ਸ਼੍ਰੀਆਂਸ ਪੇਪਰ ਮਿੱਲ ਬਣਾ ਦੇ ਵਰਕਰਾਂ ਨੇ ਕੀਤੀ ਚਰਚਾ

ਸੁਖਦੇਵ ਸਿੰਘ ਪਨੇਸਰ, ਪੰਜਾਬੀ ਜਾਗਰਣ, ਕਾਠਗੜ੍ਹ : ਸ਼੍ਰੀਆਂਸ ਪੇਪਰ ਮਿਲ ਬਣਾ ਦੇ ਵਰਕਰਾਂ ਦੀ ਇੱਕ ਅਹਿਮ ਮੀਟਿੰਗ ਪ੍ਰਧਾਨ ਸੁਖਦੇਵ ਕਸਾਨਾ ਦੀ ਪ੍ਰਧਾਨਗੀ ਹੇਠ ਹੋਈ। ਮੀਟਿੰਗ ਵਿਚ ਪ੍ਰਧਾਨ ਸੁਖਦੇਵ ਕਸਾਣਾ ਅਤੇ ਜਨਰਲ ਸਕੱਤਰ ਹਰੇ ਰਾਮ ਯਾਦਵ ਨੇ ਸਾਂਝੇ ਤੌਰ ’ਤੇ ਜਥੇਬੰਦੀ ਵਰਕਰਾਂ ਨੂੰ 6 ਸਤੰਬਰ ਨੂੰ ਜਲੰਧਰ ਵਿਖੇ ਸੀਟੂ ਵੱਲੋਂ ਕਰਵਾਈ ਜਾ ਰਹੀ ਵਿਸ਼ਾਲ ਕਨਵੈਂਸ਼ਨ ਵਿਚ ਸ਼ਾਮਲ ਹੋਣ ਦਾ ਮਤਾ ਪਾਸ ਕੀਤਾ। ਉਨ੍ਹਾਂ ਕਿਹਾ ਕਿ ਠੇਕੇਦਾਰੀ ਸਿਸਟਮ ਅਤੇ ਨਿੱਜੀਕਰਨ ਦੀ ਨੀਤੀਆਂ ਖ਼ਿਲਾਫ਼ ਘੱਟੋ ਘੱਟ ਉਜਰਤ ਦੇ ਵਾਧੇ ਲਈ, ਮਹਿੰਗਾਈ ਭੱਤਾ ਰਿਲੀਜ਼ ਕਰਵਾਉਣ ਲਈ, ਕੱਚੇ ਮੁਲਾਜ਼ਮਾਂ ਨੂੰ ਪੱਕੇ ਕਰਵਾਉਣ ਲਈ, ਸਮੂਹ ਦਿਹਾੜੀਦਾਰ ਵਰਕਰ ਤੇ ਈਐੱਸਆਈ ਲਾਗੂ ਕਰਵਾਉਣ ਲਈ ਅਤੇ ਪਿਛਲੇ ਦਿਨੀਂ ਸ਼੍ਰੀਆਂਸ ਪੇਪਰ ਮਿੱਲ ਦੀ ਮੈਨੇਜਮੈਂਟ ਵਲੋਂ ਬਿਨਾਂ ਕਿਸੇ ਕਾਰਨ 6 ਦਿਨ ਲਈ ਫੈਕਟਰੀ ਬੰਦ ਕਰ ਕੇ ਵਰਕਰਾਂ ਦੀਆਂ ਤਨਖਾਹਾਂ ਤੇ ਰੋਕ ਲਗਾਉਣ ਤੇ ਫੈਕਟਰੀ ਮੈਨੇਜਮੈਂਟ ਦੇ ਵਤੀਰੇ ਖ਼ਿਲਾਫ਼ ਯੂਨੀਅਨ ਲਗਾਤਾਰ ਸੰਘਰਸ਼ ਕਰ ਰਹੀ ਹੈ। ਜਿਸ ਦਾ ਸਬੂਤ ਪਿਛਲੇ ਦਿਨੀਂ 26 ਅਗਸਤ ਨੂੰ ਯੂਨੀਅਨ ਦੀਆਂ ਚੋਣਾਂ ਵਿੱਚ ਭਾਰੀ ਗਿਣਤੀ ਵਿੱਚ ਸਮਰਥਨ ਦੇ ਕੇ ਕੀਤੇ ਕੰਮਾਂ ਤੇ ਪ੍ਰਾਪਤੀਆਂ ’ਤੇ ਮੋਹਰ ਲਗਾ ਦਿੱਤੀ। ਆਗੂਆਂ ਨੇ ਕਿਹਾ ਕਿ ਪੇਪਰ ਮਿੱਲ ਬਣਾ ਦੀ ਵਰਕਰ ਯੂਨੀਅਨ ਸਟੇਟ ਕਮੇਟੀ ਸੀਟੂ ਦੇ ਨਿਰਦੇਸ਼ਾਂ ਮੁਤਾਬਿਕ ਹੀ ਕੰਮ ਕਰ ਰਹੀ ਹੈ। ਇਹੇ ਕਾਰਨ ਹੈ ਕਿ ਹਰ ਸੰਘਰਸ਼ ਦੇ ਬਾਅਦ ਜਥੇਬੰਦੀ ਦੀ ਜਿੱਤ ਹੋਈ। ਸਾਥੀ ਸੁਖਦੇਵ ਸਿੰਘ ਪ੍ਰਧਾਨ ਅਤੇ ਹਰੇ ਰਾਮ ਯਾਦਵ ਜਨਰਲ ਸੈਕਟਰੀ ਨੇ ਕਿਹਾ ਕਿ ਸੀਟੂ ਪੰਜਾਬ ਕਮੇਟੀ ਵੱਲੋਂ ਕੇਂਦਰ ਸਰਕਾਰ ਅਤੇ ਪੰਜਾਬ ਦੀ ਭਗਵੰਤ ਸਿੰਘ ਮਾਨ ਸਰਕਾਰ ਦੀਆਂ ਮਜ਼ਦੂਰ, ਕਿਸਾਨ, ਮੁਲਾਜ਼ਮ, ਵਿਦਿਆਰਥੀ, ਮਿਹਨਤ ਕਸ਼, ਲੋਕ ਵਿਰੋਧੀ ਨੀਤੀਆਂ ਖ਼ਿਲਾਫ਼ ਸੰਘਰਸ਼ ਕਰ ਕੇ ਪ੍ਰਾਪਤ ਕੀਤੀਆਂ ਮੰਗਾਂ ਨੂੰ ਖੋਰਾ ਲਗਾਉਣਾ ਅਤੇ 29 ਲੇਬਰ ਕਾਨੂੰਨਾਂ ਨੂੰ ਬਦਲ ਕੇ ਚਾਰ ਲੇਬਰ ਕੋਡ ਬਣਾਉਣ ਖ਼ਿਲਾਫ਼ ਅਤੇ ਕਾਰਪੋਰੇਟ ਘਰਾਣਿਆਂ ਦੀ ਲੁੱਟਦਾ ਰਾਹ ਪੱਧਰਾ ਕਰਨ ਲਈ 8 ਘੰਟੇ ਤੋਂ 12 ਘੰਟੇ ਕੰਮ ਕਰਨ ਖ਼ਿਲਾਫ਼, ਵੱਧ ਰਹੀ ਮਹਿੰਗਾਈ ਨੂੰ ਨੱਥ ਪਾਉਣ ਲਈ ਸੀਟੂ ਵੱਲੋਂ ਕੀਤੀ ਜਾ ਰਹੀ 6 ਸਤੰਬਰ ਦੀ ਵਿਸ਼ਾਲ ਕਨਵੈਂਸ਼ਨ ਵਿਚ ਜਲੰਧਰ ਵਿਖੇ ਦੇਸ਼ ਭਗਤ ਯਾਦਗਾਰ ਹਾਲ ਵਿਚ ਭਾਰੀ ਗਿਣਤੀ ਵਿੱਚ ਪਹੁੰਚਣਾ ਜਰੂਰੀ ਹੈ। ਵਰਕਰਾਂ ਨੇ ਦੋਵੇਂ ਹੱਥ ਖੜ੍ਹੇ ਕਰ ਕੇ ਕਨਵੈਂਸ਼ਨ ਵਿਚ ਪਹੁੰਚਣ ਦਾ ਫੈਸਲਾ ਕੀਤਾ। ਅਖੀਰ ਵਿੱਚ ਸਾਥੀ ਪ੍ਰਧਾਨ ਸੁਖਦੇਵ ਸਿੰਘ ਨੇ ਸਾਰੇ ਸਾਥੀਆਂ ਦਾ ਧੰਨਵਾਦ ਕੀਤਾ।