ਨਵਾਂਸ਼ਹਿਰ ’ਚ ਰੱਖੜੀ ਦੇ ਤਿਉਹਾਰ ਮੌਕੇ ਬਾਜ਼ਾਰ ਹੋਏ ਗੁਲਜ਼ਾਰ

- ਰੱਖੜੀ ਬੰਨ੍ਹਣ ਦਾ ਸ਼ੁੱਭ ਮੁਹੂਰਤ ਸਵੇਰੇ 5:57 ਵਜੇ ਤੋਂ 9:48 ਤੱਕ

ਪ੍ਰਦੀਪ ਭਨੋਟ, ਪੰਜਾਬੀ ਜਾਗਰਣ

ਨਵਾਂਸ਼ਹਿਰ : ਨਵਾਂਸ਼ਹਿਰ ਦੇ ਬਾਜ਼ਾਰਾਂ ਵਿਚ ਭੈਣ-ਭਰਾ ਦੇ ਅਤੁੱਟ ਪਿਆਰ ਅਤੇ ਵਿਸ਼ਵਾਸ ਦੇ ਪ੍ਰਤੀਕ ਰੱਖੜੀ ਦੇ ਤਿਉਹਾਰ ਨੂੰ ਲੈ ਕੇ ਭਾਰੀ ਰੌਣਕ ਦੇਖਣ ਨੂੰ ਮਿਲ ਰਹੀ ਹੈ। ਨਵਾਂਸ਼ਹਿਰ ਦੇ ਮੁੱਖ ਬਾਜ਼ਾਰਾਂ, ਗਲੀਆਂ ਅਤੇ ਚੌਕ-ਚੌਰਾਹਿਆਂ 'ਤੇ ਰੱਖੜੀਆਂ ਦੇ ਸਟਾਲ ਸਵੇਰ ਤੋਂ ਹੀ ਲਗਣੇ ਸ਼ੁਰੂ ਹੋ ਜਾਂਦੇ ਹਨ। ਇਸੇ ਤਰ੍ਹਾਂ ਦੁਕਾਨਾਂ ’ਤੇ ਮਠਿਆਈ ਅਤੇ ਗਿਫ਼ਟ ਨਾਲ ਬਾਜ਼ਾਰ ਸਜੇ ਹੋਏ ਹਨ। ਇਸ ਵਾਰ ਬਾਜ਼ਾਰ ’ਚ ਰਵਾਇਤੀ ਰੱਖੜੀਆਂ ਦੇ ਨਾਲ-ਨਾਲ ਲਾਈਟਿੰਗ ਸੈਂਸਰ, ਕੁੰਦਨ ਸਟੋਨ, ਸਿਲਵਰ ਪਾਲਿਸ਼, ਬ੍ਰੈਸਲੇਟ ਅਤੇ ਭਰਾ-ਭਾਬੀ ਸਪੈਸ਼ਲ ਰੱਖੜੀਆਂ ਆਕਰਸ਼ਣ ਦਾ ਕੇਂਦਰ ਬਣੀਆਂ ਹੋਈਆਂ ਹਨ। ਜਦਕਿ ਭਰਾ-ਭਾਬੀ ਗਿਫ਼ਟ ਬਾਕਸ ਵੀ ਖ਼ਰੀਦਦਾਰਾਂ ਨੂੰ ਲੁਭਾ ਰਹੇ ਹਨ। ਇਸ ਤੋਂ ਇਲਾਵਾ ਪਾਰਸ, ਸ਼੍ਰੀਜੀ, ਸੈਲੀਬ੍ਰੇਸ਼ਨ, ਰਿਸ਼ਤਾ ਰੱਖੜੀ, ਨਕਸ ਰੱਖੜੀ ਅਤੇ ਭਾਬੀ ਦਾ ਲੂੰਬਾ ਵਰਗੀਆਂ ਕਈ ਆਕਰਸ਼ਕ ਵਰਾਇਟੀਆਂ ਵੀ ਬਾਜ਼ਾਰ ’ਚ ਮੌਜੂਦ ਹਨ। ਸਨੇਹੀ ਮੰਦਰ ਦੇ ਪੰਡਤ ਅੰਬਾ ਦੱਤ ਅਨੁਸਾਰ ਰੱਖੜੀ ’ਤੇ ਰੱਖੜੀ ਬੰਨ੍ਹਣ ਦਾ ਸ਼ੁੱਭ ਮੁਹੂਰਤ ਸਵੇਰੇ 5:57 ਵਜੇ ਤੋਂ 9:48 ਤੱਕ ਦਾ ਸਮਾਂ ਬਹੁਤ ਸ਼ੁਭ ਰਹੇਗਾ ਪਰ ਦਿਨ ਭਰ ਰੱਖੜੀ ਦਾ ਤਿਉਹਾਰ ਬਿਨਾਂ ਕਿਸੇ ਝਿਜਕ ਦੇ ਮਨਾਇਆ ਜਾਵੇਗਾ। ਇਸ ਦੌਰਾਨ ਭੈਣਾਂ ਆਪਣੇ ਭਰਾ ਦੇ ਗੁੱਟ ਤੇ ਰੱਖੜੀ ਬੰਨ੍ਹ ਕੇ ਉਸ ਦੀ ਲੰਮੀ ਉਮਰ ਦੀ ਕਾਮਨਾ ਕਰ ਸਕਦੀਆਂ ਹਨ ਅਤੇ ਭਰਾ ਜੀਵਨ ਭਰ ਉਸ ਦੀ ਰੱਖਿਆ ਦਾ ਸੰਕਲਪ ਲਵੇਗਾ। ਅਜਿਹੇ ’ਚ ਰੱਖੜੀ ਤੇ ਮਠਿਆਈਆਂ ਅਤੇ ਗਿਫਟ ਪੈਕ ਖਰੀਦਣ ਦਾ ਬਜਟ ਪਿਛਲੇ ਸਾਲ ਦੇ ਮੁਕਾਬਲੇ ਵਧਣ ਦੀ ਉਮੀਦ ਹੈ। ਪਰ ਖੰਡ ਅਤੇ ਸੁੱਕੇ ਮੇਵੇ ਦੀਆਂ ਵਧੀਆਂ ਕੀਮਤਾਂ ਦਾ ਸਭ ਤੋਂ ਵੱਧ ਅਸਰ ਦੇਖਣ ਨੂੰ ਮਿਲ ਰਿਹਾ ਹੈ। ਮਠਿਆਈਆਂ ਵਿੱਚ ਵਰਤੇ ਜਾਣ ਵਾਲੇ ਕਾਜੂ, ਬਦਾਮ, ਪਿਸਤਾ ਅਤੇ ਹੋਰ ਸੁੱਕੇ ਮੇਵੇ ਦੀ ਕੀਮਤ ਵਧਣ ਕਾਰਨ ਪ੍ਰੀਮੀਅਮ ਮਠਿਆਈਆਂ ਦੀ ਕੀਮਤ ਵਧ ਗਈ ਹੈ। ਇਸ ਦੇ ਨਾਲ ਹੀ ਵੇਸਣ ਅਤੇ ਚੀਨੀ ਦੇ ਨਾਲ-ਨਾਲ ਦੇਸੀ ਘਿਓ ਦੀਆਂ ਕੀਮਤਾਂ ਵਧਣ ਕਾਰਨ ਰਵਾਇਤੀ ਮਠਿਆਈਆਂ ਦੇ ਉਤਪਾਦਨ ਤੇ ਵੀ ਸਿੱਧਾ ਅਸਰ ਪਿਆ ਹੈ। ਰੱਖੜੀ ਦੇ ਦੌਰਾਨ ਬਾਜ਼ਾਰ ’ਚ ਚੰਗੀ ਮੰਗ ਰਹੇਗੀ। ਹਾਲਾਂਕਿ, ਮਹਿੰਗਾਈ ਦੇ ਕਾਰਨ, ਗਾਹਕ ਮਠਿਆਈਆਂ ਦੀ ਮਾਤਰਾ ਅਤੇ ਗਿਫਟ ਪੈਕ ਲਈ ਬਜਟ ਦਾ ਫੈਸਲਾ ਕਰਦੇ ਸਮੇਂ ਕੀਮਤ ਨੂੰ ਪਹਿਲਾਂ ਨਾਲੋਂ ਜ਼ਿਆਦਾ ਮਹੱਤਵ ਦੇ ਸਕਦੇ ਹਨ। ਅਜਿਹੇ ’ਚ ਇਸ ਵਾਰ ਰੱਖੜੀ ਦਾ ਤਿਉਹਾਰ ਭਰਾ-ਭੈਣ ਦੇ ਰਿਸ਼ਤੇ ’ਚ ਮਿਠਾਸ ਦੇ ਨਾਲ-ਨਾਲ ਪਰਿਵਾਰਾਂ ਦੇ ਬਜਟ ’ਤੇ ਵੀ ਵਾਧੂ ਬੋਝ ਪਾ ਸਕਦਾ ਹੈ।

