ। ਇਸ ਮੌਕੇ ਪ੍ਰਧਾਨ ਰਸ਼ਮੀ ਰੰਦੇਵ ਨੇ ਸ਼ਹਿਰ ਦੀ ਸਫਾਈ ਨੂੰ ਲੈ ਕੇ ਸਫਾਈ ਕਰਮਚਾਰੀਆਂ ਅਤੇ ਸ਼ਹਿਰ ਦੀਆਂ ਲਾਈਟਾਂ ਦਾ ਪ੍ਰਬੰਧ ਵਧੀਆ ਤਰੀਕੇ ਨਾਲ ਕਰਨ ਵਾਸਤੇ ਮੁਲਾਜ਼ਮਾਂ ਨੂੰ ਵਿਸ਼ੇਸ਼ ਹਦਾਇਤਾਂ ਵੀ ਜਾਰੀ ਕੀਤੀਆਂ। ਜਿਸ ਦਾ ਸਾਰਾ ਫੀਡਬੈਕ ਉਹ ਖੁਦ ਲੈਣਗੇ ਅਤੇ ਉਨ੍ਹਾਂ ਕਿਹਾ ਕਿ ਲੋਕਾਂ ਦੀਆਂ ਸਮੱਸਿਆਵਾਂ ਨੂੰ ਹੱਲ ਕਰਵਾਉਣ ਵਾਸਤੇ ਨਗਰ ਕੌਂਸਲ ਦਫਤਰ ਵੱਲੋਂ ਇੱਕ ਟੋਲ ਫਰੀ ਨੰਬਰ ਵੀ ਜਲਦੀ ਜਾਰੀ ਕੀਤਾ ਜਾਵੇਗਾ ਅਤੇ ਲੋਕਾਂ ਦੀਆਂ ਸਮੱਸਿਆਵਾਂ ਦਾ ਹੱਲ ਪਹਿਲ ਦੇ ਆਧਾਰ ਤੇ ਕੀਤਾ ਜਾਵੇਗਾ। ਉਨ੍ਹਾਂ ਕਿਹਾ ਕਿ ਸ਼ਹਿਰ ਵਾਸੀ ਜੋ ਵੀ ਨਗਰ ਕੌਂਸਲ ਵਿਚ ਆਪਣਾ ਕੰਮ ਕਰਵਾਉਣ ਆਉਂਦਾ ਹੈ। ਉਸ ਦਾ ਕੰਮ ਪਹਿਲ ਦੇ ਆਧਾਰ ਤੇ ਕੀਤਾ ਜਾਵੇ। ਤਾਂ ਜੋ ਲੋਕਾਂ ਨੂੰ ਕਿਸੇ ਵੀ ਕਿਸਮ ਦੀ ਪਰੇਸ਼ਾਨੀ ਦਾ ਸਾਹਮਣਾ ਨਾ ਕਰਨਾ ਪਵੇ। ਇਸ ਮੌਕੇ ਕਾਰਜ ਸਾਧਕ ਅਫਸਰ ਮਨੀਸ਼ ਕੁਮਾਰ, ਵਾਈਸ ਪ੍ਰਧਾਨ ਮੋਹਨ ਲਾਲ, ਕੌਂਸਲਰ ਊਸ਼ਾ ਰਾਣੀ, ਦਵਿੰਦਰ ਕੁਮਾਰ ਜਾਂਗੜਾ, ਬਿਮਲ ਕੁਮਾਰ, ਹਰਦੀਪ ਕੌਰ, ਐਡਵੋਕੇਟ ਰਣਧੀਰ ਸਿੰਘ, ਸਿਮਰਨਜੋਤ ਕੌਰ ਭਾਰਤੀ, ਮਹਿੰਦਰ ਸਿੰਘ, ਜਸਵਿੰਦਰ ਚੋਪੜਾ, ਦਵਿੰਦਰ ਕੌਰ, ਮਨਜੀਤ ਲਾਲ, ਅਧਿਕਾਰੀ ਰਾਜੀਵ ਵਸ਼ਿਸ਼ਟ, ਸੈਨੇਟਰੀ ਇੰਸਪੈਕਟਰ ਪ੍ਰੀਤਮ ਸਿੰਘ, ਲੇਖਾਕਾਰ ਸਤਨਾਮ ਸਿੰਘ, ਜਗਦੀਪ ਸਿੰਘ, ਰਵਿੰਦਰ ਸਿੰਘ, ਬਲਵੀਰ ਕੌਰ, ਰਘਵਿੰਦਰ ਸਿੰਘ, ਰਿੰਪਲ ਮੱਟੂ, ਸ਼ਮਿੰਦਰ ਦਾਸ, ਰਾਕੇਸ਼ ਕੁਮਾਰ, ਮਨਜੀਤ ਕੌਰ ਆਦਿ ਹਾਜ਼ਰ ਸਨ।