- ਕੱਚੇ ਮਾਲ ਦੀਆਂ ਕੀਮਤਾਂ ਵਿਚ ਵਾਧੇ ਕਾਰਨ ਮਠਿਆਈਆਂ ਮਹਿੰਗੀ ਹੋਣਗੀਆਂ

ਆਰਕੇ ਸਵੀਟਸ ਸ਼ਾਪ ਦੇ ਮਾਲਕ ਕੁਮਾਰ ਹਿਤੇਸ਼ ਨੇ ਦੱਸਿਆ ਕਿ ਕੱਚੇ ਮਾਲ ਦੀਆਂ ਕੀਮਤਾਂ ਵਿੱਚ ਅਚਾਨਕ ਵਾਧਾ ਹੋਣ ਕਾਰਨ ਮਠਿਆਈਆਂ ਦੀਆਂ ਕੀਮਤਾਂ ਵਧਾਉਣ ਤੋਂ ਇਲਾਵਾ ਕੋਈ ਚਾਰਾ ਨਹੀਂ ਬਚਿਆ ਹੈ। ਮਠਿਆਈਆਂ ਦੀਆਂ ਕੀਮਤਾਂ ਵਿਚ 20 ਤੋਂ 30 ਰੁਪਏ ਦਾ ਵਾਧਾ ਕੀਤਾ ਹੈ, ਜੋ ਕਿ ਔਸਤਨ ਚਾਰ ਤੋਂ ਪੰਜ ਫੀਸਦੀ ਦੇ ਕਰੀਬ ਹੈ। ਉਨ੍ਹਾਂ ਕਿਹਾ ਕਿ ਕੱਚੇ ਮਾਲ ਦੀ ਕੀਮਤ ਕੁਝ ਦਿਨਾਂ ਵਿਚ ਕਾਫੀ ਵਧ ਗਈ ਹੈ। ਤਿਉਹਾਰੀ ਸੀਜ਼ਨ ਦੌਰਾਨ ਕੀਮਤਾਂ ਤੇ ਇਸ ਦਾ ਅਸਰ ਪੈਣਾ ਸੁਭਾਵਿਕ ਹੈ। ਉਨ੍ਹਾਂ ਕਿਹਾ ਕਿ ਆਨਲਾਈਨ ਸ਼ਾਪਿੰਗ ਅਤੇ ਵਧਦੀ ਮਹਿੰਗਾਈ ਦਾ ਅਸਰ ਸਥਾਨਕ ਕਾਰੋਬਾਰ 'ਤੇ ਸਾਫ਼ ਦਿਖਾਈ ਦੇ ਰਹਾ ਹੈ।

- ਮਠਿਆਈਆਂ ਦੇ ਨਾਲ ਬੇਕਰੀ ਉਤਪਾਦ ਵੀ ਹੋਣਗੇ ਮਹਿੰਗੇ

ਲਾਲ ਸੰਨਜ਼ ਸਵੀਟਸ ਸ਼ਾਪ ਦੇ ਮਾਲਕ ਦੀਪਕ ਅਰੋੜਾ ਅਤੇ ਸੌਰਵ ਅਰੋੜਾ ਦੱਸਿਆ ਕਿ ਮਠਿਆਈਆਂ ਦੇ ਨਾਲ ਨਾਲ ਬੇਕਰੀ ਉਤਪਾਦ ਤਿਆਰ ਕਰਨ ਵਿੱਚ ਵਰਤੇ ਜਾਣ ਵਾਲੇ ਕੱਚੇ ਮਾਲ ਦੀ ਕੀਮਤ ਵਿਚ ਕਾਫੀ ਵਾਧਾ ਹੋਇਆ ਹੈ। ਇਸ ਨਾਲ ਉਤਪਾਦਾਂ ਦੀਆਂ ਕੀਮਤਾਂ ਤੇ ਅਸਰ ਪਿਆ ਹੈ ਅਤੇ ਕੀਮਤਾਂ ਚ ਕਰੀਬ 10 ਫ਼ੀਸਦੀ ਦਾ ਵਾਧਾ ਹੋਇਆ ਹੈ। ਉਨ੍ਹਾਂ ਕਿਹਾ ਕਿ ਸਾਰੀ ਵਧੀ ਹੋਈ ਲਾਗਤ ਗਾਹਕਾਂ ਨੂੰ ਨਹੀਂ ਦਿੱਤੀ ਗਈ। ਕਾਰੋਬਾਰੀਆਂ ਨੇ ਵੀ ਆਪਣੇ ਪਾਸੇ ਤੋਂ ਕੁਝ ਬੋਝ ਚੁੱਕਣ ਦੀ ਕੋਸ਼ਿਸ਼ ਕੀਤੀ ਹੈ। ਉਮੀਦ ਹੈ ਕਿ ਆਉਣ ਵਾਲੇ ਦਿਨਾਂ ਚ ਕੱਚੇ ਮਾਲ ਦੀਆਂ ਕੀਮਤਾਂ ਸਥਿਰ ਰਹਿਣਗੀਆਂ। ਉਨ੍ਹਾਂ ਕਿਹਾ ਕਿ ਇਸ ਸਮੇਂ ਸਭ ਤੋਂ ਵੱਧ ਮਹਿੰਗਾਈ ਖੰਡ ਅਤੇ ਸੁੱਕੇ ਮੇਵੇ ਵਿੱਚ ਦੇਖਣ ਨੂੰ ਮਿਲ ਰਹੀ ਹੈ। ਹਾਲਾਂਕਿ ਉਨ੍ਹਾਂ ਨੂੰ ਉਮੀਦ ਹੈ ਕਿ ਤਿਉਹਾਰ ਨੇੜੇ ਆਉਂਦੇ ਹੀ ਖਰੀਦਦਾਰੀ ’ਚ ਤੇਜ਼ੀ ਆਵੇਗੀ।